Mi Dangte Thil Tihdik Loh Chu Tlûk Phah Nân Hmang Suh

1, 2. Engtin nge Bible-in Jehova mite pun chhohna chu a hrilh lâwk?

KHAWVEL pumah Jehova hmangaih a, a rawngbâwl duhtute hmanga din pâwl pakhat a awm a. Chûng mite chu Jehova Thuhretute an ni. Anni chuan thil tihdik loh leh thil tihsualte nei mah se, Jehova chuan a thlarau thianghlim hmangin a mite chu a kaihhruai a. Kawng ṭhenkhata anmahni mal a sâwm dân i lo en ang u.

² Kum 1914-ah khân, Jehova betu a la tlêm hle a. Mahse, Jehova chuan thu hrilh rawngbâwlna chu mal a sâwm a. Chuvângin, mi maktaduai tam takin Bible thutak zirin, a Thuhretute an rawn ni ta a ni. He pun chhohna mak tak chungchângah Jehova chuan: “In zînga hnam tê ber pawh hnam ropui tak an ni ang a, hnam tlêmte pawh hnam chak tak an ni ang: kei LALPA hian a hun hunah chuan ka thlentîr thuai ang,” tiin a sawi lâwk a ni. (Isaia 60:22) Tûn laiah, he hrilh lâwkna hi a famkim tawh tih chiang takin kan hmu thei a. Jehova mite chu hnam lian tak pakhat ang an ni a. Dik tak chuan, Jehova mite belh khâwm aia mihring tlêmna ram hi khawvêl pumah tam tak a awm a ni.

3. Engtin nge Pathian chhiahhlawhte chuan hmangaihna an lantîr?

³ Hêng ni hnuhnûng chhûng hian, Jehova chuan a mite chu inhmangaih tawn lehzual tûrin a ṭanpui a. “Pathian chu hmangaihna a ni” a, anni chuan amah an entawn a ni. (1 Johana 4:8) Isua chuan a hnungzuite chu “inhmangaih” tawn tûrin thu a pe a. “In inhmangaih chuan mi zawng zawngin ka zirtîrte in ni tih chu miah chuan an hria ang,” tiin a hrilh bawk a ni. (Johana 13:34, 35) Tûn hnai khân, hnamte chu an indo chung pawhin Jehova chhiahhlawhte chuan he inhmangaihna hi an inlantîr tawn a. Entîr nân, khawvêl indopui pahnihnaah khân, mi maktaduai 55 vêlin nunna an chân a. Mahse, chu indonaah chuan Jehova mite’n tumah an that ve lo. (Mika 4:1, 3 chhiar rawh.) Chu chuan ‘mi zawng zawng thisena hul’ reng tûrin a ṭanpui a ni.—Tirhkohte 20:26.

4. Engvângin nge Jehova mite punna chu chhinchhiah tlâk tak a nih?

⁴ Hmêlma thiltithei tak “he khawvêl pathian,” Setana an hmachhawn chung pawhin Pathian mite chu an pung chhoh zêl a. (2 Korinth 4:4) Setana chuan he khawvêla politics pâwlte leh chanchin thar theh darhnate chu a thunun a, chûng chu chanchin ṭha hrilhna tihtâwp nân a hmang a ni. Mahse, chu hna chu a titâwp thei lo. Setana chuan hun tlêm tê chauh a nei tih a inhriat avângin, Jehova be lo tûra min siam a tum char char a ni.—Thu Puan 12:12.

MI DANGTE’N THIL AN TIHSUAL HUNAH PAWH I RINAWM ANG EM?

5. Engvângin nge mite’n kan rilru tihnat châng an neih mai theih? (A thupui chunga milem en rawh.)

⁵ Pathian chhiahhlawhte chuan Pathian leh mi dangte hmangaih chu thil pawimawh tak a ni tih an hria a. Isua chuan: “‘Lalpa i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tûr a ni.’ . . . Chu chu thu pêk ropui leh pawimawh ber a ni. Tin, a dawttu, a anpui chu hei hi a ni, ‘Nangmah i inhmangaih angin i vêngte pawh i hmangaih tûr a ni,’ tih hi,” tiin a sawi. (Matthaia 22:35-39) Mahse, Bible chuan Adama sualna avângin mi zawng zawng chu ṭha famkim lovin kan piang tih a târ lang a. (Rom 5:12, 19 chhiar rawh.) Chuvângin, kohhrana mi ṭhenkhat chuan kan rilru tina thei thu sawi châng leh thiltih châng an nei thei a. Chutiang thil a thlen chuan eng nge kan tih ang? Jehova kan hmangaihna chu a nghet reng ang em? Amah leh a mite chungah kan rinawm ang em? Bible chuan mi dangte tina thei thu sawitu leh thiltitu Pathian chhiahhlawh ṭhenkhatte chungchâng min hrilh a. An chunga thilthlengte aṭanga kan zir theihte chu i lo en ang u.

