“Mi Dangte Aw” Lakah Fîmkhur Rawh
“Mi dang zawng an zui lo vang a, an tlân bosan zâwk ang; mi dangte aw zawng an hriat loh avângin.”—JOHANA 10:5.
1, 2. (a) Isua’n a hminga a koh khân, engtin nge Mari’n a chhân lêt a, he thilthleng hian a hmaa Isua thusawi eng nge a hrilhfiah? (b) Engin nge Isua hnaih tûra min ṭanpui thei?
THOLEH Isua chuan a thlân ruak bula hmeichhe ding chu a hmu a. Hmeichhia chu a mi hriat chian êm êm mai, Mari Magdalini a ni. Kum hnih dâwn lai kalta khân, a kaw chhûng ata ramhuai a hnawh chhuahsak a ni. Chuta ṭang chuan Isua leh a tirhkohte chu a zui ta zêl a, an nî tin mamawhte a phuhrûksak ṭhîn a. (Luka 8:1-3) Mahse, vawiin chuan Mari chu Isua thih avâng leh tûnah a ruang pawh a bo lehzêl avângin lungchhe takin ṭap lo thei a ni lo! Tichuan, Isua chuan: “Hmeichhia, engati nge i ṭah? Tunge i zawn?” tiin a zâwt a. Ani chuan huan enkawltu emaw tiin, a hnênah: “Ka pu, amah heta ta i kalpui a nih chuan i dahna chin mi hrilh ang che, chutichuan ka la ang,” tiin a chhâng a. Chutah, Isua chuan “Mari,” a ti a. Chuveleh, a biak dân ṭhin a hriat chiang êm avângin tunge a nih a hre nghâl vat a. “Zirtîrtu” tiin hlim taka auvin, a kuah ta a ni.—Johana 20:11-18.
2 He chanchin hian Isua’n a hmaa a thil lo sawi tawh chu rilru khawih zâwng takin a hrilhfiah a ni. Amah chu berâmpu nêna intehkhinin leh a hnûngzuitute chu berâm nêna tehkhinin, berâm vêngtu chuan a berâmte chu an hmingin a ko ṭheuh va, anni’n a aw an hria a ti. (Johana 10:3, 4, 27, 28) Berâmin a vêngtu a hriat ang chiahin, Mari chuan a vêngtu, Krista aw chu a hria a ni. Hei hi tûn laia Isua zuitute tân pawh a dik a. (Johana 10:16) Hriatthiamna beng nei berâm chu a vêngtu hnaiha a awm theih ang chiahin, kan thlarau lam hriatthiamna chuan min Vêngtu Ṭha, Isua Krista hniak hnung chu hnaih takin min zuitîr thei ang.—Johana 13:15; 1 Johana 2:6; 5:20.
3. Isua berâm huang tehkhin thuin a phawrh chhuah zawhnate chu engte nge ni?
3 Amaherawhchu, chu tehkhin thu bawkin a târ lan dânin, berâmin mihring aw a hriat theihna chuan a ṭhiante aw chuah ni lovin, a hmêlmate aw pawh a hriatthiamtîr a ni. Dodâltu sual takte kan neih avângin, hmêlmate aw hriat chu thil pawimawh tak a ni. Tute nge an nih? Engtin nge an chêt? Engtin nge an lakah kan invênhim theih? A chhânna hriat nân, Isua’n berâm huang tehkhin thua a sawi belh dangte i lo en ang u.
