“Diabola Dodâl Rawh U”
“Diabola dodâl rawh u, tichuan a tlân bosan ang che u.”—JAKOBA 4:8.
1. Tûn lai khawvêl chungchâng eng nge sawi theih ni a, engvângin nge hriak thihte leh an ṭhiante chu an harhvân a ngaih?
“PATHIAN a bibo va, Diabola erawh a awm reng.” He, French lehkha ziaktu André Malraux-a thu ziak hi kan tûn lai khawvêl awm dân nên hian a inmil hle: mihring thiltihte hian Pathian duhzâwng aiin Diabola thlêmna hnuaia an awm zâwkzia a târ lan avângin. Setana chuan mite chu “thiltihtheihna tinrêng te, chhinchhiahna tinrêng te, dâwt thilmak tinrêng te . . . boral mêkte tân fel lohna bumna tinrêng nên,” a hruaibo a ni. (2 Thessalonika 2:9, 10) Nimahsela, he “ni hnuhnûngahte” hian, Setana chuan Pathian chhiahhlawh inpumpêkte chu a tum bîk a, hriak thih Kristian, “Pathian thupêkte zâwma Isua hriattîrna thu pawmte,” chu a do a ni. (2 Timothea 3:1; Thu Puan 12:9, 17) Hêng hriak thih Pathian chhiahhlawhte leh an thawhpui leilam beiseina neite hi an harhvân hle a ngai a ni.
2. Engtin nge Setana’n Evi a bum a, eng a hlauhthâwn thu nge tirhkoh Paula’n a sawi?
2 Setana chu kawng engkima bumhmang a ni a. Ani chuan rûl chu kâwrah hmangin Evi chu Pathian laka inlâk hranna aṭanga hlimna nasa zâwk hmu thei tûrah inngaihtîrin a bum a ni. (Genesis 3:1-6) Kum sângli vêl a ral hnuah, tirhkoh Paula chuan Korinth khuaa hriak thih Kristiante chu Setana ngamthlêma an awm a hlauh thu a sawi chhuak a ni: “Rûl chuan a ngamthlêmnain Evi a bum ang khân Krista lama takna leh thianghlimna ata chu eng emaw tiin in rilru chu an tikhawlo dah ang e, tih ka hlauthâwng a ni,” tih ziakin. (2 Korinth 11:3) Setana chuan mite rilru a tikhawlo va, an ngaihtuahnate a herhkawi a ni. Evi a bum angin, Kristiante pawh Jehova leh a Fapa duh loh zâwngte tihnaah an hlimna a innghat tih ngaih dân dik lo tak a neihtîr thei a ni.
3. Jehova’n Diabola laka inhumhimna eng nge a pêk?
3 Setana chu sava thang kamtu nêna khaikhin theih a ni a. Setana thangte pumpelh tûr chuan, ‘Chungnungbera bihrûkna hmuna kan awm’ a ngai a, chu hmun chu an thiltih apianga Jehova lal chungnunna an pawmzia lantîrtute tâna a siam, entîr nei inhumhimna hmun hi a ni. (Sâm 91:1-3) “Diabola ngamthlêmnate chu [kan] do zawh nân,” Pathianin a Thu, a thlarau, leh a inawpna pâwl hmanga inhumhimna min pêk zawng zawng hi kan mamawh a ni. (Ephesi 6:11) “Ngamthlêmnate” tih atâna hman Grik thu mal chu “thiltih verther takte” emaw, “bumnate” ti emaw pawha lehlin theih a ni a. Rinhlelhrual lovin, Jehova chhiahhlawhte a man theih nân Diabola chuan bumna leh thiltih verther takte chu a hmang a ni.
Kristian Hmasate Awh Nâna Setana Thang Kamte
4. Kristian hmasate chu eng ang khawvêlah nge an chên?
4 C.E. kum zabi pakhatna leh pahnihnaa Kristiante chu Rom Lalram a dinchan lai bera awm an ni a. Pax Romana (Rom Lalram Remna Hun) chuan sum dâwnna lam a tiduah hle a. Chu chuan ram awptute tân hun âwl tam tak a siam a; tin, ram awptute chuan mipuite an hel loh nân intihhlimna tam tak an siam a ni. Hun engemawti chhûng phei chu vântlâng chawlh nî pawh hnathawh nî tlukin a tam a ni. Hruaitute chuan vântlâng sum chu mipuite hrai puara, an rilru lâkpên nân an hmang bawk.
