1925—Kum Za Liam Ta Khân

BEISEINA TIH KHAWTLAI

Bible Zirlai tam tak chuan kum 1925-ah lei chu Paradis-a a chan an beisei a ni. Engvângin nge? A hnua Governing Body member nia rawngbâwl Unau Albert Schroeder-a chuan: “Krista hnungzuitu hriak thih la bângte chu vâna hruai chhoh niin, Abrahama, Davida leh hmân laia Pathian chhiahhlawh rinawm dangte chu lei paradis-a rorêl tûra kaihthawh an nih kan beisei a ni,” tiin a sawi. Hunte a liam zêla, an beisei anga thil a thlen tâk lohvah chuan, mi ṭhenkhat chu lunghnual takin an awm a ni.—Thuf. 13:12.

Lunghnualna nei mah se, Bible Zirlai tam tak chuan thu hrilh rawngbâwlnaa buai rengin, Jehova Thuhretute nia an mawhphurhna pawimawhzia chu an hre chiang lehzual a ni. Mi tam tak hnêna thutak thlen tûra an hmalâkna hi han ngaihtuah teh.

RADIO BROADCASTING NEIH BELH A NI

Kum hmasaa, WBBR radio station ṭha taka an sak zawh hnuah, Illinois, Chicago khaw bulah radio station dang an din leh a. Chu station thar chu WORD (THU) tia koh a ni. A saknaa ṭanpuitu radio engineer Ralph Leffler-a chuan, “Thlasik zân vâwt takahte hian, hmun hrang hranga mite chuan WORD (THU) chu an ngaithla ṭhîn,” tiin a sawi. Entîr nân, kilometer 5,000-a (mêl 3,000) hla Alaska, Pilot khawpuia chêng chhûngkaw khat chuan kan broadcast hmasa ber chu an ngaithla a. An ngaihthlâk zawh chuan, station-a thawk unaute hnênah mi ti chak thei tak thlarau lam chaw an buatsaihsak avânga an lâwmthu lehkha ziakin an thawn a ni.

Chutianga mi tam takin an ngaihthlâk theih chhan chungchângah, kum 1925, December 1 chhuak Vênnainsâng chuan, heti hian a sawi a ni: “WORD (THU) chu current watt 5,000 hmang, United States-a station ropui ber zînga pakhat niin, chu chu United States ram chhûnga khaw chhak leh khaw thlang tuipui kama chêng mi tam takin an ngaithla thei a. Chutiang chuan, mite chuan thutak chu an rawn ngaihven ṭan a ni,” tiin.

Chutih hun laiin, Bible Zirlaite chuan Canada ramah radio hmangin chanchin ṭha chu theh darh tumin hma an la ve mêk bawk a. Kum 1924-ah, CHUC tia koh radio station chu Saskatchewan, Saskatoon khawpuiah din a ni a. Chu chu Canada rama sakhaw lam atâna hman radio station hmasa ber a ni. Kum 1925-ah chuan chu station chu hmun lian zâwka sawn a ngai a. Chuvângin, Watch Tower Society chuan Saskatoon-a theater hlui tawh tak Regent Building tia an koh chu leiin a thuam ṭha a; chutah chuan broadcasting studio-te chu a sawn a ni.

Chu station avâng chuan, Saskatchewan-a chêng mi tam tak chuan chanchin ṭha chu a vawikhatna atân an rawn hriat theih phah a ni. Entîr nân, khaw kilkhâwr pakhata chêng Mrs. Graham-i chuan kan broadcast a ngaihthlâk hnu chuan, kan thu leh hla chhuah neih a duh thu lehkha ziakin a thawn a. Unau George Naish-a chuan, “A ṭanpui dîlna chu a hmanhmawhthlâk êm avângin, Studies in the Scriptures tih lehkhabu chu a bu pumin kan thawn ta a ni,” tiin a sawi. Rei lo te hnuah, Mrs. Graham-i chuan Lalram chanchin ṭha chu mi tam tak hnênah a hrilh theih phah a ni.

