Lal Tâna Thupêk Chu Zâwm Ve Rawh

‘Dân hi lehkhabuah a ziak chhâwng ang a; a kawl ang a, a dam chhûng zawng a chhiar ṭhîn tûr a ni.’​—DEUTERONOMY 17:​18, 19.

1. Kristian chuan tu ang nge nih a duh mai theih?

LALPA emaw, lalnu emawa inchan châng i nei ngai mang lo vang. Kristian rinawm leh Bible zirlai chu Lal rinawm tak tak, Davida te, Josia te, Hezekia te, leh Jehosaphata te anga lal thuneihna nei tûrah an inchan ngai dâwn em ni? Chutichung chuan, kawng khatah tal anmahni i ang thei a, i ang bawk tûr a ni. Chu chu eng nge ni? Engvângin nge chu mi kawnga anmahni an chu i duh ang?

2, 3. Mihring lal chungchângah Jehova’n eng nge a hmuh lâwk a, chutiang lal chuan eng nge a tih ngai?

² Pathian chuan Israelte tâna lal neih a phal hma hun rei tak, Mosia hun lai aṭangin, A mite zîngah lal neih duhna a lo awm dâwn tih a hmu lâwk a. Chuvângin, Dân thuthlungah chuan zirtîrna pawimawh tak takte chu telh tûrin Mosia chu a thâwk khum a ni. Chûng chu lal tâna inzirtîrna thupêkte a ni.

³ Pathian chuan: “LALPA in Pathianin ram a pêk che u in va thlen a, . . . ‘Kan vêla hnam zawng zawngte ang bawkin lal i nei ang u,’ in tih hunah chuan; LALPA in Pathianin a thlana ngei chu lalah in nei tûr a ni a: . . . Tin, heti hi a ni ang a, a ram lalṭhutthlênga a ṭhut hun chuan . . . dân hi lehkhabuah [“a ziak chhâwng,” NW] ang a; a kawl ang a, a dam chhûng zawng a chhiar ṭhîn tûr a ni, hêng dân leh hêng thuruat zawng zawngte hi pawm a, zâwma ti tûra LALPA a Pathian ṭih dân a zir theih” nân a ti a.​—Deuteronomy 17:​14-19.

4. Lal tâna Pathian kaihhruaina thupêkah eng nge tel?

⁴ Ni e, Jehova’n amah betute tâna lala a thlan chuan i Bible-a i hmuh theih thuziakte hi ama tân a ziak chhâwng tûr a ni a. Chu chu nî tin a chhiar nawn fo tûr a ni. Mahse, chu chu thil hriat reng theih nâna thluak sawizawina mai a ni lo. A zira zir a ni a, thiltum ṭangkai tak a nei bawk a ni. Jehova pawm zâwng lal ni tûr chuan thinlung dik a neih a, a neih chhunzawm reng theih nân, chutianga a zir reng chu a ngai a. Chu bâkah, lal hlawhtling leh fing tak a nih theih nân, chûng thâwk khum thuziakte chu a zir a ngai a ni.​—2 Lalte 22:​8-13; Thufingte 1:​1-4.

Lal Ang Bawkin Zir Rawh

5. Lal Davida chuan eng Bible bute nge ziah chhâwn tûr leh chhiar tûr a neih a, chu mi chungchâng chu engtin nge a ngaih?

⁵ Israel lal a nih khân Davida tih tûr chu eng nge nia i rin? Awle, ani chuan Pentateuch (Genesis, Exodus, Leviticus, Number, Deuteronomy) te a ziah chhâwn a ngai a. Dân thu ziah chhâwn nâna a mit leh a kutte a hmanna chuan Davida rilru leh thinlung a khawih dân tûr chu han ngaihtuah teh. Mosia pawhin Joba leh Sâm 90 leh 91 a ziak a nih hmêl hle a. Davida chuan hêngte hi a ziak chhâwng ve em? A ziak chhâwng mai thei. Chu bâkah, Josua te, Rorêltu te, Ruthi te lehkhabu pawh hi a awm tawh hmêl bawk a. Chuvângin, Lal Davida chuan chhiar tûr leh zawm tûr Bible thu a nei tam thawkhat tih i hre thei a ni. Tin, kan sawi tâk angin a ti ngei a ni tih rin nachhan tûr i nei a ni; Pathian Dân chungchâng Sâm 19:​7-11-a a sawite aṭang hian.

