“Bêl Keh Awl Zâwk” Hlutna

TIRHKOH Petera chuan: “Nangni pasalte u, in nupuite nên in khawsak dânah bêl keh awl zâwk an nih hre thiam ula, . . . chawimawi rawh u,” tiin a ziak a ni. (1 Petera 3:7) He Bible châng hian hmeichhia chu “bêl keh awl zâwk” tia a sawi avângin kawng engemaw takin a ngainêp em? Pathian thâwk khum he thu ziaktuin atîra a sawi tum tak chu ilo en ang u.

Grik thu mal “chawimawi” tia lehlin awmzia tak chu “man nei, hlut, . . . zah,” tihna a ni a. Chuvângin, Kristian pasal chuan a nupui chu duat taka enkawlin, dimdawih ngai bêl hlu tak angin a cheibâwl tûr a ni. Hei hi ngaihnêpna lam a ni hauh lo. Entîr nân, Tiffany lotus khâwnvâr hi lo ngaihtuah ta ila. Chu khâwnvâr nalh tak, he milema i hmuh hi dimdawih ngai thil zawng a ni ngei mai. Dimdawih ngai tak a nihna chuan a hlutna a tihniam em? Tihniam lo ve! Kum 1997 khân Tiffani lotus khâwnvâr dik tak chu dollar maktaduai 2.8 laia hralh a nih chu! Chu dimdawih ngai tak a nihna chuan a hlutna chu tihhniam ahnêkin, a belhchhah zâwk a ni.

Chutiang bawk chuan, hmeichhiate bêl keh awl zâwk anga sawina chuan a hlutna a tihniam emaw, a tinêp emaw lo. An nupuite nêna an khawsak dâna “hre thiam” tih awmzia chu, pasal chuan a nupui chakna leh chak lohna te, a duhzâwng leh duh lohzâwng te, a lan dân leh rilru veizâwng te a ngaihtuah tel tûr tihna a ni. Nupuite ngaihsaktu pasal chuan amah leh a nupui inkâra mize dang lamnate chu hre thiamin, a ngaihtuahzia a lantîr tûr a ni. Chutianga a tih chhan chu a ‘ṭawngṭainate dâl a nih loh nân’ a ni. (1 Petera 3:7) Nupui hmeichhe nihna zah lotu pasal chuan Pathian nêna a inlaichînna ngei chu a tiderthâwng a ni. Pathian Thu chuan hmeichhiate chu a ngainêp lo tih a chiang hle. Anni chu a zahin, a chawimawi zâwk a ni. (w06 5/15)

[Phêk 32-naa Thlalâk Hawhtîrtu]

© Christie’s Images Limited 1997