Bible-a Tehkhin Thute Hriatthiam Theih Dân

Bible-ah hian tehkhin thu a za têl tak meuh a awm a. Mahse, Bible chhiartu mi tam tak chuan chûngte chu hriatthiam harsa an ti a ni. (Mt. 13:13) Bible-a hman tehkhin thute awmze dik tak hre thiam tûrin engin nge ṭanpui thei ang che? Hêngte hi han ti chhin teh:

• A sawi tum leh a tehkhinna chu thliar hrang rawh. Tehkhin thu chuan sawi tum leh tehkhin a nei ṭhîn a. Entîr nân, Thu Puan 3:3-na chuan Isua lo kal lehna (sawi tum) chu rûkru lo kalna (a tehkhinna) nên a khaikhin a.

• A sawi tum leh a tehkhinna inan dân chu hriat tum rawh. Thil pakhat chu a dang pakhat nêna a khaikhin chhan leh an pahniha inanna an neihte chu hriat tum rawh.

• Thu tâwp dik tak siam rawh. A sawi tum leh a tehkhinna inkâra inanna ṭhenkhat chuan thu tâwp dik lo min siamtîr thei a. A chunga kan târ lan tâk entîrnaah khân, Isua chu thil eng emaw ru tûrin a lo kal dâwn lo. Chu aiin, a chung leh a hnuai thuin a târ lan angin, a lo kal dân chu rûkru angin beisei loh leh hriat lâwk loh a ni dâwn tihna zâwk a ni.