Lungawina Neih Dân Thurûk I Zir Tawh Em?

1. Lungawina nei tih awmzia chu eng nge ni a, eng nge a nih loh?

MI LUNGAWI thei tak i ni em? Mi lungawi thei tak chuan a malsâwmna dawn mêkte ngaihhlutna aṭangin hlimna leh thlamuanna a hmu a. A thil neih lohte avângin lungni lo leh thinrimin a awm lo. Chutih rualin, lungawina nei tih awmzia chu hmasâwn tumna nei lo tihna a ni lo va. Entîr nân, Kristian pakhat chuan a rawngbâwlna zauh tûrin hun remchângte a zawng thei a ni. (Rom 12:1; 1 Tim. 3:1) Mahse, chutianga a tih hunah pawh, a beisei anga chanvo hlute a dawng mai lo a nih pawhin a hlimna chu a hloh chuang lo.

2. Engvângin nge lungawina neih loh chu a hlauhawm êm êm?

² Lungawina neih lohna chuan sawhkhâwk ṭha lo tak a nei thei a. Lungawina nei ngai lo mi chuan a thil mamawh tak tak ni lote neih tumin, dârkâr rei tak tak chhûng rim takin hna a thawk thei a. Lungchhiatthlâk takin, Kristian ṭhenkhat chuan pawisa leh an duh zâwng thil dangte chu an ru hial a ni. Anni chuan, ‘Neih ka phû alâwm!’ ‘Ka nghâk rei tawh bawk e,’ a nih loh leh ‘A hnuah ka pe leh mai ang,’ tihtein an ngaihtuah mai thei. Mahse, rûkrûkna eng pawhin Jehova a ti lâwm lo va, a chawimawi lo bawk a ni. (Thuf. 30:9) Mi dangte chuan rawngbâwlnaa chanvo hlute an dawn loh avânga an lunghnual êm avângin, Jehova rawngbâwl pawh an tâwpsan hial a ni. (Gal. 6:9) Engtin nge inpumpêkna nei tawh Jehova betute chuan chutiang thil chu an tih theih? Anni chuan zawi zawia lungawina an hloh tawh vâng a ni thei a ni.

3. Philippi 4:11, 12 aṭangin eng thu thlamuanthlâk tak nge kan zir theih?

³ Kan zavaiin lungawina neih kan zir thei a. Tirhkoh Paula chuan “eng dinhmunah pawh . . . lungawina neih” a zir tawh thu a sawi a ni. (Philippi 4:11, 12 chhiar rawh.) Chûng thute chu tântîr a nih laia a ziah a ni a. Chuti chung chuan, a hlimna chu a hloh lo va. Lungawina neih “dân thurûk” a zir zâwk a ni. Lungawina neih harsa kan tih chuan Paula thusawite leh thiltawn chuan lungawina kan nei chho thei tih min hriat nawntîr a ni. Mahse, awlsam taka lungawina nei tûrin kan inbeisei thei lo va. Kan inzir a ngai a ni. Engtin nge kan inzir theih? Tûnah, lungawina neih dân thurûk hre tûra min ṭanpui thei miziate chungchâng i lo ngaihtuahho vang u.

LAWM NACHANG HRE RAWH

4. Engtin nge lâwm nachâng hriatna chuan lungawina nei tûra min ṭanpui? (1 Thessalonika 5:18)

⁴ Lâwm nachâng hriatna chuan lungawina nei tûrin min ṭanpui thei a. (1 Thessalonika 5:18 chhiar rawh.) Entîr nân, mamawh bulpui kan neihte chunga lâwmna kan neih chuan, kan neih châk zâwng thilte chu a lutukin kan ngaihven lo vang. Chu bâkah, rawngbâwlnaa kan chanvo dawn chunga ngaihhlutna kan neih chuan, chanvo thar dawn ringawt ngaihtuah aiin, chu kan chanvo chu a ṭha thei ang bera thawh kan tum zâwk dâwn a ni. Chuvângin, Bible-in kan ṭawngṭai huna Jehova hnêna lâwmthu sawi tûra min fuih chu a inâwm hle! Lâwm nachâng hriatna chuan “hriatthiam phâk rual loh Pathian thlamuanna” nei tûrin min ṭanpui dâwn a ni.—Phil. 4:6, 7, NWT.

