Engtin Nge Rilru La Pêng Thei Thilte Chu I Do Vang?

1-2. Engtin nge thil pawimawh eng emaw chu rilru la pêngtu a nih theih?

I RILRU la pêngtu thil i do hnuhnûng ber ṭum kha engtik nge? I thil tih mêk aṭanga i rilru la pêngtu thil eng emaw hmachhawnin, thil pawimawh zâwk chungchângah thu tlûkna i siam a ngai pawh a ni thei a ni. Entîr nân, motor i khalh laiin i phone a rawn rî angah han mitthla teh. Phone call chu a pawimawh thei a; mahse, tûnah rih chuan, chu chu i rilru la pêngtu mai a ni tih leh i motor khalha rilru pêk chu thil pawimawh zâwk a ni tih i pawm a ngai a ni.

² Kan nunah hian thil pawimawh tih tûr tam tak kan nei a. Thlarau lam thil tihtea leh hun duantea rilru pêk tlat chu thil pawimawh ber a ni tih kan hria a. (Mt. 6:33) Fîmkhur taka motor khalhtute angin, Jehova mite chuan thil pawimawh ber lak ata an rilru la pêng thei thilte chu hmuh thiam an tum a ni.—Thuf. 4:25; Mt. 6:22.

3. Engvângin nge rilru la pêng thei thilte do hneh theih dân chungchâng ngaihtuahna chu kan hlâwkpui theih?

³ Thlarau lam thil tihte aṭanga rilru lâk pêna awm chu tu man kan duh lo va. Mahse, kan za hian awlsam taka kan rilru la pêng thei dinhmunte kan hmachhawn ṭheuh a ni. (Lk. 21:34-36) Chuvângin, Jehova rawngbâwlnaa rilru pe tlat tûra min ṭanpui tûrin (1) kan hmachhawn rilru la pêng thei thilte, (2) Isua’n rilru la pêng thei thilte a do hneh dân, leh (3) tûn laia rilru la pêng thei thil kan do hneh theih dânte kan sawiho vang.

ENG ANG RILRU LA PENG THEI THILTE NGE KAN HMACHHAWN?

4-6. Eng thilte’n nge awlsam taka kan rilru la pêng thei?

⁴ Rilru pêk ngai thil pawimawh tam tak kan mi mal nunah kan nei ṭheuh va. Entîr nân, hrilsêlna lama harsatna te, chhûngkua leh, mi mal thil ngaih pawimawh tûrte kan nei thei a. Ni e, chûng thilte chu a pawimawhin kan ngaihsak tûr a ni ngei mai. Mahse, chûngte chu kan rilru la pêngtu thilte an ni thei em? Kan ngaihtuahna an luah khah a, kan hun leh tha zawng zawng an ei ral a nih chuan, chûngte chu rilru la pêngtu thilte an ni tiin kan sawi thei ang.

⁵ Chu bâkah, hun hnuhnûngah kan awm tih târ langtu politics lama buaina te, sum leh pai harsatna te, hri lêng te leh, mihringte inkâra inrem lohnate chuan kan zînga tam tak chu mi mal takin min nghawng ṭheuh va. (2 Tim. 3:1) Chûng thilte kan tawh hunah, kan rilru a hah êm avângin chûngte chauh chu kan ngaihtuah ngut ngut thei a ni.

⁶ Chûng thil thlengte avânga an nuna buaina nasa tak hmachhawn mi ṭhenkhat hriat kan nei mai thei a. Chûng an thil tawnte avânga rilru hahna nasa tak an nei chu a hriatthiamawm hle. Mihringte hi hun rei tak chhûng rilru hah taka awm tûra siam kan nih loh avângin, mi ṭhenkhatin chûng hun khirh takte an hmachawn huna nun pângngai nei thei tawh lo nia an inhria pawh hi a mak lo ve! Chuvângin, mi ṭhenkhat chuan intih hlim nân leh intih hahdam nân hun tam tak hmangin an rilru tih zângkhai an tum a ni. A nih leh, chûng târ lan tâk dinhmunte zînga a eng emaw ber hmachhawn nia kan inhriat chuan eng nge kan tih theih? Pathian kan biakna ata rilru la pêng thei thilte do hneh tûra min ṭanpuitu tûr Isua hnên aṭanga kan zir theihte chu i lo ngaihtuahho vang u.