6. Eng kawngin nge Elia’n a fapate a thunun loh?

⁶ Entîr nân, Elia chu Israel puithiam lal ni mah se, a fapate pahnih chuan Jehova dân an zâwm lo va. Bible chuan: “Elia fapate chu Beliala fapate an ni a; LALPA chu an hre lo va,” tiin a sawi a ni. (1 Samuela 2:12) Elia chuan a fapate’n thil sual tak an ti tih chu a hria a. Mahse, a thunun ṭha tâwk lo. A hnuah, Pathian Jehova chuan Elia leh a fapate pahnihte chu a hrem ta a. A hnuah, Elia thlahte chu puithiam lal nia rawng an bâwl a phal tawh lo a ni. (1 Samuela 3:10-14) Elia hun laiah awmin, a fapate thiltih râpthlâk takte chu hre ta la chuan, tlûk phah nân i hmang ang em? Chu dinhmun chuan Jehova i rinna a tichauvin, a rawngbâwl loh phah nân i hmang ang em?

7. Engtin nge Davida’n thil sual pawi tak a tih a, Pathianin chu chu engtin nge a tih?

⁷ Davida chuan mize ṭha duhawm tak a neih avângin Jehova chuan a hmangaih hle a. (1 Samuela 13:13, 14; Tirhkohte 13:22) Mahse, Davida pawhin thil sual lian tak a ti a ni. Uria chu indo tûra a kal bo lai chuan, Davida’n a nupui Bath-sebi chu a lo mutpui a, a lo rai ta a. Davida chuan a thiltih chu mi hriat a duh lo va. Chuvângin, Uria chu amah rawn hmu tûrin a chah a, chutah a in lama haw tûrin hmin a tum a. Uria’n a nupui Bath-sebi chu a mutpui ang a, chutiang chuan mite’n Uria chu naute pa nia an ngaih a beisei a ni. Mahse, Uria chu a in lamah a haw duh lo. Chuvângin, Davida chuan Uria chu indonaa a thih theih nân ruahmanna a siam ta a ni. A sualna nasa tak avângin, amah leh a chhûngte chuan nasa takin an tuar a. (2 Samuela 12:9-12) Chuti chung pawhin, Jehova chu lainatnaa khat a nih avângin, ani chu a ngaidam a. Davida’n thil dik tih duhna a nei tih a hria a ni. (1 Lalte 9:4) Chu mi hun laia awm ni ta la, Davida thiltih chu engtin nge i ngaih ang? Jehova rawngbâwl bânsan nân i hmang ang em?

8. (a) Engtin nge tirhkoh Petera chuan a thusawi a hlen loh? (b) Petera’n thil a tihsual hnuah, engvângin nge Jehova’n ani chu a hman zawm zêl?

⁸ Bible entîrna dang pakhat chu tirhkoh Petera a ni a. Isua’n ani chu tirhkoh ni tûrin a thlang a ni. Chuti chung pawhin, Petera chuan thil dik lo sawi châng leh tih châng a nei a. Entîr nân, Petera chuan mi dang zawng zawngin Isua an kalsan pawhin, a kalsan ve ngai lo vang tih a sawi a. (Marka 14:27-31, 50) Mahse, Isua an man hnu chuan Petera pawh tiamin tirhkoh zawng zawng chuan an kalsan a. Chutah, Petera chuan ṭum thum zet chu Isua a hriat loh thu a sawi a ni. (Marka 14:53, 54, 66-72) Mahse, a thiltih avâng chuan a rilru a na hle a. Chuvângin, Jehova’n ani chu a ngaidam a, a hmang zawm zêl a ni. Petera thiltihte hretu chutih hun laia zirtîr pakhat ni ta la, Jehova chungah rinna i nei zawm zêl ang em?

9. Pathian chuan engtik lai pawhin thil dik leh fel a ti reng ṭhîn ang tih engvângin nge i rin?

⁹ Hêng entîrnate aṭang hian, Jehova chhiahhlawh ṭhenkhat chuan thil sualte tiin, mi dangte rilru an tina hle tih kan hmu a. Tûn laiah chutiang thil a thlen chuan, eng nge i tih ang? Inkhâwmte i bânsan dâwn nge ni a, Jehova leh a mite i hnuchhawn hial dâwn? A nih loh leh, Jehova chu lainatna khat a ni a, ani chuan mi a inlamlêt hun a nghâk reng pawh a ni thei tih i hre zâwk dâwn? Mahse, tuemawin sual pawi tak a tih hnuah pawh pawi tihna neih loh châng a awm thei a. Jehova chuan chu chu hriain, a hun takah a ṭûl angin thil a ti ang tih i ring ang em? A ṭûl chuan, chu mi chu kohhran aṭangin a hnawt chhuak hial thei bawk a ni. Jehova chuan engtik lai pawhin thil dik leh fel a ti reng ṭhîn ang tih i ring em?

