‘Thurualin’ Pathian Chawimawi Rawh U
“Kan Lalpa Isua Krista Pathian leh a Pa chu, . . . thuruala kan chawimawi theihna tûrin.”—ROM 15:5, 6.
1. Ngaih dân inan lohna tihven dân chungchângah Paula’n zir tûr eng nge a rinpuite a hrilh?
KRISTIAN zawng zawngte duhzâwng leh duh thlan hi a inang vek kher lo va. Mahse, Kristian zawng zawngte chu nunna kawngah lungrual takin an kalho tûr a ni. Chu chu thil theih a ni em? Thil theih ni e, thil tê tham tak takte thil lian taka kan chantîr loh phawt chuan. Chu chu a ni, tirhkoh Paula’n kum zabi khatnaa a rinpuite a hrilh chu ni. Engtin nge he thu pawimawh tak hi a hrilhfiah? Engtin nge chu Pathian thâwk khum fuihna thu chu tûn laiah kan hman theih?
Kristian Inpumkhatna Pawimawhna
2. Engtin nge Paula’n inlungrual a ngaihzia a sawi uar?
2 Paula chuan Kristian inpumkhatna chu a pawimawh hle tih a hriat avângin, hmangaihnaa indawh tawn tûrin Kristiante chu fuihna thu ṭha tak a pe a ni. (Ephesi 4:1-3; Kolossa 3:12-14) Nimahsela, kum 20 chhûng vêla kohhran tam tak a din hnu mi dangte a tlawh kual hnuah chuan inpumkhatna neih chu thil harsa a ni tih a hria a ni. (1 Korinth 1:11-13; Galatia 2:11-14) Chuvângin, Rom khuaa a rinpuite chu: “Kan Lalpa Isua Krista Pathian leh a Pa chu, . . . thuruala kan chawimawi theihna tûrin, chhelna leh thlamuanna Pathian chuan . . . awmtîr che u rawh se,” tiin a fuih a ni. (Rom 15:5, 6) Tûn laiah pawh, Pathian Jehova chu a mi inlungrual takte angin ‘thurualin’ kan chawimawi a ni. He mi chungchângah hian eng nge kan dinhmun?
3, 4. (a) Rom khuaa Kristiante khân eng anga pian leh mûrna inang lo tak tak nge an neih? (b) Engtin nge Rom khuaa Kristiante chuan “thuruala” Jehova rawng an bâwl theih?
3 Rom khuaa Kristian tam takte chu Paula ṭhian ṭhate an ni hlawm a. (Rom 16:3-16) An lo pian leh mûrna chu inang lo mah se, Paula chuan a unau zawng zawngte chu “Pathian duh tak” angin a pawm vek a ni. Hetiang hian lehkha a ziak a: “Khawvêl zawng zawngah in rinna thu a than avângin in zaa chunga ka lâwmna thu Isua Krista zârah ka Pathian hnênah ka sawi . . . a ni,” tiin. Chiang takin, Rom mite chu kawng tam takah an entawn tlâk a ni. (Rom 1:7, 8; 15:14) Chutih rualin, kohhrana mi ṭhenkhat chuan thil engemaw chungchângah ngaih dân hrang an nei bawk. Tûn laia Kristiante pawh hi pian leh mûrna chi hrang hrang leh hnamze chi hrang hrang aṭanga lo kal khâwm an nih avângin, ngaih dân inan lohnate hmachhawn dân chungchânga Pathian thâwk khum Paula fuihna thute zirna chuan “thuruala” thu sawi thei tûrin a ṭanpui thei a ni.
4 Rom khuaah chuan Juda leh Jentail ringtute an awm ve ve a. (Rom 4:1; 11:13, 14) Juda Kristian ṭhenkhat chuan Mosia Dân hnuaia an awm laia an thil chîn ṭhenkhat chu chhandam nâna thil ṭûl a ni lo tih hre tûr an ni nâ a, an bânsan chuang lo niin a lang. A leh lamah lah chuan, Juda Kristian tam tak chuan Krista inthawinain Kristian an lo nih hmaa an thil chîn ṭhin khirh tak takte ata a tizalên tih an pawm thung a ni. Chuvângin, an mi mal thiltih ṭhinte leh thil chîn ṭhenkhat chu an bânsan phah a ni. (Galatia 4:8-11) Mahse, Paula sawi angin, an vaiin “Pathian duh tak” an ni vek a. Rilru put hmang dik tak an neih ve ve chuan an vaiin Pathian chu ‘thurualin’ an fak thei a ni. Tûn laiah pawh thil engemaw chungchângah ngaih dân a inang lo tak tak kan nei thei a; chuvângin, Paula’n chu mi chungchâng thu bul pawimawh tak a hrilhfiah chu ngun takin kan ngaihtuah tûr a ni.—Rom 15:4.
