Harsatna I Tawhte Chungah Thlîr Dân Dik Nei Tlat Rawh

1-2. Kan harsatna tawhte hlawhtling taka hmachhawn tûrin eng nge kan tih ngai? (Milem en bawk rawh.)

I RINNA avângin rorêl dik lohna te, chhûngkaw dodâlna te leh, tihduhdahnate i hmachhawn mêk em? Hrisêl lohna leh kum upatna sawhkhâwkte i tuar mêk em? A nih loh leh, thihnaa hmangaih takte chânna ang chi chhiatnate i tâwk mêk em? Jehova berâm hlu tak kan unau tam takte angin, i nun chu ‘thawhrimna leh lungngaihnain’ a khat pawh a ni thei a ni.—Sâm 90:10.

² Kan harsatnate hlawhtling taka hmachhawn thei tûr chuan thlîr dân dik kan neih a ngai a. Chutah chuan eng nge tel? Heti hian tehkhinna kan pe thei a ni: I nuna buaina i tawhte chu motor i khalh laia i tawh dinhmun hlauhthâwnawm nên a inang a. I dinhmun tawh dân azirin, i motor chu ding lamah emaw, vei lamah emaw i herh kawi thei a, a nih loh leh i khalh muang deuh emaw, i ding lawk emaw thei bawk. Mahse, hma lâk dân tûr ber hre tûr chuan i dinhmun tawh chu i hriat chian a ngai a. I motor dârthlalang chu dai leh chirhdiak avânga a phe ruai a nih chuan i hmu fiah thei lo vang. Chutiang bawkin, kan harsatna tawhte hlawhtling taka hmachhawn thei tûr chuan Jehova thlîr dân anga kan thlîr thiam a ngai a ni. He thuziakah hian (1) kan harsatna tawhte chunga thlîr dân dik, (2) kan dinhmun tawhte chunga thlîr dân dik lo neih a hlauhawm dân leh, (3) harsatna kan tawh huna thlîr dân dik nei reng tûra kan hma lâk ngai ṭhenkhatte sawiho a ni ang.

KAN HARSATNA TAWHTE CHUNGA THLIR DAN DIK

3. He khawvêl ṭha lo taka kan awm chhûng chuan eng nge kan pawm ngai?

³ Harsatnate chu he khawvêl ṭha lo takah hian pumpelh theih a ni lo. Ṭha famkim lo kan la nih chhûng leh Setana’n khawvêl a la awp chhûng chuan, harsatnate chuan min la nghawng zêl dâwn a. Chu bâkah, he khawvêl tâwpna a hnaih zêl rualin, leilung chhiatna te, mihringte tih chhuah chhiatna te, a nih loh leh thil sual titute hnên aṭangin buainate chu nasa lehzualin kan tâwk dâwn a ni. (Mt. 24:8; 2 Tim. 3:13) Jehova’n chûng buaina zawng zawng tûnah a ching fel a nih chuan, he khawvêl awptu Setana chu a ṭanpui ang a ni dâwn a. Chuvângin, he khawvêlah hian harsatnate chu kan pumpelh thei lo a ni.—Thur. 9:12.

4. Kristiante’n eng harsatna dang nge kan hmachhawn?

⁴ Kristiante chuan harsatna dang pawh an hmachhawn. Isua chuan a zirtîrte chu an rinna avângin tihduhdah an ni dâwn tih a hrilh fo va. (Mt. 24:9; Joh. 16:2) Chumi hriatna chuan tihduhdahna avânga kan rinna tih nghîna awm lo tûrin min ṭanpui ang. (1 Thes. 3:3, 4) Rinna nghet tak kan neih avânga fiahnate kan tawh hunah chatuan nunnaa min hruaitu kawngah kan la awm reng tih kan chiang thei a ni. Chu bâkah, Pathian Jehova leh Setana inkâra thu buaiah tu lam ṭang nge kan ni tih kan lantîr bawk. Setana’n Pathian hming a beihnaah, mihringte hian mahni hmasialna avâng chauhva Pathian rawngbâwl an ni tiin a puh a. A thusawi dikzia finfiah tumin, ani chuan Jehova mite chu nasa takin a bei a. (Job. 1:9-11) Mahse, Jehova kan hmangaih avânga chhelna kan lantîr hian Ani chu kan ti lâwm a ni.—Thuf. 27:11.