‘Tupawh Kawngkhâra Lût Lo Chu’
4. Berâm vêngtu tehkhin thuah hian, berâmte’n tunge an zui a, tunge an zui loh?
4 Isua chuan: “Tupawh kawngkhâra lût erawh chu berâm vêngtu a ni. Kawngkhâr vêngtuin ani chu a lo hawnsak ṭhîn a; berâmten a aw an hre ṭhîn a; ama berâmte chu an hmingah a ko ṭheuh va, a hruai chhuak ṭhîn a. A ta zawng zawng a chhuahtîr veleh, an hma a hruai a, berâmte chuan amah an zui ṭhîn a, a aw an hre si a. Mi dang zawng an zui lo vang a, an tlân bosan zâwk ang; mi dangte aw zawng an hriat loh avângin,” a ti a. (Johana 10:2-5) Isua’n “aw” tih ṭawngkam hi vawi thum lai a hmang tih lo chhinchhiah rawh. Vawihnih chu berâm vêngtu aw chungchâng a sawina a ni a; mahse, a vawithumna chu “mi dangte aw” a sawina a ni thung. Eng ang mi dangte nge Isua’n a sawi?
5. Engvângin nge Johana bung 10-a târ lan ang chi mi dang hnênah khual chhawn thiamna kan lantîr duh loh?
5 Isua chuan an chunga khual chhawn thiamna—atîra Bible ṭawngkam, a awmzia chu “hmêlhriat lohte hmangaihna”—kan lantîr duh mi dangte chanchin a sawi lo. (Hebrai 13:2) Isua tehkhin thuah chuan, mi dang a tih hi sâwm loh mikhual hi a ni. Ani chu “berâm huanga kawngkhâra lût lova, dang lama lâwn lût,” a ni a. “Rûk hmang leh suam hmang,” a ni. (Johana 10:1) Tunge Pathian Lehkha Thua rûk hmang leh suam hmang tia târ lan hmasak ber chu? Diabol-Setana hi a ni. Chutiang a nihzia fiahna chu Genesis buah kan hmu a ni.
Mi Dang Aw Hriat A Nih Hmasak Ber Hun
6, 7. Engvângin nge Setana chu mi dang leh rûkru tia dik taka koh theih a nih?
6 Genesis 3:1-5 chuan leia mi dang aw hriat hmasak ber a nih dân chu a târ lang a. Thuziak chuan Setana’n hmeichhe hmasa ber, Evi chu panin rûl hmangin a bum a ni. He chanchin ziahah hian Setana chu “mi dang” tia ziah lan fak chu a ni lo ngei mai. Amaherawhchu, a thiltih dân chuan Johana bung 10-a Isua tehkhin thua mi dang nên kawng tam takin an inang tih a târ lang a ni. A inanna ṭhenkhat lo ngaihtuah ta ila.
7 Mi dang chuan berâmte bei tûrin, pehhêlin a pan tih Isua chuan a sawi a. Chutiang bawkin, Setana chuan rûl hmangin pehhêlin a pan a ni. A rûk a râla thil a tih dân hian Setana nihna dik tak—mi tibuaitu sual tak—a nihzia a târ lang. Chu bâkah, berâm huanga mi dang chuan a neitu nihna rûk bosak a tum a. A thiltum chu berâmte ‘tihhlum leh tihchhiat’ a nih bawk avângin, rûkru ai mahin a sual zâwk a ni. (Johana 10:10) Chutiang bawkin, Setana chu rûk hmang a ni a. Evi chu bumin, Pathian laka a rinawmna chu a rûksak a ni. Chu bâkah, Setana pawhin mihringte thihna a thlen a. Chuvângin, tual thattu pawh a ni.
8. Engtin nge Setana chuan Jehova thute leh thiltihte a lâk kawi?
8 Setana rinawm lohna chu Jehova thu leh a thiltihte a lâk kâwi dân aṭangin a lang chiang a. Evi hnênah: “Pathianin, ‘Huana thing rah rêng rêng hi in ei tûr a ni lo,’ a ti elo maw?” a ti a. Setana chuan mak tihmêl takin: ‘Engah nge Pathianin he thil âwm lo tak hi a tih theih?’ a tihna a ni. Ani chuan: “In ei nî apang chuan in mit a lo vâr ang . . . tih Pathianin a hre reng a nih chu,” a tih belh a. A ṭawngkam hman: “Pathianin a hre reng,” tih hi lo chhinchhiah rawh. Setana ṭawngkam chu: ‘Pathian thil hriat chu ka hre ve vek, a rilru pawh a kawi tih ka hria,’ a tihna a ni. (Genesis 2:16, 17; 3:1, 5) Lungchhiathlâk takin, Evi leh Adama chuan he mi dang aw chu an tlânsan lo va. An zâwm zâwk a, anmahni leh an fate tân chung pikna an thlen a ni.—Rom 5:12.
