Jehova, Kan “Hlim Em Emna”

1-2. (a) Eng dinhmunte nge tûn laia mi tam takin an hmachhawn? (b) He thuziakah hian eng nge kan sawiho vang?

TUN laia mi tam tak chuan hlimna hmuh tumin thil tam tak an ti a. Mahse, hlimna tluantling an hmu thei chuang lo. Nun ruak tak leh beidawng takin an awm a ni. Jehova mite zînga ṭhenkhat pawhin chutianga awm châng an nei thei a. “Ni hnuhnûngahte” kan awm avângin, lungngai leh beidawng taka min siamtu dinhmun “khirh takte” hmachhawn kan inbeisei a ni.—2 Tim. 3:1, NWT.

² He thuziakah hian, kan hlimna min hlohtîr theitu leh kan hloh huna kan neih lêt leh theih dân kan sawiho vang a. Mahse, a hmasain, hlimna lo chhuahna Bulpui Jehova chungchâng hi i lo ngaihtuahho vang u.

HLIMNA LO CHHUAHNA BULPUI CHU

3. Thil siamte’n Jehova chungchâng eng nge min zirtîr? (Milem en bawk rawh.)

³ Jehova chu a hlim reng a. Keini pawh kan hlim a duh a ni. Chuvângin, a hlimna chu a thil siam—kan chênna leilung mawi tak, kan chhehvêla rawng chi hrang hrang, ramsa duhawm tak tak infiam laite leh ei tûr tuihnai tak takte hian an târ lang a. Ani chuan min hmangaihin, hlim taka nun kan hman a duh tih a chiang hle!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Khawvêla hrehawm tawrhnate a hmu chung pawhin, engtin nge Jehova chu a hlim reng theih? (b) Eng thilpêk nge Jehova’n min pêk? (Sâm 16:11)

⁴ Jehova chu “Pathian hlim” ni mah se, khawvêla harsatnate leh hrehawm tawrhnate chu a hmu vek a. (1 Tim. 1:10, 11, NWT) Mahse, chu chu a hlimna tih kiamtîr a phal ngai lo a ni. Hrehawm tawrhna zawng zawngte chu rei lo tê atân a ni tih a hriat bâkah, chûngte a sût lêt hun tûr chu a ruat lâwk tawh a. Chu hun chu dawh thei takin a nghâk a ni. Tûna kan dinhmun tawh mêkte hi min hriatsakin min ṭanpui a duh a. A nih leh, engtin nge min ṭanpui? Min ṭanpui dân kawng khat chu hlimna thilpêk hmangin a ni a. (Sâm 16:11 chhiar rawh.) Jehova’n a fapa Isua hnêna chu thilpêk a pêk dân hi lo chhinchhiah ang che.

5-6. Engvângin nge Isua chu mi hlim thei tak a ni?

⁵ Jehova thil siam zawng zawngte zînga hlim thei ber chu Isua a ni. Engvângin nge? A chhan pahnih hi han ngaihtuah teh. (1) “Ani chu hmuh theih loh Pathian anpui” niin, kawng engkimah a Pa mizia chu ṭha famkimin a lantîr a. (Kol. 1:15, NWT; 1 Tim. 6:15) (2) Isua chuan tu dang zawng aiin, hlimna lo chhuahna Bulpui, a Pa Jehova nên hun an hmang tam a ni.

⁶ A Pa’n ti tûra a duh apiang a tih ṭhin avângin, Isua chu a hlim reng a. (Thuf. 8:30, 31; Joh. 8:29) A thiltih engkima a rinawm avângin, Jehova lawm leh duhsakna a hlawh a ni.—Mt. 3:17.

7. Engtin nge hlimna dik tak kan hmuh theih ang?

⁷ Keini pawh hlimna lo chhuahna Bulpui Jehova hnaihna aṭangin hlimna dik tak kan nei ve thei a. Jehova chungchâng kan zira amah kan entawn tam poh leh, kan hlim lehzual dâwn a ni. Chu bâkah, Pathian duhzâwng tihna leh a lawm kan hlawh tih hriatna aṭangin hlimna kan hmu thei bawk.a (Sâm 33:12) A nih leh, hun rei lo te chhûng emaw, hun rei tak chhûng emaw hlim lo nia kan inhriat chuan engtin nge ni ang? Chu chu Pathian lawm kan hlawh tawh lo tihna a ni em? Ni lo ve! Ṭha famkim lo kan nih avângin, rilru natna, lungngaihna leh beidawnnate kan tawh châng a awm ṭhîn a. Chu chu Jehova’n min hriatsak a ni. (Sâm 103:14) Tûnah, hlimna min hlohtîr theitu thilte leh hlimna kan neih leh theih dânte chu i lo ngaihtuahho vang u.