5. Thuhriltu 7:13, 14 aṭangin eng nge kan zir theih? (Milem en bawk rawh.)

⁵ Jehova’n harsatna awm a phal. Jehova chuan thil sual a ti ngai lo va, sualin min fiah ngai hek lo. (Jak. 1:13) Mahse, Lal Solomona chuan ‘chhiat nî’ chu “Pathian hnathawh” angin a sawi a. (Thuhriltu 7:13, 14 chhiar rawh.) Bible-a târ lan fo a nih angin, Pathian Jehova’n thil eng emaw thlentîr a phal chu ama tih anga târ lan a ni ṭhîn a. Chumi nêna inkûngkaihin Solomona chuan kan fiahna tawhte chunga thlîr dân dik tak nei tûra min ṭanpui thei thurâwn ṭha tak min pe a ni. Pakhatna, Setana khawvêla ṭha famkim lo nunah hian ni ṭha leh ni ṭha lote kan nei dâwn tih a nihna ang taka kan pawm thiam a ngai a. Ni ṭha kan neih hian Pathian ṭhatna avânga kan lâwmzia lantîrin chu chu a hnên aṭanga kan dawn thilpêk angin kan thlîr thei a ni. Pahnihna, Solomona chuan ni ṭha kan neih dâwn leh dâwn loh chungchângah ‘mihring chuan a hnu lam tûr a hre lo,’ tiin min hriat nawntîr a. Beisei loh buainate chu mi felte leh mi fel lote chungah a thleng ve ve a ni.

6. Engvângin nge Jehova’n fiahnate kan hmachhawn a phal mai theih? (Hebrai 12:7, 11)

⁶ Fiahna kan tawhte chunga thlîr dân dik kan nei a nih chuan, Jehova’n mahni ni lo va, amah rinchhan tûrin min zirtîr tih kan hre thiam ang. Jehova chuan kan fiahna tawhte chu a hmuh hmaih ngai lo va, kan hrehawm tawrhnate pawh min ngaihthahsak hek lo. “Thihna hlim kawr ruam” kan zawh a phal a nih pawhin, ani chuan min kaihruai zawm zêl a, min hmangaih tih min hriat nawntîrin, chhel taka tuar thei tûra kan mamawh chakna min pe zawm zêl a ni. (Sâm 23:4) Harsatnate chuan kan chak lohna laite hre tûrin min ṭanpui thei a, Pathian ṭanpuinain, kan miziate min siam ṭhatsak thei a ni. (Hebrai 12:7, 11 chhiar rawh.) Entîr nân, Joba chuan inngaihtlâwmna kawngah hmasâwn a mamawh a. A fiahna tawh chu Jehova thlentîr ni lo mah se, chu chu a thlen phalin, chuta ṭang chuan Joba chu thil pawimawh tak a zirtîr a ni. (Job. 42:1-6) Kan chungah eng pawh lo thleng se, Jehova chuan chatuana chhiat hlenna min thlen thei thil eng mah awmtîr a phal lo vang tih kan hria a. Rinawm taka fiahnate kan tuar chhuak a nih chuan, “hnehna famkim changtute” kan ni ang.—Rom 8:35-39.

7. Engvângin nge i rinna avânga tihduhdahna i tawh hunah i hlim theih?

⁷ Tihduhdahna kan tawh lai mêk pawhin kan hlim thei. I rinna avânga tihduhdahna i tuar a nih chuan Jehova malsâwmna hloh ta niin inngai suh. Chu aiin, chutiang tihduhdahnate chuan a duhsakna i dawng tih a târ lang zâwk a ni. (Mt. 5:10-12) Thlîr dân dik tak i nei a nih chuan, tirhkohte ang bawkin, Kristian i nih avânga tihduhdahna i tawrh hunah hlimna i neiin, chu chu chawimawina angin i thlîr thei ang a. (Tirh. 5:40-42) Chu bâkah, Thuhretu ni lote chu thutak hre tûr leh ‘Pathian chawimawi’ tûrin i ṭanpui thei ang. (1 Pet. 2:12) Josefa ang bawkin, harsatnate a tâwp hnuah chauh ni lovin, i tawh lai mêk pawhin, hlawhtling takin i hmachhawn thei a ni.—Gen. 39:3, 23.