9. Engvângin nge tûn laiah mi dangte aw hriat chu kan inbeisei ang?
9 Setana chuan tûn laia Jehova mite bum nân chu tih dân bawk chu a hmang a ni. (Thu Puan 12:9) Ani chu “dâwt pa” a ni a, amah anga Pathian chhiahhlawhte hruai sual tum tute chu a fate an ni. (Johana 8:44) Tûn laia hêng mi dangte aw hriat a nih dân kawng ṭhenkhat lo chhinchhiah ta ila.
Tûn Laiah Mi Dangte Aw Hriat A Nih Dân
10. Mi dangte aw hriat theihna kawng khat chu eng nge ni?
10 Ngaihtuahna bum hmang. Tirhkoh Paula chuan: “Zirtîrna tinrêng leh zirtîrna mak tak len bovin awm suh u,” a ti a. (Hebrai 13:9) Eng ang zirtîrna nge? ‘Min len bo’ theih avângin, Paula chuan kan thlarau lam inbûk tâwkna tichak lo thei zirtîrna a sawi a ni tih a chiang hle. Chûng zirtîrna mak tak chu tute’n nge tichhuak? Paula chuan Kristian upahote hnênah: “In zînga mi ngei pawh hi, zirtîrhote in hnêna pakaitîr tûrin thu hran sawi in lo la awm ang,” a ti a. (Tirhkohte 20:30) Paula hun lai ang chiahin, tûn laiah pawh Kristian kohhran zînga mi lo ni tawh ṭhîn ṭhenkhat chuan “thu hran”—dâwt chanve leh dâwt hûlhualte—sawina hmangin berâmte bum chu an tum a ni. Tirhkoh Petera chuan, ‘dâwt thu’—thutak anga lang si a, hlutna rêng nei lo—an hman thu a sawi a ni.—2 Petera 2:3.
11. Engtin nge 2 Petera 2:1, 3 chuan kal pêngte thiltih dân leh an thiltum a târ lan?
11 Petera chuan “rin hrannate a rûkin an rawn luhpui ang” tiin kal pêngte thil tih dân chu a laih lan belhchhah a ni. (2 Petera 2:1, 3) Isua berâm huang tehkhin thua rûkru chu “kawngkhâra lût lova, dang lama [a] lâwn lût” ang chiahin, kal pêngte chuan a rûk a râlin min pan a ni. (Galatia 2:4; Juda 4) An thiltum chu eng nge? Petera chuan: “An hmang ang che,” a tihbelh a ni. Kal pêngte chuan engti ang pawhin insawi thiam tum mah se, an tum ber chu ‘rûk leh tihhlum leh tih chhiat’ hi a ni. (Johana 10:10) Chutiang mi dangte lakah chuan fîmkhur rawh.
12. (a) Engtin nge kan ṭhiante chuan mi dangte aw an chhuah theih? (b) Setana beih dân leh tûn laia mi dangte beih dân inkârah hian inanna eng nge awm?
