Pathian Duhzâwng Mizia Diamond Aia Hlu Zâwk Chu

Armenia rama baptisma la chang lo thuchhuahtu Haykanush-i chuan a in bulah passport lehkha pawimawh a chhar a. Passport kârah chuan debit card ṭhenkhat leh pawisa ṭhahnem tâwk tak a awm a. A thil chhar chungchâng chu baptisma chang lo thuchhuahtu ni ve bawk a pasal hnênah a hrilh a ni.

An nupa chuan an rethei hle a, leibâ an nei bawk. Mahse, an pawisa chhar chu passport-a chuang address-ah pêk kîr an tum a. A tibotu leh a chhûngte chuan mak an ti hle a. Haykanush-i leh a pasal chuan an rinawm chhan chu Bible aṭanga an thu zirte vâng a nih thu an hrilh a. Chutah, an hnêna Jehova Thuhretute chungchâng hrilh nân leh thu leh hla chhuah ṭhenkhat pêk nân remchângah an hmang a ni.

Chu chhûngkua chuan Haykanush-i chu lâwmman atân sum engemaw zât pêk an tum a; mahse, ani chuan a la duh lo. A tûkah, a nupui chu Haykanush-i leh a pasalte inah va lêngin, a lâwmzia lantîr nân diamond zungbun pakhat chu a pe lui ta a ni.

Chu chhûngkua ang bawkin, mi tam tak chuan Haykanush-i leh a pasalte rinawmna chu mak an ti ngei ang. Mahse, Jehova chuan mak a ti em? Engtin nge an rinawmna chu a ngaih? An rinawmna chu a manhla em?

SUM LEH PAI AIA HLU ZAWK MIZIATE

Chûng zawhnate chhân chu thil harsa a ni lo. Engvângin nge? A chhan chu Pathian chhiahhlawhte chuan Pathian miziate entawn chu diamond te, rangkachak te, a nih loh leh sum leh paite aiin a hlu zâwk tih an hriat vâng a ni. Ni e, Jehova thil ngaihhlutte chu mite thil ngaihhlutte nên a inang lo hle. (Isaia 55:8, 9) A chhiahhlawhte chuan Jehova miziate entawn tûra theih tâwp an chhuahna chu thil hlu tak angin an ngai a ni.

Chu chu Bible-in hriatthiamna leh finna chungchâng a sawite aṭangin kan hmu thei a. Thufingte 3:13-15 chuan: “Finna hmu chhuaktu chu a nihlawh a, hriatthiamna hmu chhuaktu pawh. Tangkaraw peipun aiin a peipun chu a ṭha zâwk si a, a hlêp pawh rangkachak ṭha mi aiin. Lunghlu sen mi aiin a hlu a; thil i duhthusâm theih ang zawng zawng pawhin a hen lo,” tiin a sawi a. Jehova chuan chutiang miziate chu khawvêla ro hlu engpawh aiin a ngaihlu tih a chiang hle.

Chuti chu, rinawmna chungchâng chu eng nge ni ta ang?

Jehova chu a rinawm a. Ani chuan ‘dâwt a sawi thei lo.’ (Tita 1:1-2) Ani chuan tirhkoh Paula chu kum zabi khatnaa Hebrai Kristiante hnênah: “Min ṭawngṭaisak rawh u; engkimah fel [“rinawm,” NW] taka awm tumin, chhia leh ṭha hriatna thiang tak kan nei tih dik takin kan inhre si a,” tia ziak tûrin a thâwk khum a ni.—Hebrai 13:18.

Isua Krista chuan rinawmna kawngah entawn tûr ṭha tak a siam a. Entîr nân, Puithiam Lal Kaiapha’n a hnênah: “Pathian nung chhâlin thu ka pe a che, Krista Pathian Fapa chu i ni emaw? min hrilh rawh,” tia a zawh khân, Messia a nih thu tlang takin a hrilh a. Sanhedrin-in, Pathian sawichhetuah a puh theiin, a thihna thlentu a ni thei tih a hre reng chung pawhin thu dik a hrilh a ni.—Matthaia 26:63-68.

Thu dik kan sawi em? Tuemaw hnêna thil nih dân kim chang taka hrilh loh emaw, tlêma thlâk danglam deuh emaw avânga nasa taka hlâwkpui theih tûr dinhmunah ding ta ila, rinawm takin thu dik kan sawi tho ang em?

RINAWM A HARSATNA

‘Mi, mahni inhmangaihtu te, leh tangka ngainatute’ tam tak awmna, he ni hnuhnûnga rinawm chu thil harsa tak a ni thei a. (2 Timothea 3:2) Sumdâwnna a tlâk chhiat hunah, a nih loh leh hna hmuh a harsat hunah mi tam tak chuan rûkrûk emaw, inbum emaw, a nih loh leh thil dik lo tih emaw chu pawi an ti lo. Hetiang ngaihtuahna hi a hluar hle avângin mi tam tak chuan sum leh pai lama hlâwk theih dân awmchhun chu rinawm loh mai niin an ngai a. Kristian ṭhenkhatte pawhin ‘hlêpna bawlhhlawh’ an duh avânga thu tlûkna ṭha lo siamin, kohhranah an hming chhiat phah a ni.—1 Timothea 3:8; Tita 1:7.