RINAWM RENG RAWH

10. Juda Iskariota leh Petera thil tihdik loh chungchângah Isua’n eng nge a hriatthiam?

¹⁰ Bible-ah chuan, an bul hnaia mite’n thil sual lian tak an ti chung pawha Jehova leh a mite chunga rinawm reng mi tam takte chanchin kan chhiar a. Entawn tûr ṭha ber chu Isua a ni. A Pa ṭanpuina dîla zankhuaa a ṭawngṭai hnuah, tirhkoh 12-te chu a thlang a. Mahse, a hnuah, chûng zînga pakhat Juda Iskariota chuan a phatsan a ni. Tirhkoh Petera pawhin Isua a hriat loh thu a sawi bawk. (Luka 6:12-16; 22:2-6, 31, 32) Isua chuan tirhkoh ṭhenkhatin a tihbeidawn hunah pawh Jehova emaw, tirhkoh dangte emaw chu a mawhpuh lo. A Pa chu a hnaih tlat a, rinawm takin a rawng a bâwl zawm zêl a ni. Chuvângin, Jehova’n ani chu a kaitho va, a hnuah vân Ram Lalberah siamin lâwmman a pe a ni.—Matthaia 28:7, 18-20.

11. Bible-in tûn lai huna Jehova chhiahhlawhte chungchângah eng nge a sawi lâwk?

¹¹ Isua entawn tûr siam chuan Jehova leh a mite chunga rinawm tûrin min zirtîr a. Rinawm chhan tûr ṭha tak kan nei a ni. Jehova chuan he tâwpna hunah hian, a chhiahhlawhte chu a kaihhruai tih kan hmu thei a. Khawvêl puma thutak puang chhuak tûrin a ṭanpui a, anni chu he hna thawktu awmchhun an ni. Jehova zirtîrna zawng zawngte avângin an inpumkhat tak zetin, an hlim hle bawk. Chu dinhmun chu Jehova chuan heti hian a sawi a ni: “Ngai teh u, ka chhiahhlawhte chu thinlunga an lâwm avângin hlim takin an zai ang,” tiin.—Isaia 65:14.

12. Engtin nge mi dangte thil tihdik loh chu kan thlîr ang?

¹² Jehova chuan thil ṭha tam tak ti tûra min kaihhruai a, min ṭanpui avângin kan lâwm tak zet a. Chu mi nêna inkalh takin, Setana khawvêla mite chu an hlim lo va, nakin hun beisei tûr an nei lo. Kohhrana tuemawin thu dik a sawi loh emaw, thil dik a tih loh emaw avânga Jehova leh a mite hnuchhawn chu a finthlâk lohvin a va dik lo dâwn êm! Chu ai chuan, Jehova chungah kan rinawm tlatin, a kaihhruainate kan zâwm zâwk tûr a ni. Mi dangte thil tihdik loh chungchânga thlîr dân tûr leh chhân lêt dân tûr kan hriat a ngai bawk a ni.

ENGTIN NGE I CHHAN LET ANG?

13, 14. (a) Engvângin nge kan indawh tawn ang? (b) Eng thutiam nge hriat reng kan duh?

¹³ I unaute zînga pakhatin i rilru tina thei thil a sawi emaw, a ti emaw a nih chuan eng nge i tih ang? Bible chuan: “I rilruah thinur hmanhmawh suh, mi âte ṭâng laiah a châm ṭhîn, thinurna hi,” tih thurâwn min pe a ni. (Thuhriltu 7:9) Kan vai hian mi ṭha famkim lo leh thil tisual thei vek kan a ni a. Chuvângin, kan unaute chuan thu dik an sawi rengin, thil dik an ti reng ang tih kan beisei thei lo. Tin, an thil tihsualte ngaihtuah reng chu kan tân a ṭha lo vang. Chutianga kan ngaihtuah reng chuan, Jehova rawngbâwlnaah hlimna kan nei tawh lo vang. Chu aia pawi zâwk chu, amah kan rinna a chauvin, Jehova inawpna pâwl kan chhuahsan hial thei a ni. Chutiang a nih chuan, Jehova rawng kan bâwl thei lo vang a, a khawvêl thara nun beiseina pawh kan nei thei lo bawk ang.