8. Fiahnate chhel taka tuar chhuak tûra min ti chaktu eng tiamkamna nge kan neih?

⁸ Kan fiahna tawhte chuan tâwp hun a nei ang. Joba thiltawnte chuan kan harsatna tawhte’n tâwp hun a nei ang tih min hriat nawntîr a. Dik tak chuan, “LALPA chuan Joba hun hnuhnung chu a tîr aia nasa takin mal a sâwm a.” (Job. 42:12) Chutiang bawkin, Jehova chuan buainaa khat tûna i nun tâwi tê aiin, chatuana i neih tûr i nun “hun hnuhnung” chu mal a sâwm ang tih a tiam che a ni. Chu chu a tâwp thlenga chhel taka tuar chhuak tûra min ti chaktu a va ni chiang êm!—Mt. 24:13.

THLIR DAN DIK LO NEIH A HLAUHAWM DAN

9. Engtin nge harsatna kan tawhte chunga thlîr dân dik lo neihna chu kan tân a hlauhawm theih?

⁹ Kan harsatna hmachhawnte chu eng pawh ni se, buaina dang kan insiam belh loh nân thlîr dân dik kan neih a ngai a. Entîr nân, kan harsatna tawhte chu Jehova thlentîr niin kan ngai thei a. Joba pawhin a harsatna tawhte chu Jehova thlentîr niin hun eng emaw chen a ngai a, chutianga thlîr dân dik lo a neihna chuan ‘Pathian ai mahin amah thiam a inchantîr” a ni. (Job. 32:2) Chutiang bawkin, Naomi pawhin a harsatna tawhte avângin Jehova a mawhchhiat a. (Rut. 1:13, 20, 21) Joba leh Naomi’n chutiang thlîr dân dik lo nei zawm zêl se la chuan, Jehova nêna an inlaichînna chu a chhe ngei ang. (Thuf. 19:3) Mahse, Jehova chuan anni chu an harsatna tawhte chungah thlîr dân dik nei tûrin a ṭanpui bâkah, an rinawmna avângin mal a sâwm bawk a ni.

10. Fiahna kan tawh hunah, eng nge kan rinhlelh ṭan mai theih?

¹⁰ Fiahna kan tawhte chu Jehova thlentîr a ni lo tih kan chian hnuah pawh, ani chuan min ngaihsak tak zet em tih kan ringhlel ṭan thei a. Chutianga a thim zâwnga ngaihtuahna chuan kan chakna a ti kiam thei a ni. (Thuf. 24:10) Lal Davida leh zâwlnei Habakuka te pawhin harsatna an hmachhawn a, ṭanpui an dîlnate chu Jehova’n a ngaihthlâksak tak zet em tih an rinhlelh chângte a awm a ni. (Sâm 10:1; Hab. 1:2) Mahse, ṭawngṭai an bâng chuang lo. Jehova’n chûng mi rinawmte chu ṭanpui a tiam a, nang pawh a ṭanpui ngei ang che.—Sâm 10:17.