12 Ṭhian sual. Mi dangte aw chu kan ṭhian kawmte hnên aṭang pawhin kan hre thei a. Ṭhian sualte chu a bîk takin ṭhalaite tân a hlauhawm a ni. (1 Korinth 15:33) Setana’n nupa tuak hmasa bera a naupang zâwk leh thiltawn nei tlêm zâwk, Evi chu a tum hmasa tih hre reng rawh. A zalênna chu Jehova’n âwm lo taka khuahkhirhsak angin a thlêmthlu a, a nihna takah chuan a letling hlauh a ni. Jehova chuan a mihring siamte a hmangaih a, an ṭhatna tûr a ngaihtuah a ni. (Isaia 48:17) Chutiang bawkin, nangni ṭhalaite u, tûn laiah pawh mi dangte chuan in Kristian nu leh pate’n in zalênna khuahkhirh anga ngai tûrin thlêmthlûk che u an tum a ni. Engtin nge chutiang mi dangte chuan a nghawng theih che? Kristian nula pakhat chuan: “Rei lo te chhûng chu ka pâwlpuite avângin kan rinna a chau ang reng a. Ka sakhuana chu âwm lo khawpin a khirh lutuk tih min hrilh reng ṭhîn a ni,” tiin a sawi a. Mahse, thu dik chu in nu leh pate chuan an hmangaih che u tih hi a ni. Chuvângin, in school kalpuite’n i nu leh pate ring lo tûra tlêm che an tum hian, Evi angin bumin awm ve suh u.
13. Eng kawng finthlâk nge Davida’n a zui a, kan entawn theih dân kawng khat chu eng nge ni?
13 Ṭhian ṭha lo chungchângah, fakna hla phuahtu Davida chuan: “Mi engmah lo mai maite hnênah ka ṭhu ngai lo va; vervêkte [“mahni nihna thupte,” NW] hnênah pawh kan lût hek lo vang,” a ti a. (Sâm 26:4) Tah pawh hian, mi dangte thil tih dân chu i lo chhinchhiah em? Setana’n rûl hmanga a nihna a thup ang chiahin—an nihna an thup a ni. Tûn laiah pawh, nungchang bawlhhlawh tak ṭhenkhat chuan Internet hmangin an nihna leh an tum chu an thup a. Chat room-ahte chuan kum tling mi sualte chuan an thanga an awh theih nên che ṭhalai la naupang tak angin an insawi mai thei. Ṭhalaite u, khawngaih takin, fîmkhur hle ang che u, chutilochuan thlarau lamah in chhiat phah hlauh dah ang e.—Sâm 119:101; Thufingte 22:3.
14. A châng chuan engtin nge chanchin tihchhuahnate chuan mi dangte aw chu a tlân zarh?
14 Sawichhiatna dik lo. Jehova Thuhretute chanchin an chhuah ṭhenkhat chu dik mah se, a châng chuan chanchin tichuaktute chuan mi dangte aw dik lo tak chu an chhuah ṭhîn. Entîr nân, ram pakhata chanchin tihchhuah chuan Indopui II-na chhûngin Thuhretute chuan Hitler-a awpna an thlâwp tih a târ lang a. A dang leh pakhat chuan Thuhretute chu biak in suam chhia angin a puh bawk. Ram tam tham takah chuan, Thuhretute chu an fate damdawia enkawl duh lo leh an rinpuite sual lian tak thuppui anga puh an ni bawk. (Matthaia 10:22) Chuti chung chuan, a mi mal taka min hretu mi rilru ṭhate chuan chutiang sawichhiatna dik lohzia chu an hria a ni.
15. Engvângin nge chanchin thara an puan zawng zawng âwih vek chu a finthlâk loh?
15 Chutiang mi dangte aw hmanga sawichhiatna kan hmachhawnin eng nge kan tih ang? Thufingte 14:15-a fuihna thu kan zâwm tûr a ni: “Mi mâwl chuan thu tin a ring a, mi remhria erawh chuan a kalna a en ṭha ṭhîn,” tih hi. Thu dik anga chanchin thara puanchhuah nazawng rin chu a finthlâk lo. Chanchin puan chhuah zawng zawng kan hnâwl vek loh laiin, “khawvêl pumhlûm hi mi sual thu thuin a awm,” tih kan hria a ni.—1 Johana 5:19.
“Fiah Rawh U”
16. (a) Engtin nge berâm tak takte awm dân chuan Johana 10:4-a Isua thusawi a dikzia a târ lan? (b) Bible-in eng ti tûrin nge min fuih?
