Nangmah Beihna Tûra Hriam Chher Chu A Sâwt Lo Vâng
“Nangmah beina tûra hriam chher rêng rêng a sâwt lo vang.”—ISAIA 54:17.
1, 2. Engtin nge Albania rama Jehova Thuhretute thiltawn chuan Isaia 54:17-na dikzia a târ lan?
KUM sâwmbi engemaw zât liam ta khân, Europe chhimchhak lam tlâng ram tê pakhatah Kristian huaisen tak an awm a. Anmahni timang tûrin Pathian awm ring lotu Communist sawrkâr chuan a bei nasa hle a ni. Mahse, nghaisakna te, hna thawhtîrna camp te, leh dik lo taka chanchin thehdarhnate chuan anni chu a nuaibo thei lo. Anni chu tute nge an nih? Albania rama Jehova Thuhretute an ni. Inkhâwmho leh thu hrila kal chu harsa hle mah se, kum sâwmbi tam tak chhûng an beih fan fanna chuan Kristianna chu a chawimawiin, Jehova hming chawimawina a thlen a ni. Ni kuma an branch thar hlannaah chuan, kum rei tak chhûng Thuhretu rinawm tak lo ni tawh pa pakhat chuan: “Setana chuan nasa takin bei mah se, ani chu tlâwm zêlin, Jehova chuan a hneh chhunzawm zêl a ni!” tih a sawi.
2 Hêng zawng zawng hi Pathianin a mite hnêna a thutiam Isaia 54:17-a chhinchhiah: “Nangmah beina tûra hriam chher rêng rêng a sâwt lo vang; lei tinrêng thupawia nangmah rawn khingtute chu thiam loh i chantîr ang,” tih a dikzia finfiahna a ni. Thilthleng chanchinte chuan Setana khawvêlin Pathian Jehova chhiahhlawh inpumpêkte’n amah an biakna chu a titâwp thei ngai dâwn lo tih a nemnghet a ni.
Setana Beihna Hlawhchhamte
3, 4. (a) Setana hriam chherah engte nge tel? (b) Eng kawngin nge Diabola hriam chher chu a hlawhchham?
3 Betu dikte beihna tûra hriam chherahte chuan khapbehna, mipui tharum thawhna, lung ina khungna, leh ‘dâna thil tihsualna siamna’ te a tel a. (Sâm 94:20) Dik tak chuan, ram ṭhenkhatah chuan Jehova Thuhretute’n he thuziak an zir lai ngei pawh hian, hêng Kristian dikte hian Pathian laka an rinawmna chungchângah ‘fiahna’ an tâwk mêk a ni.—Thu Puan 2:10.
4 Entîr nân, Jehova Thuhretute branch office pakhat chuan, kum khat lek chhûnga Pathian chhiahhlawhte’n kut an tawrhna thilthleng 32 a awm tih thu a thlen a. Chu bâkah, vântlânga thu hriltu Thuhretute—apui apang, a hmei a pa te—chu police-in an kawlna thilthleng 59 lai a awm bawk a ni. Ṭhenkhat chu dân bawhchhetu anga kutzia lâksak te, thla lâksak te, leh tân ina khung te an ni. Mi dangte chu vuak tûra vau an ni bawk. Ram dang lehah chuan, Jehova Thuhretute chu man, pawisa châwitîr, a nih loh leh vuak an tawrhna thu buai 1,100 aia tam a awm a. Hêng thu buaite zînga 200 chuang chu Isua thih hriatrengna hmang tûra an kalkhâwm nîa thleng a ni! Amaherawhchu, hêng ramte leh ram dangahte hian Jehova thlarau chuan harsatna namên lo tâwk a mite chu tuar chhuak tûrin a ṭanpui a ni. (Zakaria 4:6) Hmêlmate thinrimna nasa tak chuan Jehova an chawimawina chu a tibo lo vang. Ni e, hriam chher eng mahin Pathian thiltum chu a titlâwm lo vang tih kan ring tlat a ni.
Lei Dik Lo Thiam Loh Chantîrna
5. Kum zabi khatnaah khân Jehova chhiahhlawhte dodâlna kawngah eng lei dik lote nge chhuak?
5 Isaia chuan Pathian mite’n anmahni khingtu lei tinrêng chu thiam loh an chantîr dâwn tih a sawi lâwk a. Kum zabi khatnaah khân, Kristiante chu an chanchin dik lo taka sawi leh thil sual titute anga târ lan an ni fo va. Tirhkohte 16:20, 21-a thute hi chutianga an puhna tlângpui chu a ni: “Hêng mite [hian] . . . kan khua an tibuai êm êm a, dân eng emaw kan lawm leh zawm thiang lote hi an hril ṭhîn a, Rom mi kan ni si a,” tihte hi. Ṭum dang lehah chuan, dodâltu sakhaw hruaitute chuan Krista hnungzuite bei tûrin khaw hotute chu fuihpawrh an tum a: “Khawvêl chawk buaitute kha hetah pawh an lo kal a, . . . Kaisara thu kalhin an awm ṭhîn a ni,” tiin an puh a ni. (Tirhkohte 17:6, 7) Tirhkoh Paula chu “mi huatthlala” leh ‘khawvêl zawng zawng’ chawk buaitu pâwl hrang hruaitu nia puh a ni bawk.—Tirhkohte 24:2-5.