5. Eng chungchângah nge Israelte’n lâwm nachhan tûr an neih? (Milem en bawk rawh.)

⁵ Israelte chunga thilthleng hi han ngaihtuah teh. Aigupta rama an ei ṭhin ei tûrte chu ei leh an châk êm avângin Jehova hnênah vawi tam tak an phunnawi a ni. (Num. 11:4-6) Ni e, thlalêra nun chu a awlsam lo ngei mai. Mahse, engin nge lungawina nei tûra ṭanpui thei? Jehova’n an tâna a tihsakte chu ngaihtuahin lâwmna an lantîr thei a. Entîr nân, sal anga râwng taka cheibâwl an nihna Aigupta rama mite chungah Pathianin hri sâwm a lêntîr a. Chhuah zalen an nih khân, Aigupta mite tangkarua, rangkachak leh, thawmhnaw te chu “an rawksak” a ni. (Ex. 12:35, 36) Tuipui Sen kam thlenga ûm an nih khân, Jehova’n mak takin tui chu a ti ṭhen a. Thlalêra an awm laiin, nî tin manna pein a châwm a ni. A nih leh, an phunnawi chhan chu eng nge ni ta ber? An mamawh ei tûr an tlâkchham vâng ni lovin, ei tûr an neih chunga lâwmna an neih loh avângin an lungawi thei lo a ni.

6. Lâwm nachâng hre tûra min ṭanpui theitu thil ṭhenkhat chu engte nge ni?

⁶ A nih leh, engin nge lâwm nachâng hre tûra ṭanpui thei che? Pakhatna, nî tin i nuna thil ṭha i neihte ngaihtuah nân hun hmang ang che. Lâwmna i neih chhan pahnih emaw, pathum emaw i ziak chhuak thei a ni. (ṬH. 3:22, 23) Pahnihna, i lâwmzia lantîr rawh. Mi dangte’n i tâna thil an tihsak che avânga i lâwmzia lantîr tûrin hma la la. A pawimawh berah, Jehova hnênah lâwmthu sawi ziah ang che. (Sâm 75:1) Pathumna, lâwm nachâng hriate chu ṭhian ṭhaah siam rawh. Lâwm nachâng hriatna chu a intihhmuh theih ang bawkin, lâwm nachâng hriat lohna pawh a inkaichhâwn theih a ni. (Deut. 1:26-28; 2 Tim. 3:1, 2, 5) Lâwmna lantîr kan tum reng chuan, lungawi lohna lem ralin kan awm lo vang.

7. Engtin nge Aci-i’n lâwm nachâng hriatna a neih chhoh va, chu chuan eng nge a rah chhuah?

⁷ Indonesia rama chêng Aci-i chunga thilthleng hi han ngaihtuah teh. Ani chuan: “COVID-19 hripui a lên lai khân, ka dinhmun chu ka unaute dinhmun nên ka khaikhin ṭan a. Lungawina ka nei thei ta lo a ni,” tiin a sawi. (Gal. 6:4) A ngaihtuah dân thlâk tûrin engin nge ṭanpui? Aci-i chuan: “Pathian inawpna pâwla ka awm avânga thil ṭha ka neihte chu ngaihtuahin, nî tin ka malsâwmna dawnte chu ka chhiar ṭan a. Tichuan, Jehova hnênah lâwmthu ka hrilh a. Chuvângin, lungawina dik tak ka nei ta a ni,” tiin a sawi. A thim zâwnga thlîrnain a ti buai che a nih chuan, lâwm nachâng hriatna nei leh tûrin chutiang chuan i ti ve thei ang em?

INBUK TAWK LEH INNGAITLAWM TAK NI RAWH

8. Baruka chungah eng thil nge thleng?

⁸ Zâwlnei Jeremia lehkha ziaktu, Baruka chu hun rei lo te chhûng lungawi lovin a awm a. Lâwm nachâng hre lo hnam hnêna thuchah khauh tak a hrilhnaah Jeremia chu ṭanpui tûrin mawhphurhna lian tak a dawng a ni. Ṭum khat chu inbûktâwkna a hloh va. Jehova’n ti tûra a duhte aiin, mahni leh a tih duh zâwngte chu a lutukin a ngaihtuah ṭan niin a lang. Jehova’n Jeremia hmangin ani chu: “Mahni tân thil ropui i zawng em ni? Zawng lo mai rawh,” tiin a hrilh a ni. (Jer. 45:3-5) Thu danga sawi chuan: “Tûna i dinhmunah lungawi rawh,” tia sawi ang a ni a. Baruka chuan zilhna chu a pawm a, Jehova lawm a hlawh chhunzawm a ni.

9. Korinth thawn khat 4:6, 7-a sawi angin, inngaihtlâwmna chuan eng nge pawm tûra min ṭanpui? (Milem en bawk rawh.)

⁹ Kristian tu emaw chuan rawngbâwlnaa chanvo eng emaw chu dawn phû nia inhriat châng a nei thei a. Ani chu talent nei ṭha tak, taima tak leh, thiltawn ngah tak a ni thei a ni. Mahse, a chanvo dawn duh tak chu mi dangin lo dawng ta se, engin nge ani chu lungni lova awm lo tûra ṭanpui thei ang? 1 Korinth 4:6, 7-a Paula thusawite hi a ngaihtuah thei a ni. (Chhiar rawh.) Kan chanvo dawn leh talent neih zawng zawngte hi Jehova min pêk a ni a. Chûng thilpêkte chu kan thawh chhuah emaw, dawn kan phû vâng emaw ni lovin, Jehova khawngaihna nasa tak avânga dawng kan ni zâwk.—Rom 12:3, 6; Eph. 2:8, 9.

