“Indona Chu LALPA Indona A Ni”

Kum 1999-a France sawrkârin France branch chu kum 1993 leh 1996 inkâra a thawhlâwm dawnte chungchânga dik lo taka chhiah pe tûra a tih aṭangin thubuai chu a inṭan a. France rama court-ahte chuan thubuai chu kan thlen a; mahse, eng mah a sâwt lo. A hnua thubuai kan thlenna court-a hnehna kan chan tâk lovah chuan, sawrkâr chuan branch bank account aṭangin euro maktaduai li leh a chanve (U.S. $6,300,000) chuang chu min lâksak a. Kan beiseina neih chhun chu ECHR chauh a ni. Mahse, ECHR chuan thubuai min ngaihthlâksak hmain, France sawrkâr ukilte leh European Court palai nêna inhmua thubuai thlen a nih hmaa inremna kan siam theih leh theih loh hriat phawt a duh a ni.

Court palaiin chhiah min tuk zât aṭanga tlêm azâwng pea thubuai chu chingfel tûra min nawr kan ring a. Mahse, euro khat lek pawh kan pêk chuan Bible thu bulte bawhchhiatna a ni dâwn tih chiang takin kan hria a ni. Unaute chuan Lalram rawngbâwlna atân thawhlâwmte hi thawh an ni a, sawrkâr ta a ni lo. (Mt. 22:21) Chuti chung chuan, Court dânte kan zah avângin kan va inlan a ni.

Court-a inhmuh khâwmna room mawi takah chuan kan kal khâwm a. Mahse, bul kan ṭan ṭha vak lo va. Court palai ṭanna thusawi aṭang chuan chhiah pe tûrin min beisei tih a chiang reng mai a. Chuvângin, “Sawrkârin kan bank account aṭangin euro maktaduai li leh a chanve chuang a la tawh tih i lo hre tawh em?” tiin kan zâwt ve nghâl a ni.

A lan dân aṭang chuan mak a ti hle tih a hriat a. Sawrkâr ukilte’n chutianga an tih thu an sawi chuan thubuai chungchânga a rilru put hmang chu a thlâk ta thawk a. Anni chu a hau va, inhmuh khâwmna chu a ti tâwp nghâl a ni. Chuta ṭang chuan Jehova’n kan beisei phâk loh dânin thubuai kal zêl dân tûr chu a kaihruai tih ka hre thiam a. Mak ti tak leh phûr takin court chu kan chhuahsan ta a ni.

Kum 2011, June 30-ah ECHR chuan hnehna min chantîr a. Chhiah min tuk chu dân kalh a ni tih a puang a, sawrkâr chu a pung pawh tiamin sum min lâksak zawng zawng min pe kîr leh tûrin thu a pe a ni. Chu court thu tlûkna chhinchhiah tlâk tak chuan France rama biakna thianghlim chu vawiin thleng hian a humhim a. Chu ngaihtuah lâwk lova kan zawh zawhna pakhat tê chuan Goliatha ti hlumtu lungtê ang maiin thubuai kal zêl dân chu a her danglam a ni. Engvângin nge hnehna kan chan? Davida’n Goliatha hnêna a sawi angin, “indona chu LALPA indona” a nih vâng a ni.—1 Sam. 17:45-47.

Chu chu hnehna kan chan awm chhun a ni lo. Vawiin thlengin, min dodâltu sawrkâr leh sakhaw thiltithei tak takte hmaah ram 70-a court sâng ber berte leh international court-te chuan thubuai 1225-ah Jehova Thuhretute chu hnehna min chantîr a. Chûng hnehnate chuan sakhaw pakhat anga kan din theihna te, vântlâng hmaa rawng kan bâwl theihna te, hnam hmangaihna lantîrna thiltihtea tel lo tûra duh kan thlan theihna te leh, thisen hnâwl tûra duh kan thlan theihnate ang chi, dikna kan neih chu min humhimsak a ni.

