Governing Body Member Tharte

NILAINI zîng, August 24, 2005 chuan, United States leh Canada Bethel-te chu video-a thlun zawm a ni a, chuta awm Bethel chhûngkuate chuan thu puanchhuah phûrawm tak chu an hria a. Chu chu September 1, 2005 aṭangin mi thar pahnih​—Geoffrey W. Jackson-a leh Anthony Morris III-na​—te chuan Jehova Thuhretute Governing Body chu an belh chhah dâwn, tih hi a ni.

Unau Jackson-a chuan February 1971 khân Australia khawmual, Tasmania thliarkâr ramah pioneer a thawk ṭan a. June 1974-ah Jeanette-i (Jenny) chu nupuiah a nei a. Chu mi hnu rei lo têah, special pioneer thawk tûra ruat an ni. Kum 1979 aṭanga 2003 chu Tuvalu, Samoa, leh Fiji​—South Pacific thliarkâr ramah chuan missionary angin rawng an bâwl a. Chûng thliarkâra an awm lai chuan Unau Jackson-a te nupa hian Bible thu leh hla lehlinna chu nasa takin an ṭanpui a ni. Kum 1992 ṭantirh lamah Unau Jackson-a chuan Samoa ram Branch Committee nihna a chelh a, 1996 aṭang chuan Fiji ram Branch Committee nihna a chelh a ni. April 2003 chuan amah leh Jenny chu United States Bethel chhûngkaw zînga mi lo niin, Translation Services Department-ah hna an thawk ṭan a. Chu mi hnu rei lo têah Unau Jackson-a chu Governing Body Teaching Committee ṭanpui tûra tih a ni.

Unau Morris-a chuan United States-ah kum 1971 khân pioneer a thawk ṭan a. Chu mi kum December chuan Susan-i nên an innei a, an fapa hmasa ber Jesse-a a pian hma, kum li deuh thaw chu an pioneer chhunzawm a. A hnuah chuan, fapa dang Paul-a chu an nei leh a ni. Unau Morris-a chuan 1979-ah regular pioneer angin hun bikima rawngbâwl hna chu a thawk ṭha leh a. An fapate school an kal ve leh chuan a nupui pawhin a thawhpui a. An chhûngkua chuan United States-a mamawh zualna hmun Rhode Island leh North Carolina state-ah rawng an bâwl a ni. North Carolina-ah Unau Morris-a chuan bial kantu awm loh chânga a aiawhtuah a ṭang a, a fapate chuan regular pioneer hna an thawk a ni. Jesse-a leh Paul-a chu kum 19 an nihin United States branch-ah sâwm an ni. Chutih lai chuan, Unau Morris-a chuan bial kan hna chu a ṭan a. Tichuan, kum 2002-ah amah leh Susan-i te chu Bethel-ah sâwm an ni a, an hna thar chu August 1 khân an ṭan a ni. Unau Morris-a chuan Patterson-a Service Department-ah a thawk a, a hnuah chuan Governing Body Service Committee ṭanpuitu angin a awm a ni.

Member thar pahnihte bâkah, Governing Body member-te chu C. W. Barber-a; J. E. Barr-a; S. F. Herd-a; M. S. Lett-a; G. Lösch-a; T. Jaracz-a; G. H. Pierce-a; A. D. Schroeder-a; D. H. Splane-a; leh D. Sydlik-a te an ni a. Governing Body member zawng zawngte hi hriak thih Kristian vek an ni. (w06 3/15)