“Inlâwm Tawn Rawh U”
5, 6. Engvângin nge Rom khua kohhranah ngaih dân inan lo tak tak a awm?
5 Rom mite hnêna a lehkha thawnah, Paula chuan ngaih dân chi hrang hrang awm thei thil pakhat a sawi a. Heti hian a ziak a ni: “Mi pakhatin thil engkim ei theiin a inring a, mi chak lo erawh chuan thlai chauh a ei ṭhîn,” tiin. Eng nge a chhan? Aw le, Mosia Dân hnuaiah chuan vawksa chu sa thianghlim lo a ni a. (Rom 14:2; Leviticus 11:7) Mahse, Isua thih hnu chuan chu Dân chuan tumah a phuar tawh si lo. (Ephesi 2:14, 15) Tichuan, Isua thih hnu kum thum leh a chanveah chuan, vântirhkoh pakhatin tirhkoh Petera hnênah Pathian thlîr dân aṭang chuan eng chaw mah thiang lo a awm tawh lo tih a hrilh a ni. (Tirhkohte 11:7-12) Hêng thilte rilrua vawng rengin, Juda Kristian ṭhenkhat chuan vawksa leh Dân hnuaia an awm laia chaw ei thiang lo dang ṭhenkhatte ei theiah an inngai a ni ngei ang.
6 Nimahsela, Juda Kristian dangte tân chuan tûn hmaa chaw ei thiang lo tûna ei tâk mai chu thil tenawm lamah a kal tlat a ni. Chutiang mite chuan an Juda unaute’n chutiang chaw an ei an hmuh chuan hriat loh hlânin an lo eng helh thei a ni. Chu bâkah, tûn hmaa an sakhaw biakin ei leh in chungchânga khapna dân engmah nei lo Jentail Kristian ṭhenkhat chuan ei leh in tûr chungchânga buai chiam mai chu an hre thiam lo thei bawk ang. A nihna takah chuan, chhandam nih nân a nih loh phawt chuan chaw ṭhenkhat ei insûm chu thil sual a ni lo. Mahse, chutianga ngaih dân inan lohna chuan kohhranah awlsam takin buaina a chawk chhuak thei a ni. Rom khuaa Kristiante tân chutiang ngaih dân inan lohnain “thuruala” Pathian an chawimawina a dan loh nân an fîmkhur hle a ngai a ni.
7. Chawlhkâr tina ni khat serh bîk chungchângah eng ngaih dân inang lo nge awm?
7 Paula chuan entîrna pahnihna hetiang hian a pe leh a: “Mi pakhatin ni khat hi ni dang ai hian a ngaihlu bîk ṭhîn a, mi dangin ni zawng zawng hi inang ṭheuhvin a ngai ṭhîn a ni,” tiin. (Rom 14:5) Mosia Dân hnuaiah chuan, Sabbath nîah engmah thawh loh tûr a ni a. Zin vah takngial pawh khap tlat a ni. (Exodus 20:8-10; Matthaia 24:20; Tirhkohte 1:12) Mahse, Dân thupêk tihbân a nih tâkah chuan chûng khapbehna zawng zawng chu a awm tawh lo. Chutichung pawhin, Juda Kristian ṭhenkhat tân chuan tûn hmaa an lo serh thin nîa hna han thawh tâk mai emaw, lam hla han zin tâk mai emaw chu an hreh a ni thei ang. Kristian an lo nih hnuah pawh, Pathian mithmuhah chuan Sabbath awm tawh lo mah se, a ni sarih nî chu thlarau lam thil chauh tih nân an hmang a ni thei bawk. Chutianga tih chu sual a ni em? Ni lo ve, Pathianin Sabbath serh a la phût reng anga an phût luih loh phawt chuan sual a ni lo. Chuvângin, a Kristian unaute chhia leh ṭha hriatna a ngaihtuah avângin, Paula chuan heti hian a ziak a ni: “Mi tin mahni rilruah inhre chiang rawh se,” tiin.—Rom 14:5.
