Mi Dangte Ṭanpui Theitu Niin Ka Inhre Tawh

KA TUN HMA NUN:

Guatemala rama hmun fâl taka awm, Acul an tih thingtlâng khaw pakhatah ka piang a. Kan chhûngkua chu Maya thlah, Ixil hnam kan ni. Ka seilenna hmunah chuan Spanish ṭawng bâkah, tualchhûng ṭawngte pawh ka hmang a. Guatemala rama tualchhûng indona kum 36 chhûng a thlen lai khân, ka puitling chho va. Chûng hun chhûng chuan Ixil mi tam tak an thi a ni.

Kum li mi ka nihin, kum sarih mi ka u chuan vawmpuah bomb a infiampui laiin a tipuak palh a. Lungchhiatthlâk takin a nun a chân phah ta a, kei chuan ka mit ka chân thung. Chuta ṭang chuan, ka naupan chhûng chu Guatemala Khawpuia mitdelte school-ah awmin, chutah chuan Mitdel Hawrawp ka zir a. Ka thiam theih loh avângin, hnathawktu chuan naupang dangte ka biak a phal lo va, ka zirpuite pawhin min kâwm duh lo a ni. Ka khua a har ṭhîn hle a, kum khatah thla hnih chhûng chu ka nu hnênah ka awm thei a, ka chungah a ngilneih a, min khawngaih theih êm avângin a bula awm chu ka châk thei hle a ni. Lungchhiatthlâk takin, kum sâwm mi ka nih laiin ka nu chuan min boralsan a. Khawvêla min hmangaihtu awmchhun chân nia ka inhriat avângin ka mangang hle a ni.

Kum 11 ka nih chuan, kan khuaah ka haw leh a, ka pa lama ka unaupate chhûngkua chu ka bêl ve ta chawt a. Anni chuan ka taksa lam mamawh chu min pe a; mahse, rilru lamah tumahin min ṭanpui thei lo. A châng chuan, Pathian hnênah: “Engvângin nge ka nu a thih? Engvângin nge ka mit a del?” tiin ka au chhuak ṭhîn a. Mite chuan chûng chhiatnate chu Pathian duhzâwng a ni tih min hrilh a. Pathian chuan min ngaihthahin, âwm lo takin thil a ti niin ka ngai ta a ni. Intihhlumna hmanrua ka neih loh vâng chauhva intihlum lo ka ni.

Ka mitdelna chuan taksa lamah leh rilru lamah derthâwng takin min siam a. Ka naupan lai chuan ṭum engemaw zât chu mipat hmeichhiatna lama khawih chingpen ka ni a. Chûng thilsualtihte chu ka report ngai lo—tumahin min ngaihsak ka rin loh vâng a ni. Mite chuan min be khât hle a, kei pawhin tumah ka be ngai lo. Ka inla hrangin, ka lunghnual hle a, tumah ka ring lo bawk.

BIBLE-IN KA NUN A THLAK DANGLAM DAN:

Kum 13 mi ka nih chuan, school-a intihhlimna kan neih laiin Jehova Thuhretu pahnih (nupa tuak khat) chuan min rawn pan a. Ka dinhmun avânga min khawngaihtu, zirtîrtu pakhatin min tlawh tûra a lo hrilh vâng a ni. Anni chuan mitthite an tholeh ang a, engtik nîah emaw chuan mitdelte pawhin an hmu leh thei ang tih Bible thutiam chu min hrilh a. (Isaia 35:5; Johana 5:28, 29) An thu min zirtîr chu duh hle mah ila, ka ṭawng ngai loh avângin, amahni nêna inbiak chu harsa ka ti hle a. Ka inkiltawih nachungin, Bible chungchâng min zirtîr tûrin ngilnei tak leh dawhthei takin min rawn tlawh zawm zêl a. An nupa chuan kan khua thleng tûrin tlâng kawngah mêl ruk (km 10) aia tam an kal ṭhîn a ni.

Anni chu felfai taka inthuam; mahse, hausak hmêl loh tak an nih thu ka unaupa chuan min hrilh a. Ka chungah mi mal taka ngaihsakna lantîrin, thil min hawn ziah a. Kristian dikte chauh chutianga an inpêk chu ka ring a ni.