6. Engtin nge Isua chuan a thlahtu Davida ang bawkin Pathian Lehkha Thu a tuipui tih kan chian theih?

⁶ Davida Ropui Zâwk​—Davida Fapa, Isua—pawhin chutiang bawkin a ti a. Chawlhkâr tina inkhâwmna ina kal chu Isua tih ṭhin dân a ni. Chutah chuan Pathian Lehkha Thu an chhiar leh an hrilhfiah te chu a ngaithla ṭhîn a. Chu mai bâkah, Isua ngei chuan mipui hmaah Pathian Thu chhiarin, a awmzia a hrilhfiah bawk a ni. (Luka 4:​16-21) Isua’n Pathian Lehkha Thu a hriat chian tûrzia chu awlsamtêin i chhût thei mai ang. Chanchin Ṭha thuziakte han chhiar la, “tih ziak a ni” tiin emaw, kawng dangin emaw Pathian Lehkha Thu khawi emaw lai a lâk chhuah ngunzia chu chhinchhiah teh. Entîr nân, Matthaia chhinchhiah angin, Tlâng chunga a Thusawiah ngawt pawh Isua chuan Hebrai Pathian Lehkha Thu aṭangin vawi 21 lai a la chhuak a ni.​—Matthaia 4:​4-​10; 7:​29; 11:10; 21:13; 26:​24, 31; Johana 6:​31, 45; 8:​17.

7. Engtin nge Isua chu sakhaw hruaitute lakah a danglam?

⁷ Isua chuan Sâm 1:​1-3-a fuihna: “Mi suaksualte remruat anga awm ngai lo . . . mi chu, a eng a thâwl e. A lâwmna chu LALPA dânah a ni zâwk a, a dân thu chu achhûn azânin a ngaihtuah ṭhîn. . . . A thiltih apiang chu a hmuingîl zêl ang,” tih thu hi a zâwm a ni. A hun laia sakhaw hruaitu, ‘Mosia ṭhutphaha ṭhu’ a, ‘LALPA dân’ ngaihthah si tute nên chuan an va inang lo êm!​—Matthaia 23:​2-4.

8. Engvângin nge Juda sakhaw hruaitute Bible chhiarna leh zirna chu a thlâwn mai a nih?

⁸ Nimahsela, Isua’n Bible zir a sawimawi lo ni âwm taka ngaih theih thu pakhat hian mi ṭhenkhat chu a tibuai mai thei a ni. Johana 5:​39, 40-ah chuan Isua’n a hun laia mi ṭhenkhatte hnênah: “Pathian Lehkha in chhiar ngun ṭhîn, a chhûngah chatuana nunna awmin in rin avângin: chûng Lehkha chu ka chanchin hriattîrtu chu a ni si a. Nimahsela nunna nei tûrin ka hnênah in lo kal duh si lo,” tiin a hrilh a. Hetianga a hrilh avâng hian Isua’n a thu ngaithlatu Judate hnênah Bible zir a sawimawi lo tihna a ni lo. Chuti ni lovin, an tih tak lohzia leh mumal taka an tih lohzia chu a târ lang zâwk a ni. Pathian Lehkha Thu chuan chatuan nunnaah a hruai thei tih an hria a; mahse, chu an Pathian Lehkha Thu chhiar tho chuan Messia, Isua hnênah pawh a hruai tûr a ni. Nimahsela, amah chu an hnâwl tlat si. Chutianga an tak loh avâng leh zirtîr theih loh an nih avâng chuan an zirna chuan awmzia a nei lo a ni.​—Deuteronomy 18:15; Luka 11:52; Johana 7:​47, 48.

