Jehova I Hmangaihna Chuan Baptisma Chang Tûrin A Chêttîr Ang Che

1-2. Tirhkohte 8:27-31, 35-38-a târ lan angin, engin nge Ethiopia mi chu baptisma chang tûra chêttîr?

KRISTA zirtîr nia baptisma chan chu i duh em? Hmangaihna leh ngaihhlutna chuan mi tam tak chu baptisma chang tûrin a chêttîr a. Ethiopia lalnu tâna rawngbâwltu entawn tûr siam hi han ngaihtuah teh.

² Chu Ethiopia mi chuan Pathian Thu aṭanga a thu zirte milin hma a la nghâl a. (Tirhkohte 8:27-31, 35-38 chhiar rawh.) Ani chu engin nge chêttîr? Pathian Thu chu a ngaihlu hle a; tawlailîra chuang chungin Isaia lehkhabu chu a chhiar a. Philipa’n a biak chuan, a tâna Isua thiltihte avângin a lâwm hle a ni. A nih leh, engvângin nge Ethiopia mi chu Jerusalema a zin? Jehova hmangaihna a lo neih tawh vâng a ni. Engtin nge kan hriat? Ani chuan Jerusalemah Jehova a be zo chiah a. A pianpui sakhua chu kalsanin, Pathian dik hnêna inpumpêk hnam awmchhun chu a zawm ta a. Jehova a hmangaihna vêk chuan rahbi dang pawimawh tak baptisma chang a, Krista zirtîr ni tûrin a chêttîr a ni.—Mt. 28:19.

3. Mi chu baptisma chang lo tûrin engin nge dang mai thei? (“I Thinlung Chu Eng Ang Nge A Nih?” tih bâwm chu en rawh)

³ Jehova i hmangaihna chuan baptisma chang tûrin a chêttîr thei che a. Mahse, hmangaihna vêk chuan baptisma chang lo tûrin a dang thei bawk che a ni. Engtin nge? Entîrna ṭhenkhat hi han ngaihtuah teh. Thuhretu ni lo i chhûngte leh i ṭhiante chu i hmangaih tak zet avângin, baptisma i chan chuan an huat che i hlau mai thei a. (Mt. 10:37) A nih loh leh, Pathian huat zâwng chîn dân ṭhenkhat chu i ngainain, bânsan harsa i ti pawh a ni thei bawk. (Sâm 97:10) Chu bâkah, sakhaw dik lo nêna inzawmna nei hnam dânte hmanna hmuna seilian i ni mai thei a. Chûng hnam dânte chu i rilruah a la châm reng pawh a ni thei. Chuvângin, Jehova tilâwm lotu chûng hnam dânte chu bânsan harsa i ti mai thei a ni. (1 Kor. 10:20, 21) Zawhna lo awm ta chu, “Eng nge, a nih loh leh tu nge ka hmangaih ber?” tih hi a ni.

KAN HMANGAIH BER TUR CHU

4. Baptisma chang tûra chêttîrtu ber che chu eng nge ni?

⁴ Kan ngainat zâwng leh ngaihhlut zâwng thil tam tak a awm thei a. Entîr nân, Jehova Thuhretute nêna Bible zirna i neih hma aṭang tawhin, Bible ngaihlutna thûk tak i nei pawh a ni thei. Chu bâkah, Isua pawh i hmangaih hle thei a. Tûnah chuan, Jehova Thuhretute nên in inhriain, anmahni nêna inkawm chu nuam i ti ṭan a. Mahse, chûng thil ṭhate ngainatna mai chuan Jehova hnêna inpumpêk a, baptisma chang tûrin a chêttîr lo vang che. Baptisma chang tûra chêttîrtu ber che chu amah, Pathian Jehova i hmangaihna hi a ni. Thil dang zawng aia Jehova i hmangaih chuan, a rawng i bâwlna chu engmah leh tu mahin a dan i phal lo vang. Jehova i hmangaihna chuan baptisma chang tûrin a chêttîr ang che a, i chan hnuah pawh rinawm reng tûrin a ṭanpui ang che.   