10. Engtin nge inngaihtlâwmna kan neih chhoh theih?

¹⁰ Kan tâna Isua entawn tûr siamte ngun taka ngaihtuahin inngaihtlâwmna kan nei chho thei a. Isua’n a tirhkohte kê a silsak zâna thilthleng hi han ngaihtuah teh. Tirhkoh Johana chuan: ‘Isua chuan [1] Pain a kutah thil engkim a pe tawh tih leh [2] Pathian hnên aṭanga lo kal a ni a, [3] Pathian hnênah a kîr leh dâwn tih hre reng chungin a zirtîrte kê chu a silsak a,’ tiin a sawi. (Joh. 13:3-5, NWT) Isua chuan ke silsak phû nia inhriatna a nei thei a. Mahse, leia a awm chhûng khân, hausa leh nuam taka awm phû niin a inngai ngai lo. (Lk. 9:58) A inngaitlâwmin lungawina a nei a. Kan tân entawn tûr ṭha famkim a siam a ni.—Joh. 13:15.

11. Engtin nge inngaihtlâwmna chuan Dennis-a chu lungawina nei tûra a ṭanpui?

¹¹ Netherlands rama awm Dennis-a chuan inngaihtlâwmna kawngah Isua entawn a tum a; mahse, chutianga tih chu awlsam a ti lo. Ani chuan: “Tu emawin rawngbâwlnaa chanvo hlu an dawn hun angahte hian chapona, a nih loh leh lungawi lohna ka rawn nei ṭan tih ka hria a. Chutiang hunah chuan, inngaihtlâwmna chungchângah inzirna ka nei a. JW Library^® app-ah inngaihtlâwmna chungchânga Bible châng ṭhenkhat chu awlsam taka ka hmuha ka chhiar nawn leh theih nân ka chhinchhiah ṭhîn a. Inngaihtlâwmna chungchânga thusawi ṭhenkhat chu phone-a download-in ka ngaithla nawn fo bawk a ni.a Kan thiltih eng pawh chu mahni inchawimawi nân ni lovin, Jehova chawimawi nân a ni tih ka zir a. Jehova hnaah chanvo kan nei ve mai a lo ni,” tiin a sawi. Tûna i dinhmuna lungawi lohna i nei ṭan a nih chuan, inngaihtlâwmna nei tûrin hma la ang che. Chu chuan Jehova nêna in inṭhianna ti nghet tûr leh lungawina nei tûrin a ṭanpui dâwn che a ni.—Jak. 4:6, 8.

I BEISEINA CHHUT NGUN RAWH

12. Hma lam hun atâna eng beiseinain nge lungawina nei tûra min ṭanpui? (Isaia 65:21-25)

¹² Hma lam hun atâna kan beiseina ropui tak kan chhût ngun hian lungawina kan nei lehzual a. Isaia bu-ah chuan Pathianin nunah harsatna tam tak kan tâwk tih min hriatthiampuizia a sawi a; chûngte laka chhuah zalen chu min tiam a ni. (Isaia 65:21-25 chhiar rawh.) In him leh nuam takahte kan chêng ang a. Hna awmze nei tak thawkin ei tûr hrisêl leh tuihnai tak takte kan ei ang a. Keimahni emaw, kan fate chungah emaw thil ṭha lo a thlen kan hlau leh tawh ngai lo vang. (Is. 32:17, 18; Ezek. 34:25) Chu kan beiseina chu a rawn thleng ngei ang tih a chiang a ni.

13. Eng dinhmunahte nge a bîk taka kan beiseina ngaihven a ngaih?

¹³ Kan beiseina chu tûn hma zawng aia kan ngaihven lehzual a ngai a ni. Engvângin nge? “Ni hnuhnûngahte” awmin buaina “khirh takte” kan hmachhawn vâng a ni. (2 Tim. 3:1) Jehova chuan kaihhruaina, chakna leh, mamawhte pein chhel tûrin nî tin min ṭanpui a. (Sâm 145:14) Chu bâkah, kan Kristian beiseina chuan harsatnate kârah chakna min pe bawk. I chhûngkaw mamawh phuhrûk chu harsa i ti mai thei a. Mahse, chutianga tih chu i tân a harsa reng dâwn tihna a ni em? Ni lo ve! Pathianin Paradis-ah i mamawh—leh a bâk thil tam tak—pêk che a tiam a ni. (Sâm 9:18; 72:12-14) Natna benvawn, rilru hahna nasa tak, a nih loh leh natna khirh tak i tuar mêk a ni thei a. Dam nî rêng nei lovin chutiang chuan i awm reng ang em? Awm reng lo vang. Pathian khawvêl tharah chuan natna leh thihna chu a awm tawh dâwn lo a ni. (Thup. 21:3, 4) Chu beiseina chuan tûnah—thinrimna leh khâkna awm lova—lungawina nei tûrin min ṭanpui a. Rorêl dik lohna, thihna, natna leh, harsatna dangte tâwk chung pawhin lungawina kan nei thei a ni. Engvângin nge? Tûna kan harsatna tawh chu eng ang khawpa khirh pawh ni se, “kan hrehawm tawrh hi . . . hun rei lo te chhûng atân chauh” a ni tih leh khawvêl tharah chuan tih bovin a awm tawh ang tih kan hria a ni.—2 Kor. 4:17, 18, NWT.