5, 6. (a) Engvângin nge Kristiante tân khân Rom-ho ennawm chhuahna in leh hmuhnawm chhuahna lâmmualte tlawh chu thil tih âwm a nih loh? (b) Khatih lai khân, eng ang bumna nge Setana’n a hman a, chu chu Kristiante’n engtin nge an pumpelh theih?
5 Chu dinhmun chu Kristian hmasate tân a hlauhawm em? Tertullian-a te ang tirhkohte hun hnua thu ziaktute vaukhânna thu aṭanga chhût chuan, chutih hun laia hun âwl hmanna thiltih tam tak chu Kristian dikte tân thlarau lam leh nungchang lamah a hlauhawm a ni. Hlauhawm pakhat chu hei hi a ni; vântlâng kût nî leh infiamna zawng zawng deuhthaw chu milem pathiante chawimawi nâna hman hi. (2 Korinth 6:14-18) Ennawm chhuahna inah lah, lemchan ṭhaa ngaihte zînga tam takah pawh nungchang bawlhhlawhna leh tharum thawhna râpthlâk tak a tel ṭhîn. Hun a liam zêl chuan, chutiang chi lemchante chu a lo chuai ta a; lemchan bawlhhlawh tak takte hian a rawn luahlân ta a ni. Thilthleng chanchin ziaktu, Jérôme Carcopino-a chuan a lehkhabu chhuah, Daily Life in Ancient Rome-ah chuan: “Chûng lemchanahte chuan a changtunute chu saruak ngalngata an awm phal a ni a . . . Thisen nasa taka chhuah a ni bawk. . . . [A changtute] chuan khawpuia mite hneh tlattu hurherhna lam thil nasa takin an lantîr a ni. Anni chuan chutiang an thil hmuh uchuak tak takte chu an ten lo; an hmuhnawm chhuahna lâmmuala thisen chhuahna leh tharum thawhna râpthlâk tak takte’n an rilru leh an pianpui finnate chu kum tam tak chhûng a lo tihchawmawlha, a lo tihkhaw loh tawh avângin,” a ti.—Matthaia 5:27, 28.
6 Chûng an hmuhnawm chhuahna lâmmualahte chuan, insuala ei zawng mite chuan an mihringpuite emaw, ramsate emaw chu an sual ṭhîn a; anni’n an that emaw, an thih phah emaw ṭhîn. Dân bawhchhetu thiam loh chantîrte chu ram sakawlhte ei atâna pêk an ni a, a hnuah chuan Kristian tam takte pawh pêk an ni bawk. Chûng hun laiah pawh chuan, Setana mi bumna chu mite’n nungchang bawlhhlawhna leh tharum thawhna an huatna chu tihbo va, chûng thilte chu thil lâr tâk leh mipuiin an thlâk hlelh hial nihtîr chu a ni. Chu thang pumpelh theih dân awmchhun chu ennawm chhuahna in leh hmuhnawm chhuahna lâmmualte pumpelh hi a ni.—1 Korinth 15:32, 33.
7, 8. (a) Engvângin nge hmân laia Kristiante tân tawlailîr intlânsiakna hmuna tel chu a finthlâk loh? (b) Engtin nge Setana chuan Rom-ho inbualna chu Kristiante awh nân a hman theih?
7 Hmuhnawm chhuahna lâmmual zau taka tawlailîr intlânsiak en chu a phûrawm hle ngei mai a; mahse, a thlîrtu mipuite zîngah tharum thawhna a chhuah ṭhin avângin, Kristiante tân chuan pawm theih a ni lo. Kum zabi pathumnaa chanchin ziaktu pakhat chuan a thlîrtute zînga ṭhenkhat chu an lo insual buai thu a sawi a; tin, Carcopino-a pawhin tawlailîr intlânsiakna in hulhliap hnuaiah chuan “ârsi hmanga ai en thiamte leh nawhchizuarte an lo sumdâwn,” thu a sawi bawk. Chuvângin, Rom-ho tawlailîr intlânsiakna hmun chu Kristiante kalna âwm a ni lo tih a chiang hle.—1 Korinth 6:9, 10.