5. Eng zawhnate nge kan ngaihtuah ang?

⁵ Isua chuan Jehova chu kan thinlung, thlarau, rilru leh chakna zawng zawngin kan hmangaih tûr a ni tih a sawi a. (Mk. 12:30) Engtin nge Jehova chu chutiang khawpa nasaa kan hmangaih a, kan zah theih? Jehova min hmangaihna chuan amah hmangaih lêt tûrin min chêttîr a ni. (1 Joh. 4:19) Chu hmangaihna pawimawh ber chu kan neih hnuah, eng ang rilru put hmang leh thiltih dangte nge kan la neih ngai ang?b

6. Rom 1:20-a sawi angin, Jehova chanchin i zir theih dân kawng khat chu eng nge ni?

⁶ Jehova chanchin chu a thil siamte aṭangin zir rawh. (Rom 1:20 chhiar rawh; Thup. 4:10-11) Thingkûngte leh ramsate siam dâna hmuh theih finna chu chhût ngun la. Mak danglam taka kan taksa siam dân hi zir rawh. (Sâm 139:14) Nî chu arsi tlûklehdingâwn tam tak zînga pakhat mai a ni tih hriain, Jehova’n chuta chakna nasa tak a dah chu ngaihtuah rawh.c (Is. 40:26) Chutianga i tih chuan, Jehova i zahna chu a thûk zual deuh deuh vang. Mahse, Jehova chu fing tak leh thiltithei tak a ni tih i hriatna chu amah nêna in inlaichînna atâna nghahchhan ṭhenkhat mai a ni a. Tih tak zeta Jehova hmangaih tûr chuan, a chanchin tam lehzuala i hriat a ngai a ni.

7. Tih tak zeta Jehova hmangaih tûr chuan, eng nge i rin ngheh tlat ngai?

⁷ Jehova’n mi mal takin min ngaihsak tih i rin tlat a ngai a. Lei leh vân Siamtu chuan a hria chein, a ngaihsak che tih rin chu harsa i ti em? Harsa i tih chuan, Jehova’n “min hlat lo ṭheuh,” tih hi hre reng ang che. (Tirh. 17:26-28) Ani chuan “thinlung a en ṭhîn a,” Davida’n Solomona hnênah “amah i zawn chuan i hmu ang,” tia a sawi ang khân a tiam che a ni. (1 Chro. 28:9) Dik tak chuan, tûna Bible i zir chhan ber chu Jehova’n: “Ka lamah ka hîp che a ni,” tia a sawi vâng a ni. (Jer. 31:3, NW) I tâna Jehova thiltihte i ngaihhlut poh leh, amah i hmangaihna chu a thûk zual deuh deuh vang.

8. Jehova hmangaihna chu engtin nge i chhân lêt theih?

⁸ Jehova hmangaihna chhân lêt theih dân kawng khat chu ṭawngṭaia amah biak hi a ni. Pathian hnênah i lungkhamnate leh i tâna a thiltihte avânga i lâwmzia i hrilh chuan, amah i hmangaihna chu a pung zêl ang. Chu bâkah, i ṭawngṭainate a chhân dân i hmuh chuan, Jehova nêna in inṭhian ṭhatna chu a nghet lehzual ang a. (Sâm 116:1) A hre thiam che tih i ring nghet tlat ang. Mahse, Jehova hnaih lehzual tûr chuan, a ngaihtuah dânte i hriatthiam a ngai a. I laka a thil phûtte i hriat a ngai bawk. Chu hriatna i neih theih dân kawng awmchhun chu a Thu, Bible zir hi a ni.

9. Bible i ngaihhlutna chu engtin nge i lantîr theih?

⁹ Pathian Thu, Bible chu ngaihlu rawh. Bible-ah chauh hian Jehova leh i tâna a thiltum chungchânga thutak chu a chuang a. Nî tina Bible chhiarna, Bible zirna atâna inbuatsaihna, leh i thu zirte nunpuina hmangin Bible i ngaihhlutzia i lantîr a ni. (Sâm 119:97, 99; Joh. 17:17) Mi mala Bible chhiarna hun duan i nei em? Chu hun duan chu zuiin, nî tin Bible i chhiar em?