6, 7. Kristian dikte chuan anmahni ṭawngkama beihna thiam loh an chantîr dân kawng khat chu eng nge ni?
6 Chutiang bawkin, tûn laia Kristian dikte chuan chanchin dik lo taka sawina leh sawichhiatna huatthla la takte an tâwk hi mak kan ti lo. Engtin nge chutiang ṭawngkama beihna chu thiam loh kan chantîr a tih theih?—Isaia 54:17.
7 Hêng puhnate leh thu dik lo theh darhnate hi Jehova Thuhretute nungchang ṭha chuan a kalh fo a ni. (1 Petera 2:12) Kristiante chuan dân zâwm khua leh tui an nihzia leh an mihringpuite ṭhatna ngaihtuahtu nungchang ṭha tak an neihzia an finfiah hian, anmahni puhna thu an sawite a dik lo tih a lo lang ṭhîn a ni. Kan nungchang ṭha chuan mi tluang tak kan nihzia a târ lang. Lo thlîrtute chuan hna ṭhaa kan taihmâkna an hmuhin, kan Pa vâna mi chawimawi tûr leh a chhiahhlawhte nun kawng chu a ṭha zâwk tih pawm tûra chêttîrin an awm fo a ni.—Isaia 60:14; Matthaia 5:14-16.
8. (a) Pathian Thu ṭanchhan kan dinhmun humhim tûrin a châng chuan eng tih nge a ṭûl mai thei? (b) Krista entawnin, engtin nge dodâlna lei chu thiam loh kan chantîr?
8 Kan Pathian ngaihsakna nungchang bâkah, Pathian Thu ṭanchhan kan dinhmun chu huaisen taka kan humhim a ngaih châng a awm thei a. Kawng khat chu invênhim nâna sawrkâr hnênah leh court-a thu buai chhawm hi a ni. (Estheri 8:3; Tirhkohte 22:25-29; 25:10-12) Isua leia a awm lai khân, ṭum khat chu an puhna dik lo tak chu hnial thlain, tlang takin a sawisêl a ni. (Matthaia 12:34-37; 15:1-11) Isua entawnin, kan rin tlatna mi dangte hnêna hrilhfiah theihna hun remchâng neih chu kan châk a ni. (1 Petera 3:15) School te, hnathawhna hmun te, a nih loh leh ring lotu kan chhûngkhatte hnên aṭanga deusawhna chuan Pathian Thutak kan hriattîrna chu titâwp ngai suh se.—2 Petera 3:3, 4.
Jerusalem—‘Lung Rit Tak Chu’
9. Zakaria 12:3-a târ lan ‘lung rit tak’ chuan eng Jerusalem nge a entîr a, leiah hian tuin nge chu mi ai chu awh?
9 Zakaria hrilh lâwkna chuan hnamte’n Kristian dikte an dodâl chhan a târ lang a. Zakaria 12:3-na thu hi lo chhinchhiah rawh: “Chumi nîah chuan heti hi a lo ni ang a. Jerusalem chu mipui zawng zawng tân lung rit takah ka siam ang,” tih hi. He hrilh lâwkna hian eng Jerusalem chungchâng nge a sawi? Jerusalem chungchânga Zakaria hrilh lâwkna hi “vân Jerusalem,” hriak thih Kristiante koh an nihna vân lam Lalram atân pawh a ni. (Hebrai 12:22) Hêng Messia Lalram roluahtu tûrte zînga tlêm tê chauh hi leiah an la bâng a. An ṭhian “berâm dang” nên hian mite chu hun a la awm laia Pathian Ram hnuaia intulût tûrin an fuih a ni. (Johana 10:16; Thu Puan 11:15) Engtin nge hnamte chuan he sâwmna hi an chhân lêt? Eng ang ṭanpuina nge Jehova’n tûn laia betu dikte chu a pêk? Zakaria bung 12-na awmzia kan enfiah belh rualin, a chhânna chu i zawng chhuak ang u. Chutianga kan tih chuan Pathian hriak thihte leh an ṭhian inpumpêkte beihna tûra ‘hriam chher rêng rêng a sâwt dâwn lo’ tih thu tiam hi kan nei thei a ni.
10. (a) Engvângin nge Pathian mite chu beih an nih? (b) ‘Lung rit tak’ lâk kian tumte chungah eng thil nge thleng?
