“Duhawm Tak I Ni Si A”!

1-2. Engtin nge Jehova mit hmuhah kan hlu tih kan hriat theih?

JEHOVA chhiahhlawh hlu takte zîngah pawh hlu lo nia inhria ṭhenkhat an awm a. Hnuaichhiah taka cheibâwl an nih avânga chutianga inngai an ni thei a ni. Chutiang chu i tawng ve em? I tawng a nih chuan, engtin nge Jehova mit hmuhah i hlu tih i chian theih?

² Jehova’n mite a cheibâwl dân leh a thlîr dân târ langtu Bible-a chanchinte ngaihtuah chu i hlâwkpui thei a. A Fapa Isua chuan mite a cheibâwl dânah anni chu a ngai pawimawhin a zah tih a lantîr a. Chutianga tihna hmangin, hlu lo nia inhria mi inngaitlâwm takte chu amah leh a Pain an ngaihlu tak zet tih a târ lang a ni. (Joh. 5:19; Heb. 1:3) He thuziakah hian: (1) Isua’n mite an hlutna hre tûra a ṭanpui dân leh, (2) Pathian mit hmuhah kan hlu tak zet tih kan chian theih dânte chu kan sawiho vang.—Hag. 2:7.

ISUA’N AN HLUTNA HRE TURA MITE A ṬANPUI DAN

3. Engtin nge Isua’n ṭanpuina dîla amah rawn pantu Galili mite chu a cheibâwl?

³ Galili biala Isua’n thu a hrilh ṭum thumnaah, hmun hrang hranga mite chu a thu ngaithla tûr leh anmahni ti dam tûrin a hnênah an lo kal a. Isua chuan anni chu ‘vêngtu nei lo berâm ang maia châwm ṭhat loh leh ngaihthahin an awm,’ tih a hmu a ni. (Mt. 9:36, NWT) An sakhaw hruaitute chuan eng atân maha an ngaih loh avângin anni chu “ânchhe dawng,” tiin an ko hial a. (Joh. 7:47-49, NWT) Mahse, Isua’n anni chu zirtîrin leh an natnate tih damsakin a ngaih pawimawhzia a lantîr a. (Mt. 9:35) Chu bâkah, mi tam lehzual ṭanpui tûrin a tirhkohte chu thu hrilh dân a zirtîr a, dam lote ti dam tûrin thiltihtheihna a pe bawk a ni.—Mt. 10:5-8.

4. Isua’n mite hmuhsita awm a thu ngaithlatute a cheibâwl dân aṭangin eng nge kan zir?

⁴ A thu ngaithlatute chu zahawm tak leh ṭha taka cheibâwlin, Isua chuan mite’n an ngaihnêpte chu amah leh a Pa mit hmuhah an hlu tih a lantîr a. Jehova rawngbâwl chung pawha hlutna nei lo nia i inhria a nih chuan, hmuhsita awm a hnên aṭanga inzîr duhte Isua’n a ngaihsak dân chu ngaihtuah ang che. Chutianga tihna chuan Jehova mit hmuha i hlutzia hmu thiam tûrin a ṭanpui dâwn che a ni.

5. Isua’n a tawh Galili hmeichhe pakhat dinhmun chu sawi rawh.

⁵ Isua chuan mipuite a zirtîr mai ni lovin, mi tinte chu a ngaihsak a. Entîr nân, Galili biala rawng a bâwl chhûng khân, kum 12 chhûng thi pût avânga hrehawm tuar hmeichhe pakhat a tâwk a. (Mk. 5:25) Dân ang chuan, ani chu a thianghlim lo va, amah khawihtu apiang pawh an thianghlim lo a ni. Chu chuan mi dangte nêna inpawh a ti harsa hle ngei ang. Chu bâkah, inkhâwmnaah leh kût nîahte chuan mi dangte rualin Jehova a be thei lo va. (Lev. 15:19, 25) Tisa leh rilru lamah hrehawm a tuar tih a chiang hle.—Mk. 5:26.