8. Mi dangte chhia leh ṭha hriatna ngaihsakna an lantîr theih laiin, Rom khuaa Kristiante chuan eng nge an tih loh vang?
8 Nimahsela, Paula chuan chhia leh ṭha hriatna chungchânga rilru insual mêkte dawhthei tûra a unaute a fuih laiin, Mosia Dân hnuaia intukluh chu chhandamna hmuhna ang hrima an rinpuite intulût tûra tihluih tumte chu nasa takin a dem thung a ni. Entîr nân, C.E. 61 vêl chuan Paula chuan Juda Kristiante hnêna a lehkha thawn khauh tak mai, Hebrai lehkhabu chu a ziak a, chutah chuan Kristiante chuan Isua tlanna inthawinaa innghat beisei sâng zâwk an neih avângin, Mosia Dân hnuaia intukluh chuan hlutna rêng a neih loh thu chiang takin a hrilhfiah a ni.—Galatia 5:1-12; Tita 1:10, 11; Hebrai 10:1-17.
9, 10. Kristiante’n eng nge an tih loh tûr? Hrilhfiah rawh.
9 Kan hriat tawh angin, Paula chuan Kristian thu bulte bawhchhiat a nih loh chhûng chu mi mal duh thlanna chuan inpumkhatna a tihchhiat loh thu a sawi a. Chuvângin, Paula chuan chhia leh ṭha hriatna lama chak lo zâwk Kristiante hnênah: “Nangin engati nge i unau i sawisêl ni?” tiin a zâwt a. Tin, a chak zâwkte (Dân hnuaia ei thiang lo thil ṭhenkhat eitute emaw, Sabbath nîa hna dang thawh pawiti lote emaw) hnênah pawh: “Nangin engati nge i unau i hmuhsit ni?” tiin a zâwt bawk a ni. (Rom 14:10) Paula sawi ang chuan, chhia leh ṭha hriatna lama chak lo zâwk Kristiante chuan thil thlîr zau zâwk an unaute chu an thiam lo tûr a ni lo. Chutih rualin, Kristian chakte pawhin thil engemaw chungchânga chhia leh ṭha hriatna chak lo zâwkte chu an hmusit tûr a ni hek lo. An vaiin mi dangte rilru dik chu an zahsak tûr a ni a, ‘tumah an inngaihhlut tâwk aliamin an inngaihlu’ tûr a ni lo.—Rom 12:3, 18.
10 Paula chuan thlîr dân inbûk tâwk tak chu heti hian a hrilhfiah a ni: “Engkim ei mi chuan a ei lo mi hmusit suh se; ei lo mi pawhin a ei mi chu sawisêl suh se; Pathianin ani chu a lâwm tawh alâwm,” tiin. Chu bâkah, heti hian a sawi bawk: “Krista chuan Pathian tihropui nân a lâwm che u,” a ti bawk. A chakte leh chak lote pawh Pathian leh Krista’n an pawm ve ve avângin, keini pawhin chutiang bawk rilru zau puin, kan “inlâwm tawn” tûr a ni. (Rom 14:3; 15:7) Chu chu tuin nge pawm lo thei ang?
Unau Inhmangaihna chuan Tûn Laiah Inlungrualna A Siam
11. Eng dinhmun danglam bîk tak nge Paula hun laiah awm?
11 Rom khuaa mite hnêna a lehkha thawnah Paula chuan dinhmun danglam bîk tak pakhat chungchâng a sawi a. Jehova chuan thuthlung pakhat a tibâng a, a thar a siam hnu lawk a ni. Ṭhenkhat chuan insiamrem harsa an ti a. Chu dinhmun ang chiah chiah chu tûn laiah a awm lo; mahse, chutiang ang chi deuh lo thlen châng a awm thei.
12, 13. Tûn laia Kristiante’n an unaute chhia leh ṭha hriatna an ngaih pawimawhzia an lantîr theihna dinhmun ṭhenkhatte chu engte nge ni?
12 Entîr nân, Kristian hmeichhe pakhat chu hmeichhe tân inchei loh tûr tih zirtîrna sakhua a lo vuan ṭhîn a ni thei a. Thutak a pawm hnu chuan, engemaw chânga mawi taka chei thawmhnaw hâk emaw, a âwm tâwka han inhnawih deuh emaw chu a ngai thiam lo mai thei. Bible thu bulte a kalh loh avângin, chu Kristian hmeichhia chu a chhia leh ṭha hriatna kalh tûra thlêm chu a dik lo vang. Chutih rualin, an chhia leh ṭha hriatnain chutiang thilte hman pawiti lo hmeichhiate chu a sawisêl tûr a ni lo tih a hre bawk a ni.