9. Tirhkohte leh hmân lai zâwlneite khân eng entawn tûr ṭha tak nge an siam?

⁹ Tirhkohte pawh tiamin, Isua zirtîrte chu an va danglam êm! Anni chuan ‘chhandamna hmu khawpa [mi] tifing thei Lehkha Thianghlimte’ an zir a ni. (2 Timothea 3:15) He mi kawngah hian zâwlnei hmasa, ‘ngun taka chhui ṭhîn’ mite ang an ni. Chûng zâwlneite chuan ngun taka an chhuina chu thla rei lo te chhûng emaw, kum rei lo te chhûng emaw ṭhahnemngai taka tih tûrah an ngai lo. Tirhkoh Petera chuan, Krista chungchâng leh mihringte a chhandamnaa ropuina inrawlhte ‘chhui chhuah an tum’ reng tih a sawi a ni. A lehkha thawn pakhatnaah, Petera chuan Bible bu sâwmte aṭangin vawi 34 lai a la chhuak a ni.​—1 Petera 1:​10, 11.

10. Engvângin nge kan za hian Bible zirna kan ngaihsak ṭheuh vang?

¹⁰ Chuvângin, Pathian Thu ngun taka zir chu hmân lai Israel lalte tih tûr a ni tih a chiang hle. Isua pawhin he tih dân hi a zui a ni. Tin, lal anga Krista nêna vâna rorêl tûrte tân chuan Pathian Thu zir chu an hna tûr a ni. (Luka 22:28-​30; Rom 8:​17; 2 Timothea 2:​12; Thu Puan 5:​10; 20:6) He lal tâna thupêk hi Lalram awpna hnuaia lei lam malsâwmnate dawn inbeisei apiangte tân pawh zui ve a ṭûl a ni.​—Matthaia 25:​34, 46.

Lalte leh Nangma Tih Tûr Chu

11. (a) Zirna chungchângah eng hlauhawm nge Kristiante tân awm? (b) Eng zawhnate nge mahni leh mahni kan inzawh ang?

¹¹ Kristian dik apiangte chuan anmahniin Bible an zir chiang tûr a ni tih chu dik tak leh uar takin kan sawi thei a. Chu chu Jehova Thuhretute nêna Bible i zir ṭan lai chauhva tih tûr thil a ni lo. Kan za hian tirhkoh Paula hun laia mi mala zirna thlahthlam ta mi ṭhenkhatte ang kha nih loh kan tum tlat tûr a ni. Anni chuan “Pathian thu bul ber A Aw B,” “Krista thu bul” angte chu an zir a. Mahse, an zirna chu an chhunzawm zêl lo va, ‘puitlin lam an pan’ lo a ni. (Hebrai 5:​12–6:3) Chutiang bawkin keini pawhin: ‘Kristian kohhranah hun rei tak ka tel tawh emaw, ka telna ala rei lo emaw pawh nise, Pathian Thu mi mala zir chu engtin nge ka ngaih? Paula chu a hun laia Kristiante “Pathian hriat famkimna kawnga lo sâwt deuh deuhva” an awm theih nân a ṭawngṭai a. Chutiang ang bawk duhna chu ka nei a ni tih ka lantîr em?’ tiin kan inzâwt tûr a ni.​—Kolossa 1:​9-12.

12. Engvângin nge Pathian Thu ngainatna neih reng a pawimawh?

¹² Zirna ṭha neih theih nâna pawimawh ber chu Pathian Thu ngainatna neih hi a ni. Sâm 119:​14-16 chuan pelh hauh lova awmze nei taka Pathian Thu ngaihtuah te chu, Pathian Thu i ngainat theihna tûr a ni tih a târ lang a. Chu chu hun rei tak chhûng Kristian lo ni tawh mah la, a pawimawh êm êm tho a ni. Chu mi pawimawhzia ti langtu Timothea entawn tûr siam han ngaihtuah chhuak teh. Ani chu Kristian upa niin, “Krista Isua sipai ṭha” angin rawng bâwl reng tawh mah se, Paula chuan ‘thutak thu fel taka hmang’ tûra ṭhahnem ngai tûrin a fuih a ni. (2 Timothea 2:​3, 15; 1 Timothea 4:15) Chuvângin, “ṭhahnem ngai” taka i beihnaah chuan zirna ṭha neih pawh a tel a ni tih a chiang hle.