6. Hmeichhe thi pût chuan tih dam ni tûrin eng nge a tih?

⁶ Chu hrehawm tuar hmeichhia chuan Isua tih dam duh mah se, a ṭanpuina dîlin a pan lo a ni. Engvângin nge? A natna avângin a zâm a ni thei a; a nih loh leh, Dân anga thianghlim lova ngaih a nih avângin, mipui zînga a va kal chuan Isua’n a lo hnâwl ang tih a hlauh vâng pawh a ni thei bawk. Chuvângin, Isua kawrfual chu a va dek a; tih dam a ni dâwn tih a ringnghet tlat a ni. (Mk. 5:27, 28) A rin ang ngei chuan tih dam a ni ta a. Chu veleh, Isua’n amah dektu hriat tuma a zawh chuan, hmeichhia chuan a deh thu a hrilh a ni. Engtin nge Isua’n a chhân lêt?

7. Engtin nge Isua’n hrehawm tuar hmeichhia chu a cheibâwl? (Mk. 5:34)

⁷ Isua’n hmeichhia chu zah tak leh ngilnei takin a cheibâwl a ni. Ani chu ‘hlau leh khûrin’ a awm tih a hmu a. (Mk. 5:33, NWT) A rilru awm dân tûr chu hre rengin, dam tak leh ngilnei takin a bia a. Hawihhâwmna mai ni lo, ngilneihna leh hmangaihna ṭawngkam duhawm tak hmangin, “ka fanu,” tiin a ko hial a ni. (Marka 5:34 chhiar rawh.) Hei hi Bible-a Isua’n “ka fanu,” tia hmeichhia a koh târ lanna awm chhun a ni a. Hmeichhia chu a hlauthâwng hle tih a hmuh avânga chu ṭawngkam ngilnei tak chu hmang a ni thei a ni. Chu thil a thlen hnua, hmeichhia a thlamuan dân tûr chu han ngaihtuah teh! Isua’n ngilnei takin be lo se la chuan, hmeichhia chu a natna tih dam ni mah se, inthiam lohna nasa tak neiin a awm reng dâwn a. Chu aiin, Isua’n ani chu hmangaihna ngah tak kan Pa vâna mi fanu duh tak a ni tih inhre tûrin a ṭanpui zâwk a ni.

8. Brazil rama unaunu chuan eng harsatnate nge a hmachhawn?

⁸ Tûn laiah pawh, Pathian chhiahhlawh ṭhenkhat chuan an rilru lam nghawngtu hrisêlna lama harsatnate an hmachhawn a ni. Entîr nân, Brazil rama regular pioneer unaunu Maria-ia chu kut ke kim lovin a piang a. Ani chuan: “Ka lan dân avângin school-ah hnehchhiah ka tuar ṭhîn a. Hming mawi lo tak takte’n min ko fo va. Ka chhûngte ngei pawhin mahni insitna nei tûr zâwnga min cheibâwl châng a awm a ni,” tiin a sawi.

9. Maria-i chu Jehova mithmuhah a hlu tih hre thiam tûrin engin nge ṭanpui?

⁹ Maria-i chuan eng ṭanpuina nge a dawn? Jehova Thuhretu a rawn nih chuan, unaute chuan ani chu thlamuanin, Jehova’n a thlîr anga inthlîr thiam tûrin an ṭanpui a. Ani chuan: “Min ṭanpuitute hming zawng zawng hi ka notebook-ah ziak chhuak dâwn ila chuan a leng hauh lo vang! Thlarau lam chhûngkaw ṭha tak min pêk avângin, thinlung takin Jehova chungah ka lâwm a ni,” tiin a sawi. Maria-i chu a thlarau lam unaute chuan Pathian mit hmuhah a hlu tih hre thiam tûrin an ṭanpui a ni.

10. Mari Magdalini chuan eng harsatnate nge a hmachhawn? (Milem en bawk rawh.)

¹⁰ Isua’n hmeichhe dang, Mari Magdalini a ṭanpui dân hi han ngaihtuah teh. Ani chu ramhuai pasarih manin a awm a! (Lk. 8:2) Mak tak taka a chêt avânga mite pumpelh a nih a rinawm. Chu a nun beidawnthlâk tak avâng chuan, mi dangte hnâwl, zahpui leh, ṭanpuitu nei lo angin a inhre ngei ang. Isua’n amah ti hrehawmtu ramhuaite chu hnawh chhuahsakin, ani chu a hnungzuitu rinawm tak a rawn ni ta a ni. Eng kawng dangin nge Isua’n Mari Magdalini chu Pathian tân a hlu tih hre thiam tûra a ṭanpui?