ENGTIN NGE ISUA’N RILRU LA PENG THEI THILTE A DO HNEH?

7. Isua’n eng ang rilru la pêng thei dinhmunte nge a hmachhawn?

⁷ Isua chu khawtlâng leh politics buaina ang chi thil tam tak avânga rilru lâk pêna awm thei a ni a. A hun laia mi tam tak chu an retheiin natna chi hrang hrang nei an ni. (Mt. 14:14; Mk. 14:7) Rom mite leh an Juda-puite hnên ngei aṭangin rorêl dik lohna an tuar bawk a. Mite chuan Isua’n thiltihtheihna leh thil mak tih theihna a nei tih an hmuhin, ani chu lala siam an duh a. (Joh. 6:14, 15) Chu bâkah, Isua chuan awlsam taka khawvêl rorêltu ni tûra thlêmtu Setana beihna a tâwk bawk. (Mt. 4:8, 9) A tawrh mai tawh tûr hrehawmna zawng zawng chungchâng a zirtîrte a han hrilh chuan, a ṭhian hnai ber zînga pakhat tirhkoh Petera’n: “Lalpa, chutiang thil chu sawi suh,” tia hrilhin nun kawng hahdam zâwk zawh tûrin Isua chu a fuih a ni.—Mt. 16:21, 22.

8. Engtin nge Isua’n rilru la pêng thei thilte a do hneh?

⁸ Engtin nge Isua’n rilru la pêng thei thilte chu a do hneh? A do hneh dân kawng thum a awm a. Pakhatna, Jehova ngaihtuah dân a entawn a ni. (Joh. 8:28; 14:9) Pahnihna, thlarau lam thil tihahte a buai reng a. (Mt. 9:35) Pathumna, thil pawimawh zâwkte chu a hre reng a ni. (Joh. 4:34) Setana thlêmna chu a hnâwl tlat a, duhsak taka Petera thurâwn pêk chu Pathian ngaihtuah dân nên a inmil loh avângin a pawm lo bawk. (Mt. 4:10; 16:23) Isua chuan mite ngaihtuah dân te, thusawi te leh, thil tihte chu Pathian thiltum a tih hlawhtlinna dâltu nihtîr a phal lo. Ni e, Isua hmachhawn nêna inang lo rilru la pêng thei thil dangte kan tâwk thei a. Mahse, Isua entawnin kan rilru la pêng thei thilte chu kan do hneh thei a ni.

ENGTIN NGE KAN RILRU LA PENG THEI THILTE KAN DO HNEH THEIH ANG?

9. “Jehova duh zâwng chu eng nge ni tih hre reng,” tih awmzia chu eng nge ni? (Ephesi 5:17)

⁹ Jehova ngaihtuah dân anga ngaihtuah thiam zir rawh. Chutianga tihna chuan “Jehova duh zâwng chu eng nge ni tih hre reng” tûrin min ṭanpui thei a ni. (Ephesi 5:17 chhiar rawh.) Bible chhiarna leh chhût ngunna hmangin Jehova ti lâwmtu thilte chu kan hre thei a. Bible-ah kan dinhmun tawh ang tak târ lanna a awm loh hunah pawh, chutiang chuan kan ti thei a ni. Engtin nge? Jehova ngaihtuah dânte hre bel a, chumi nêna inmila thil tihna hmangin a ni.