8 Rom-ho inbualna hmingthang tak chanchin chu eng nge ni ve? Fai nâna inbualah chuan thil dik lo a awm hauh lo. Mahse, Rom-ho inbualna chu in lian tak chhûnga neih a ni a, chutah chuan pang inzûtna pindante, in chhûnga inkhelhna pindante, pawisa inkhelhna pindante, leh ei leh inna pindante a awm a. A thuphungah chuan mipa leh hmeichhe inbual hun tihhran ni mah se, inbualho pawh phal tho a ni. Aleksandria khaw chhuak Clement-a chuan: “Mipa leh hmeichhia inbualpawlh vek phal a ni a; chutah chuan a hlei a hluaka inphalrai tûrin saruak ngalngatin an awm ṭhîn,” tih a ziak a ni. Chutiang chuan, Setana chuan mipui pawmtlân thiltihte chu awlsam têin Kristiante awh nân a hmang thei a. Chuvângin, mi fingte chu chutiang hmunah chuan an kal lo.
9. Kristian hmasate khân eng thangte nge an pumpelh ngai?
9 Rom Lalram a dinchan lai chuan pawisa khelh chu mite’n hun khawhral nâna an nuamtih ber a lo ni a. Kristian hmasate chuan tawlailîr intlâksiaknaa pawisa inthâpna chu a hmuna kal lohna hmangin an pumpelh thei mai a. Pawisa khelhna tênau chu khualbûkahte leh zu dâwrahte a rûka neih a ni bawk ṭhîn. Inkhêlte chu an khelhpuite ṭiaulung hûm zât emaw, infiamna saruh hûm zât emaw kawp kim leh kim lohahte an inthâp ṭhîn a ni. Pawisa khelhna chu awlsam têa sum hlawh theihna a nih avângin a phûrawm zual a. (Ephesi 5:5) Chu bâkah, chutiang zu inna hmuna dâwr nghâktute chu nawhchizuar an ni tlângpui, nungchang bawlhhlawhnaa tlûkchhiat a hlauhawm lehzual a ni. Hêng hi Rom Lalram khawpuia chêng Kristiante tâna Setana thang kam ṭhenkhatte a ni. A nih leh kan hunah hian thil a danglam viau em?
Tûn Laia Setana Thangte
10. Engtin nge tûn lai dinhmun hi Rom Lalrama dinhmun lâr tak nên a inan?
10 A tlângpui thuin, Setana mi bumdân chu tûn thlengin a inthlâk danglam lo. Korinth khawpui bawlhhlawh taka awm Kristiante chu ‘Setana dinchan khalha’ an awm loh nân, Paula chuan zilhna thu khauh tak a pe a. “[Setana] ngamthlêmna chu kan hai si lo,” a ti. (2 Korinth 2:11) Ram changkâng tam takah chuan, tûn laia dinhmun hi Rom Lalram a dinchan laia dinhmun nên a inang hle. Mi tam tak chuan tûn hma zawng aiin hun âwl an nei tam a. Sawrkâr lottery-te chuan mi chhe ber pawh beiseina a pe tlat a. Mite rilru luahkhattu tûr intihhlimna man tlâwm tak takte a awm a. Inkhelhna mualte chu mihringin a khat tlat a, pawisa khelhna a awm a, a châng chuan mipuite chuan tharum an thawh bawk a; tin, inkhêltute pawhin tharum an thawh bawk ṭhîn. Rimawi lepchiah tak takte chu mite bengah a khat tlat a, thil bawlhhlawh tak takte chu ennawm chhuahnaah leh cinema-ah leh TV-ahte a khat tlat a ni. Ram ṭhenkhatah chuan, tuipui kam ṭhenkhata saruaka inbual chu sawi loh, tui luma inbualna pindan leh luitui luma mipa leh hmeichhia inbual tlânte chu a lâr hle. Kum zabi hmasaa Kristianna ang bawkin, Setana chuan Pathian chhiahhlawhte chu khawvêl hun khawhralna thiltih hmanga thlêm a tum a ni.
