I Kawppui Nêna In Inṭhian Ṭhatna Chu Ti Nghet Reng Rawh

1. Engvângin nge ṭhian ṭhate chu Jehova thilpêkte an nih?

ṬHIAN ṭhate chu Jehova thilpêkte an ni a. (Jak. 1:17) Anni chuan Pathian an hmangaih a, keini pawh min hmangaih bawk. Kan hlim hunah min hlimpui a, kan lunghnual hunah min thlamuan a, kan mamawh hunah tlang takin thurâwn ṭhate min pe a ni. An rinawm tlat avângin anni chu kan rinchhan thei a. Chutiang ṭhiante chuan ‘rilru an tihlim ṭhîn’ hle!—Thuf. 27:9.

2. Engvângin nge nupate chuan an inṭhian ṭhatna an tih ngheh zawm zêl a pawimawh? (Matthaia 19:6)

² Nupate chu ṭhian ṭha ber an nih a pawimawh hle a. An inṭhian ṭhatna chu ngaiah an nei mai tûr a ni lo va, an ti nghet zawm zêl tûr a ni. An inṭhian ṭhatna an ngaihthah a nih chuan, mal nia inhriatna leh rilru hrehawmna an nei ṭan theiin, thinrimna hial pawh an pai ṭan thei a ni. Mahse, an inṭhian ṭhatna an chhawm nung zêl a nih chuan, mihringte inkâra kan neih theih azawnga inlaichînna nghet ber chu an nei thei ang. (Matthaia 19:6 chhiar rawh.) He thuziakah hian nupate’n an inṭhian ṭhatna an tih ngheh zawm zêl theih dân kan hmu ang a. Mahse, a hmasain, kawppui la nei lo Kristian tu emawin a dam chhûnga a ṭhian ṭha ber rawn ni tûr kawppui a thlan theih dân i lo ngaihtuah ang u.

DAM CHHUNG AWH ṬHIAN TUR THLAN DAN

3-4. Engin nge mi chu kawppui tûr ṭha hmu tûra ṭanpui ang? (Thufingte 18:22)

³ Thu tlûkna lian tham eng pawh kan siam hmain, nghawng ṭha lo awm thei te, a hlâwkna te leh, a rah chhuah tûrte chu kan ngaihtuah lâwk a ngai a. Thu tlûkna liante chuan kan dam chhûng nun a nghawng theih avângin, ngun taka kan ngaihtuah a pawimawh a ni.

⁴ Dam chhûng awh tûr ṭhian—kawppui tûr—kan thlan hian thu tlûkna azawnga pawimawh ber kan siam tihna a ni a. Inneihna ruahmanna chu Jehova siam a nih avângin, kawppui tûr thlan hunah a hnên aṭanga kaihhruaina zawn chu thil inâwm tak a ni. Mi pain nupui ṭha tak a hmuh a, hmeichhiain pasal ṭha tak a hmuh chu a duhsak a. Chu bâkah, kan tâna ṭha ber tûr chu a hre bawk. (Thufingte 18:22 chhiar rawh; Is. 48:17, 18) Pathian Thua kan hmuh thu bulte chuan Kristian tu emaw chu a tâna kawppui tûr ṭha ber hmu tûrin a ṭanpui thei a ni.

5. Engvângin nge kawppui atân baptisma chang tawh unau tu emaw thlan chu a pawimawh?

⁵ Baptisma kan chan hian Pathian ṭhian kan rawn ni a. (Sâm 25:14) Nupui pasal neih i duh a nih chuan, i kawppui âwm chu Jehova ṭhiante zîng aṭangin i thlang tûr a ni. (1 Kor. 7:39) Chutianga tihna hmangin, Jehova tehnate kan ngaihhlutzia kan lantîr bâkah, kan kawppui chu a hnên aṭanga kan dawn malsâwmna a nihzia kan hmu dâwn a ni. (Thuf. 19:14) Ring lotute nêna ‘rual lo taka nghâwngkawl bah’ avânga lo awm buainate chu kan pumpelh thei bawk ang. (2 Kor. 6:14) Kristian unaute zîngah kawppui tûr âwm an awm lo a nih pawhin, ring lotu nêna inlaichînna siam chu a va ât thlâk dâwn tak êm! A hnuah thutak a zir ang tih ngaih dân neia ring lotu nêna inlaichînna siam chu i duh hek lo vang.