10. Engtin nge Jehova ngaihtuah dân kan zir theih?

¹⁰ Jehova ngaihtuah dân chu Bible zirna leh mite a dâwr dân chhût ngunna hmangin kan zir thei a. (Jer. 45:5) Chûng Bible thute kan chhiar hunah, hêng zawhnate hi kan inzâwt thei a ni: ‘He thu hian Jehova chungchâng eng nge min zirtîr? Engtin nge he thu hi ka ngaihtuah dân thununtîrtu atân ka hman theih?’ tiin. Ni e, A ngaihtuah dânte chu kan ngaihtuah dânte aiin a sâng zâwk hle si a. (Is. 55:9) Chuvângin, a duh zâwnga thil tih dân min zirtîr tûra amah rinchhan chu thil inâwm tak a ni. (Sâm 143:10) Chu bâkah, a ngaihtuah dân hre thiam tûr leh amah anga ngaihtuah thiam ve tûrin rinnghehna nên a ṭanpuina kan dîl thei bawk.—1 Joh. 5:14.

11. Jehova’n eng ti tûrin nge min duh?

¹¹ Jehova anga ngaihtuah thiam kan zir zêl rualin, he khawvêl tâwpna atâna kan lo inpeih sa theih nân, kan rilru la pêng thei thilte pumpelh tûrin min duh tih kan hre thiam a. (Mt. 24:44) Lungkhamnain min chîm buai chu a duh lo a ni. (Mt. 6:31, 32) Chuvângin, kan hrisêlna te, hna te, in leh lo te, mi mal thil te leh, chhûngkaw thilte avânga lungkhamnain kan rilru a luah khah hunah, Jehova chuan kan mamawh ṭanpuina min pe a. Kan harsatnate hmachhawn thei tûra kan mamawh finna leh chakna min pe tûra amah rinchhan tûrin min sâwm a ni.—Sâm 55:22; Thuf. 3:5-7.

12. Khawvêla thil thlengte avânga kan lungkhamna chin fel theih dân kawng khat chu eng nge ni? (Matthaia 5:3)

¹² Thlarau lam thil tihahte buai reng rawh. Kan za hian kan thunun theih loh khawvêla thil thlengte avângin lungkhamna eng emaw chen kan nei ṭheuh va. Chuvângin, kan thunun theih loh thilte avânga rilru lâk pêna kan awm loh nân, thlarau lam thiltihte chu kan ngaihven tlat a ni. Jehova’n mihringtea a dah kan thlarau lam mamawhna phuhru tûra ṭan kan lâk hian kan hlim thei a. (Matthaia 5:3 chhiar rawh.) A Thu, Bible zira Jehova hriat chianna hmangin, leh rawngbâwlna chanvo hlu kan neih eng pawha theih tâwp chhuaha amah biakna hmangin chu mamawhna chu kan phuhru thei a ni. Chutianga kan tih chuan Jehova kan ti lâwmin, kan hun neihte a ṭha thei ang bera hmang kan ni ang.—Thuf. 23:15.

13. Engtin nge ‘a ṭha thei ang bera kan hun neihte kan hman’ theih?

¹³ Kristiante kan nih angin, ‘a ṭha thei ang bera kan hun neihte hman’ chu kan tum tlat a. (Eph. 5:15, 16) Hemi chungchângah hian, Bible-in nî tin kan thil tihnaah ṭha lehzuala hun hmang tûrin min fuih mai lo tih kan hria a. Chu aiin, Jehova’n he kalhmang suaksual tak a tih tâwp hmaa kan hun hman dân chu ngun taka ngaihtuah tûrin min fuih zâwk a ni. Engtin nge kan hun chu a ṭha thei ang bera kan hman ang? Chatlak lova hmuh tûr awm reng chanchin ṭha lo chhuak thar ber berte tâna hun kan hmang tam lutuk a nih chuan, chûngte chuan kan rilru a la pêng ang a, min ti lunghnualin, biakna atâna kan ṭhahnemngaihna a ti kiam thei a ni. Kan chanchin en leh chhiarte atâna kan hun hman zât tih tlêm chu a va ṭha zâwk dâwn em! Ṭûl lo taka rilru ipikna kan pumpelh thei ang a, min ti harhvâng thei thlarau lam thil tihahte kan buai reng thei ang. A theihna hmun apiangah tlawhkîrna tam lehzual neih ang chi, rawngbâwlna zauh belh dân kawngte chu kan zawng thei a. Mite chu “chhandama an awm leh thutak hriatna dik an neih” theih nâna anmahni ṭanpui theihna hun remchâng kan neih apiang hman ṭangkai a pawimawh tak zet tih kan hria a ni.—1 Tim. 2:4.