11. Intih hahdam leh hun âwl neih duhnaah chuan eng thangte nge awm?
11 Lungngaihna khawvêlah hian, intih hahdam duhna leh, hun âwl neih duhna chu thil pângngai a ni a. Nimahsela, Rom-ho inbualnaah khân Kristian hmasate tâna hlauhawm thei thil a tel ang bawkin, chawlh hmanna in leh hmun ṭhenkhatte chu tûn lai Kristiante nungchang bawlhhlawhna leh zuruihnaa hruai nâna Setana thang hman a ni a. Paula chuan Korinth khuaa Kristiante hnênah: “Bumin awm suh u; ‘Ṭhian sualte chuan nungchang ṭha an tikhawlo ṭhîn.’ Fel takin harh ula, thil tisual suh u; ṭhenkhat chuan Pathian hriatna rêng in neih loh hi,” tiin a ziak a ni.—1 Korinth 15:33, 34.
12. Tûn laia Jehova chhiahhlawhte awh nân, eng bumna thang ṭhenkhatte nge Setana’n a hman?
12 Evi chungchângah khân Setana’n a ngaihtuahna tihchhiat nân vervêkna a hmanzia kan lo hmu tawh a. (2 Korinth 11:3) Tûn laia Diabola thang pakhat chu hei hi a ni: Jehova Thuhretute chu mi dangte ang tho an nihzia a theih chin china târ lanna hian Kristian thutakah mite a hruai lût dâwn tih ngaih dân min neihtîr hi. A châng chuan, an kalthui lutuk avângin an tum loh zâwk chu an chungah a lo thleng a ni. (Hagaia 2:12-14) Setana bumna dang leh chu hei hi a ni: Kristian inpumpêk tawh a pui a pangte chu nun kawng chi hnih ûmna hmanga ‘Pathian thlarau thianghlim tilungngai’ tûra chawhthawh hi. (Ephesi 4:30) Ṭhenkhat chu Internet hman dik loh avângin he thangah hian an âwk a ni.
13. A hlauhawmna lang chhuak lo eng thang hi nge Diabola ngamthlêmna pakhat ni a, Thufingte-a eng zilhna thu nge he mi chungchâng atâna inâwm tak a nih?
13 Setana thang dang pakhat chu a hlauhawmna lang chhuak lo thlarau khawvêl lam thilte hi a ni. Kristian dik tumah chu hre reng chungin Setana biaknaah emaw, thlarau zâwlnaah emaw a va inhnamhnawih dâwn lo va. Mahse, ṭhenkhat chu cinema an en hunah te, TV thawnthu inzawm an en hunah te, video game an khelh hunah te, leh tharum thawhna leh thlarau khawvêl lam thil chuanna naupang lehkhabu leh thawnthubute an chhiar hunah an hriat lohvin an lo fîmkhur tâwk lo ṭhîn. Thlarau khawvêl lam nêna inzawmna nei anga lang apiang chu pumpelh tûr a ni. Thu fing pakhat chuan: “Mi bengtla lo kawngah chuan hlîng te, thang te a awm a, a nunna vawng ṭha chuan a hlat daih ang,” a ti. (Thufingte 22:5) Setana chu “he khawvêl pathian” a nih avângin, thiltih lâr tak apiang chuan a thang pakhat khat chu a thup bo a rinawm a ni.—2 Korinth 4:4; 1 Johana 2:15, 16.
