Pathian Hnaih Rawh
‘Pathian Hmangaihna Ata Min Ṭhen Thei’ Thil Engemaw A Awm Em?
TUTE pawh hian hmangaihna kan mamawh ṭheuh va. Chhûngte leh ṭhiante’n min hmangaih tih kan inhriat hian kan hlimin kan phûr hle ṭhîn. Amaherawhchu, lungchhiatthlâk takin mihringte inlaichînna chu a chhe awlsamin, a inthlâkthleng hma hle a. Kan hmangaih takte chuan rilru naa min siamin, min kalsan thei a, a nih loh leh min hnâwl hial thei bawk. Mahse, a hmangaihna inthlâk danglam ve ngai lo tuemaw a awm a. Pathian Jehova’n amah betute a hmangaihna chu Rom 8:37-39-ah mawi taka târ lan a ni.
Tirhkoh Paula chuan engmahin ‘min hmangaihtu . . . Pathian hmangaihna ata chu mi ṭhen thei lovang tih dik taka a hriat’ thu a sawi a. Hetah hian Paula chuan “min hmangaihtu” tih ṭawngkam hmangin a thusawi chu rinawm taka Pathian rawngbâwltu zawng zawngte tân a nihzia a târ lang a ni. Chu mi sawi uar nân, a chhiahhlawh inpe takte hnêna Jehova hmangaihna thleng lo tûra dang thei lo thil engemaw zât a sawi a ni.
“Thihna te, nunna te . . . pawhin.” Jehova hmangaihna chu a mite an thih pawhin a dai chuang lo. Chu mi finfiah nân, chûng mitthi tate chu a hre reng a, felna khawvêl thar lo awm tûrah chuan a kai tho vang. (Johana 5:28, 29; Thu Puan 21:3, 4) Chu mi lo thlen hma chuan, Pathian betu rinawmte chuan he khawvêlah hian eng thil pawh tawng se, Pathianin anmahni a hmangaihna chu a dai ngai lo.
“Vântirhkoh te, lalna te . . . pawhin.” Mihringte rilru chu mi thiltithei takte emaw, thuneitute emaw hian a hneh hma hle ṭhîn a; mahse, Jehova chu chutiang a ni ve lo. Thil siam thlarau thiltithei tak, Setana lo ni ta vântirhkoh ang chite chuan Pathian chu amah betute hmangaih tawh lo tûrin an hmin thei lo. (Thu Puan 12:10) Kristian dikte dodâl mai thei lalna te, a nih loh leh sawrkârte pawhin Pathianin a chhiahhlawhte a thlîr dân chu an thlâktîr thei lo.—1 Korinth 4:13.
“Thil awm sa te, thil lo la awm tûr te . . . pawhin.” Pathian hmangaihna chu khua reiah pawh a chuai chuang lo. A chhiahhlawhte chunga tûna thil thleng mêkte leh nakina lo la thleng thei thil a enga mahin Pathianin anmahni a hmangaihna chu a tireh lo vang.
“Thiltihtheihna te . . . pawhin.” Paula chuan vân lam leh lei lam chaknate—“vântirhkoh te” leh “lalna te”—chungchâng a sawi zo tawh a, tûnah chuan “thiltihtheihna te” chungchâng a sawi a ni. Heta hman Grik thu mal hian awmzia chi hrang hrang a nei a. Chûng zînga a engemaw ber atâna hman pawh chu ni se, thil pakhat chu a chiang a ni: Vân lam emaw, lei lam emawa thiltihtheihna a enga mah chuan Jehova hmangaihna chu a mite hnên thleng lo tûrin a dang thei lo.
“Sânna te, thûkna te . . . pawhin.” Jehova chuan a mite chu tisa lamah leh rilru lamah an sâng emaw, an hniam emaw eng ang dinhmunah pawh ding se, a hmangaih reng a ni.
“Thil siam dang rêng rêng pawhin.” Engkim huaptu hêng ṭawngkamte hmang hian Paula chuan engmah rêngin betu rinawmte chu Jehova hmangaihna lak ata a ṭhen hrang thei lo tih a sawi a ni.
Inthlâk danglam thei leh chuai thei mihringte hmangaihna ang lo takin, Pathianin rinnaa a lam hawitute a hmangaihna chu sâwi danglam theih a ni lo; chatuan daih a ni. He mi hriatna hian Jehova hnaih zual tûr leh kan hmangaihna târ lan nâna theih tâwp chhuah tûrin min chêttîr tak zet a ni. (w08 8/1)