ENG THIL MAHIN I HLIMNA RU BO SUH SE

8. Nuna kan tawh buainate chuan engtin nge min nghawng?

⁸ Hlimna ru botu 1-na: Nuna buainate. Tih duhdahna, leilung chhiatna, retheihna, natna, a nih loh leh kum upatnain a nghawngte chu i tuar mêk em? Chûng buainate chuan, a bîk takin, dinhmun siam ṭha tûra kan tih theihte a tlêm hunah, kan hlimna chu awlsam takin min hlohtîr thei a ni. Chuvângin, Bible chuan, “Thinlung lungngaihna erawh chuan rilru a tilungchhe ṭhîn,” tiin a sawi. (Thuf. 15:13) Kohhran upa unau Babis-a chuan a unaupa leh a nu leh pate chu kum li chhûng lekin a sûn a. Ani chuan: “Mal tak leh ṭanpuitu nei lo anga inhriatna ka nei a. An thih hmaa duh anga hun ka hmanpui theih loh avângin, rilru hrehawm taka awm châng ka nei a ni,” tiin a sawi. Ni e, nuna kan tawh buainate chuan tisa lam leh rilru lamah nasa takin min ti chau hle thei a ni.

9. Engin nge hlimna nei leh tûra min ṭanpui thei? (Jeremia 29:4-7, 10)

⁹ Engin nge hlimna nei leh tûra min ṭanpui thei? Kan dinhmun tawn chu kan pawma lâwmna kan lantîr chuan hlimna kan nei leh thei a. Kan duhthusâm ang nun kan neih chauhvin, hlimna kan nei thei niin khawvêl mite chuan an ngai a ni. Mahse, chu chu a dik lo. Entîr nân, Jehova chuan Babylon-a Juda sal tângte chu an dinhmun pawma, chu dinhmun khirh tak chu a ṭha thei ang bera hmachhawn tûrin a hrilh a ni. (Jeremia 29:4-7, 10 chhiar rawh.) Eng nge kan zir theih? I dinhmun tawn mêkte chu pawm la; i nuna thil ṭha i dawnte chungah lâwmna lantîrin, Jehova’n a ṭanpui dâwn che tih hre reng ang che. (Sâm 63:7; 146:5) Tawh sual a tawh avânga zeng unaunu Effie-i chuan: “Jehova, ka chhûngte leh kohhrana unaute hnên aṭangin ṭanpuina nasa tak ka dawng a. Chuvângin, ka beidawng mai a nih chuan, an chunga lâwmna nei lo ang ka ni dâwn a. An ṭanpuina nasa tak avângin, an chunga lâwmna lantîr chu ka duh a ni,” tiin a sawi.

10. Engvângin nge buaina tâwk chung pawha hlimna kan neih theih?

¹⁰ Kan nun chu kan beisei ang ni lo mah se, hlimna kan la nei reng thei a ni.b (Sâm 126:5) Engvângin nge? Kan hlimna chu kan dinhmun tawnah a innghah loh vâng a ni. Pioneer unaunu Maria-i chuan: “Buaina tâwk chung pawha hlimna nei reng tih awmzia chu kan rilru awm dânte kan ngaih thah tihna ni lovin, Jehova thutiamte kan hre reng tihna zâwk a ni. Kan Pa Jehova’n hlimna nei reng tûrin min ṭanpui ang,” tiin a sawi. Kan nunah eng ang buaina pawh tâwk mah ila, chûngte chu tuipui kama ke hniak rei lo têa bo leh mai tûr ang an ni tih hre reng ang che. Nakin lawkah, hnu bâng engmah awm lovin, tih bo hmak an ni dâwn a ni.

