Chhiartute Zawhna

Solomona biak ina hulhliap chu eng anga sâng nge a nih?

Hulhliap chu biak ina hmun Thianghlim luhkâ atâna hman a ni a. Kum 2023 hma lama tihchhuah New World Translation of the Holy Scriptures târ lan dânin, “a hma lama hulhliap chu a in vâng lam nêna inangin tawng 20-a sei a ni a, a sân lam chu tawng 120 a ni.” (2 Chro. 3:4) Bible lehlin dangte pawhin hulhliap chu “tawng 120,” meter 53-a (ft 175) sâng a nih thu an sawi bawk!

Mahse, kum 2023-a tihchhuah New World Translation chuan Solomona biak ina hulhliap chungchângah: “A sân lam chu tawng 20,” a nih loh leh meter 9-a (ft 30) sâng a nih thu a târ lang a ni.a Hetianga siamrem a nih chhan ṭhenkhat lo ngaihtuah ta ila.

Hulhliap sân zâwng chu 1 Lalte 6:3-ah târ lan a ni lo. He chângah hian, Jeremia chuan hulhliap sei lam leh vâng lam a chhinchhiah a, a sân lam erawh a ziak tel lo. Tichuan, a bung dawtah dâr tuizêm lianpui te, hûn chhan sâwm te leh, hulhliap pâwn lama awm dâr ban pahnihte pawh telin biak in hmêlhmang langsâr tak takte chu chipchiar takin a târ lang a. (1 Lal. 7:15-37) Hulhliap chu meter 50-a sâng niin biak ina hmun dang zawng aia sâng ni tak tak ta se, engvângin nge Jeremia’n a sawi lan loh vang? Kum za tam tak a liam hnuah pawh Judate chanchin zir mite chuan hulhliap chu biak ina hmun dangte aia sâng zâwk a nih loh thu an sawi a ni.

Bible lama mi thiamte chuan biak in bangin tawng 120-a sâng hulhliap chu a do zawh theih an ring chiah lo. Egypt-a sakhaw biak in kawngkhârte ang chi hmân laia lung leh leirawhchana sak thilte chu a bulṭhut a chhahin a chhîp lam chu a pan zâwk ṭhîn a. Mahse, Solomona biak in erawh a danglam a ni. Mi thiamte chuan a bangte chu tawng 6, meter 2.7 (ft 9) aia chhah lo a nih an ring a. Chuvângin, hmân laia in sak dân chanchin zir mi Theodor Busink-a chuan: “[Biak in luhka] bang chhah dân enin hulhliap chu tawng 120-a sâng a ni thei lo,” tiin thu tâwp a siam a ni.

Chronicles pahnihna 3:4-a thute chu dik lo taka ziah chhâwn palh a ni thei. Hmân lai kutziak lehkhabu ṭhenkhat chuan he chângah hian “120” tiin ziak mah se, kum zabi nganaa ziah Codex Alexandrinus leh kum zabi ruknaa ziah Codex Ambrosianus ang chi lehkhabu rin tlâk dangte chuan “tawng 20” tiin an ziak thung. Engvângin nge lehkha ziaktu chuan “120” tia a ziah sual theih? Hebrai ṭawngah “za” leh “tawng” tih thu malte hi a inang hle a. Chuvângin, “tawng” tih aiah “za” tia ziah palh a ni thei a ni.

Hêng thil chipchiar takte hi hre thiam a, Solomona biak in chu dik taka hriat kan tum rualin, chumiin a entîr—thlarau lam biak in ropui tak—chu kan ngaihven lehzual a ni. Chu biak ina amah be tûra a chhiahhlawh zawng zawngte a sâwm avângin Jehova chungah kan va lâwm tak êm!—Heb. 9:11-14; Thup. 3:12; 7:9-17.