Vântlâng Hmuna Thu Hril Tûra Hma Lâkna Thar
1. Kum zabi khatnaa Kristiante khân entawn tûr eng nge min hnut chhiah?
1 Kum zabi khatnaa Kristiante chuan in tina thu an hrilh mai bâkah, vântlâng hmunahte pawh thu an hril a. (Tirh. 20:20) Entîr nân, mi tam tak an hmuh theihna tûr biak inahte an kal a ni. (Tirh. 5:42) Tirhkoh Paula chuan Atheni khuaa a awm laiin, dâwr hmunahte nî tin thu a hril a ni. (Tirh. 17:17) Tûn laiah pawh, in tina kal hi chanchin ṭha kan hrilh dân kawng pawimawh ber a la ni zêl a. Mahse, motor dahna hmunah te, sumdâwnna hmunah te, vântlâng lênvahna park-ah te, kawtthlêr lûn laiah te, leh hmun dang mite kan hmuh theihna apiangah thu hril tûrin kan kal bawk. Thuchhuahtu tinte chu a theihna a pianga vântlâng hmuna thu hril tûra fuih an nih rualin, mi tam takte chuan vântlâng hmuna thu hrilhna tûr hma lâkna thar phûrawm taka tel theihna hun remchâng an nei dâwn a ni.
2. Vântlâng hmuna thu kan hrilh laiin eng thilah nge kan fîmkhur ang?
2 He thuziak hian vântlâng hmuna thu hrilh dân ṭhenkhat a târ lang a. Mahse, chu chu India ram tâna Kan Lalram Rawngbâwlna chhuak tawhtea târ lan rawngbâwlnaa fîmkhur tûra kaihhruainate chu a hman tlâk tawh lo tihna a ni lo. Chûng kaihhruaina zawng zawngte chu a la hman tlâk reng tho a ni. Thlawhhma rawngbâwlnaah buaina a chhuah loh nân a ṭûl ang angin kan invêng lâwk tûr a ni a. Upahote chuan an thu hrilhna bial chu buaina chhuah awlsamna a nih leh nih loh te, chutianga vântlâng hmuna thu hrilhna chuan chu mi vêngchhûnga rawngbâwlna chungah nghawng ṭha lo a neih dâwn leh dâwn lohte chu ngun takin an ngaihtuah tûr a ni. (Hriat belh nân, upate chuan November 24, 2012 leh February 13, 2014-a lehkha thawnte chu an râwn thei ang.) Thu hrilhna bial chu a him emaw, him lo emaw pawh ni se, in tin kal hun leh kawtthlêra thu hrilh huna an ken ṭhin T-85 brochure, Jehova Thuhretute—Mite Hnêna Chanchin Ṭha Hril Tûra Kan Neih Dikna leh Mawhphurhna tih chu copy khat an keng ṭheuh tûr a ni.
3. Kum 2011 November thla khân, eng hma lâkna thar nge tihchhin nâna neih a nih?
3 Kum 2013 Yearbook phêk 16-17-a târ lan tawh angin, kum 2011 November thla khân New York Khawpuiah vântlâng hmuna thu hrilhna chu a chhin nâna neih ṭan a ni a. Khawpuia mi kêa an kal tamna kawtthlêrahte chuan milem mawi tak takte leh ṭawng chi hrang hranga thu leh hla chhuahte awmze nei taka pho chhuahna dawhkân leh tawlailîr nawr sawn theihte an hûng a ni. Chûng chu mi a sâng têlte chuan nî tinin an kal pêl ṭhîn a; an zîngah chuan tlawh pawh theih loh aparment-a awmte leh ina awm ṭhîn lo mi tam takte pawh an tel a ni. An chhân lêt dân chu a phûrawm hle. Thla khat chhûng lekin, magazine 3,797 leh lehkhabu 7,986 sem chhuah a ni a. Mi veivâk tam takin Bible zirna neihpui tûrin an dîl a ni. A tum ber chu Bible zirpui neih ṭan a nih avângin, tuina lantîrtute address hnutchhiah apiang chu tlawh pawh a nih theih nân kohhran inâwm berah thawn nghâl a ni ṭhîn.