16 Mahse, ṭhian nge kan kawm a, hmêlma tih engtin nge kan hriat chian ang? Aw le, Isua chuan berâmin a vêngtu ‘aw an hriat’ avângin amah an zui ṭhîn a ti a. (Johana 10:4) Berâmte’n a vêngtu an zui chhan chu a hmêl lan dân vâng ni lovin, a aw vâng a ni. Bible ramte chanchin ziakna lehkhabu pakhat chuan chu mi hmun va tlawhtu pakhatin berâmte’n an pu an hriat chhan chu a aw vâng ni lovin, a thawmhnaw hâk vâng tiin a hnial tih a sawi a. Berâm vêngtu chuan a aw an hriat vâng a nih thuin a chhâng a ni. Chu mi fiah nân, mikhual nên chuan thawmhnaw an inhâk thleng a. Berâm vêngtu thawmhnaw hain mikhual chuan berâmte chu a kova; mahse, berâmte chuan an ngaihsak lo. A aw an hriat loh avângin. Mahse, berâmpu chuan a thawmhnaw dang haa berâmte a kohvin, a vawikhat kohnaah an pan nghâl a ni tih a sawi a. Chuvângin, tuemaw chu berâmpu a ang mai thei a; mahse berâm tân chuan ani chu berâmpu a ni chuang lo. Berâmte chuan a kotu aw chu an chîk a, an pu aw nên an khaikhin a ni. Pathian Thu chuan chutiang bawka ti tûrin min hrilh—“thlaraute chu Pathian laka mi an ni nge ni lo fiah rawh u,” tiin. (1 Johana 4:1; 2 Timothea 1:13) Chutianga ti tûrin engin nge min ṭanpui ang?
17. (a) Engtin nge Jehova aw chu kan hriat bel? (b) Pathian hriatna chuan eng nge min tihtîr theih?
17 Hriatthiam theih takin, Jehova aw, a nih loh leh a thuchah kan hriat chian poh leh, mi dangte aw chu kan hre thei lehzual dâwn a ni. Bible chuan chutiang hriatna kan neih theih dân a sawi: “In bengin in hnung lama thu, ‘Hei hi kawng a nih hi, tah hian kal rawh u,’ tiin a hre zêl ang,” tiin. (Isaia 30:21) Kan hnung lama chu “thu” chu Pathian Thu aṭanga lo chhuak a ni. Pathian Thu kan chhiar apiangin, min Vêngtu Ropui Ber, Jehova aw chu kan hria a tih theih a. (Sâm 23:1) Chuvângin, Bible kan zir tam poh leh, Pathian aw chu kan hre bel lehzual a ni. Chu hriat belna chuan mi dangte aw min hriat hran nghâltîr thei a ni.—Galatia 1:8.
18. (a) Jehova aw hriatnaah eng dang nge tel? (b) Matthaia 17:5-a sawi angin, engvângin nge Isua aw kan âwih ang?
18 Jehova aw hriatnaah eng dang nge tel? Hriat bâkah, thuawih pawh a tel a ni. Isaia 30:21 hi en leh ta ila. Pathian Lehkha Thu chuan: “Hei hi kawng a nih hi,” tiin a puang chhuak a. Ni e, Bible zirna aṭangin Jehova kaihhruaina kan hria a. A dawt lehah: “Tah hian kal rawh u,” tiin thu a pe a ni. Jehova chuan kan thil hriat anga ti tûrin min fuih a. Chuvângin, kan thil zirte nunpuiin, Pathian aw chu kan hre mai ni lovin, kan âwih bawk a ni tih kan lantîr a ni. (Deuteronomy 28:1) Jehova aw kan âwih chuan Isua aw pawh kan âwih tûr a ni, Jehova chuan Isua thu âwih tûrin min hrilh si a. (Matthaia 17:5) Berâm Vêngtu Ṭha Isua’n eng ti tûrin nge min tih? Zirtîrte siam tûr leh “bawi rinawm, fing tak” ring tûrin min zirtîr a ni. (Matthaia 24:45; 28:18-20) A aw âwihna chu kan chatuan nunna a ni si a.—Tirhkohte 3:23.