6-7. Inngaihzâwn laiin eng zawhnate nge i inzawh ngai?

⁶ Ni e, tu emaw chu baptisma a chan tawh avâng maiin kawppui tûr ṭha a ni kher lo. I kawppui tûr âwm nia i hriat chu ngun takin chîk ang che.a Hêng zawhnate hi inzâwt rawh: ‘Engtin nge a chhûngte a cheibâwl? Mi dangte ngaihsak tak leh zah thiam tak a ni em? A ṭhiante chu tute nge ni? Thu inhmuh lohna a awm hunah engtin nge a chinfel? A duh dân chauh a kalpui ṭhîn nge ni a, Bible thu bul nêna a inkalh loh phawt chuan, a insiamrem ṭhîn zâwk? Sum leh pai chungchânga a rilru put hmang chu eng nge ni?’ tihte hi.

⁷ Chu bâkah, heti hian i inzâwt thei bawk a: ‘Ka mi ngaihven mêkchuan Jehova hmangaihna thûk tak a lantîr em? ‘Mize thara’ inthuam tumin hma a la em? Jehova chhiahhlawh ṭha lehzual ni thei tûrin min ṭanpui ang em? Thlarau lam thiltum inang kan nei em? Ṭhian ṭha satliah mai ni lovin, ṭhian ṭha ber kan rawn ni thei ang em?’ tiin. (Kol. 3:9, 10) Unaunu i nih chuan, i thlithlai mêk unaupa chu ṭhian ṭha leh chhûngkaw lû ṭha a ni ang em? (1 Kor. 11:3) Unaupa i nih chuan, i thlithlai mêk unaunu chuan tlin lohnate nei mah la, chhûngkaw lû i nih anga i thuneihna chu a pawm duh ang em? Chûng zawhna chhânnate hre tûr chuan hun pêk a ngai a. Chuvângin, in inngaihzâwn hun chu amah hriat chian nân hmang ang che.

8-9. Engin nge ngaihzâwng nei mêk tu emaw chu thu tlûkna ṭha siam tûra ṭanpui thei? (Milem en bawk rawh.)

⁸ Inngaihzâwn laiin, ani chu eng ang mi nge a ni tih hriat chian i tum a nih chuan, thu tlûkna ṭha i siam thei lehzual ang. Mi dangte ngaih dân pawh hriat tum la. Eng miziate nge a lantîr a, mi dangte’n eng angin nge an hmuh tihte i zâwt thei a ni. Entîr nân, ani chu mi inngaitlâwm, ngilnei leh, a âwm tâwk hre mi nia hriat hlawh a ni em? Unau Daniel-a nêna innei French Guiana biala awm unaunu Sarah-i chuan: “Daniel-a roommate leh pioneer thawhpui unaupa, a kohhrana upa, a ṭhian hnaite leh, a kohhrana unaunute hnên aṭangin an ngaih dânte ka zâwt a ni,” tiin a sawi. Thil ṭhenkhat, a nih loh leh chîn dân ṭhenkhatin a hnuah nupa inkârah buaina lian tak a thlen theih ṭhin avângin, tûn hma leh tûna a dinhmun chungchânga i hriat ngai a awm leh awm loh ngilnei takin zâwt ang che.

⁹ Rinhlelhna eng emaw i neih mai theihte leh i ṭhian mi puitlingte thlîr dân chu ngaihthah mai suh. Chûngte chuan inngaihzâwn chhunzawm a ṭhat leh ṭhat loh chungchângah thu tlûkna ṭha siam tûrin a ṭanpui thei ang che.b Tûnah chuan, innei tawhte chungchâng i lo ngaihven ang u.