4. Engtin nge he hma lâkna thar hi hmun dangah pawh hman a nih a, nupa tuak khat chuan engtin nge an hlâwkpui?
4 He hma lâkna thar hi a hlawhtlin avângin, vântlâng hmuna thu hrilhna hi khawvêl puma mi tam tak awmna hmun dangahte chuan neih a ni ta a. Nupa tuak khat chuan: “Dawhkân bula dinga, nî tina mi veivâk a sâng têlte kan han hmuhna chuan khawvêl puma mite hnêna chanchin ṭha hrilh theih nâna thawh nasat a nih dân kan rilruah a tuh nghet a. Mi tam takte kan han hmuh a, Jehova’n mi tinte a ngaihsak tak zet dân kan ngaihtuahna hian, thu hrilh rawngbâwlna chu kan nuna thil pawimawh bera dah zêl kan tumna chu a tinghet lehzual a ni. Jehova’n dawhkân kal pêla kal zawng zawngte thinlung chu enfiahin, a thleng tlâkte a zawng niin kan mitthla a. Tûn ang tluk hian vântirhkohte thawhpui nia inhriatna kan nei ngai lo,” tiin an ziak a ni.
5. (a) Vântlâng hmuna thu hrilhna atân kohhran tam takah eng hma lâkna thar nge huaihawt a nih? (b) Vântlâng hmuna thu hrilhna neih a nih hunah kohhrante chuan engtin nge an thawhho theih?
5 Tualchhûnga Huaihawt Vântlâng Hmuna Thu Hrilhna: He hma lâkna thar hi kohhran tam taka upahote chuan an tualchhûng thu hrilhna bialah an huaihawt a. Hetianga hma lâkna neiin, thuchhuahtute chuan kohhran thu hrilhna bial huam chhûnga mipui veivâk an tamna hmunah lehkhabu pho chhuahna dawhkân emaw, tawlailîr nawr sawn theih emaw chu hmangin vântlâng hmuna thu hrilhna an nei a ni.—“Thawhhona Ṭha Neih A Ngai” tih bâwm chu en rawh.
6. Tih theih a nih chuan, upate chuan engtin nge vântlâng hmuna thu hrilhna chu an huaihawt ang?
6 Upate chuan kohhran thu hrilhna bialah chuan kêa mi veivah tamna hmun a awm leh awm loh ngaihtuahin, vântlâng hmuna thu hrilhna huaihawt chi a nih leh nih loh thu tlûkna an siam ang. Thu hrilhna dawhkân emaw, tawlailîr nawr sawn theih emaw dahna tûr âwm ang chu, lîrthei dinna hmunpui te, kawng pêng ṭhuam te, vântlâng lênvahna park te, kawngpui lûn lai te, bazârna hmunpui te, college tual te, thlawhna ṭumhmun te, leh kum tina thil pawimawh an hmanna hmunte chu a ni thei ang. Thuhrilhna dawhkân emaw, tawlailîr nawr sawn theih emaw chu a hmun pângngai, a ni pângngai leh a hun pângngaia pho chhuah chuan ṭangkaina a nei a ni. Mite chuan dâwr lian pakhata an kal hian an thil lei duh chauh an ngaihtuah ṭhin avângin chutiang hmuna thu hrilhna dawhkân emaw, tawlailîr nawr sawn theih emaw dah ai chuan bazâr hmunpui—shopping malls—vêla dah chu a sâwt zâwk tih kan hmu chhuak a. Mipui kêa veivah tamna kawngpui sîr ang chi hmun ṭhenkhatah chuan lehkhabu pho chhuahna tawilailîr tê chi hman chu a ṭangkai zâwk thei a ni. Upate chuan Vênnainsâng leh Awake! magazine leh Bible Zirtîrna bu ang chi atâna milem hman tûrte chu kan Web site aṭangin an download thei ang. Chûng chu tûna kan sawi tâk ang vântlâng hmuna thu hrilh nân bîka siam a ni. Tualchhûng mite rilru tina thei tûr ni lovin, mit la thei tûr milemte chu thlang ang che. Chutiang thu hrilhnaa tel tûrte chuan service overseer kaihhruaina chu an zâwm tûr a ni a. An thu hrilhna bial pâwn lama awm ngaihventu address an dawn chuan Please Follow Up (S-43) form chu ziak khatin, secretary hnênah an pe nghâl ṭhîn tûr a ni bawk.