11. Engtin nge Isua’n Mari Magdalini chu Pathian tân a hlu tih a lantîr? (Milem en bawk rawh.)

¹¹ Isua’n Mari Magdalini chu rawngbâwlnaa amah zui tûrin a sâwm a.b Chuvângin, Isua’n mi dangte a zirtîrna thu a hriatte chu a hlâwkpui chhunzawm a ni. A thawhleh nîah pawh, Isua chu a hnênah a inlâr a. Chumi nîa Isua’n a biak hmasak ber a zirtîrte zînga pakhat a ni. A thawhleh thu hrilh tûrin a zirtîr dangte hnênah a tîr bawk a. Chûngte chuan Mari Magdalini chu Jehova tân a hlu tak zet tih a târ lang chiang hle!—Joh. 20:11-18.

12. A seilen dânin Lidia-i chu mi dangte hnâwl nia a inngaihtîr theih chhan hrilhfiah rawh.

¹² Mari Magdalini angin, tûn laia mi tam tak chuan mi dangte hnâwl nia inhriatna an nei a ni. Spain rama unaunu Lidia-i chuan a nuin a pai laiin tih tlâk a tum thu a sawi a. Naupang tê a nih laia a ngaihsak loh dân leh ṭawngkam na tak taka a cheibâwl dânte chu a la hre reng a ni. Lidia-i chuan: “Mi dangte pawm leh hmangaih nih chu nuna ka thil tum ber a ni a. Ka nu’n mi tlâktlai lo anga min cheibâwl ṭhin avângin, chu chuan eng pawh ti mah i la, tu ma hmangaihna dawng thei tawh lo tûr nia inhriatna min neihtîr a ni,” tiin a sawi.

13. Engin nge Lidia-i chu Jehova tân a hlu tih hre thiam tûra ṭanpui?

¹³ Lidia-i’n thutak a zir hnu chuan, ṭawngṭaina leh mi mala inzirna bâkah, unaute ṭawngkam leh thil tih ngilnei takte chuan Jehova mit hmuhah a hlu tih hre thiam tûrin a ṭanpui a. Ani chuan: “Ka pasalin min hmangaihzia min hrilh fo va. Ka mize ṭhate min hriat nawntîr ṭhîn bawk a. Ka ṭhian duh takte pawhin chutiang chuan an ti a ni,” tiin a sawi. Jehova mit hmuhah a hlu tih hre thiam tûra ṭanpui ngai tu emaw hriat chhuah i nei em?

JEHOVA MIN THLIR ANGA KAN INTHLIR THEIH DAN

14. Engtin nge 1 Samuela 16:7 chuan Jehova’n mihringte a thlîr dân hre thiam tûra min ṭanpui? (“Engvângin Nge Jehova’n A Mite A Ngaihhlut?” tih bâwm chu en bawk rawh.)

¹⁴ Jehova’n khawvêl thlîr dân angin a thlîr lo che tih chhinchhiah rawh. (1 Samuela 16:7 chhiar rawh.) I lan dân, i sum leh pai dinhmun, a nih loh leh i zir sân zâwng ṭanchhanin i hlutna a teh lo va. (Is. 55:8, 9) Chuvângin, khawvêl tehna ni lovin, Jehova tehna milin i hlutna chu hmuh thiam tum ang che. Elija, Naomi leh Hani-te anga an hlutna chungchânga rinhlelhna neitute Jehova’n a ngaihhlut dân târ langtu Bible-a chanchinte i chhiar thei a. Jehova’n a hmangaih chein, a ngaihlu tak zet che tih nemnghettu i thiltawnte chu i ziak chhuak thei bawk. Chu bâkah, Jehova mit hmuhah i hlu tih târ lanna kan thu leh hla chhuahte i chhiar thei bawk a ni.c

15. Engvângin nge Jehova’n Daniela chu mi “duhawm tak” anga a thlîr? (Daniela 9:23)

¹⁵ I rinawmna chuan Jehova mit hmuhah mi hlu tak a nihtîr che tih hre rawh. Zâwlnei Daniela chu kum 100 vêl dâwn a nih khân, “chau êm êm” leh lunghnual takin a awm a. (Dan. 9:20, 21, NWT) Engtin nge Jehova’n a tih chak? Vântirhkoh Gabriela hmangin, ani chu a tâna mi “duhawm tak” a ni tih leh, a ṭawngṭainate chu A ngaihthlâksak tih a hriat nawntîr a ni. (Daniela 9:23 chhiar rawh.) Engvângin nge Daniela chu Pathian tâna mi duhawm tak a nih? Felna a ngainat vâng leh a rinawm vâng a ni. (Ezek. 14:14) Jehova’n Daniela chanchin chu min thlamuan tûrin a Thu-ah a chuantîr a. (Rom 15:4) Nang pawh, Jehova’n i ṭawngṭainate chu ngaithlain, dikna i ngainat avâng leh rinawm taka a rawng i bâwl avângin a ngaihlu tak zet che a ni.—Mik. 6:8; Heb. 6:10.