Isua’n Diabola A Dodâl
14. Engtin nge Isua’n Diabola thlêmna hmasa chu a dodâl?
14 Isua chuan Diabola dodâla, tlânchhîattîrna kawngah entawn tûr ṭha tak min hnutchhiah a ni. Baptisma a chan hnu, ni 40 chhûng chaw a nghei hnuah Isua chu Setana’n a thlêm a. (Matthaia 4:1-11) Thlêmna hmasa ber chuan chaw nghei hnua Isua ril ṭâmna chu remchângah a la a. Setana chuan Isua chu a tisa mamawh phuhrûk nâna a thilmak tihtheihna hmang tûrin a sâwm a ni. Deuteronomy 8:3-na la chhâwngin, Isua chuan a thiltihtheihna chu mahni tâna hman a duh lo va, thlarau lam chaw chu tisa lam chaw aiin a dah pawimawh zâwk a ni.
15. (a) Eng châkna pângngai tak nge Setana’n Isua thlêm nân a hman? (b) Diabola’n tûn laia Pathian chhiahhlawhte chunga ngamthlêmna vervêk tak a hman ber chu eng hi nge ni a, chu chu engtin nge kan dodâl theih?
15 He thlêmna chungchânga ngaihven awm tak chu Diabola’n Isua chu mipat hmeichhiatna lama sual ti tûra a thlêm lo hi a ni a. Chu mi ṭuma Isua thlêm nâna hman theih tisa châkna nasa ber nia lang chu a rilṭâm êm avânga a chaw châkna chu a ni. Eng thlêmnate nge Diabola chuan tûn laia Pathian mite bum nân a hman? Thlêmna tam tak leh chi hrang hrang a awm a; mahse, mipat hmeichhiatna lama thlêmnate chu Jehova mite rinawmna tihchhiat a tumna lama a hman ṭangkai ber ngamthlêmna vervêk tak pakhat a ni. Isua entawnin, Diabola kan dodâl thei a, thlêmnate kan do thei a ni. Isua’n Bible châng inâwm tak hriat chhuahna hmanga Setana hma lâkna a tihtlâwmsak ang bawkin, thlêmna kan hmachhawn hunah Genesis 39:9 leh 1 Korinth 6:18 te chu kan hre chhuak ve thei a ni.
16. (a) Engtin nge Setana chuan a ṭum hnihnaah Isua chu a thlêm? (b) Eng kawngin nge Setana chuan Jehova fiah tûrin min thlêm mai theih?
16 Tichuan, Diabola chuan biak in chhîp aṭanga zuang thlaa, Pathianin A vântirhkohte hmanga a vênhimna a fiah ngam leh ngam loh fiah tûrin Isua chu a cho leh a. Deuteronomy 6:16 thu la chhuakin, Isua chuan a Pa fiah chu a duh lo a ni. Setana chuan biak in chhîp aṭanga zuang thla tûrin min thlêm kher lo vang a; mahse, thil danga Jehova fiah tûrin min thlêm thei a ni. Zilhna tawng lova khawvêl silhfên leh inchei dân kan zui theih chin chin zui châkna kan nei em? Rinhlelhkai intihhlimna lama tel duhna kan nei em? Kan neih chuan Jehova kan fiah a ni thei a ni. Chutiang tihduhna kan neih chuan, Setana chu kan hnên ata tlân chhuah ahnêkin, a awm reng zâwk ang a, a lama ṭang tûrin min thlêm reng zâwk ang.
17. (a) Engtin nge Diabola chuan a ṭum thumna atân Isua a thlêm? (b) Engtin nge Jakoba 4:7 thu hi kan tân pawh a dik theih?