10 Zakaria 12:3 chuan hnamte chu “na takin an hliam” tih a târ lang a. Engtin nge chutianga an inhliam? Pathian chuan Ram chanchin ṭha chu hrilh a ni ang tih thu a pe a. Jehova Thuhretute chuan chu thu hrilhna chu an la urhsûn hle a ni. Amaherawhchu, Lalram chu mihringte beisei tûr awmchhun nia puan chhuahna chu hnamte tân ‘lung rit tak’ ang a ni. Anni chuan Lalram puang chhuaktute chu chawk buaiin, chu lung rik tak lâk kian chu an tum a. Chutiang chuan chawk buaitu hnamte chu “na takin an hliam” a ni. Nasa taka an hlawhchham avângin, an hming pawh a chhe tel a ni. He khawvêl tâwp hmaa Pathian Messia Lalram “chatuan chanchin ṭha” puan chhuah theihna chanvo hluttu, betu dikte chu an ngawihtîr thei lo. (Thu Puan 14:6) Africa ram pakhata tâng vêngtu pakhat chuan Jehova chhiahhlawhte chunga tharum thawhna a hmuhin: ‘I hun i sêng thlâwn mai mai a ni. An tlâwm ngai lo vang. An pung tial tial zâwk mah a ni,’ tiin a sawi.
11. Engtin nge Pathian chuan Zakaria 12:4-a chhinchhiah a thutiam chu a hlen?
11 Zakaria 12:4 chu chhiar rawh. Jehova chuan a Lalram puang chhuaktu huaisen takte dotute mit chu a tidelin, a “ṭhâwng” ang tih thu a tiam a. A thutiam chu a hlen a ni. Entîr nân, biakna dik khapbehna ram pakhatah chuan, dodâltute chuan Pathian mite chu an Bible thu leh hlate dawng lo tûrin an siam thei lo. Chanchinbu pakhat chuan Jehova Thuhretute chuan ram chhûnga Bible thu leh hla chhuahte la lût tûrin balloon an hmang a ni a ti hial a nih kha! Pathianin a mi rinawmte hnêna a tiam: “Ka mit ka meng ang a, mipuite sakawrte chu mitdelnain ka hrem ang,” tih chu a thleng dik a ni. Thinurna nêna an mit tihdela awmin, Lalram hmêlmate chuan an kalna tûr lam pawh an hre lo. Mahse, Jehova chuan a mite chu a huhovin a humhimin, an ṭhatna tûr a ngaihtuah tih kan ring tlat a ni.—2 Lalte 6:15-19.
12. (a) Eng kawngin nge Isua’n leia a awm lai khân mei a tihkan? (b) Engtin nge hriak thih la bângte chuan thlarau lam kawngin mei an tihkan a, eng nge a rah chhuah?
12 Zakaria 12:5, 6-na chu chhiar rawh. “Juda hotute” tih hian Pathian mite zînga enkawltute a kâwk a. Jehova chuan hêng mite hi a Lalram lei lam thilte enkawl tûrin mei anga alh ṭhahnemngaihna nasa tak a pe a ni. Ṭum khat chu, Isua’n a zirtîrte hnênah: “Khawvêlah mei thlâk thla [thil tikâng] tûra lo kal ka ni,” a ti. (Luka 12:49) Entîr nei mei chu a tikâng tak zet a ni. Ṭhahnemngai taka thu hrilin, Isua chuan Pathian Ram chu mite hmâah thil pawimawh berah a dah a. Chu chuan Juda hnam pumah inhnialna nasa tak a tichhuak a ni. (Matthaia 4:17, 25; 10:5-7, 17-20) Chutiang bawkin, ‘thing zînga meichher ang leh buhphal zînga meichher angin,’ kan hun laia Krista hniak hnung zuitute chuan thlarau lam kawngin an thilte chu an tikâng a ni. Kum 1917-a chhuak The Finished Mysterya tih lehkhabu chuan Kristianna ram vervêkna chu chiang takin a târ lang a. Chu chu sakhaw hruaitute chuan nasa takin an chhâng lêt a ni. Tûn hnai mai khân, Lalram Chanchin Thar No. 37-na, “Sakhaw Dik Lo Tâwpna A Hnai!” tih chuan mi tam tak chu Pathian Ram ṭan emaw, do emaw tûrin a tur a ni.
“Juda Puan Inte” Chu Hum A Ni
13. “Juda puan inte,” tih hian eng nge a kawh a, engvângin nge Jehova chuan a hum?