THUTAK PAWIMAWH TAK

Kum 1925, March 1 chhuak Vênnainsâng-ah chuan “Hnam Pianna,” tih thupui nei thuziak pawimawh tak pakhat a chuang a. Engvângin nge chu thuziak chu a pawimawh êm êm? Hun eng emaw chhûng chu, Bible Zirlaite chuan thlarau sualte leh leia sakhuana, sumdâwnna leh mihring sawrkârte chu Setana thununna hnuaia awm an ni tih an lo hre tawh a. Mahse, chu thuziak hmangin, “bâwih rinawm leh fing tak” chuan kan unaute chu Setana inawpna pâwl laka hrang hlak, pâwl pakhat Jehova’n a nei tih hrethiam tûrin a ṭanpui a ni. (Mt. 24:45, NWT) Chu bâkah, kum 1914-ah Pathian Ram chu din a ni a; ‘vânah indona lo chhuakin’, Setana leh a ramhuaite chu leia paih thlâk an nih thu a hrilhfiah bawk.—Thup. 12:7-9, NWT.

Mi ṭhenkhat chuan chu hriatthiamna thar chu pawm harsa an ti hle a. Chumi chungchângah, kan târ lan tâk thuziak chuan: “Vênnainsâng thuziak chhiartute zîngah he hriatthiamna hi pawm thei lo an awm chuan, thinlung thianghlim tak pua, dawhthei taka Lalpa nghâk tûrin kan fuih duh a ni,” tiin a sawi.

Colporteur (tûna pioneer tia kan koh) Tom Eyre-a chuan chu kan hriatthiamna thar chungchânga Bible Zirlai a tam zâwkte chhân lêt dân chu heti hian a sawi a ni: “Thu Puan 12 hrilhfiahna thar avâng chuan unaute chu an phûr hle a. Pathian Ram chu vânah din a ni tawh tih kan hriat chuan, chu chanchin ṭha chu mite hnêna hrilh kan châk êm êm a. Chu chuan nasa lehzuala thu hril tûr leh Jehova’n nakin huna thil ropui tak min tihsak tûrte hmuthiam tûrin min ṭanpui a ni,” tiin.

JEHOVA TANA THU HRILHNA

Tûn laiah, Jehova Thuhretute chuan Isaia 43:10-a: “Nangni hi mi hriatpuitute in ni, ka chhiahhlawh ka thlana pawh chu, LALPAN a ti,” tih thu hi kan hre chiang êm êm a. Kum 1925 hma chuan, he Bible châng hi kan thu leh hla chhuahah târ lan a ni khât hle a ni. Mahse, kum 1925 chhûng chuan, Isaia 43:10 leh 12 hrilhfiahna chu Vênnainsâng magazine issue 11-ah târ lan a ni thung.

Kum 1925, August thla tâwp lamah chuan, Bible Zirlaite chu Indiana, Indianapolis khawpuia neih inkhâwmpuiah an kal khâwm a. Inkhâwmpui chhimte lawmna lehkhaah, Joseph F. Rutherford-a chuan: “Rawngbâwlnaa tha tho taka thu kan hrilh theih nâna Lalpa hnên aṭanga chakna nei tûra he inkhâwmpuia lo kal hi kan ni,” tiin a ziak a. Chu ni riat awh inkhâwmpuiah chuan, inkhâwmpui rawn chhim zawng zawngte chu hun remchâng an neih apianga mite hnêna Jehova chungchâng hriattîr tûra tih chakin an awm a ni.

August 29, Inrinnîah, Unau Rutherford-a chuan “Thu Hril Tûra Kohna,” tih thupui hmangin thu a sawi a. A thusawiah chuan, thu hrilh a pawimawhzia sawi uarin: “Jehova chuan a mite hnênah . . . : ‘Nangni hi ka thu mi hriatpuitute in ni . . . tin, kei chu Pathian ka ni,’ tia a sawi hnuah, ‘Mite tân chhinchhiahna târ chhuak rawh u,’ tih thu khauh tak hmangin thu a pe leh a. Lalpa thlarau thianghlim dawngtu a thuhretute nia rawngbâwl, a mite tih loh chu, leiah chutianga ti thei tu mah an awm lo,” tiin a sawi a ni.—Is. 43:12; 62:10.