Mitdel Hawrawpa ziak thu leh hla chhuahte hmangin Bible ka zir a. Ka thil zirte chu hre thiam tho mah ila, pawm harsa ka ti a ni. Entîr nân, Pathianin a mi mal takin min ngaihsak tih leh mi dangte’n ka chungah Pathian rilru ang an pu ve thei tih chu rin harsa ka ti hle a. Jehova’n sualna awm a la phal chhan chu hre thiam mah ila, hmangaihna ngah tak Pa anga ngaih chu harsa ka ti a ni.a

Pathian Thu ka zirte chuan zawi zawia ka thil thlîr dân thlâk tûrin min ṭanpui a. Entîr nân, Pathianin hrehawm tuarte a khawngaih tak zet tih ka hre ta a. Ṭha lo taka cheibâwla awm amah betute chungchângah, Pathian chuan: “Ka mite . . . hrehawmzia ka hmu reng asin, . . . an lungngaihnate chu ka hre reng si a,” tiin a sawi (Exodus 3:7) Jehova mize duhawm tak tak ka hriatthiam tâk hnu chuan, inpumpêk duhna ka nei a. Kum 1998-ah Jehova Thuhretu zînga pakhat niin baptisma ka chang ta a ni.

Baptisma ka chan hnu kum khat vêlah, Escuintla khawpui bula mitdelte zirnaah ka tel ve a. Kan khuaa ka awm laia inkhâwm tûra harsatna ka tawhte chu tualchhûng kohhrana upa pakhatin a hre chhuak a. Chuta Kohhran hnai ber chu Thuhretu nupain Bible min zirpui tûra an lo kalna ang tluka hla a nih avângin, ka tân kal a harsa hle a ni. Chu upa chuan min ṭanpui tûrin, an ina min awmtîra kohhran inkhâwmnaa min hruai theitu tûr Escuintla-a awm Thuhretu chhûngkaw pakhat chu a hmu ta a. Vawiin nî thleng pawh hian an chhûngkaw zînga mi angin min la enkawl reng a ni.

Kohhrana mite’n ka chunga hmangaihna dik tak an lantîrna thiltawn tam tak ka sawi thei a. Chûng ka thiltawnte chuan Jehova Thuhretute zînga mi ka nih angin, Kristian dikte zîngah ka tel tih min rinnghehtîr a ni.—Johana 13:34, 35.

KA HLAWKPUI DAN:

Hlutna nei lo leh beiseina nei lo niin ka inngai tawh lo va. Tûnah chuan thiltum tam tak ka nei tawh a. Jehova Thuhretute Bible zirtîrna hnaah hunbi kima thawk ka nih angin, rual ka ban lohna lam aiin mite hnêna Bible thutak zirtîr chu ka ngaihtuah tlat zâwk a ni. Chu bâkah, kohhran upa nia rawngbâwl theihna leh tualchhûng kohhranahte thusawi theihna chanvo hlu tak ka nei a. Mi sâng têl telna regional inkhâwmpuia Bible ṭanchhan thute sawi theihna chanvo hlu ka nei bawk a ni.

Kum 2010 khân, Ministerial Training School (tûna Lalram Chanchin Ṭha Puangtute School tia koh) El Salvador rama neihah chuan ka tel a. Chu school chuan kohhrana ka mawhphurhnate ṭha lehzuala hlen tûrin min ṭanpui a ni. Zirtîrna ka dawn chuan a hna thawk tûra tupawh tlintîr theitu, Pathian Jehova tâna hlu tak leh a hmangaih tak nia inhriatna min pe a ni.

Isua chuan: “Englo lâk aiin pêkin lukhâwng a nei zâwk,” tiin a sawi a. (Tirhkohte 20:35) Tûnah chuan, ka hlim tawh hle tih dik takin ka sawi thei a, tûn hmaa ka ngaihtuah phâk ngai loh, mi dangte ṭanpui theitu niin ka inhre tawh a ni. (wp15-E 10/01)