14. Eng kawngtein nge thlarau lam thil tihtea buai rengna chuan min ṭanpui theih? (Milem en bawk rawh.)

¹⁴ Thlarau lam thil tihtea kan buai reng hian, kan chênna hun chungchângah thlîr dân inbûk tâwk tak kan nei reng thei a. Politics lama buaina te, ei leh bâr harsatna te leh, hri lêngte kan hmachhawn zêl chung pawhin, mangang lutukin kan awm lo. Chûng thil thlengte chu Bible hrilh lâwkna a thleng famkim tih finfiahna a ni tih kan hria a. Hlauh avânga ṭûl lo taka rilru kal pêntîr aiin, kan hma lam hun atâna Jehova thiltum chungchângah rinnghehna kan nei zâwk a. Chûng harsatnate chu hmachhawn tûrin Jehova’n min ṭanpui ang tih kan rinchhan zêl hian rilru thlamuanna kan nei thei a ni.—Sâm 16:8; 112:1, 6-8.

15. “Rilru fîm tak” neihna chuan eng ti tûrin nge min ṭanpui theih? (1 Petera 4:7)

¹⁵ Thil pawimawh zâwkte chu hre reng rawh. Tûn laia mi tam tak chuan he kalhmang tâwp hun tûr chungchâng ni lovin, intih hlimna lam ringawt an ngaihven a. Intih hlimna a âwm tâwka neih chu a ṭhat rualin, khawvêl thlîr dân inthununtîr lo tûr chuan “rilru fîm tak” kan neih a ngai a ni. (1 Petera 4:7 chhiar rawh.) Chu chuan kan tân eng awmzia nge a neih? Awmze tam tak a neih theih zînga pakhat chu, intih hlimna chungchângah thlîr dân inbûk tâwk tak nei reng tûr leh thu tlûkna fingte siam tûrin ngaihruat thiamna kan nei tihna a ni a. Chutianga thu tlûkna fingte kan siam chuan, Jehova ngaihtuah dân kan entawnin, thil pawimawh zâwkte chu kan hre thiam tih kan lantîr a ni ang.—2 Tim. 1:7.

16. A thih hun a hnaih khân, Isua’n eng nge a ngaihven tlat?

¹⁶ Isua chuan thil pawimawh ber chu a rilruah a vawng tlat a. He leia a thih hma hun khirh tak chhûng khân, rinawm tlat leh Pathian duh zâwng hlen chhuah chu a rilru zawng zawngin a ngaihven tlat a ni. Chumi avâng chuan, tih tak zetin a ṭawngṭai a. Harhvâng renga awm Isua nêna inang lo takin, a zirtîrte erawh ‘lungngaia an chauh êm avângin’ an muhîl a ni.—Lk. 22:39-46; Joh. 19:30.

17. Engvângin nge mi tam takin social media an hman a; mahse, chu chu engtin nge rilru la pêngtu thil a nih theih? (Milem en bawk rawh.)

¹⁷ Isua zirtîrte ang bawkin, keini pawh rilru hah taka awm châng kan nei thei a. Tâwpna chhinchhiahna thil thlengte chuan lungkhamna min thlen thei bawk. Tûn laia mi tam tak chuan an buainate theihnghilh tumin social media-ah hun tam tak an hmang a. Khawvêl hmun hrang hranga awm an ṭhiante leh chhûngkhatte biak pawh nân leh chanchin te, thlalâk te leh, thil dangte theh darh nân an hmang a ni. Intih hlimna atân hun an hmang nasa hle bawk. Chu achhapah, nî tin hian chanchin chhiar tûrte leh en tûr thil thar tam takte atân an hun leh tha nasa takin an la khawhral cheu a ni. Social media chungchânga thlîr dân inbûk tâwk tak nei thei tûrin, heti hian kan inzâwt thei a ni, ‘Social media ka hmanna hian min ti harhvâng nge ni a, thil pawimawh zâwkte aṭangin ka rilru min lâk pênsak zâwk?’ tiin.