7. Hetiang vântlâng hmuna thu hrilhna hi eng anga neih nge ni?
7 Thu Hrilhna Neih A Nih Dân: Thuchhuahtute chuan miin an dawhkân emaw, tawlailîr nawr sawn theih emaw an rawn pan chu an nghâk tlângpui ṭhîn a. Tuemawin a rawn pan chuan, a tuizâwng thu leh hla chhuah a duh apiang la tûrin an lo hrilh ṭhîn a ni. Tin, thuchhuahtute chuan zawhna a neih eng pawh chu Bible hmangin lâwm takin an chhânsak a. Thu leh hla chhuah lâk a neih chuan, thuchhuahtute chuan thawhlâwm chungchâng an sawi lang lo. Mahse, kan rawngbâwlna chhawmdâwl a nih dân a zawh erawh chuan, thawhlâwmte chu lehkhabua chuang address-ah a thawn theih thu an hrilh thei ang. A remchân chuan heti hian an zâwt ṭhîn a ni: “Tuemawin rawn tlawh se i ti em?,” a nih loh leh, “I lehkhabu lâk ṭanchhana Bible sawihona neih i duh ang em?” tiin.
8. Engtin nge he hma lâkna thar hi a hlawhtlin?
8 Hetiang thu hrilhnaa tel hi a hlâwkthlâk hle a. India rama kohhran pakhat chuan tihchhinna an neihah dârkâr khat chhûngin magazine 1,000 chuang a pe chhuak a, tuina neite address 200 lai an la khâwm hman a ni. Bangalore-ah chuan traffic inspector pakhat chuan bazâr pui, shopping mall kianga lehkhabu pho chhuahna dawhkân chu panin, kan rawngbâwlna a ngaihhlutzia a sawi chhuak a. Family Happiness lehkhabu leh Young People Ask chu a la ta a ni. Andhra Pradesh-ah pawh Thuhretute hmuh châk tak tuina nei mi pakhat chu hetiang vântlâng hmuna thu hrilhna aṭangin biak pawh a ni a, Bible a zir tawhin inkhâwmnaah pawh a tel tawh a ni.
9. Kohhranah vântlâng hmuna thu hrilhna tûr huaihawt a nih loh chuan, eng hun remchângte nge awm thei tho?
9 I Mi Mal Rawngbâwlnaah Vântlâng Hmuna Thu Hrilhna: Kohhran ṭhenkhat chuan an thu hrilhna bialah thu leh hla pho chhuahna dawhkân emaw, tawlailîr nawr sawn theih emaw dahna tham kêa mipui veivâk a nei meuh lo va. Mahse, chûng kohhranahte pawh thuchhuahtute chu an mi mal rawngbâwlnaah vântlâng hmuna thu hrilhna telh tûra fuih an ni. I thu hrilhna bialah bazârna hmun, a nih loh leh dâwrtu tam tak nei dâwr lian a awm em? Vântlâng lênvahna park emaw, mite kal khâwmna hmun emaw a awm em? Thu hrilhna bialah chuan a khât tâwkin vântlâng thiltihna a awm em? A awm a nih chuan, upate râwn chung leh remhriatna hmangin vântlâng hmuna thu hrilhna chu i nei thei tho vang.
10. Engvângin nge mite awmna apianga thu hril tûrin theih tâwp kan chhuah ang?
10 Jehova chuan “mi zawng zawng chhandama awmah leh thutak hriaah a duh a ni.” (1 Tim. 2:4) Chuvângin, khawvêl tâwp hmain Lalram thuchah chu mi a tam thei ang berte hnêna thleng tûrin ṭan kan la a. (Mt. 24:14) Hmun tam takah chuan mite chu an ina tawn fuh a harsa a. Mahse, vântlâng hmuna an awm laiin thu kan hrilh thei a ni. Vântlâng hmuna thu hrilhna hi mi ṭhenkhat tân chuan chanchin ṭha hriat theihna hun remchâng awmchhun a ni thei. Chuvângin, mite an awmna apianga thu hrilin kan rawngbâwlna chu i hlen chhuak ang u.—2 Tim. 4:5.