13. (a) Engtin nge Bible zir nâna hun tam zâwk kan insiam theih ang? (b) Zir nâna hun insiam nân eng insiamremna nge i siam theih?

¹³ Zirna ṭha neih theih dân rahbi pakhat chu Bible zir nâna hun insiam thlap thlap hi a ni. He mi chungchângah hian i ti ṭha em? I chhânna chu engpawh ni se, mi mal zirnaa hun hman tam lehzual chu i hlâwkpui i ring em? ‘Engtin nge chu mi atân chuan hun ka insiam theih ang?’ i ti mai thei. Awle, ṭhenkhat chu an Bible zirna hun an tihpun theih nân zîngah an tho hma deuh va. Minute 15 chhûng vêl Bible an chhiar emaw, mi mal zirna an nei emaw ṭhîn. Thil dang tihleh theih chu, chawlhkâr tina i hun duan chu i sâwi danglam deuh hlek thei em? Entîr nân, nî tin deuhthawa chanchinbu i chhiar ṭhîn emaw, tlai tin deuhthaw television-a chanchin thar i en ṭhîn emaw a nih chuan, chawlhkâr khata ni khat tal en loh chu i thei ang em? Chu mi nî chu Bible zirna tihpun nân i hmang thei dâwn a ni. Chutianga chawlhkâr khata chanchin thar ni khat pelh a, minute 30 vêl chu mi mal zirna atâna i dah chuan kum khat chhûngin dâr kâr 25 ngawt i nei mai dâwn a ni. Bible chhiar leh zir nâna dârkâr 25 chhûng i neih belh hi i hlâwkpui dân tûr han ngaihtuah teh! Tih dân dang pawh a la awm cheu: Chawlhkâr lo la awm tûr chhûng chuan tlai tinin i ni hman dân chu chhût chiang ang che. Bible chhiar leh zir nâna hun tam zâwk i hman theih nâna thil engemaw i tih loh tûr emaw, tihtlêm deuh tûr emaw i neih leh neih loh chu enfiah ang che.​—Ephesi 5:​15, 16.

14, 15. (a) Engvângin nge mi mal zirna chungchângah hian tum neih a pawimawh? (b) Bible chhiarnaa thiltum neih theihte chu engte nge ni?

¹⁴ Engin nge zirna chu i tân awlsam zâwk leh nuam zâwka siam thei? Tum neihnain a siam thei a ni. I tlintâwk tûr zirna thiltum eng nge i insiam theih? Mi tam takte tân chuan, thiltum duhawm hmasa ber chu Bible pum pui chhiar chhuah hi a ni. Tûn thlengin, i remchân apianga Bible châng tlêm tê tê chhiarin, chûng aṭang chuan hlâwkna i la dawng zêl pawh a ni mahna. Tûnah chuan Bible bu pum pui chhiar chhuah chu i thiltum i nihtîr thei ang em? Chu mi tihlawhtling tûra i thiltum hmasa ber chu Chanchin Ṭha palite chhiar chhuah a ni thei a, chu chu thiltum pahnihna, Kristian Grik Pathian Lehkha Thu chhiar chhuah chuan a zui thei ang. Lungawina leh a hlâwkna i hmuh chuan, Mosia lehkhabute leh hmân lai chanchin inziahna Estheri lehkhabu thlenga chhiar chu a dawtleha i thiltum a ni thei ang. Chutiang i tih zawh chuan, Bible bu dangte chhiar zawh pawh chu thil thei a ni tih i hre mai ang. Nu pakhat, kum 65 vêl a niha Kristian rawn ni ta chuan, Bible a chhiar ṭan nî leh a chhiar chhuah nî chu a Bible kâwm chhûng lamah a chhinchhiah zêl a. Tûnah chuan vawi nga lai a chhiar chhuak tawh a ni. (Deuteronomy 32:​45-47) Computer emaw, khâwla chhutchhuah emaw chhiar lovin, a Bible ngei kengin a chhiar zâwk a ni.