Unau Rutherford-a’n thu a sawi zawh chuan, “Beiseina Thuchah,” tih thupui nei lehkha pakhat a chhiar a. Chutah chuan, Pathian Ram chu “remna, hmuingîlna, hrisêlna, nunna, zalenna, leh hlimna tluantling” nei thei tûra kan beisei awm chhun a nih thu a chuang a. Chu thu a chhiar zawh chuan, mipui zawng zawng chuan an thlâwpzia lantîrin an ding ta vek a ni. Chu thuchah chu, ṭawng dang hrang hranga lehlin niin, rawngbâwlnaa hman tûra chhut chhuah a ni a. Copy maktaduai 40 vêl sem chhuah a ni.

Kum eng emaw zât chhûng, Bible Zirlaite chu Jehova Thuhretute tia hriat an la ni lo va. Chutih rualin, a thuhretu ni tûra an mawhphurhna erawh chiang lehzualin an rawn hre chho a ni.

NGAIHVENNA LANTIRTUTE TLAWHKIRNA

Khawvêl pumah Bible Zirlaite an pun chhoh zêl avângin, anni chu chanchin ṭha ngaihventute tlawhkîr tûra fuih an ni a. Beiseina Thuchah tih tract hmanga campaign neih zawh a nih chuan, Bulletina chuan: “Beiseina Thuchah tih tract dawngte chu an inah va tlawh leh ang che,” tiin kaihhruaina a pe a ni.

Kum 1925, January thla chhuak Bulletin chuan Texas, Plano khawpuia chêng Bible Zirlai pakhat hnên aṭangin hetiang hian report a dawng a ni: “Rawngbâwlna bial tharte aiin, rawng kan lo bâwl tawhna bialahte chuan chhân lêtna ṭha zâwk kan hmu a. Kan rawngbâwlna biala khaw pakhat chu kum sâwm kalta chhûng khân, vawi nga lai kan hrût chhuak tawh a. . . . Tûn hnai lawk khân, Unaunu Hendrix-i leh ka nu nên kan va tlawh leh a; tûn hma zawng aia tam lehkhabu kan sem chhuak a ni,” tiin.

Panama rama chêng colporteur pakhat chuan: “Ka tlawh hmasak ber ṭuma ngaihvenna lantîr lo, ka tlawhkîr leh huna an rilru put hmang lo thlâk tawh mi tam tak tawn ka nei a. Tûn kuma ka rawngbâwl dân tam zâwk chu tûn hmaa ka lo tlawh tawhte tlawhkîr leh a ni a; thiltawn ṭha ka nei nual a ni,” tiin a sawi.

HMA LAM THLIR TLATIN

Colporteur zawng zawngte hnêna kum tina a lehkhathawnah, Unau Rutherford-a chuan kum khat chhûnga rawngbâwlnnaa an hlen chhuahte leh hma lam hun atâna ruahmanna an siamte chu a târ lang a. “Kum kalta chhûng khân, lungngaia awm mi tam takte thlamuan theihna chanvo hlu in nei a. Chu chuan hlimna nasa tak a neihtîr che u a. . . . Kha mi kum kha, Pathian leh a lalram tâna thuhretu ni tûr leh, amah betu dik tak in nihzia lantîrna tûr hun remchângte in neih hma a ni a. . . . Kan Pathian leh kan Lal faka chawimawi tûrin aw râwl i chhuah ṭheuh vang u,” tiin a ziak a ni.

Kum 1925 tâwp dâwn meuh chuan, unaute chuan Brooklyn Bethel zauh tûrin ruahmannate an siam a. Kum 1926-ah, inawpna pâwla construction project lian ber chu ṭan a ni tawh dâwn a ni.