13 Zakaria 12:7, 8-na chu chhiar rawh. Hmân lai Israel-ah chuan, puan inte chu thil tlânglâwn tak a ni a, a châng chuan berâm vêngtute leh lo nei mite pawhin an hmang a ni. Hmêlmain Jerusalem an rawn beih chuan, hêng puan ina awmte hi a nghawng hmasa ber ang a, anni chuan vênhimna an mamawh ang. “Juda puan inte” tih hian kan hun laia hriak thih a la bângte hi khawpui kulh hung chhûngah an awm lo va, phaizâwlah an khawsa tih a târ lang. Chutah chuan Messia Lalram chu huaisen takin an ṭan a. Setana’n a beih bîk avângin, sipaihote Jehova chuan “Juda puan inte chu A chhan chhuak hmasa ber” ang.
14. Engtin nge Jehova’n ‘Juda puan ina’ awmte chu a hum a, a tlûktîr loh?
14 Hmân lai chanchinte chuan Jehova’n hêng hriak thih Lalram palaite hi phaizâwla an ‘puan inahte’ chuan a hum tih a finfiah a ni.b Ani chuan “mi chhiaṭhate” chu sipai hruaitu lal Davida anga mi chak leh huaisen taka siamin a tlûktîr lo a ni.
15. Engvângin nge Jehova chuan ‘hnamte tihboralna a zawn’ a, eng hunah nge chu chu a tih ang?
15 Zakaria 12:9-na chu chhiar rawh. Engvângin nge Jehova chuan ‘hnamte tihboralna a zawn’? Messia Lalram chu an dodâl reng vâng a ni. Pathian mite an tihretheih avângin, thiam loh chantîr an ni. Nakin lawkah chuan Setana lei lama mite chuan Pathian betu dikte chu a tâwp ber atân an bei ang a, chu chuan Har–Magedon tia Bible-a târ lan dinhmunah khawvêl chu a hruai ang. (Thu Puan 16:13-16) Chu beihna chu chhâng lêtin, Rorêltu Sâng Ber chuan a chhiahhlawhte chu a hum ang a, hnamte zîngah a hming a tithianghlim ang.—Ezekiela 38:14-18, 22, 23.
16, 17. (a) Eng nge “LALPA chhiahhlawhte rochan chu”? (b) Setana beihna laka kan chhelna chuan eng nge a finfiah?
16 Setana chuan khawvêl puma Pathian mite rinna tichak lo thei tûr leh an ṭhahnemngaihna tireh thei tûr hriam hrei rêng a nei lo. Pathian chhan chhuah theihna aṭanga lo awm kan thlarau lam thlamuanna chu “LALPA chhiahhlawhte rochan chu a ni.” (Isaia 54:17) Kan thlamuanna leh thlarau lama hausakna chu tumahin min chhuhsak thei lo. (Sâm 118:6) Setana chuan a dodâlna chu chhunzawm zêlin, hrehawm nasa tak chawh chhuah chu a tum zêl ang. Sawichhiatna tâwk reng chunga rinawm taka kan chhelna chuan Pathian thlarau kan nei tih a finfiah a ni. (1 Petera 4:14) Jehova din Lalram chanchin ṭha chu khawvêl puma puan chhuah a ni a. Mi dangte beihna hriam hrei angin, entîr nei dodâlna “virvawm lungte” hmanga Pathian mite chu beih an ni. Mahse, Jehova chaknain a chhiahhlawhte chuan chûng lungte chu hnehin, a nghawngte chu an nuai reh a ni. (Zakaria 9:15) Hriak thih a la bângte leh an ṭhian mi rinawmte rawngbâwlna chu tihtâwp a ni ngai lo vang!
17 Diabola beihna aṭanga chhan chhuahna pumhlûm chu kan beisei a. ‘Min beihna tûra hriam chher rêng rêng a sâwt lo vang; lei tinrêng thupawia min rawn khingtute chu thiam lo kan chantîr ang,’ tih tiamkamna neih chu a va thlamuanthlâk tak êm!
[Footnotes]
a Jehova Thuhretute chhuah a ni a, tûnah chuan tih chhuah a ni tawh lo.
b He mi chungchâng hriat chian lehzual nân, Jehova Thuhretute tihchhuah Jehovah’s Witnesses—Proclaimers of God’s Kingdom, bu phêk 675-6-na chu en rawh.
Engtin Nge I Chhân Ang?
• Engin nge Setana hriam chher chu a sâwt lo tih finfiah?
• Engtin nge vân lam Jerusalem chu ‘lung rit taka’ a chan?
• Engin nge Jehova’n “Juda puan inte” chu a hum?
• Armageddon kan hnaih rualin, eng nge i rin tlat?
[Phêk 23-naa milemte]
Albania rama Jehova mite chu Setana beihna hnuaiah an rinawm reng
[Phêk 25-naa milemte]
Isua’n puhna dik lo tak chu a hnial thla
[Phêk 26-naa milemte]
Chanchin ṭha puang chhuaktute beih nâna hriam chher rêng rêng a sâwt lo vang