Chhiartute Zawhna

Exodus 23:​19-a hmuh: “Kêl no sa a pui hnutetuiin i chhûm tûr a ni lo,” tih khapna aṭang hian eng nge kan zir theih?

He Bible-a vawi thum lai lang Mosia Dân kaihhruaina hian Jehova thil mawihnai hriatna te, a lainatna te, leh a dimdawihna te hre thiam tûrin min ṭanpui thei a. Biakna dik lo a huatzia pawh a sawi uar bawk a ni.​—Exodus 34:26; Deuteronomy 14:21.

Kêl no emaw, ran dang emaw a pui hnutetuia chhum chu Jehova thil ruat dân phung pângngai kalh a ni dâwn a ni. Pathianin a pui hnutetui chu a no châwm nân leh ṭhanlentîr nâna a pêk a ni a. A pui hnutetui ngei mai a no chhum nâna hman chuan, mi thiam pakhat sawi dân chuan, “a pui leh a notête inkâra inlaichînna Pathian siam leh a tihthianghlim tawh zah lohna” a lantîr a ni.

Chu bâkah, a pui hnutetuia a no chhum chu ruahtui koh chhuah nâna milem betute thiltih ṭhin niin ṭhenkhat chuan an sawi. Chu chu milem betute tih ṭhin dân a nih tak zet chuan, chu khapna chu Israelte tân chuan an chhehvêl hnamte sakhaw thiltih âtthlâk tak leh nunrâwng tak lak ata vênghimtu a ni dâwn a ni. Mosia Dân chuan Israel mite chu chûng hnamte thuruatte zâwm lo tûrin a khap tlat a ni.​—Leviticus 20:23.

A tâwpah chuan, Jehova thinlunga khawngaihna chu he dân bîkah hian kan hmu a ni. Dik takin, Dânah chuan hetiang chi thupêk tam tak, nungchate laka nunrawnna leh thil nihphung pângngai kalh ang chite khapna tam tak a tel a. Entîr nân, Dân chuan ran chu a pui nêna ni sarih tal a awm zet hmaa inthawina atâna hlan te, ran notê leh a pui ni khata talh te, leh sava no a pui chawpa lâk te chu a khap a ni.​—Leviticus 22:​27, 28; Deuteronomy 22:​6, 7.

Chiang takin, Dân chu thupêk leh khapna thil inzam hnawk mai mai a ni lo. Thil dang zîngah hian, a thu bulte chuan Jehova mize mak ropui takte târ langtu nungchang dik hriatna kan thinlunga tuh tûrin min ṭanpui a ni.​—Sâm 19:​7-11. (w06 4/1)

[Phêk 31-naa Thlalâk Hawhtîrtu]

© Timothy O’Keefe/Index Stock Imagery