13 Entîrna dang lo ngaihtuah leh teh. Kristian pakhat chu zu in khapna hmuna seilian a ni mai thei. Thutak hriatna dik a rawn neih hnu chuan, Bible-in uain chu Pathian thilpêk anga a thlîr thu leh a tâwk chauhva hman theih a nih thu a rawn hre ta a. (Sâm 104:15) Chu thlîr dân chu a pawm thlap a ni. Mahse, a hmaa a lo tih ṭhan tawh avângin, zu in miah loh chu a duh zâwk thei a; mahse, a tâwk chauhva inte pawh a sawisêl kher lo a ni. Chutiang chuan: “Inremna tûr leh intihsâwt tawnna tûr thilte chu i ûm ang u,” tia Paula sawi chu a nunpui a ni.—Rom 14:19.
14. Eng dinhmunah nge Kristiante’n Rom khuaa mite hnêna Paula fuihna thu hi an hman theih?
14 Rom mite hnêna Paula fuihna hman a ngaihna dinhmun dang a awm leh a. Kristian kohhran chu mi tam tak, mi chi hrang hrang infinkhâwm a ni a, an duhzâwng pawh chi hrang hrang a ni. Chuvângin, duh thlanna chi hrang hrang an siam thei—entîr nân, thawmhnaw leh incheina chungchângah hian. Bible chuan Kristian dik zawng zawngte zawm tûr thu bul a sawi ngei mai. Kan zînga tumah hian thawmhnaw leh sam put dân maksak tak leh chei nasat lutuk emaw, khawvêl mite nêna inzawmna nei anga min lantîr thei chi emaw chu kan hain, kan pu ngai tûr a ni lo. (1 Johana 2:15-17) Kristiante chuan engtik lai pawhin, an awm hahdam lai pawhin, Lei leh Vâna Lal Chungnungber aiawha rawngbâwltu an ni tih an hre reng a ni. (Isaia 43:10; Johana 17:16; 1 Timothea 2:9, 10) Mahse, kawng tam takah Kristiante tân thlan tûr pawm tlâk thil tam tak a awm a ni.a
Mi Dangte Tihtlûk Pumpelh Rawh
15. Eng hunah nge Kristianin a unaute ṭhatna tûr a ngaihtuah avângin thil ti tûra dikna a neih chu a thlahthlam ang?
15 Paula’n Rom khuaa Kristiante a fuihna zîngah kan ngaihsak tûr thu bul pawimawh tak dang a la awm a. A châng chuan chhia leh ṭha hriatna ṭha tak nei Kristian chuan thil sual ni lo thil engemaw tih loh chu a thlang mai thei a ni. Engvâng nge? Thil engemaw a tihna chuan mi dangte chhiatna a thlen thei tih a hriat vâng a ni. Chutiang hunah chuan, eng nge kan tih ang? Paula chuan heti hian a sawi: “I unau tlûkna tûr a nih chuan sa ei loh te, uain in loh te, thil engpawh tih loh a ṭha a ni,” tiin. (Rom 14:14, 20, 21) Chutiang chuan, “keini mi chakte hian mahni lâwmna zawng lovin, mi chak lote chak lohnate chu kan tuarpui zâwk tûr a ni. Mahni vêngte tihsâwt nân an ṭhatna tûrin tihlâwm i tum ṭheuh ang u.” (Rom 15:1, 2) Kan thil tihin kan Kristianpui pakhat chhia leh ṭha hriatna a khawihbuai chuan, unau inhmangaihna chuan anmahni ngaihtuah a, chutiang duh thlana siam lo tûrin min chêttîr ang. Zu in chungchâng hi entîr nân kan hmang thei ang. Kristiante tân a âwm tâwka uain in chu phal a ni a. Mahse, chu chuan a ṭhian a tihtlûk dâwn chuan, in theihna dân a neih chu a kengkawh tlat lo vang.
16. Engtin nge kan bial chhûnga mite ngaihtuahna kan lantîr theih?
16 He thu bul hi Kristian kohhran pâwn lama mi dangte nêna kan indâwr hunah pawh a hman theih a ni. Entîr nân, kan chênna biala kohhran lian ber chuan chawlhkâr khata ni khat chu chawlh nâna hmang tûrin a mi leh sate a zirtîr mai thei. Chu mi avângin, kan ṭhenawmte kan tihtlûk a, thuhrilhna dantîrtu a nih loh nân, chu mi nîah kan ṭhenawmte ngaihmawh tûr thil engmah kan ti lo vang. Dinhmun dang lehah chuan, Kristian hausa tak chu a ṭûl zualna hmuna rawngbâwl tûrin mi retheite awmna hmunah a insawn a ni thei a. Chutih hunah chuan a ṭhenawm tharte a ngaihtuah avângin a inchei mâwl zâwk emaw, a neih aia tlâwm zâwk emawa khawsak chu a thlang mai thei a ni.