16. Engin nge Jehova chu hmangaihna ngah tak Pa anga thlîr tûra ṭanpui thei che?

¹⁶ Jehova chu nangmah hmangaihtu Pa angin thlîr rawh. Ani chuan i fel lohna hmuh a tum lova, ṭanpui che a duh zâwk a ni. (Sâm 130:3; Mt. 7:11; Lk. 12:6, 7) Chumi chhût ngunna chuan hlutna nei lo nia inhria mi tam takte chu a ṭanpui tawh a ni. Entîr nân, a pasalin kum tam tak chhûng ṭawngkam râwng tak taka a ṭawng khum ṭhin avânga mite hnâwl leh ṭangkai lo nia inhria Spain rama unaunu Eliana-i thusawi hi han ngaihtuah teh. Ani chuan, “Hlu lo nia ka inhriat apiangin, Jehova’n duat taka min pawmin min vênghim angin ka inmitthla ṭhîn,” tiin a sawi. (Sâm 28:9) South Africa-a unaunu Lauren-i pawhin, “Jehova’n hmangaihna hruiin a lamah min hîp a, hêng kum tam tak chhûng hian ka hnaiha awm tlatin, mi dangte zirtîr tûr hial pawha min hmang a nih chuan, mi hlu tak leh ṭangkai tak angin min thlîr tih ka chiang a ni,” tiin a sawi.—Hos. 11:4.

17. Jehova pawm i hlawh tih ring nghet tûrin engin nge ṭanpui thei che? (Sâm 5:12) (Milem en bawk rawh.)

¹⁷ Jehova pawm i hlawh tih ringnghet tlat rawh. (Sâm 5:12 chhiar rawh.) Davida’n Jehova lawm hlawh nih chu mi felte vênghimtu “phaw” nên a tehkhin a. Jehova pawm i hlawh tih leh a ṭanpui che tih i hriatna chuan hlu lo nia inhriatna lakah a vênghim thei che a ni. A nih leh, engtin nge Jehova pawm i hlawh tih i inhriat theih ang? Kan hriat tawh angin, Jehova’n a Thu hmangin min hriattîr a. Chu bâkah, a mit hmuhah i hlu tih hriat nawntîr tûr chein, kohhran upa te, ṭhian ṭha te leh mi dangte a hmang ṭhîn bawk a ni. Chutianga a hman hunah engtin nge i chhân lêt ang?

18. Engvângin nge fakna thute chu kan pawm ang?

¹⁸ Nang mah hre chianga hmangaihtute hnên aṭanga fakna thute chu lâwm takin pawm la. Jehova’n a pawm i hlawh tih hriattîr tûr chein anni chu a hmang thei tih theihnghilh suh ang che. Kan târ lan tâk unaunu Eliana-i chuan: “Zâwi zâwiin, mi dangte fakna thute chu thinlung taka pawm ka zir a. Harsa mah se, Jehova’n ti tûrin min duh tih ka hria,” tiin a sawi. Eliana-i chuan hmangaihna nei taka upate ṭanpuina chu a hlâwkpui hle bawk a. Tûnah chuan, pioneer thawkin, Bethel-ah remote volunteer niin rawng a bâwl mêk a ni.

19. Engvângin nge Pathian mit hmuhah i hlu tih i rinngheh theih?

¹⁹ Isua’n ngilneihna nei takin, kan Pa vâna mi tân kan hlu tak zet tih min hriat nawntîr a. (Lk. 12:24) Chuvângin, Jehova mit hmuhah kan hlu hle tih kan chiang thei a ni. Chu chu i theihnghilh ngai lo vang u! Chu bâkah, mi dangte chu Pathian mit hmuhah an hlu tih hre thiam tûrin theih tâwp chhuahin i ṭanpui bawk ang u!