I Lo Hre Tawh Em?

Hmân lai Israelte tân rimawi chu eng anga pawimawh nge a nih?

RIMAWI chu Israelte hnam dâna bet tel thil pawimawh tak a ni a. Bible-ah mite’n rimawi tuma an zai thu vawi tam tak târ lan a ni. A nihna takah chuan, Bible hmun sâwma ṭhena hmun khat chu hlate a ni a; entîr nân, Sâm bu te, Hla Thlan Khâwm te leh, Ṭah Hlate a ni. Chu bâkah, Music in Biblical Life tih lehkhabu pawhin Israelte’n an thiltih tam takah rimawi an telh ṭhîn tih Bible-in chiang taka a târ lan thu a sawi bawk.

Nî tin nuna rimawi hmun chan. Israel mite chuan rimawi hmangin an rilru vei zâwngte an târ lang ṭhîn a. (Is. 30:29) Hmeichhiate chuan lal thar thlannaah te, kût nîah te leh, sipaite’n indonaa hnehna an chan hunahte khuang tête tumin hlim takin hla an sa ṭhîn a ni. (Ro. 11:34; 1 Sam. 18:6, 7; 1 Lal. 1:39, 40) Israel mite chuan lu an sûn hunah pawh an zai ṭhîn bawk. (2 Chro. 35:25) “Hebrai mite chu rimawi ngaina tak hnam an ni,” tiin McClintock and Strong’s Cyclopedia chuan a sawi a ni.

Lal ina rimawi hmun chan. Israel lalte chuan rimawi an ngaina hle a. Lal Saula chuan Davida chu lal ina rimawi tumtu ni tûrin a ko a ni. (1 Sam. 16:18, 23) A hnuah, Davida lal a rawn nih chuan rimawi tumna hmanruate a siam a, hla mawi tak takte a phuah bâkah, Jehova biak ina rimawi hmanga hla sa tûrte pawh a ruat bawk. (2 Chro. 7:6; Amos. 6:5) Lal Solomona pawhin lal ina hla sa tûr mipa leh hmeichhiate a ruat a ni.—Thur. 2:8.

Biaknaa rimawi hmun chan. Israel mite’n rimawi an hmanna pawimawh ber chu Jehova biaknaah a ni a. Dik takin, Jerusalema biak inah rimawi tumtu mi 4,000 an awm a ni. (1 Chro. 23:5) Dârbenthekte, perhkhuangte leh, ṭingṭangte tumin, tawtawrâwtte an hâm a. (2 Chro. 5:12) Mahse, chûng rimawi tum thiamte chauh chu rimawi hmanga Jehova betu awmchhun an ni lo. Israel mi tam tak chuan kum tina kût hmang tûra Jerusalem an pannaah Chhoh Hlate chu an sa ṭhîn a. (Sâm 120-134) Judate thuziak sawi dânin, Israel mite chuan Hallel Sâm Hlatea chu Kalhlên Kût chhûngin an sa ṭhîn bawk a ni.

Rimawi chu Pathian mite tâna thil pawimawh tak a la ni reng a. (Jak. 5:13) Hla sak chu kan biakna pêngah a tel a ni. (Eph. 5:19) Rimawi chuan kan Kristian unaute nên min inpumkhattîr a. (Kol. 3:16) Harsatna kan tawh laiin min tichak bawk. (Tirh. 16:25) Rimawi chu Jehova kan rinchhanzia leh kan hmangaihzia târ lan dân kawng duhawm tak a ni.