Chhiartute Zawhna Siam
Armageddon Indona Chu Khawi Hmuna Thleng Tur Nge?
Armageddon indona chu khawi emaw lai bîka thleng tûr a ni lo. Lei pum pui chu indona hmun a ni zâwk ang. Engvângin nge? Pâwl inepte chu an tam êm avânga lei hmun khata an len dâwn loh avângin.
Armageddon, a nih loh leh Har–Magedon chu ‘Pathian Engkimtitheia ni ropuia indona’ tia hriat a ni bawk. Pathian Jehova chuan a Fapa Krista Isua chu he leia rorêltu suaksual infinkhâwm zawng zawngte do tûra vântirhkoh sipai rualte kokhâwmtu atân a hmang ang.—Thu Puan 16:14; 19:11-16.
Hnamte chu indonaa tel tûrin Setana chuan kawng engemawti takin a thlêm a. Bible chuan “ramhuai thlarau” chu “khawvêl zawng zawnga lalte [rorêltute] hnênah an kal a . . . hmun pakhat Hebrai ṭawnga Har–Magedon an tihah chuan an hruai khâwm” tih a sawi.—Thu Puan 16:14-16.
Bible-a bu dangte ang lo takin, Thu Puan bu chuan a chhiartu tam takte chu a ngaihna hre lovin a awmtîr a. Thu Puan bua thute hi a ngial a ngana lâk tûr tih ngaih dân nei mi tam takte chuan chu indona inṭanna hmun tûr nia an rin chu târ langin, a chhehvêla thilthlengte chu engto takin an ngaihven reng a ni. Armageddon chuan khawi emaw lai bîk tak a kâwk tih ngaih dân chu, C.E. kum zabi paruknaa Oecumenius-a buatsaih tûn thlenga la awm Grik ṭawnga ziak Thu Puan hrilhfiahna lehkhabuah chuan hmuh theihin a awm a ni.
Fundamentalist sakhaw hruaitute thlîr dân lâr tak chu ṭâwmpuiin, Dallas Theological Seminary-a president hlui John F. Walvoord-a chuan Armageddon hi “Middle East aṭanga lo chhuak tûr khawvêl beidawnthlâk taka indona hnuhnûng ber” a nih thu a sawi. Nakina lo thleng tûr he indona nasa tak a lo chhuahna hmun tûr chu “Palestine ram hmâr lam, phaizâwl zau tak tâwpa awm tlâng tê pakhat ‘Megido Tlâng,’” an tih chu niin a sawi bawk.
Amaherawhchu, Thu Puan bu hi Armageddon awmna hmun tak tak kawhhmuhtu a ni lo. A tîra Grik ṭawnga ziakah chuan, he lehkhabu châng hmasa ber chuan a thute hi entîr nei ṭawngkama ziak a nih thu a sawi a. Chuvângin, Jehova Thuhretute chuan an lehkhabu chhuah hlui tawh tak Studies in the Scriptures, Volume IV-naah chuan: “Megido Tlânga mi an punkhâwm tak tak kan beisei tûr a ni lo,” tih chu an lo sawi daih tawh a ni.
Megido hmuna tûn hmaa thil thlengte chuan Pathian hmêlmate tâna tlân chhuahna awm lo innangchinna dinhmun a entîr a. Chuvângin, Armageddon-ah chuan, Pathianin he khawvêl khawi hmuna awm pawh ni se, hlemhlêtna leh suahsualna rêng rêng chu a nuaibo vek ang.—Thu Puan 21:8.
Pathian Jehova leh a Fapa Isua Krista hmangaihtute chuan Armageddon chu an hlauh a ngai lo. Pathian indona chu siam ṭhat theih tawh loh khawpa suaksual nia Pathianin an chung thu a rêl mihringte chung chauhva thleng tûr a ni. A indona chuan a phute chauh a tiboral ang. ‘Lalpa chuan amah ngaihsaktute chhanchhuah dân a hria,’ tih Bible chuan a sawi a. (2 Petera 2:9) Sâm 37:34-a thutiam phûrawm tak chuan: “LALPA chu nghâk la, a kawng chu zawh rawh, tichuan ram hi luah tûrin a chawimawi ang che: mi suaksualte tihborala an awm lai chu i la hmu ang,” tiin a sawi bawk a ni. (w08 4/1)