17. Engvângin nge duhthlanna kan siam hian mi dangte ngaihtuah chu thil tih âwm tak a nih?
17 Chûng “mi chakte” hnêna chutiang insiamremna beisei chu thil âwm lo a ni em? He tehkhin thu hi ngaihtuah teh: Kawngpuia motor kan khalh laiin, kan hmaah chuan naupang ṭhenkhat kawngpui sîr, hlauhawm khawpa kawngpui hnaiha kal kan hmu a. Dânin a phal avâng maiin tlân chak zât tûr a phal chenin kan tlân zui zêl dâwn em ni ang? Ni lo ve, naupangte tâna hlauhawm thei thilte pumpelh nân kan tlân muang ṭhîn a ni. Chutiang bawkin, kan rinpuite emaw, mi dangte emaw nêna kan inlaichînnaah kal muan, a nih loh leh inphahhniam inhuam a ngaih châng a awm ṭhîn. Kan thiltih chu ti tûrin dikna famkim kan nei a ni thei a. Chutianga kan tih avângin Bible thu bulte lah kan bawhchhe hek lo thei. Amaherawhchu, mi dangte kan tihthinur emaw, chhia leh ṭha hriatna chak lo zâwkte kan tihnat emaw dâwn chuan, Kristian inhmangaihna chuan fîmkhur taka thil ti tûrin min chêttîr ang. (Rom 14:13, 15) Inlungrualna siam leh Lalram hmakhaw tihhmasâwn chu kan mi mal dikna hman aiin a pawimawh zâwk daih a ni.
18, 19. (a) Engtin nge mi dangte ngaihtuahna lantîrna kawngah Isua entawn tûr siam kan entawn? (b) Eng thilah nge inlungrual taka kan awm a, eng nge a dawta thuziakah kan sawiho vang?
18 Hetianga thil kan tih hian, entawn tûr ṭha ber mai chu kan entawn tihna a ni. Paula chuan heti hian a sawi: “Krista pawh chuan mahni lâwmna a zawng si lo; ‘Nangmah hautute hauna chu keima chungah a tla ta a’ tih ziak ang khân a ni zâwk,” tiin. Isua chuan kan tâna a nun hlan a inhuam a. Chuvângin, “mi chak lote” nêna inlungruala Pathian kan chawimawi theihna tûr a nih chuan kan dikna neih ṭhenkhat chu chân kan inhuam ve a ni. Dik takin, chhia leh ṭha hriatna chak lo nei Kristiante dawhtheih leh an chunga rilru inhawng tak—a nih loh leh kan dikna neih phût tlat lo va, kan tih theih rengte pawh mahni thua inhrênna—chuan ‘Krista Isua rilru ang’ kan neihzia a lantîr a ni.—Rom 15:1-5.
19 Pathian thu bulte tel lohna thilahte chuan thlîr dân inang lo nei thluah hlawm mah ila, biakna chungchângah chuan kan inlungrual vek a ni. (1 Korinth 1:10) Entîr nân, biakna dik dodâltute kan chhân lêtnaah chutiang inlungrualna chu a lang a ni. Pathian Thu chuan chutiang dodâltute chu mi dangte tiin a ko va, chûng “mi dangte aw” laka fîmkhur tûrin min vaukhân a ni. (Johana 10:15) Engtin nge chutiang mi dangte chu kan hriat hran theih ang? Engtin nge anni chu kan chhân lêt ang? Hêng zawhnate hi a dawta thuziakah ngaihtuah a ni ang. (w04 9/1)
[Footnote]
a Kum tling lo naupangte chu thawmhnaw thlan chungchângah an nu leh pate’n an kaihhruai a ni.
Engtin Nge I Chhân Ang?
• Engvângin nge mi mal thila ngaih dân inan lohna chuan inlungrualna a tihderthâwn loh?
• Engvângin nge keini Kristiante hian kan inngaihtuah tawnzia kan lantîr ang?
• Inlungrualna chungchânga Paula fuihna pêk tûn laia kan hman theih dân kawng ṭhenkhat chu engte nge ni a, chutianga ti tûrin engin nge min chêttîr ang?
[Phêk 23-naa milem]
Inlungrualna chungchânga Paula fuihna chu kohhran tân a pawimawh
[Phêk 24-naa milem]
Kristiante chu an pian leh mûrna inang lo mah se an inlungrual