HUN HMANG DUNIN IN INṬHIAN ṬHATNA TI NGHET RAWH

10. Engvângin nge nupate tân hun hman dun leh ngaihsakna inlantîr tawn chu a ṭhat?

¹⁰ Nupate chuan engtiang khawpa buai pawh ni se, hun hman dunna hmangin an inṭhian ṭhatna leh an inneihna chu an ti nghet reng thei a. Hun an hman dunna chuan an nî tin hun hman dân te, an rilru chhûngrila awmte in hrilh tawn tûr leh hmangaihna inlantîr tawn a, hun hlimawm hmang dûn tûrtein hun remchâng a neihtîr a ni.

11. Nupate inkâra inṭhian ṭhatna chu engin nge ti chhe thei?

¹¹ Inṭhian ṭhatna nghet tak nei nupate chuan awm hran aiin awm dun an duh ṭhîn a. Ni e, hun rei lote chhûng awm hran a ngaih chângte chu a awm ngei mai. Mahse, hun rei tak chhûng awm hran chu thil hlauhawm tak a ni thei a ni. Entîr nân, ṭhenkhat chu ram dangah hna an thawh avângin an chhûngte nên hun rei tak an awm hran a ngai a. Chu chuan sum leh pai lamah hlâwkna eng emaw chen thlen thei mah se, hun rei tak chhûng awm hranna chuan nupa inkârah harsatna nasa tak a thlen thei a ni.

12-13. (a) Kristian nupa ṭhenkhatte’n hun an hman dun theih nân eng nge an tih? (Milem en bawk rawh.) (b) I kawppui nêna in inlaichînna chu i tân eng anga pawimawh tûr nge a nih? (“Ka Kawppui Chu Ka Tân Eng Anga Pawimawh Tûr Nge A Nih?” tih bâwm chu en rawh.)

¹² Nupa ṭhenkhatte’n hun an hman dun ziah theih nâna an tih ṭhenkhat hi lo chhinchhiah ang che. Guam rama awm Leah-i chuan: “Kan nupain thil chi hrang hrang kan ti dûn ṭhîn a. Intih hlimnaah emaw, inhmuh khâwmnaah emaw a hrangin kan tel khât hle,” tiin a sawi. United States-a awm Roxanne-i pawhin: “Thil tih tûrte kan ngah chhoh zêl avângin, thil pawimawh dangte ang bawkin, hun kan hman dun theih nân hun duan fel tak kan siam a ngai tih kan hria,” tiin a sawi. (Amosa 3:3 nên khaikhin rawh.) France rama awm Damien-a chuan heti hian a sawi ve bawk: “Kan thil ngainat zâwngte inngaihvensak tawn leh intuipui tawn dânte kan zir a ni,” tiin. (Mt. 7:12) United States-a Katie-i pawhin: “Min tih buai loh nân kan phone-te chu kan dah bo châng a awm ṭhîn,” tiin a sawi.

¹³ Thil dang zawng aiin, thlarau lam thil tihnaah hun hmang dûn ang che u. France rama awm Myriam-i chuan: “Bible te chhiarin leh kan thu chhiara kan duh zâwngte leh nunpui theih dânte inhrilh tawnin ni bul kan ṭan ṭhîn a. Chûng hunte chu ka ngaihlu hle. Kan ṭawngṭai dun huna ka pasal ṭawngṭaina aṭanga Jehova a hmangaihzia ka hriat hian ka hlim thei hle bawk,” tiin a sawi. Kan târ lan tâk unaunu Katie-i pawhin: “Nuam kan tih ber hun chu rawngbâwlnaa kan tel dun hian a ni a. Kan rinna chungchâng kan sawi chhuahte inngaih thlâksak tawnna aṭangin phûrna kan neiin thil tharte kan inzir tawn reng a ni,” tiin a sawi.—Thuf. 27:17.

HARSATNA IN NEIH HUNAH HMACHHAWN DUN ANG CHE U

14-15. Engvângin nge nupate chuan an inkâra harsatna an neihte chu theih tâwp chhuaha chinfel an tum ang? Entîrna pe rawh.