‘An Tlân Bosan Ang’
19. Mi dangte aw chu engtin nge kan chhân lêt ang?
19 A nih leh, mi dangte aw chu engtin nge kan chhân lêt ang? Berâmte tih dân kan zui ang. Isua chuan: “Mi dang zawng an zui lo vang a, an tlân bosan zâwk ang,” a ti. (Johana 10:5) Kan chhân lêt dân chu thuah hnihin a ni. A hmasain, mi dangte chu kan “zui lo vang.” Ni e, mi dang chu kan hnâwl ṭhak a ni. “Lo vang” tia lehlin ṭawngkam hi Bible ziak nâna hman Grik ṭawngah chuan thil hnâwlna ṭawngkam na ber a ni. (Matthaia 24:35; Hebrai 13:5) A dawtah, kan “tlân bosan,” a nih loh leh kan hawisan ang. Chu chu Berâm Vêngtu Ṭha aw nêna inkalh zirtîrtute kan chhân lêt theih dân kawng awmchhun a ni.
20. Engtin nge (a) bum hmang kal pêngte, (b) ṭhian sualte, (c) chanchin thar dik lo taka puanchhuahte kan hriat hunah kan chhân lêt ang?
20 Chuvângin, kal pêngte ngaih dân phuh chhuaktute aw kan hriat hunah, Pathian Thu-in: “Zirtîrna thu nangmahni zir loh lama inṭhenna leh tlûkna siamtute chu vêng ṭha tûr leh hawisan tûrin ka ngên a che u,” tia min fuih anga tih chu kan duh a ni. (Rom 16:17; Tita 3:10) Chutiang bawkin, ṭhian ṭha lo hlauhawm tak hmachhawntu Kristian ṭhalaite chuan: “Tleirâwl châknate chu tlânsan la,” tia Paula’n ṭhalai Timothea a fuihna chu nunpui an duh a ni. Chanchin thara puhna dik lo takte kan hriat hunah, Paula’n Timothea hnêna thurâwn a pêk belhchhah chu kan hria ang: “Thawnthu lam panin [mi dangte aw ngaithlatute chu] an pêng tawh ang. Nang erawh chu engkimah fîmkhur la,” tih hi. (2 Timothea 2:22; 4:3-5) Mi dangte aw chu hriat nuam tak pawh ni mah se, kan rinna tichhe thei zawng zawngte chu kan tlân bosan ang.—Sâm 26:5; Thufingte 7:5, 21; Thu Puan 18:2, 4.
21. Mi dangte aw hnâwltute chu eng lâwmmanin nge nghâk?
21 Thlarauva hriak thih Kristiante chuan mi dangte aw hnâwlna hmangin, Luka 12:32-a târ lan an hnêna Berâm Vêngtu Ṭha thute chu an chhâng lêt a ni. Chutah chuan Isua’n an hnênah: “Pâwl tlêmte u, hlau suh u; ram pêk che u hi in Pa lâwmzâwng tak a ni,” a ti a. Chutiang bawkin, “berâm dang” chuan Isua thu: “Ka pa voh bîkte u, lo kal ula khawvêl siam ṭantirh ata in tâna ram buatsaih chu chang rawh u,” tih thu hriat hlân chu an nghâkhlel êm êm a ni. (Johana 10:16; Matthaia 25:34) “Mi dangte aw” kan hnâwl hian, lâwmman hlimawm takin min nghâk a ni! (w04 9/1)
I La Hria Em?
• Engtin nge Isua’n berâm huang tehkhin thua mi dang a sawi chu Setana a nih theih?
• Engtin nge tûn laiah mi dangte aw chu tih chhuah a nih?
• Mi dangte aw chu engtin nge kan hriat theih?
• Mi dangte aw chu engtin nge kan chhân lêt ang?
[Phêk 30-naa milem]
Mi dang chuan berâm chu tlang takin a pan lo