Engtin nge U.S.A., New York khawpuia Jehova Thuhretute World Headquarters-a rawngbâwl chunga Europe-a thubuai chinfelnaa ka tel theih?

MISSIONARY ṬHAHNEMNGAI TAKTE ENKAWL SEILEN

Ka nu leh pa, George-a leh Lucille-i te chu Gilead school vawi 12-na kal chhuak an ni a. Kum 1956-a Ethiopia rama rawng an bâwl laiin ka piang a ni. Kum zabi khatnaa chanchin ṭha hriltu hming chawiin, Philip-a tih hming chu min sa a. (Tirh. 21:8) A hnu kumah, sawrkârin kan biakna chu a khap a. Naupang tê la ni mah ila, a rûka chhûngkuaa biakna kan neih ṭhinte kha chiang takin ka la hria. A phûrawm ka ti thei khawp mai! Lungchhiatthlâk takin, sawrkâr chuan kum 1960-ah ram chu chhuahsan tûrin min ti a ni.

U.S.A., Kansas-a Wichita khuaa kan insawn hnu pawhin, ka nu leh pate chuan missionary anga an ṭhahnemngaihna chu an vawng chhunzawm zêl a. Thutak chu nunpuiin thlarau lam thil an ngaih pawimawhnate chu keimah bâkah, Ethiopia-a piang ve tho ka u Judy-i leh ka nau Leslie-a te hnênah pawh an tuh a ni. Kum 13 ka nihin baptisma ka chang a. Kum thum hnuah, kan chhûngkuain mamawh zualna hmun Peru rama Arequipa-ah kan insawn ta a ni.

Kum 1974-a kum 18 mi lek ka nih laiin, Peru branch chuan unaupa dang palite rualin special pioneer thawk tûrin min ruat a. Central Andes Mountains-a thu la hrilh ngai lohna hmunahte chuan min tîr a. Quechua leh Aymara ṭawng hmangte hnênah pawh thu kan hril a ni. Bâwm kil li nei a an avânga The Ark (Lawng) tia duat taka kan koh motor in (home) hmangin kan zin kual a. Chuta awmte hnêna Pathian Jehova’n retheihna te, natna te leh, thihnate a tih bo thuai tûr thu Bible hmanga kan hrilh ṭhin laite kha ka theihnghilh thei lo. (Thup. 21:3, 4) Mi tam takin Lalram thuchah chu an pawm a ni.

WORLD HEADQUARTERS-AH RAWNG KA BAWL ṬAN

Kum 1977-a Jehova Thuhretute Governing Body member Albert Schroeder-a’n Peru a rawn tlawh chuan, world headquarters-a rawngbâwl tûra dîlna theh lût tûrin min fuih a. Dîlna chu ka theh lût ta a ni. Chumi hnu lawk, kum 1977 June 17 aṭangin Brooklyn Bethel-ah chuan rawng ka bâwl ṭan a. Kum li chhûng tih thianghlimna leh thawmṭhatna lamah ka thawk a ni.

Kum 1978, June thlaah chuan Louisiana, New Orleans-a neih international inkhâwmpuiah Elizabeth Avallone-i nên kan intawng a. Ani pawh thutak nunpuitu a nu leh pate enkawlna hnuaia seilian a ni. Kum li chhûng regular pioneer a lo thawk tawh a, hunbi kima rawngbâwl zawm zêl pawh a duh a ni. Kan inbe pawh reng a. Rei lo te hnuah, kan induh ta êm êm a. Tichuan, kum 1979, October 20-a inneiin, Bethel-ah rawng kan bâwl dûn ta a ni.