18. Engvângin nge intih hlimna chungchânga duh thlanna kan siam hunah ngaihruat thiamna kan hman a ngaih?

¹⁸ Movie te leh internet-a video tâwi te kan en a, a nih loh leh video games-te kan khêl a nih chuan ngaihruat thiamna kan hman a ngai a. Chûng thil tihte chu a nuam theiin, min ti hahdamtu an ni thei ngei mai. Mahse, eng ang intih hlimna nge kan thlan ang a, engtianga tam nge kan thlan ang tih chungchângah ngaihruat thiamna kan hman a ngai a. Video pe chhuaktute chuan a entute chu thil thar dang an kawhhmuh belh zêl a, chu chuan tharum thawhna leh nungchang bawlhhlawhna lamah a hruai thei a ni. Asia khawmuala kan unaupa pakhat chungah chutiang chiah chu a thleng a. A tîr chuan, online aṭangin movie lâr zualte a en a. An kawhhmuh video tâwite a han en zawm zêl hnu chuan, nungchang bawlhhlawhna lam thil lannate chu a en chho ṭan a. A tâwpah, saruak lem video-te a en ṭan ta hial a ni. Mahse, thil lâwmawm tak chu, kohhran upate leh a ṭhian hnai takte ṭanpuina zârah, chûng video pêk chhuahna app-te chu a paih bo mai bâkah, a phone chu chin tâwk neiin a hmang tawh a ni. He thiltawn hian intih hlimna chungchânga duh thlanna kan siam hunah ngaihruat thiamna kan hman a ngaih chhan chiang takin a târ lang a ni.

19. Intih hlimna atân hun kan hmang tam lutuk a nih chuan eng nge thleng thei?

¹⁹ Intih hlimna leh chawlh lâk chungchângah pawh ngaihruat thiamna kan hman a ngai bawk a. Kan za hian intih hah dam leh chawlh lâk kan mamawh chângte a awm a, chu chu kan tân a ṭha a, hrisêl tûrin min ṭanpui thei a ni. Chutih rualin, chûng thilte kan ngaihven lutuk a nih chuan, inbûk tâwk taka nun harsa kan ti ṭan theiin, thil pawimawh zâwkte lak ata kan rilru lâk pênin a awm thei a ni. (Phil. 1:10) Kan za hian kan thil tih tûr leh chumi atâna hun kan hman zât tûr chungchângah thu tlûkna kan siam ṭheuh tûr a ni a. Chutianga thu tlûknate i siam hunah, heti hian inzâwt ang che: ‘Intih hlimna leh chawlh lâk atâna ka hun hman zâtte chuan ngaihruat thiamna ka hmang tih a lantîr em? Thil pawimawh tak takte chu ka nunah ka dah hmasa ber tih ka chian em? “Thil zawng zawng tâwpna” atân ka lo inbuatsaih lâwk em?’ tiin.

20. Engtin nge rilru la pêng thei thilte do chu kan hlâwkpui theih?

²⁰ Kan thlarau lam thil tihte leh hun duante aṭanga rilru la pêng thei thilte dona chu kan hlâwkpui a. (Is. 48:17) Jehova ṭanpuinain, nuna harsatnate chu kan hmachhawn thei lehzual ang. Khawvêla thil thlengte avângin a lutukin lungkhamna kan nei lo vang a. Chu bâkah, intih hlimna chu kan nuna thil pawimawh ber kan nihtîr hek lo vang. Chuvângin, Jehova ngaihtuah dân anga ngaihtuah a, thlarau lam thil tihtea buai reng a, thil pawimawh zâwkte hriat reng chu i tum zawm zêl ang u. Chutiang chuan, rilru la pêng thei thilte chu kan do hneh mai ni lovin, ‘nunna tak tak chu nghet takin kan vuan’ thei dâwn a ni.—1 Tim. 6:19.