Kum Za Chhûga Lalram
Puanchhuahna!
1. Kum zabi khat dâwn kal ta khân Jehova mite chu eng ti tûra fuih nge an nih?
1 “Ngai rawh u, Lalin ro a rêl e! Nangni hi a chanchin puangtu tûrte in ni. Chuvângin, Lal leh a lalram chanchin chu puang rawh u, puang rawh u, puang rawh u.” Hêng thu phûrawm tak hi kum zabi khat dâwn kal taa Unau Rutherford-a thusawi a ni a, chûng thute hmangin Jehova mite chu radio-a Lalram thuchah nasa taka theh darh tûra fuih an ni a. Chutiang chuan kan ti a ni! Kristian hmasate angin, Lalram chanchin ṭha chu ‘vân hnuaia thil siam zawng zawngte zîngah’ kan hril a. (Kol. 1:23) Kum zabi kal ta kan han thlîr lêt hian, Pathian Ram chanchin puanchhuahnaah eng nge kan thawh? Lalram pianna kum 100 champha kan hnaih rualin, chu chu engtin nge kan puanchhuah zawm zêl theih ang?
2. Engtin nge kan thu leh hla chhuahte chuan Pathian Ram a chawi lâr?
2 Hnung Lam Thlîr Lêtin: Kum sâwmbi tam tak chhûng chu, kan thu leh hla chhuahte chuan Pathian Ram chu a chawi lâr a. Kum 1939 aṭang khân kan magazine bul pui ber chuan: Vênnainsâng Jehova Lalram Puanchhuahna tih hming a pu a. He magazine hian Lalram leh chu miin a hlen chhuah tûr chu a sawi zing hle a ni. Awake! magazine pawh hian, Pathian Ram chu mihringte tâna beisei tûr awmchhun a nihzia a târ lang bawk. Hêng magazine pahnihte hi khawvêla magazine lehlin tam ber leh sem chhuah tam ber a ni chu a va inâwm tak êm!—Thup. 14:6.
3. Lalram puang chhuak tûrin engtih dân ṭhenkhat nge kan hman?
3 Jehova mite chuan Lalram puanchhuah nân tih dân hrang hrang an hmang a. Atîr lamah chuan, aurinna invuah motorte, radio station-te, ken sawn theih thingremzaitheite chu kan hmang ṭangkai a. Chûng tih dânte chuan Lalram puangchhuaktu an la tlêm hle lai khân, chanchin ṭha zau taka theh darhnaah min ṭanpui a ni. (Sâm 19:4) Tûn hnai mai kumahte khân, jw.org-ah thu leh hlate tihchhuah a ni a, chuvâng chuan kan hnathawh khuahkhirhna rama awmte pawh tiamin mi maktaduai tam takte hnênah Lalram chanchin kan puang chhuak thei a ni.
4. A bîk taka hma lâkna eng nge kan neih?
4 Jehova mite chuan Lalram thuchah theh darh nân a bîk taka hma lâkna an nei bawk a. Entîr nân, 1995 aṭanga inṭanin vântlâng lênvahna park-ah te, motor hûnna hmunah te, leh sumdâwnna hmunahte chuan thu hril ṭanin, in tina kan rawngbâwlna zauh tûrin kan thawkrim a ni. Tûn hnai mai khân, ram ṭhenkhata khawpui lianahte chuan a bîk taka vântlâng rawngbâwlna huaihawt a ni a. Chu bâkah, kohhran tam tak chuan mi kal tamna hmunahte chuan thu leh hla chhuah pho chhuahna dawhkân leh tawlailîr nawr sawn theihte hmangin vântlâng thu hrilhna an nei a. Chuti chung chuan in tina rawngbâwlna chu Lalram thu hrilh dân bul pui berah kan la hmang tho a ni.—Tirh. 20:20.
5. Kan zînga mi tam tak tân rawngbâwl kum thar chuan eng hun remchâng nge min pêk ang?
5 Hma Lam Thlîrin: Rawngbâwl kum thar September thlaa inṭanin, mi tam tak chuan regular pioneer an thawk ṭan ang a. An zîngah chuan i thawk ve thei ang em? I thei lo a nih pawhin, auxiliary pioneer thawh theih châng i nei ang em? Pioneer i thawk thei emaw, thawk thei lo emaw pawh ni se, ṭhahnemngai taka Lalram puanchhuahnaa tel tûra i inpêkna eng pawh chu Jehova’n mal a sâwm ngei ang.—Mal. 3:10.
6. Engvângin nge kum 2014 October chu thla danglam bîk tak a nih?
6 Kum 2014 October thla hi Lalram pianna kum 100 champha a ni dâwn a. Hma lam kan thlîr lai hian, mi a ngaithla duhtu tûr zawng zawngte hnênah “Pathian ram chanchin ṭha” i puang chhun zawm ṭheuh vang u.—Tirh. 8:12.