Kan lawi hmasak berna Brooklyn Spanish kohhrana unaute chuan lâwm takin min lo dawngsawng a. A hnua kohhran dang pathuma kan insawn pawhin, chuta unaute chuan ṭha taka min lo lâwmin, kan Bethel rawngbâwlna pawh min thlâwp a. An mi ṭanpuina bâkah, kum upa tawh tak kan nu leh pate min enkawlsaktu kan ṭhiante leh kan chhûngte chu kan ngaihlu tak zet a ni.

LEGAL DEPARTMENT-A KA RAWNGBAWLNA

Kum 1982, January thlaah chuan beisei loh takin Bethel-a Legal Department-a thawk tûra tih ka ni a. Kum thum hnuah, license nei ukil ni tûrin dân lam zirna school-ah min kaltîr a ni. Chuta ka zir lai chuan, United States leh khawvêl puma mite’n an ngaihhlut lêm loh dikna an neih tam tak chu, dân lama Jehova Thuhretute hnehna chante vânga lo awm thei a ni tih ka hriat chuan mak ka ti hle. Class-ah chûng thubuai pawimawh takte chu chipchiar takin kan zir a ni.

Kum 1986-a kum 30 mi ka nihin, Legal Department overseer ni tûra ruat ka ni a. Ka la naupan avâng leh ka mawhphurhna chelh rih dân ka la hriatthiam tak tak loh avângin, ka lâwm rualin ka huphurh hle bawk.

Kum 1988-ah ukil ka rawn ni a; mahse, chu ka nihnain ka thlarau lam dinhmun a nghawng dân tûr chu ka dâwn thiam lo a ni. Zir sânna chuan mahni inchawimawi duhna a awmtîr theiin, chutiang zir ve lote aia chungnung zâwka inngaihna a awmtîr thei a. Mahse, Elizabeth-i ṭanpuina zârah school ka kal hmaa thlarau lam hunduan ṭha ka neihte chu ka zui leh thei a ni. Hun chu duh deuh mah se, thlarau lamah ka rawn chak chho leh a. Thiamna neih chu nuna thil pawimawh ber a ni lo tih chiang takin ka sawi thei. Nun awmze neihtîrtu ber chu Jehova nêna inlaichînna ṭha neih a, amah leh a mite chunga hmangaihna thûk tak neih hi a ni.

CHANCHIN ṬHA HUMHIMA DAN ANG TAKA TIH NGHEH

Dân lam zirna school ka zawh chuan, Bethel-a dân lam kaihhnawih thil ruahmanna leh court-a Lalram rawngbâwlna humhimna lamah chuan rilru ka pe ṭan a. Inawpna pâwlah inthlâk danglamna a awm reng avângin, ka hna chu a phûrawm rualin a awlsam lo. Entîr nân, kum 1991 aṭangin kum tam tak chhûng kan thu leh hla chhuahte tâna thawhlâwm kan lo khawn ṭhinna chungchânga insiamremnaa hmahruai tûrin Legal Department chu min ruat a. Chuta chin chu, Jehova Thuhretute chuan a thlâwnin an pe chhuak a ni. Chu chuan Bethel leh thlawhhmaa rawngbâwlna chu a tihawlsam phah bâkah, chhiah pêk chungchânga harsatna awm theite pumpelh tûrin min ṭanpui a. Mi ṭhenkhat chuan chu inthlâk danglamna avângin sum tam tak chânin rawngbâwlna chu a khaihlak phah an ring a. An rin loh ang daihin thil chu a thleng a ni. Kum 1990 aṭangin Jehova rawngbâwltute chu a leh hnihin an pung a; chu bâkah, mite chuan nun chhanhim thei thlarau lam chaw chu a thlâwnin an hmu thei a ni. Chumi leh inawpna pâwla insiamremna dangte hlawhtlin theih chhan chu, Jehova min pêk chakna leh bâwih rinawm hmanga min pêk kaihhruainate vâng a ni tih mi mal takin ka hmu a ni.—Ex. 15:2; Mt. 24:45.