14. Engtin nge kan beiseina chu kan tihngheh theih?

¹⁴ Beiseina chu lungawina nei tûra a pawimawh êm avângin, chu chu engtin nge kan tih ngheh theih? Min ṭanpui theitu pakhat chu Paradis-a awm anga inmitthla hi a ni a. Kan sum leh pai dinhmun avânga lungkhamnain min tlâkbuak a nih chuan sum te, leibâ te leh, sum leh pai lama intluktlân lohnate awm tawh loh huna kan nun awm dân tûr chu kan mitthla thei a ni. Rawngbâwlnaa kan la dawn loh chanvo avânga lungkhamna kan nei a nih chuan, ṭha famkim kan niha kum sâng tam tak chhûng Jehova rawng kan bâwl tawh hnua, chûng lungkhamnate eng mah tham a nih tawh loh dân tûr chu kan ngaihtuah thei a ni. (1 Tim. 6:19) A tîrah chuan, kan dinhmun tawn mêk engto lova hma lam hun chungchâng chhût ngun chu harsa kan ti thei a. Mahse, chutianga kan tih ngun poh leh, hma lam hun chungchânga Jehova thutiamte ngaihtuah tlat chu thil tih ṭhanah kan rawn nei chho vang.

15. Christa-i thusawi aṭangin eng nge i zir?

¹⁵ A tîra kan târ lan tâk Dennis-a nupui Christa-i chu beiseinain a ṭanpui dân lo ngaihtuah ta ila. Ani chuan: “Tihrâwl lam kaihhnawih natna ka neih avângin wheelchair ka hman a ngai a, ka hun tam zâwk chu khumah ka hmang ṭhîn a ni. Nî tin na tuarin ka awm a. Tûn hnai lawk khân, ka doctor chuan ka ṭhat chhoh mai loh tûr thu min hrilh a. Mahse, ‘Hma lam hun a thlîr dân chu ka thlîr dân nên a inang lo,’ tiin ka ngaihtuah nghâl a. Ka beiseina ka ngaihtuah tlat a, chu chuan rilru thlamuanna min pe a ni. He khawvêlah hian harsatnate kan tawrh reng ngai mah se, khawvêl tharah chuan nun nuam tak ka nei ngei ang!” tiin a sawi a ni.

“AMAH ṬIHTUTE TAN CHUAN TLAKCHHAMNA RENG RENG A AWM SI LO”

16. Engvângin nge Lal Davida chuan Jehova ṭihtute’n “tlâkchhamna rêng rêng” an nei lo vang tia a sawi theih?

¹⁶ Lungawina nei chung pawhin harsatnate chu kan la tâwk reng tho va. Lal Davida chuan a lo berah fa pathum a sûn a ni. Ani chu dik lo taka puh leh phatsana awmin, kum tam tak chhûng a nun humhim nân a tlânchhiat a ngai a. Chutiang harsatna khirh takte kârah pawh Jehova chungchângah: “Amah ṭihtute tân chuan tlâkchhamna rêng rêng a awm si lo,” tiin a sawi a ni. (Sâm 34:9, 10) Engvângin nge chutianga a sawi theih? Jehova chhiahhlawh a nih angin, nunah buainate tâwk mah se, a mamawh takte chu a tlachham ngai dâwn lo tih a chian vâng a ni. (Sâm 145:16) Keini pawh, kan harsatna tawh zawng zawngah Jehova kan rinchhan thei a. Lungawina kan nei thei a ni.

17. Engvângin nge lungawina thurûk chu zir i tum tlat ang?

¹⁷ Jehova chuan lungawina nei tûrin a duh che a. (Sâm 131:1, 2) Chuvângin, lungawina thurûk chu zir tum ang che. Lâwm nachâng hre tûr te, inbûk tâwk leh inngaitlâwm tak ni tûr te leh, i beiseina ti nghet tûrtea ṭan i lâk chuan lungawina i nei ngei dâwn a ni.