Mahse, Kristian a tam zâwkte chuan Isua an entawn a. Anni chuan hausakna leh hlâwkna engpawh aia pawimawh zâwk chu Pathian mizia ang neih hi a ni tih an hria a ni. Chuvângin, Kristian ṭhalaite chuan school-ah mark ṭha tak an hmuh theih nân an entawn lo. (Thufingte 20:23) Rinawmna chuan Haykanush-i dawn angin, lâwmman a nei ziah lo thei. Chutichung pawhin, rinawmna chu Pathian ngaihin a dik a, chhia leh ṭha hriatna thiang tak min neihtîr a, chu chu thil hlu tak a ni.

Chu chu Gagik-a entawn tûr siam chuan a târ lang a. Ani chuan: “Kristian ka nih hmain, ka hnathawhna company lian tak neitu chuan chhiah a pêk tlêm theih nân a hlêp hmuh chu tlêm tê chauh niin a report ṭhîn a. Managing director ka nih angin, chhiah khawntu chu company-in dâwt hmanga a thiltihte a endik lohna tûra thamna pea ‘inremna’ lo siampui ṭhîn tûra beisei ka ni. Chuvângin, mi rinawm lo tih hming ka pu ta a ni. Thutak ka han zir chuan ka hlawh chu ṭha hle mah se, chutianga thamna pea lo tih chu ka duh tawh lo. Chu ai chuan, mahniin sumdâwnna ka din a. A ni khat nî aṭangin ka company chuan sawrkâr dân ang thlapin chhiah chawi ngai zawng zawng chu a pe a ni,” tiin a sawi.—2 Korinth 8:21.

Ani chuan: “Ka pawisa lâk luh chu a chanve vêla a tlâk hniam avângin, ka chhûngkaw châwmna kawngah harsatna ka tâwk a. Mahse, tûnah chuan ka hlim zâwk a ni. Pathian Jehova hmaah chhia leh ṭha hriatna thiang tak ka nei a. Ka fapa pahnihte tân entawn tûr ṭha ka siam a, kohhranah chanvote ka chelh thei tawh a. Chhiah endiktute leh mi dang ka sumdâwnpuite zîngah chuan mi rinawm tih hming ṭha ka nei tawh a ni,” tiin a sawi bawk.

JEHOVA’N MIN ṬANPUI

Jehova chuan rinawmna pawh tiamin, a mize ropui tak takte entawna amah faktute chu a hmangaih a. (Tita 2:9-10) Chutianga kan tih chuan, ṭanpui min tiam a ni. Lal Davida chu: “Naupang ka lo ni tawh a, tûnah tar ka lo ni ta a, nimahsela mi fel chu kalsana a awm ka hmu ngai lo va, a thlahte chaw khawn pawh ka hmu ngai hek lo,” tia sawi tûrin a thâwk khum a ni.—Sâm 37:25.

Chu chu mi rinawm Ruthi thiltawn hian a târ lang a. Ani chuan a pasala nu, Naomi chu a upat tawh avânga kalsan lovin, rinawm takin a awmpui zâwk a ni. Ruthi chu Pathian dik a biak theihna tûr hmun Israel ramah a pêm lût a. (Ruthi 1:16, 17) Ani chu a rinawm a, mi retheite tâna Dân hmanga ruahmanna siam chu zuiin, buh ṭo zawngin a thawkrim hle a ni. A hnua Davida thiltawn angin, Jehova chuan Ruthi leh Naomi chu a kalsan ngai lo. (Ruthi 2:2-18) Jehova chuan Ruthi chu tisa lama a mamawh aia tam a pe bawk a. Ani chu Lal Davida leh thutiam Messia hial lo lanna tûr thlahtute zînga mi ni tûrin a thlang a ni!—Ruthi 4:13-17; Matthaia 1:5, 16.

Jehova chhiahhlawh ṭhenkhatte tân an mamawh bulpui berte phuhru tâwk tûr sum thawh chhuah chu a harsa hle thei a. Mahse, rinawm lova awlsam taka sum hmuh tum ai chuan, an thawkrimin an taima zâwk a ni. Chutiang chuan, rinawmna pawh tiamin Pathian mize ropui takte chu an târ lang a, chûng miziate chu sum leh pai tam tak aiin a hlu zâwk a ni.—Thufingte 12:24; Ephesi 4:28.

Ruthi ang bawkin, khawvêl puma Kristian zawng zawngte chuan anmahni ṭanpui tûrin Jehova thiltihtheihna an rinzia an târ lang a. Anni chuan: “Engtikah mah ka thlahthlam tawp lo vang chia, kal pawh ka kalsan tawp lo vang che,” tih thutiam petu chu an rinchhan pumhlûm a ni. (Hebrai 13:5) Jehova chuan englai pawha rinawm rengte chu a ṭanpui theiin, a ṭanpui ang tih vawi tam tak a târ lang tawh a. A chhiahhlawhte hnêna an mamawh bulpui pêk a tiam chu a hlen reng a ni.—Matthaia 6:33.

Ni e, mihringte chuan diamond leh thil dangte chu an ngaihlu hle a. Mahse, kan Pa vâna mi chuan lunghlu engpawh aiin kan rinawmna leh mize ṭha dangte chu a ngaihlu zâwk hle tih kan hre chiang thei a ni! (ws16.06-E)