I “Lâwmna Tûr” Chu Eng Nge Ni?
1. Thla a tâwp apiangin lâwm chhan tûr eng nge kan neih?
1 Thla a lo tâwp a, thlawhhma rawngbâwlna report thlâk tûra hriattîr kan nih hian, i “lâwmna tûr” chu eng nge ni? (Gal. 6:4, C.L. Re-edited) Special pioneer thawka dârkâr 130 report pe kan ni emaw, pawmpuina nêna minute 15 bî zêla report pe thuchhuahtu kan ni emaw pawh ni se, thinlung zawng zawnga Jehova rawng kan bâwl theih avângin kan lâwm ṭheuh tûr a ni.—Sâm 100:2.
2. Engvângin nge Jehova rawngbâwlnaah ṭan kan lâk ang?
2 Jehova chuan Lei leh vâna Lal Chungnungber a nih angin, a ṭha ber kan pêk chu a phû a. (Mal. 1:6) Amah kan hmangaih avângin, a duhzâwng ti tûrin kan inpumpêk a. Chuvângin, nî emaw, thla emaw a tâwp hunah Jehova rawngbâwl nân kan hun te, kan thiamna te, leh kan tha leh zungte zînga ‘a hmasa ber,’ a nih loh leh a ṭha ber pe nia kan inhriat hian, a mi mal angin lâwm chhan tûr kan nei a ni. (Thuf. 3:9) Amaherawhchu, kan chhia leh ṭha hriatnain thiam loh min chantîr a nih chuan, hmasâwn dân tûr kan ngaihtuah tûr a ni.—Rom 2:13-16.
3. Engvângin nge mi dangte nêna inkhaikhin chu a finthlâk loh?
3 ‘Mi Dang Nêna Inkhaikhin Lovin’: Mi dang nêna inkaikhin emaw, kan chak lai hun nêna inkhaikhin emaw chu a finthlâk loh va. Dinhmunte chu a inthlâk danglamin, theihnate pawh a danglam bawk a. Inkhaikhinna chuan inelna emaw, tlâktlai lova inhriatna emaw a awmtîr thei a ni. (Gal. 5:26; 6:4) Isua chuan mi dangte a khaikhin ngai lo va. Chu ai mah chuan, miin a phâk tâwka thil a tih chu a fak zâwk a ni.—Mk. 14:6-9.
4. Isua talent tehkhin thu aṭangin eng zir tûr hlu tak nge kan neih theih?
4 Isua talent tehkhin thuah chuan, hnathawktute chuan “an tih theih tâwk tûr” ang zêlin talent an dawng a. (Mt. 25:15) An pu a lo haw a, an thil tih chungchâng sawi tûra tih an nih khân, an theihna leh dinhmunte azira taima taka thawktute chuan fak an hlawh a, an pu lâwmnaah an lût a ni. (Mt. 25:21, 23) Chutiang bawkin Lalram thu hrilh hnaa kan buai lai hian, Pathian pawm kan hlawhin, lâwmna tûr chhan kan nei tih kan ring tlat thei a ni!