A KAWM THU | ENGTIN NGE PATHIANIN INDONA A THLIR?
Pathianin Indona A Thlîr Dân—Kum Zabi Khatnaah
Mite chu hnehchhiahin an awm a. An thlahtute angin, kum zabi khatnaa Judate chuan, chutih laia anmahni awpbettu Rom sawrkâr laka chhuah zalên an nih theih nân Pathian an dîl tlut tlut a rinawm a ni. Isua chanchin chu an hre ta a. Ani chu hrilh lâwk Messia a ni thei ang em? Mi tam takin, anmahni hnehchhiahtu Rom mite laka ‘Israelte tlantu tûr a nih an beisei’ pawh kha thilmak a ni lo. (Luka 24:21) Mahse, zalênna chu a thleng si lo. Chu aiin, C.E. 70-ah Rom sipaite chu thawk chhuakin, Jerusalem leh a biak in an tichhe ta zâwk a ni.
Eng thil nge thleng? Pathian chuan hun kal tawha a tih angin, engvângin nge Juda mite tân a dosak loh? A nih loh leh, hnehchhiahna lak ata mahnia an chhuah zalên theih nân engvângin nge indo a phalsak loh? Pathianin indona a thlîr dân a inthlâk danglam em? Danglam lo. Judate chungchângah chuan thil engemaw nasa takin a inthlâk danglam a ni. Anni chuan Pathian Fapa, Isua chu Messia-ah an pawm lo a ni. (Tirhkohte 2:36) Chuvângin, Pathian nêna a bîk taka an inlaichînna chu a hnam pum angin an chân ta a ni.—Matthaia 23:37, 38.
Juda hnam leh Ram Tiam chuan Pathian vênhimna an dawng tawh lo va, anni chu Pathian pawm, a nih loh leh a ṭanpui indonaah tel angin an inchhâl thei ngai tawh hek lo vang. Isua hrilh lâwk angin, Pathian duhsakna nêna inkûngkaih malsâwmnate chu tisa lam Israelte hnên aṭangin thlarau lam hnam tharah a insawn a, chu chu a hnuah “Pathian Israelte,” tiin Bible-ah sawi a ni. (Galatia 6:16; Matthaia 21:43) Thlarauva hriak thih Kristian kohhran chuan thlarau lam Pathian Israelte a nihzia a târ lang a. Kum zabi khatnaah khân, anni chu: ‘Tûnah chuan Pathian mi in ni ta,’ tia chiang taka hrilh an ni.—1 Petera 2:9, 10.
Kum zabi khatnaa Kristiante chu “Pathian mi” an nih tawh avângin, Pathianin Rom mite awpbehna lak aṭanga zalên tûrin a dosak ang em? Nge anmahni awpbettute do a phal zâwk dâwn? Chutiang chuan a ti lo a ni. Engvângin nge? Pathian ruat indonaah chuan, thuziak hmasaa kan târ lan tâk angin amah chauhvin a thlen hun tûr a ruat a ni. Pathian chuan kum zabi khatnaa Kristiante tân a dosak lo va, khawvêl indonaa tel tûrin a phal hek lo. Kum zabi khatna kha, Pathianin suahsualna leh awpbehna a do hun a ni lo tih a chiang hle a ni.
Chuvâng chuan, hmân laia Pathian mite ang bawkin, kum zabi khatnaa Kristiante chuan suahsualna leh inawpbehna Pathianin a tihtâwp hun chu an nghah a ngai a. Chumi hun a lo thlen hma chuan, Pathianin an hmêlmate an do pawh a phalsak lo bawk. Chu chu Isua’n a zirtîrnaah a sawi chiang hle a ni. Entîr nân, a hnungzuitute chu indonaa tel tûrin a kaihruai lova: “In hmêlmate chu hmangaih ula, a tiduhdahtu che u chu ṭawngṭaisak rawh u,” tiin a hrilh zâwk a ni. (Matthaia 5:44) Kum zabi khatnaa Rom sipaiin Jerusalem an beih hun tûr a sawi lâwk khân, Isua’n a hnungzuitute chu châmbânga bei lêt lo tûr leh tlân chhuahsan tûrin a hrilh a, chutiang chuan an ti a ni.—Luka 21:20, 21.
Chu bâkah, tirhkoh Paula chuan: “In phuba la suh ula, . . . ‘Phuba rêng rêng keima lâk tûr a ni, keiman ka thungrûl ang,’ Lalpain a ti,’ tih ziak a ni,” tiin Pathian thlarau thâwkkhumin a ziak a. (Rom 12:19) Paula chuan kum zabi engemaw zât kal taa Leviticus 19:18 leh Deuteronomy 32:35-a chhinchhiah, Pathian thu chu a la chhâwng a ni. Thuziak hmasaa kan hmu tâk angin, an hmêlmate an do huna ṭanpui chu Pathianin hmân laia a mite phuba a lâksak dân kawng khat a ni. Chuvângin, Paula thute chuan Pathianin indona a thlîr dân a thlâk danglam lo tih a târ lang. Kum zabi khatnaah khân, Pathian chuan indona chu a chhiahhlawhte phuba laksakna ang leh inawpbehna leh suahsualna chi hrang hrang tihtâwpna angin a la thlîr reng a. Mahse, hmân lai ang bawkin, Pathian chauhvin indona a thlen hun tûr leh a tel tûrte chu a ruat a ni.
Pathian chuan kum zabi khatnaa Kristiante chu indonaa an tel a phal lo tih a chiang hle. Tûn laiah hian a phal em? Pathian chuan tûn laia mite chu indonaa an tel a phal em? A nih loh leh, Pathianin a chhiahhlawhte tâna a dosak hun a ni em? Engtin nge tûn laiah Pathianin indona a thlîr? Hêng zawhnate hi he thuziak inzawma a tâwpna ber hian a chhâng ang. (wp15-E 11/01)