11. Tirhkoh Paula entawn tûr siam chuan engtin nge a tih chak che?

¹¹ A nih leh, Jehova lawm kan hlawh loh avânga buaina tâwk anga kan inhriat hunah engtin nge ni ang? Dinhmun harsa tak lo hmachhawn tawh Jehova chhiahhlawh rinawmte chungchâng ngaihtuahna chuan min ṭanpui thei a ni. Tirhkoh Paula chanchin hi han ngaihtuah teh. Ani chu amah Isua ngeiin “hnamte hnênah te, lalte hnênah te leh, Israel mite hnênahte” chanchin ṭha hril tûrin a thlang a. (Tirh. 9:15, NWT) Chu chu chanvo hlu a va ni êm! Mahse, Paula chuan buaina a nei lo tihna erawh a ni hauh lo. (2 Kor. 11:23-27) Buaina tam tak a tâwk a. Chu chu Jehova pawm a hlawh tawh loh vâng a ni em? Ni lo ve! Chu aiin, Jehova ṭanpuina avâng chauhvin chûngte chu chhel takin a tuar chhuak thei zâwk a ni. (Rom 5:3-5) Nang pawh fiahna tam tak tâwk chungin, chhelna leh rinawmna i lantîr a. Chuvângin, Jehova pawm i hlawh tih i chiang ve thei a ni.

12. Kan beisei anga thil a thlen loh hian, engtin nge hlimna kan hloh theih?

¹² Hlimna ru botu 2-na: Kan beisei anga thil a thlen loh hunah. (Thuf. 13:12) Jehova kan hmangaihna leh a chunga kan lâwmna chuan a rawngbâwlnaa thiltumte insiam tûrin min chêttîr a. Mahse, kan dinhmun avânga chûng kan thiltumte kan hlen theih loh hian kan beidawng thei a ni. (Thuf. 17:22) Pioneer unaunu Holly-i chuan: “Lal Ram Chanchin Ṭha Puangtute School-a kal te, ram danga rawngbâwl te leh, Ramapo construction project-a telte chu ka châk hle ṭhîn a. Mahse, ka dinhmun inthlâk avângin, chûng ka thiltumte chu ka hlen thei ta lo va. Ka lunghnual hle a ni. Kan thiltih châkte ti thei lo va kan awm hian rilru a hrehawm thei hle,” tiin a sawi. Jehova rawngbâwltu tam tak pawh chutiang chuan an awm ve a ni.

13. Kan dinhmunin a zir loh avânga kan tih duhte kan tih theih loh hunah, eng thiltumte nge kan insiam theih?

¹³ Engin nge hlimna nei leh tûra min ṭanpui thei? Jehova chuan kan theih chin bâk min phût lo va. Rawngbâwlnaa kan thil hlen chhuahte ṭanchhanin kan hlutna a teh lo bawk. Chu aiin, mi thuhnuairawlh leh rinawm tak kan nih a duh a ni. (Mik. 6:8; 1 Kor. 4:2) Kan thiltihte aiin kan chhûng lam nihna chu a ngai pawimawh zâwk a. Chuvângin, Jehova’n min beisei aia sâng thiltum insiam chu thil inâwm a ni ang em?c Ni lo vang! I dinhmunin a zir loh avânga Jehova rawngbâwlnaa i tih duhte i ti thei lo a nih chuan, i hlen theih tûrte chu ngaihtuah tum zâwk ang che. Nangmah aia naupang zâwkte fuihtu emaw, kum upate ti chaktu emaw i ni thei ang em? Hmaichhanah emaw, phone hmangin emaw, a nih loh leh message thawnin tu emaw i ti chak thei ang em? Chutiang thiltum inâwm takte hlen tuma i ṭan lâkna chu Jehova’n mal a sâwmin hlimna a pe dâwn che a ni. Chu bâkah, khawvêl tharah kan beisei phâk bâk aia nasain Jehova rawngbâwl theihna hun remchâng tam tak kan nei dâwn a ni tih hre reng ang che. Kan târ lan tâk unaunu Holly-i chuan: “ ‘Chatuanin ka nung dâwn alâwm,’ tiin ka inngaihtuah a. Jehova ṭanpuinain ka thiltum ṭhenkhatte chu khawlvêl tharah ka hlen thei dâwn a ni,” tiin a sawi belh bawk.