10. Bible hmêlhmang danglam tak zînga pakhat chu eng nge ni?

¹⁰ Bible hmêlhmang danglam tak zînga pakhat chu mit ngeia Isua hmutute thusawi a chuang hi a ni a. Chu chu i tâna Isua thiltihte târ langtu chanchin dik awmchhun a ni. Isua thusawi leh thiltihte i zir chuan, amah nêna inṭhianna siam tûra chêttîrin i awm ngei ang.

11. Engtin nge Jehova hmangaih dân i zir theih?

¹¹ Isua hmangaih la; tichuan, Jehova i hmangaihna a pung ang. Engvângin nge? Isua’n a Pa miziate chu ṭha famkima a lantîr vâng a ni. (Joh. 14:9) Chuvângin, Isua chungchâng i zir nasat poh leh Jehova chu i hre chiangin, i ngaihlu lehzual ang. Isua’n mite hmuhsita awm mi hrethei te, dam lote, leh chanhaite chunga khawngaihna a lantîr dân chu han ngaihtuah teh. A thurâwn ṭha takte leh a thusawite i nunpui avânga hlâwkna i hmuhte pawh ngaihtuah bawk ang che.—Mt. 5:1-11; 7:24-27.

12. Isua chungchâng i zir chuan, eng ti tûra chêttîrin nge i awm mai theih?

¹² Kan sualte ngaihdam a nih theih nâna Isua inthawina chu ngun taka i ngaihtuah chuan amah i hmangaihna chu a zual deuh deuh vang. (Mt. 20:28) Isua chu i tân inhuam takin a thi tih i hriatthiam chuan, chu chuan inchhîr a, Jehova ngaihdamna zawng tûrin a chêttîr thei che a ni. (Tirh. 3:19, 20; 1 Joh. 1:9) Pathian Jehova leh Isua i hmangaihna a nasat poh leh anmahni hmangaihtu mi dangte bula awm chu nuam i ti lehzual ang.

13. Jehova’n eng nge a pêk che?

¹³ Jehova hmangaihtute chu hmangaih rawh. Ring lotu i chhûngte leh i ṭhiante chuan Jehova hnêna inpumpêk i duh chhan chu an hre thiam lo mai thei a. An dodâl hial che pawh a ni thei. Jehova chuan thlarau lam chhûngkua pe chein a ṭanpui ang che. Chu thlarau lam chhûngkua chu i belh tlat chuan, i mamawh hmangaihna leh ṭanpuina chu i dawng ang. (Mk. 10:29, 30; Heb. 10:24, 25) A hnuah, i chhûngte pawh Jehova tehnate mila nungin, i rualin a rawng an bâwl mai thei a ni.—1 Pet. 2:12.

14. Johana thawn khat 5:3-a sawi angin, Jehova tehnate chungchângah eng nge i hmuhchhuah?

¹⁴ Jehova tehnate chu ngaihlu la, nunpui rawh. Jehova i hriat hma chuan, mahniin tehnate i insiam mai thei a; mahse, tûnah chuan Jehova tehnate chu a ṭha zâwk tih i hria a ni. (Sâm 1:1-3; 1 Johana 5:3 chhiar rawh.) Pasal te, nupui te, nu leh pa te, leh fate chungchânga Bible fuihnate hi han ngaihtuah teh. (Eph. 5:22–6:4) Chûng fuihnate chu i nunpui avângin i chhûngkuaah hmasâwnnate i hmu em? Fing taka ṭhian thlanna chungchânga Jehova kaihhruaina i zawm avângin, i thil chîn ṭhanahte hmasâwnna i nei em? Tûn hma aiin i hlim lehzual em? (Thuf. 13:20; 1 Kor. 15:33) Chûng zawhnate chu ‘aw’ tiin i chhâng ngei ang.