¹⁴ Chuti chu, mi dangte’n nangmah tibuaitu thil engemaw an tih hunah, hlim taka Jehova rawng bâwl zêl tûrin engin nge ṭanpui thei che? He a thutiam thlamuanthlâk tak hi hre reng ang che: “Ngai teh u, vân tharte leh lei thar ka siam a nih hi; tûn hma thilte chu hriat rengin a awm tawh lo vang a, rilruah pawh a lût tawh hek lo vang,” tih hi. (Isaia 65:17; 2 Petera 3:13) Jehova chunga i rinawm reng chuan hêng malsâwmnate hi a pe ang che.

15. Isua chuan mi dangte’n thil an tihsual huna kan tih tûr eng nge a sawi?

¹⁵ Khawvêl tharah kan la awm hrih lo va. Chuvângin, tuemawin kan rilru a tihnat chuan Jehova’n ti tûra min duhte chu kan chhût ngun a ngai a ni. Entîr nân, Isua chuan: “Mi an bawhchhiatte in ngaihdam chuan, in Pa vâna miin a ngaidam ve ang che u. Nimahsela mite in ngaihdam si loh chuan, in Pain in bawhchhiatte a ngaidam bîk lo vang,” tiin a sawi a. Chu bâkah, Petera’n “vawi sarih” ngaihdam tûr a nih leh nih loh chungchâng Isua a zawh khân, ani chuan: “Vawi sarih thlengin,’ ka ti lo va che, ‘Vawi sarih hmun sawmsarih thlengin,’ ka tih zâwk che,” tiin a chhâng a. Isua chuan mite ngaihdam kan inhuam reng tûr a ni tih min zirtîr a ni.—Matthaia 6:14, 15; 18:21, 22.

16. Josefa chuan entawn tûr ṭha eng nge a siam?

¹⁶ Josefa entawn tûr siam chuan mite’n min tihlunghnual huna chhân lêt dân tûr chu min zirtîr a. Josefa leh a nau chauh chu Jakoba leh Rakili te fapa neih awmchhun an ni a. Jakoba chuan fapa dang sâwm a nei a, mahse, chûng a fapa dangte ai chuan Josefa chu a hmangaih zâwk a. Chu chuan, Josefa chungah îtsîkna nasa tak a neihtîr a ni. An huat hle avângin Josefa chu salah an hralh a, Aigupta ramah hruaiin a awm ta a. Kum tam tak a liam hnuah, Aigupta rama lalber chuan Josefa hna thawh ṭhatnain a rilru a khawih êm avângin a rama thiltithei ber pahnihnaah a dah ta a ni. A hnuah, ṭâm avângin Josefa unaute chu buh lei tûrin Aigupta ramah an lo kal a. Josefa an hmuh chuan an hre lo va; mahse, ani chuan a ute chu a hria a. A chungah ṭha lo takin thil ti mah se, anni chu a hrem lo. Chu ai chuan, an inthlâkthleng tak zet a nih tih hriat nân a fiah zâwk a ni. An inthlâkthleng tih a hriat chuan, an unaupa a nih thu a hrilh a. A hnuah, anni chu thlamuanin: “Hlau suh u: nangmahni leh in fanau tê tête nên ka châwm zêl ang che u,” tiin a hrilh a ni.—Genesis 50:21.

17. Mite dangte’n thil an tihsual hian eng nge tih i duh?

¹⁷ Mi tin hian thil tihdik loh kan neih ṭheuh avângin, nang pawhin mi dangte i tilungni lo thei tih hre reng ang che. Chuvângin, tuemaw i tilungni lo tih i hriat chuan, Bible thurâwn pêk chu zui rawh. Ngaihdam dîlin, amah nêna inrem leh tum ang che. (Matthaia 5:23, 24 chhiar rawh.) Mi dangte’n min ngaidam se kan duh a. Chuvângin, keini pawhin kan ngaidam ve tûr a ni. Kolossa 3:13-ah chuan: “Tupawhin tu chungah pawh thupawi nei ang ula indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u,” tiin min hrilh a ni. Kan unaute kan hmangaih tak zet chuan, tûn hmaa an thiltih engemaw chu lungnih loh nân kan hmang fo lo vang. (1 Korinth 13:5) Mi dangte kan ngaihdam chuan Jehova’n keini pawh min ngaidam ve ang. Chuvângin, mi dangte’n thil an tihsual hian, kan Pa Jehova’n kan chunga khawngaihna a lantîr ang bawkin, an chungah khawngaihna i lantîr ve ang u.—Sâm 103:12-14 chhiar rawh. (ws16.06-E)