14. Eng thil dangin nge hlimna min hlohtîr thei?

¹⁴ Hlimna ru botu 3-na: Mahni nuam tih zâwng ûmna. Social media hmangin, mi ṭhenkhat chuan hlimna leh lungawina dik tak chu mahni duh zâwng tihna aṭanga lo awm tih ngaih dân chu an chawi lâr a. Mi dangte chu thil lei leh, hmun hrang hrang fan kual ang chi an nuam tih zâwng thiltihte chu an nuna dah pawimawh ber tûrin an fuih a ni. Jehova’n a thil siam mawi tak takte hlim pui tûra min siam avângin, chûng thiltihte chu thil sual a ni lo ngei mai. Mahse, mi tam tak chuan hlimna thlentu nia an ngaihte chu an hlimna la botu a lo ni zâwk tih an hre chhuak a ni. Pioneer unaunu Eva-i chuan, “I nun chu nuam i tih dân chauhva i hman chuan, i duh khawp i hmu ngai lo vang” tiin a sawi a. Mahni nuam tih zâwng ûmna chuan lungngai tak leh lunghnual takin min siam thei a ni.

15. Solomona hnên aṭangin eng nge kan zir theih?

¹⁵ Lal Solomona thil tawn aṭangin, mahni nuam tih zâwng ûmna sawhkhâwk ṭha lo chungchâng kan zir thei a. Ani chuan eiin ṭha, rimawi leh, sum leh paia a lei theih thil ṭha zawng zawng hmanga hlimna neih a tum a. Mahse, chûngte chuan hlimna tluantling a pe zo lo a ni. Chuvângin, “Mit chu a thil hmuhah a tlai lo va, beng pawh a thil hriat a kham hek lo” tiin a sawi. (Thur. 1:8; 2:1-11) Khawvêlin hlimna thlentu nia a ngaih thilte chu pawisa lem ang mai a ni a. Thil hlu tak angin lang mah se, hlimna tluantling min thlen thei lo a ni.

16. Engtin nge mi dangte tâna thiltihsakna chuan hlimna nei leh tûra min ṭanpui theih? (Milem en bawk rawh.)

¹⁶ Engin nge hlimna nei leh tûra min ṭanpui thei? Isua chuan, “Mi dang hnên aṭanga thil dawn aiin, mi hnêna in pêk chhuahin in hlim zâwk ang,” tiin min zirtîr a. (Tirh. 20:35, NWT) Kohhran upa Alekos-a chuan: “Ho tê anga lang thilah pawh mi dangte ṭanpui theih dân kawng ka zawng tlat a. Mi dangte chunga ngaihvenna ka lantîr nasat poh leh ka hlim lehzual a ni,” tiin a sawi. Mi dangte tân eng nge i tihsak ve theih? Tu emaw harsatna nei i hmuh chuan, tih chak tum la. A buainate i chinfelsak thei lo a nih pawhin, hriatthiamna lantîrin a thusawite i ngaihthlâksak thei a. Lainatna lantîrin leh a rit phurhte chu Jehova chunga nghat tûra hriat nawntîrin i thlamuan thei a ni. (Sâm 55:22; 68:19) Jehova’n a thlahthlam lo tih i hriat nawntîr thei bawk a. (Sâm 37:28; Is. 59:1) Chu bâkah, ei tûr siamsak emaw, rei lo tê vah chhuahpui emaw ang chi ṭanpuina ṭangkai takte pein, a rilru tih thawven nân, rawngbâwlnaa chhuahpuiah i sâwm thei bawk. Chutiang chuan, Jehova kuta hmanraw ṭangkai tak in nihtîr ang che. Mahni aia mi dangte kan ngaihven zâwk hian, hlimna dik tak kan nei ṭhîn a ni.—Thuf. 11:25.

17. Engtin nge kan hlimna chu Jehova nêna a inkûngkaih? (Sâm 43:4)

¹⁷ Bible chuan kan Pa vâna mi Jehova chu kan “hlim êm êmna” tia a sawi avângin, amah kan hnaih chhunzawm zêl a nih chuan, hlimna dik tak kan nei thei dâwn a. (Sâm 43:4 chhiar rawh.) Kan nunah eng thil pawh thleng se, him nia inhriatna kan nei reng ang. Chuvângin, kan hlimna Bulpui Jehovah chu i bêl tlat ang u!—Sâm 144:15.