15. Bible thu bulte nunpuina kawngah ṭanpuina i mamawh chuan eng nge i tih theih?

¹⁵ Bible thu bul i zirte nunpui dân hriat chu harsa tih châng i nei mai thei. Chuvângin, Jehova chuan thil dik leh dik lo hre tûra ṭanpui theitu Bible ṭanchhan thu leh hla chhuahte pe tûr chein a inawpna pâwl chu a hmang a. (Heb. 5:13, 14) Chûng thu leh hla chhuahte chhiara i zir chuan, a ṭangkaizia i hria ang a, Jehova inawpna pâwl chu i hnaih lehzual bawk ang.

16. Engtin nge Jehova’n a mite chu a kaihhruai?

¹⁶ Jehova inawpna pâwl hmangaih la, thlâwp rawh. Jehova chuan a mite chu kohhran hmangin a kaihruai a; a Fapa, Isua chu kohhran zawng zawng lû a ni. (Eph. 1:22; 5:23) Isua chuan tûn laia hlen tûra a duh rawngbâwlna chu kaihruai tûrin hriak thih pâwl tlêm tê a ruat a. Ani chuan chu pâwl chu “bawi rinawm, fing tak,” tiin a ko va, anni chuan thlarau lama châwm tûr leh humhim tûr chea an mawhphurhna chu an ngai pawimawh hle a ni. (Mt. 24:45-47) Bawi rinawmin a ngaihsak dân che kawng khat chu nangmah enkawl tûra kohhran upa tling takte a ruat hi a ni. (Is. 32:1, 2; Heb. 13:17; 1 Pet. 5:2, 3) Chûng upate chu thlamuan tûr che leh Jehova hnaih lehzual tûra ṭanpui tûr chein an inpeih reng a. I tâna an tih theih zînga pawimawh ber pakhat chu Jehova chungchâng mi dangte zirtîr tûra ṭanpui che hi a ni.—Eph. 4:11-13.

17. Rom 10:10, 13, 14-a sawi angin, engvângin nge mi dangte hnêna Jehova chungchâng kan hrilh?

¹⁷ Mite chu Jehova hmangaih dân zirtîr rawh. Isua chuan a hnungzuitute chu Jehova chungchâng mi dangte zirtîr tûrin a hrilh a. (Mt. 28:19, 20) Chu thupêk chu kan mawhphurhna a ni tih kan hriat avânga zâwm kan ni thei. Mahse, Jehova kan hmangaihna a pun zêl chuan, “thil kan hmuh leh kan hriatte kha sawi lovin kan awm thei lo,” tia sawitu tirhkoh Petera leh Johana te angin kan awm ngei ang. (Tirh. 4:20) Jehova hmangaih tûra tuemaw kan ṭanpui chuan, hlimna nasa tak kan nei ang. Chanchin ṭha hriltu Philipa’n Bible thutak hre tûr leh baptisma chang tûra Ethiopia mi a ṭanpui theih avânga a hlim dân tûr chu han ngaihtuah teh! Philipa entawn a, thu hril tûra Isua thupêk i zawm chuan, Jehova Thuhretu pakhat nih i duh tih i lantîr a ni ang. (Rom 10:10, 13, 14 chhiar rawh.) Tichuan, Ethiopia miin: “Baptisma channa tûr engin nge mi dâl kher?” tia a zâwt angin i zâwt ve ngei ang.—Tirh. 8:36.

18. A dawta thuziakah eng nge kan sawiho vang?

¹⁸ Baptisma chang tûra thu tlûkna i siam hian, i nunah thu tlûkna pawimawh ber i siam a. Chu chu rahbi pawimawh tak a nih avângin, chumiin a ken telte chu ngun taka i ngaihtuah a ngai a ni. Baptisma chungchângah eng nge i hriat ngai? Baptisma i chan hma leh i chan hnuah eng nge i tih ngai? Chûng zawhnate chu a dawta thuziakah chhân a ni ang.