Court-a hnehna kan chan chhan chu ukil ṭhate vâng chauh a ni lo va. Thuneitute rilru thlâk tûra chêttîrtu ber chu Jehova mite nungchang ṭha a ni fo a ni. Chumi dikzia chu, kum 1998-a Cuba rama neih special inkhâwmpuia Governing Body member pathum leh an nupuite an tel ṭum khân ka hmu a. An ngilneihna leh zahthiamna chuan thuneitute chu anmahni nêna kan inhmuh laia kan thusawite ai mahin, politics thilah kan inhnamhnawih lo tih pawm tûrin a hmin thei zâwk a ni.

Mahse, thubuaite chu muanawm taka chinfel theih a nih loh hian, court-ah ‘chanchin ṭha chu dân ang taka humhimin kan ti nghet a.’ (Phil. 1:7, NWT) Entîr nân, kum tam tak chhûng Europe leh South Korea rama thuneitute chuan sipaia ṭang lo tûra dikna kan neih chu min pawmsak lo va. Chuvângin, Europe-a unau 18,000 vêl leh South Korea rama unau 19,000 chuangte chu an chhia leh ṭha hriatna ṭanchhana sipaia ṭan an duh loh avângin lung inah an tâng a ni.

A tâwpah chuan, kum 2011, July 7-ah ECHR chuan Bayatyan v. Armenia tiha koh thu tlûkna pawimawh tak a siam a, chu chuan Europe ramahte chuan sipai ṭan aia hna dang thawh thlan theihna a pe a ni. Kum 2018, June 28-ah South Korean Constitutional Court pawhin chutiang chuan thu tlûkna a siam a. Kan unau tlêm tê chauh pawhin tualdawihna vawng lo ta se, chutiang hnehna chu kan chang ngai dâwn lo a ni.

Kan headquarters leh khawvêl hmun hrang hranga branch-tea legal department-te chuan Lalram rawngbâwlna hna humhim tûrin hah pawh dâwn lovin an thawk a. Thuneitute hnên aṭanga dodâlna tâwk kan unaute aiawha kan ding thei chu chanvo hlu angin kan thlîr a ni. Court-ah hnehna kan chang emaw, chang lo emaw kan thubuai chaite chuan thuneitute, lalte leh, hnam hrang hrangte hnênah thu hrilhna a thlen a. (Mt. 10:18) Rorêltu te, sawrkâr palai te, media lam te leh, vântlâng mi nâwlpuite chuan thubuai ṭanfunga kan hman thuchhuahte leh thusawitea târ lan Bible chângte chu an ngaihtuah ngei ang a. Thinlung ṭha pute chuan Jehova Thuhretute chungchâng leh Bible-a kan rin dânte chu an hre thei a. An zînga ṭhenkhat chu kan unaute an rawn ni hial a ni.

KA LAWM E, JEHOVA!

Kum 40 kal ta chhûng khân, khawvêl puma branch office-te nêna dân lam kaihhnawiha thawhho theihna leh court sângte leh thuneitu tam takte hmaa din theihna chanvo hlu ka nei a. World headquarters leh khawvêl hmun hrang hranga legal department-tea thawk ka unaute chu ka hmangaihin ka chhuang tak zet! Malsâwmna tam tak dawngin nun lungawithlâk tak ka nei a ni.

Ka nupui Elizabeth-i chuan kum 45 kal ta chhûng khân, a nuamah leh a hrehawmah pawh rinawm tak leh hmangaihna nei takin min thlâwp a. Natna dotu tibuaia taksa chak lo taka siamtu natna chi khat nei chung pawha, chutianga min thlâwp ṭâng ṭâng avâng chuan ka chhuang tak zet a ni.

Chakna leh hnehna chu kan theihna aṭanga lo awm a ni lo tih mi mal takin kan lo tawng tawh a. Davida sawi angin, “LALPA chu [a mite] chakna a ni.” (Sâm 28:8) Ni e, “indona chu LALPA indona a ni.”