11. Kan fiahna tawhte chunga thlîr dân dik kan nei lo a nih chuan kan chungah eng nge thleng thei?

¹¹ Kan fiahna tawhte chunga thlîr dân dik kan nei lo a nih chuan, kan tawh tak tak hunah mak kan tiin, kan tawh tûr âwm ni lo angin kan ngai thei a. (1 Pet. 4:12) Isua’n tihduhdahna nasa tak a tâwk dâwn tih chu a zirtîrte chuan hriatthiam harsa an ti a. (Lk. 18:33, 34) Isua’n a hmachhawn mai tawh tûrte chiang taka a hrilh chung pawhin, tihkoh Petera chuan a ngaihzamsak mai a. Chutiang ngaihtuahna chuan Jehova duh zâwng tihna a dâl thei tih Isua’n a hriat avângin Petera chu a zilh a ni. (Mk. 8:31-33) Isua thih hnuhah pawh, a zirtîrte chuan chûng thil thlengte chu an la hre thiam thei lo cheu va. Chuti chung pawhin, Isua chu an chungah a beidawng mai lo. A thawhleh hnua amahni a biak khân, ‘Pathian Lehkha Thu [an hnêna] hrilhfiahin,’ a hrehawm tawrhte chungchânga thlîr dân dik nei tûrin a ṭanpui a ni. (Lk. 24:25-27, 32, 44-48) Chûng Isua zirtîrnate chhût ngunna hmangin, a hnungzuitute an nih anga an hmachhawn mai tûr dodâlnate atân an lo inbuatsaih lâwk thei a. Keini pawh Bible-a thutakte ngaihtuahna chuan harsatna kan tawh tûrte atâna lo inbuatsaih lâwk tûrin min ṭanpui thei a ni.

12. Kan dinhmun tawh chunga thlîr dân dik lo neihna chuan engtin nge min awmtîr theih?

¹² Kan dinhmun tawhte chunga thlîr dân dik lo neihna chuan dinhmun chu a nihna aia chhe zâwk angin min ngaihtîr thei a. Chutianga a thlen theih dân kawng khat chu grêp huana hnathawktute chungchâng tehkhin thu-ah khân Isua’n a târ lang a ni. Hnathawktu ṭhenkhat chuan hlawh pêk an nih dânte chu a fel tâwk lo nia ngaiin an lung ni lo va; mahse, huan neitupa chuan an zînga pakhat hnênah: “Ṭhianpa, i chungah thil tih dik loh ka nei lo ve,” tiin a hrilh a. (Mt. 20:10-13) Hnathawktute phunnawina chu rorêl dik lohna vâng ni lovin, an thil beiseite a dik loh vâng zâwk a ni. Tûn laia Thuhretu ṭhenkhat pawh chutiang chuan an awm a. Entîr nân, rawngbâwlna chanvo hlu an dawn loh hunah emaw, an chân hunah emaw lungni lovin an awm thei a ni. Dinhmun harsa kan tawhte chunga thlîr dân dik nei tûrin engte nge kan tih theih?

HARSATNA KAN TAWH HUNA KAN HMA LAK THEIHTE

13. Harsatna i tawh hunah eng nge thleng thei?

¹³ Harsatna chungchânga Bible sawite chu i hre ngei ang a. Harsatna tâwkte ṭanpui nân chûng thute chu i hrilh pawh a ni thei a. Mahse, mi mal taka harsatna i han tawh meuh chuan, thlîr dân dik neih reng chu harsa i ti thei a ni. Entîr nân, Jehova’n a hrem che, a nih loh leh i ṭawngṭaina a ngaithla lo niin i ngai thei a. Thlîr dân dik nei reng tûrin engte nge i tih theih?

14. Harsatna i tawh hunah eng atân nge i ṭawngṭai theih? (Philippi 4:13)

¹⁴ Jehova hnênah a ṭanpuina dîl rawh. I hrehawm tawrhte leh chûngte’n a nghawng dân che chu Jehova hrilh la. Ṭanpuina i dawn duh dânte chu tlang takin hrilh ang che. Chhel taka tuar thei tûra i mamawh chakna leh finna pe tûr chein a thlarau thianghlim i dîl thei a. Mahse, Jehova’n i ṭawngṭaina chu i beisei loh kawngin a chhâng mai thei che tih hre reng ang che. (Eph. 3:20) Pathian Jehova chuan ṭanpui tûr chein, vântirhkohte emaw, i Kristian unaute emaw chu a chêttîr thei bawk. (Sâm 34:7) Chuvângin, Jehova ṭanpuina pêk eng pawh chu pawm ang che. Eng dinhmun hnuaiah pawh i mamawh thlarau thianghlim chu Jehova’n pêk a duh tak zet che tih i chiang thei a ni.— Philippi 4:13 chhiar rawh.