17 Setana chuan khawvêl ram ropuina zawng zawng chu chibai bûkna thiltih pakhat nêna thlâkthleng tûra Isua a thlêm khân, Isua chuan Bible châng hmangin a dodâl leh a, a Pa chauh chibai bûkna kawngah a ding nghet tlat a ni. (Deuteronomy 5:9; 6:13; 10:20) Setana chuan he khawvêl ramte chu pêk min tiam kher lo vang; mahse, khawvêl thil duhawm takte leh chûng thilte aṭanga lungawina neih theih beiseinate hmang hian min thlêm reng a a ni. Kan inpêkna pumhlûm chu Jehova hnênah pein, Isua angin kan chhâng lêt em? Kan chhân lêt chuan, Isua chunga thilthleng ang bawk chu kan chungah pawh a thleng ve ang. Matthaia ziak chuan: “Chu mi hnuah chuan Diabola chuan a kalsan ta a,” a ti. (Matthaia 4:11) Bible thu bul inâwm takte hriat reng leh chûng chu a taka hmanga Setana kan dodâl tlat chuan, ani’n min kiansan ang. Zirtîr Jakoba chuan: “Diabola dodâl rawh u, tichuan a tlân bosan ang che u,” tiin a ziak a ni. (Jakoba 4:7) France rama Thuhretu pakhat chuan branch office-ah: “Setana chu a vervêk êm êm a. Tum ṭha tak ka nei reng chungin, ka thil duhzâwng leh veizâwngte hneh chu harsa ka ti hle a ni. Nimahsela, huaisenna te, dawh theihna te, leh a pawimawh berah Jehova ṭanpuina zârah thutak chu chelh nghetin, ka rinawmna chu ka vawng thei a ni,” tiin a ziak a ni.
Diabola Dodâl Tûra Kim Taka Inthuamin
18. Eng thlarau lam râlthuamte’n nge Diabola dodâl tûra min thuam?
18 Jehova chuan “Diabola ngamthlêmnate chu [kan] do zawh nân” thlarau lam râlthuam famkim min pe a. (Ephesi 6:11-18) Thutak kan hmangaihna chuan kan kâwng a hrêng, a nih loh leh Kristian rawng bâwl tûrin min buatsaih ang a. Jehova felna tehnate zawm kan tumna chu kan thinlung humhimtu âwmphaw ang a ni bawk ang. Kan kêah chanchin ṭha kan bun chuan, thuhrilh rawngbâwlnaah kan tel ziah ang a, chu chuan thlarau lamah min tichakin min humhim dâwn a ni. Kan rinna chak tak chu phâw ang a ni ang a, “mi sual thal alh thei,” a beihna vervêk tak leh thlêmnate lak aṭangin min vênghim ang. Jehova thutiamte kan rinna chuan lukhum angin kan ngaihtuahnate a humhim ang a, rilru thlamuanna min pe ang. (Philippi 4:7) Pathian Thu kan hman thiam viau chuan, ngûnhnâm ang a lo ni ang a, Setana hnuaia thlarau lam sal tângte chhuahtîr nân kan hmang thei ang. Tin, Isua’n thlêmna a tawh laia a hman ang bawk khân, mahni invênhim nân kan hmang thei bawk a ni.
19. “Diabola dodâl” bâkah eng dang nge ṭûl?
19 Hêng ‘Pathian râlthuam famkim’ kan inbel reng a, kan ṭawngṭai reng bawk chuan, Setana min beih hunah Jehova vênhimna kan ring tlat thei a ni. (Johana 17:15; 1 Korinth 10:13) Mahse, Jakoba chuan “Diabola dodâl” mai chu a tâwk lo tih min kawhhmuh a. Chutianga tih mai bâkah, thil dang zawng aia pawimawh zâwk, min ngaihsaktu ‘Pathian thu thua awm a,’ a hnênah kan intulût bawk tûr a ni. (Jakoba 4:7, 8) Chutianga kan tihtheih dân chu thuziak dawtah hian sawiho a ni ang. (w02 10/15)
Engtin Nge I Chhân Ang?
• Setana thang eng nge Kristian hmasate’n an pumpelh ngai?
• Tûn laiah Jehova chhiahhlawhte awh nân Setana’n eng ngamthlêmnate nge a hman?
• Engtin nge Isua’n Diabola thlêmnate chu a dodâl?
• Eng thlarau lam râlthuamin nge Diabola min dodâltîr thei?
[Phêk 21-naa milem]
Isua’n Diabola a dodâl tlat
[Phêk 22-naa milemte]
Kum zabi pakhatnaa Kristiante chuan tharum thawhna leh nungchang bawlhhlawhna lama intihhlimna an hnâwl
[Milem Hawhtîrtu]
The Complete Encyclopedia of Illustration/J. G. Heck