¹⁴ Ṭha famkim lo an nih angin, nupate chuan an inneihnaah harsatnate an tâwk dâwn a. Nupate chuan “tisaah hrehawm an tuar ang,” tiin Bible chuan tlang takin a sawi a ni. (1 Kor. 7:28) Chu Bible châng hrilhfiahna chuan he ṭawngkam hian “nupate tawh ṭhin buainate leh fiahnate a kawh” thu a sawi a. Chûng buainate an tawh hunah, engvângin nge theih tâwp chhuaha an inhnaih tlata an hmachhawn dun a pawimawh?

¹⁵ He entîrna hi han ngaihtuah teh. Building, a nih loh leh lemziah hmingthang pakhat a chhia a nih chuan, a neitute chuan siam ṭhat leh an duh ngei ang a. Siam ṭha leh tûr chuan kum tam tak awh thei mah se, chumi atân sum leh pai tam tak leh thil dang tam tak sênso an inhuam ngei ang. Engvângin nge? Chu building emaw, lemziah emaw chu an tâna a hlut êm vâng a ni. Chutiang bawkin, inneihna zawng zawng hi a hlu a. Nupa inlaichînna ṭha ber ber neite pawhin intih thiam loh chângte an nei a. Mahse, building, a nih loh leh lemziak chhe tawh chu siam ṭhat leh theih a ni fo angin, inneihna keh chhe lek lek pawh siam ṭhat leh theih a ni. Chutianga siam ṭha leh tûr chuan hun tam tak a duhin, thawh rim a ngai thei a; mahse, nupate’n an inneihna ti nghet tûra theih tâwp an chhuah a nih chuan Jehova a lâwm ang. (Mal. 2:16) Chutianga an tih chuan hmangaihna leh zahna chu an inkârah chauh ni lovin, inneihna Bul Ṭantu Pathian Jehova chungah pawh an lantîr a ni ang.

16. Korinth thawn khat 13:4-8a-naa sawi angin, inneihnaa harsatna lian tak hmachhawn nupate chu engin nge ṭanpui thei? (Milem leh “In Inṭhian Ṭhatna Ti Nghet Tûra Ṭanpuina,” tih bâwm chu en rawh.)

¹⁶ In inneihnaah buainate a lo awm a nih chuan, awm hrang nghâl mai suh u. (1 Kor. 7:10, 11) Chu aiin, ‘Kan inṭhian ṭhatna ti nghet tûrin eng thil dang nge ka tih theih?’ tiin inzâwt la. Tichuan, hmangaihna lantîrna chungchânga Bible sawite chu ennawnin, 1 Korinth 13:4-8a-naa târ lan miziate lantîrna kawnga hma i sâwn theih dân tûrte inzâwt ang che. (Chhiar rawh.) Chu bâkah, in inlaichînna tih tâwp dân kawng zawn aiin, theih tâwp chhuahin inlaichînna ṭha neih leh theih dân kawng zâwng zâwk la. In inlaichînna siam ṭha leh tûra i tih theihte chu ngaihven tlat ang che. Jehova hnênah kaihhruaina dîlin ṭawngṭai bawk la. Thu leh hla chhuah te leh video-te bâkah, kohhran upate leh, Kristian mi puitlingte hnên aṭangin ṭanpuina zawng ang che. ‘Hrui thum hruala’ a tlo ber, a hrui thumna Jehova i rinchhan tlat a nih chuan, in inneihna chu “a chat lawk lawk ngai lo” vang.—Thur. 4:12.

17. Engtin nge inneih tumte leh innei tawhte chuan hlimna an hmuh theih ang?

¹⁷ Jehova chuan inneih tumte leh innei tawhte pawh tiamin, a chhiahhlawh zawng zawngte chu hlim tûrin a duh a. Chuvângin, nupui pasal la nei lo, nakina neih tum i nih chuan, dam chhûnga i ṭhian tûr chu fîmkhur takin thlang ang che. Nupui pasal nei tawh i nih chuan, i kawppui nêna in inṭhian ṭhatna chu ti nghet zawm zêl la. In inneihnaah harsatnate a lo awm a nih chuan, Jehova ṭanpuina rinchhanin chingfel ang che u. Chutianga i tih chuan, i duh tak i kawppui nên “nun nuam” tak inhmang thei ang!—Thur. 9:9.