¹⁵ Bible chhiar chhuak vek tawh chuan an zir lai mêk chu rah ṭha chhuah tûr leh hlâwkna hmu tûrin rahbi dang an rap leh a. Rahbi pakhat chu Bible bu indawta chhiar hmaa zir tûr thu pakhat thlan chhuaha zir hi a ni. “All Scripture Is Inspired of God and Beneficial” leh Insight on the Scriptures-ah chuan Bible-a lehkhabu tinte hmân lai chanchin te, a ziak dân te, leh hlâwkna hmuh theih te chungchânga thu ṭha tak tak a hmuh theih vek a ni.a

16. Bible zirnaah tute nge kan entawn loh vang?

¹⁶ Zirna i neih laiin, Bible lam mi thiamte tih dân hi pumpelh rawh. Anni chuan Bible hi mihringte ziah ang hrimin, a thuziak nasa taka chhui an tum a. Ṭhenkhat phei chuan a chhûnga lehkhabu tinte tân ngaithlatu bîk tûr ruatsak an tum a; tin, a ziaktu mihringte tum leh ngaih dânte chu ngaihruatsak an tum bawk a ni. Chutiang mihring ngaihtuah dân rah chhuah chu Bible lehkhabute hmân lai chanchin ziakna lehkhabu ang lek nihtîrna emaw, sakhuanain a siam chhuah ngaih dân thar târ lanna ang leka thlîrna emaw chu a ni thei a ni. Mi thiam dangte chuan Bible thu leh hla kalhmang chhuina ang maiin a thu mal hman chu an chhui buai a. Pathian thuchah pawimawhna tak tak ai mahin, a thu mal hman lo chhuahna Hebrai leh Grik thu malte awmzia chu an zir nasa zâwk a ni. Chutiang chuan rinna nghet tak leh mi chêttîr thei tak a hrin chhuah i ring em?​—1 Thessalonika 2:13.

17. Engvângin nge Bible chu mi zawng zawng tâna thuchah nei anga kan thlîr ang?

¹⁷ Mi thiamte thutâwp siam chuan belhchian a dâwl em? Bible-a lehkhabu tin hian thu pawimawh pakhat chauh a nei tih emaw, mi tuemaw tân bîk chuahva ziah a ni tih emaw chu a dik em? (1 Korinth 1:​19-21) Thu dik zâwk erawh chu Pathian Thu lehkhabute hian mi zawng zawng, a pui a pang leh eng dinhmun aṭanga lo chhuakte tân pawh chatuan daih hlutna a nei tih chu a ni. Atîrah chuan mi mal tuemaw entîr nân, Timothea emaw, Tita emaw; a nih loh leh pâwlho khat, Galatia mite emaw, Philippi mite emaw hnêna ziak pawh ni mah se, chûng bute chu kan zain kan zir thei a, kan zir bawk tûr a ni. Kan za atân a pawimawh êm êm a, bu tinte chuan thu tam tak a sawi lang a, a ngaithlatu tam takin an hlâwkpui a ni. Ni e, Bible thute chu mi zawng zawng tân a ni a, chu chuan khawvêl puma ṭawng chi hrang hranga lehlin a nih chhan hre thiam tûrin min ṭanpui a ni.​—Rom 15:4.

I Tân leh Mi Dangte Tâna Hlâwkna

18. Pathian Thu i chhiarin, eng nge i ngaihtuah ang?

¹⁸ I zir zêl chuan, Bible hriatthiamna zawn leh a thuziak tinte inzawm dân kimchang hriat tum chu a hlâwk a ni tih i hmu chhuak ang. (Thufingte 2:​3-5; 4:7) Jehova’n a Thu hmanga a thil târ lante hi a thiltum nên a inkawp tlat a. Chuvângin, Bible i chhiar hian, zilhna thute leh i thu chhiarte chu Pathian thiltum nên thlun zawm rawh. Thil thleng te, ngaih dân te, a nih loh leh hrilh lâwkna te chu Jehova thiltum nêna a inzawm dân i ngaihtuah thei ang. Hetiang hian inzâwt teh: ‘Hei hian Jehova chungchâng eng nge min hrilh? Engtin nge Lalram hmanga Pathian thiltum hlen a nih dân nên a inzawm?’ ti tein. Hetiang hian i ngaihtuah thei bawk ang: ‘He thu hi engtin nge ka hman theih? Pathian Lehkha Thu ṭanchhana mi dangte zirtîr leh thurâwn pêk nân ka hmang thei ang em?’ tihte pawhin.​—Josua 1:8.