15. Harsatnate chhel taka hmachhawn tûrin engin nge ṭanpui ang che? (Milem en bawk rawh.)

¹⁵ Thlarau lam hun duan ṭha nei reng rawh. I thlarau lam hun duan chu tûn hma anga i zui thei lo a nih pawhin i tih theih apiang ti ang che. A bîk takin, ‘manganna leh thlaphânna’ i tawh hunah Pathian ngaihtuahnatea i rilru i tih khah a ngai a. (Sâm 119:143) Bible chhiar leh inzirna nei ziahin, chhût ngun ṭhîn ang che. Theih tâwp chhuahin rawngbâwlnaah tel la, kohhran inkhâwmnaahte kalin chhânna pe ṭhîn ang che. I Kristian unaute chu be pawh reng ṭhîn la. Mahnia inkulh hran duhna i nei a nih chuan do tlat rawh.—Thuf. 18:1.

16. Harsatna i tawh hunah eng rinhlelhnate nge i neih mai theih a, engtin nge chûngte chu i chinfel theih? (2 Korinth 10:4, 5)

¹⁶ I rinhlelhnate chu chingfel rawh. Harsatna i tawh hunah, mahni leh Jehova chungchânga rinhlelhna i neih mai theihte pawh tiamin, “kulhpui nghet takte” ang ngaih dân dik lo i neihte chu i hneh a ngai a. (2 Korinth 10:4, 5 chhiar rawh.) Chûng rinhlelhnate chu Bible leh inawpna pâwl tih chhuah thu leh hlatea kan hmuh “Pathian hriatna” hmangin kan hneh thei a ni. Entîr nân, Jehova chu i chungah a lâwm tawh lo nia rinhlelhna i nei em? Chutianga rinhlelhna i nei a nih chuan, tirhkoh Paula thiltawnte chu zir chiang ang che. A rawngbâwl chhûngin harsatna khirh tak takte a tuar a; mahse, chûngte chuan Krista rawngbâwltu a nihzia arinnghehtîr lehzual a ni. (2 Kor. 11:23-27) Tûn hmaa i thil sual tihte chu Jehova’n a ngaidam tak zet tih i ringhlel em? Rinhlelhna i la nei a nih chuan, Jehova’n sualte a ngaidam tih târ langtu Bible chângte chu la khâwm la. (Is. 43:25) Chumi hnuah, chûng Bible chângte chu chhiarin, chhût ngun ang che. (Sâm 119:97) Harsatna i tawhte chuan a chhiahhlawh rinawmte humhim tûra Pathian thutiam chungah rinhlelhna a neihtîr che em? Pathianin hrehawm tawrhna awm a phal chhan leh kan chungah eng pawh lo thleng se, thlarau lama min vênhim dân thute chu zir bingna nei ang che. (Sâm 91:9-12) Chu bâkah, chhiatna an tawhte hlawhtling taka hmachhawn theitu kan Kristian unaute thiltawn pawh chhiar bawk ang che.a

17. Harsatna kan tawh hunah eng nge kan tih ang?

¹⁷ Harsatnate awm lo ni ṭha chu tûnah i hmang mêk em? I hmang mêk a nih chuan Jehova chungah lâwm thu sawiin, a ṭhatna chungchâng chhût ngun nân i hun neihte chu a ṭha thei ang berin hmang ang che. (Thur. 7:14) Mahse, harsatnate i tawh hunah, thlîr dân dik nei tlatin, Jehova i rinna chu ti nghet zawm zêl ang che. Chutianga i tih chuan Jehova’n i “tawrh theihna tûrin thlêmna rualin tlân chhuahna kawng a siamsak” dâwn che a ni. (1 Kor. 10:13) A nih leh, kan Kristian unau duh takte chungchâng hi eng nge ni ve? Harsatna an tawh hunah engtin nge kan ṭanpui theih ang? A dawta thuziakah chumi chungchâng chu sawiho a ni ang.