A KAWM THU
Engtin Nge Pathianin Indona A Thlîr?
He zawhna hi engtin nge i chhân ang? Mi tam tak chuan Pathianin indo a phal niin an ngai a. Hmân laia amah betu ṭhenkhatte chu indo tûrin thu a pe, tiin an chhût bawk; chu chu Bible pawhin a nemnghet a ni. Mi dangte erawh chuan Pathian Fapa, Isua’n a hnungzuitute chu an hmêlmate hmangaih tûrin a zirtîr tih an hria a. (Matthaia 5:43, 44) Chuvâng chuan Pathianin indona a thlîr dân chu a danglam tawh a, tûn laiah hian indo a phal tawh lo niin an ngai a ni.
Engtin nge i ngaih? Pathianin indo a phal em? A phal a nih chuan, tûn laia indonaah khawi lam nge a ṭan? Hêng zawhnate chhânna i hmuhna chuan indona i thlîr dân a nghawng thei a ni. Entîr nân, Pathianin indo a phal mai ni lovin, indona engemaw bîk takah chuan i ṭan lam chu a ṭan tih hre ta la, anni chuan an hneh dâwn tih i rin tlat avângin nuam i ti ngei ang. Mahse, Pathianin indonaa i ṭan loh lam a thlâwp tih hre ta la, engtin nge i ngaih ang? I ṭan lam chu ngaihtuah ṭhat leh i duh ngei ang.
Thil pawimawh zâwk engemaw ngaihtuah tûr a awm a. Pathianin indona a thlîr dân hriatna chuan Pathian i thlîr dân a nghawng thei a ni. Indona avânga nasa taka tuartu mi maktaduai têlte zînga tel ni ta la, Pathian chu mi ṭhenkhatte ngaih angin indona awmtîrtu emaw, indonain a kaihhnawih hrehawm tawrhna awm phaltu emaw, chawk chhuak hialtu emaw, a nih loh leh indona avânga hrehawm tawrhna ngaithei leh ngaihsak lo a ni em? tih zawhna chhânna hi i hriat a ngai ngei ang.
Hêng ngaih dânte leh Bible chhânna a inang lo hle tih i hriat chuan mak i ti ngawt ang. Chu bâkah, hmân lai aṭanga tûn lai thleng hian Pathianin indona a thlîr dân chu a la ngai reng a ni. Hmân lai leh kum zabi khatnaa Isua leia a awm laia Pathianin indona a thlîr dân Bible-in a sawi chu i lo ngaihtuah ang u. Chu chuan Pathianin tûn laia indona a thlîr dân leh indona chu mihringte hma lam huna awm zêl tûr a nih leh nih loh hre tûrin min ṭanpui ang. (wp15-E 11/01)