19. I thil zirte mi dangte hnêna i sawi chhâwn hian tuin nge hlâwkpui? Sawifiah rawh.

¹⁹ Mi dangte ngaihtuahna hian kawng dangah pawh hlâwkna a nei a ni. I Bible chhiar leh zirnaah chuan, thil thar leh hriatthiamna thar te pawh i zir ang. Chûng i thil zirte chu in chhûngkuaa in titinaah leh mi dangte nêna in titinaah telh tum ang che. Chutianga a hun tak leh a âwm tâwka i tih ṭhin chuan, chutiang sawikhâwmna chu a hlâwk ngei ngei ang. I thil zir thar emaw, thil tuiawm tak i chhar chhuah emaw chu tih tak zet leh phûr taka i sawi chhâwnna chuan mi dangte rilru a khawih lehzual ngei ang. Chu mai bâkah, nangmah ngeiin a hlâwkna i têl dâwn a ni. Eng kawngin maw? Miin a thil zir tharte chu a hriat chian lai takin a hmang emaw, mi dangte hnêna hrilh chhâwng anga a sawi nawn emaw hian a chhinchhiah rei thei zâwk tih mi thiamte chuan an hmu chhuak a ni.b

20. Engvângin nge Bible chhiar nawn fo chu a hlâwk?

²⁰ Bible i chhiar apiang hian thil thar engemaw tak zawng i zir ngei ngei ang. A hmaa i rilru khawih vak lote pawhin i rilru an khawih hle ang. Tûnah chuan awmze thar an nei mai ang. Chu chuan Bible chu mihringte thu leh hla ziah mai ni lovin, i zir reng a, i hlâwkpui zêl tûr, i tâna lehkhabu ṭha, ro tling a ni tih a târ lang tûr a ni. Lal Davida angte meuh pawhin “a dam chhûng zawng a chhiar ṭhîn tûr a ni,” tih hre reng ang che.

21. Pathian Thu i zirna i tihpun aṭangin eng hlâwkna nge i beisei theih?

²¹ Bible ngun taka zir nâna hun insiamte chuan hlâwkna nasa tak an têl a ni. Thlarau lam thil hlu leh hriatthiamna an dawn phah a ni. Pathian nêna an inlaichînna chu a inhnaih sawtin, a chak sâwt ṭhîn. Chu bâkah, an chhûngkaw tân te, Kristian kohhrana unaute tân te, leh Jehova chibai bûktu la rawn ni tûrte tân te pawh an hlu êm êm a ni.​—Rom 10:​9-13; 1 Timothea 4:16. (w02 6/15)

[Footnote-te]

I Hre Chhuak Thei Em?

• Israel lalte chu eng ti tûra phût nge an nih?

• Isua leh a tirhkohte khân Bible zir chungchângah eng entawn tûr nge an siam?

• I mi mal zirna hun tihpun nân eng siamremna nge i siam theih?

• Eng rilru put hmang neiin nge Pathian Thu i zir ang?

[Phêk 23-naa bâwm]

“Kan Kut Ngeiah”

“Bible hrilhfiahna . . . kan duh chuan, Internet aia ṭha engmah a awm lo va. Mahse, Bible chhiar te, zir te, ngaihtuah te, chhût te, kan duh chuan kan kut ngeiah kan keng tûr a ni; chu chu kan rilru leh thinlunga a luh theihna kawng awmchhun a nih avângin.”​—Gertrude Himmelfarb, distinguished professor emeritus, City University, New York.