Dân Rangkachak—Zirtîrna Lâr Tak Chu

“Thil engkim miin in chunga an tiha in duh tûr ang apiang chu, mi chungah pawh ti ve rawh u.”​—Matthaia 7:12.

HE THU hi kum sânghnih vêl kaltaa Isua Krista’n Tlâng Chunga Thusawi hmingthang tak a neih laia a sawi a ni. Chu hun aṭanga kum zabi tam tak chhûng chu he thusawi tluang tak hian sawi leh ziak a hlawh hle a. Entîr nân, “Pathian Lehkha Thu awmze dik tak a ni,” “Kristianin a ṭhenawm chunga a tih tûrte kaihtâwi a ni,” tih leh “nungchang thu bul nghahchhan ber,” tihte hi fak leh chawimawi dân ṭhenkhat a ni. Hriat a hlawh êm avângin Dân Rangkachak tia koh a ni fo.

Amaherawhchu, Dân Rangkachak ngaih dân chu Kristiana inchhâlte chauh pawm a ni hauh lo. Juda sakhuana te, Buddhist sakhuana te, leh Grik mifing te pawhin, he nungchang tehkhâwng hi chi hrang hrangin an hrilhfiah a ni. Hriat lâr tak, a bîk taka Khawchhak Lam mite hriat lâr tak chu, Confucius thu hi a ni a, ani chu Khawchhak Lam mite chuan zirtîrtu leh mi fing ropui bera an ngaih a ni. Confucius Lehkhabu Pali zînga a Pathumna, The Analects-ah chuan chu ngaih dân chu vawithum lai a lang a ni. Zirlaite zawhna a chhânnaah Confucius chuan: “I chunga miin ti se i duh loh tûr chu an chungah pawh ti suh,” tiin ṭum hnih a sawi a. Ṭum khat chu, a zirlai Zigong-a’n “Ka chunga miin ti se ka duh loh tûr chu mi chungah pawh ka ti duh lo,” tia a uan ṭumin, a zirtîrtu chuan, “Ni e, mahse i la ti thei rih lo a nih hi,” tiin chhânna ngaihtuah titam thei tak a pe a ni.

Hêng thute han chhiar hian, Confucius thusawite chu a hnua Isua thusawi kalhzâwng chiah a ni tih a hmuh theih a ni. A danglamna langsâr tak chu, Isua sawi Dân Rangkachak chuan mi dangte chunga thil ṭha tih a phût hi a ni. Mite chu Isua thusawi ṭha tak mila nungin, mi dangte ngaihsakin, mi dang ṭanpui tûra hma lain, leh chu dân chu nî tin an nunpui chuan, chu chuan tûn lai khawvêl hi hmun ṭha zâwka a siam i ring em? Rinhlelh rual a ni lo.

He dân hi a ṭha zâwng emaw, a ṭha lo zâwng emaw, a engemaw zâwng zawnga sawi pawh ni se, a pawimawh ber chu hei hi a ni; hmun leh hun chi hrang hranga mite leh dinhmun chi hrang hrang aṭanga piang chhuak mite chuan Dân Rangkachak chu an ring a ni tih hi. Hei hian Tlâng Chunga Isua Thusawi chu hmun tina mite leh eng hun pawha mite nghawngtu, zirtîrna lâr tak a ni tih a târ lang.

‘Zahawm tak, thleibîknei lo, leh dik taka cheibâwl nih ka duh em? Hnam inhuatna te, dân bawhchhiatna te, leh indona te awm lohna khawvêla nun chu ka duh em? Mi dangte ṭhatna tûr leh an ngaih dân ngaihtuah ṭheuhtute awmna chhûngkuaa awm ka duh em?’ tih han inzâwt teh. Chutiang chu tuin nge duh lo tehrêng ang? Mahse, dik tak chuan, chutiang dinhmun nei thei an awm mang meuh lo a ni. Mi tam tak chuan chutiang chu beisei pawh an beisei ngam lo.

Dân Rangkachak Tihhmingliau A Ni

Mihring chanchin tluanchhuakah chuan, mihring nihphung kalh dân bawhchhiatna tam tak a thleng a. Chûng zîngah chuan Africa aṭanga sal hralh chhuahna te, Nazi thihna camp te, naupang chhawr luihna te, leh hmun tam taka nunrâwng taka hnam intihmangna te a tel a ni. Hêng thil râpthlâk takte hi chu ziak sên rual a ni lo.

Tûn laia kan khawvêl changkâng tak hi mahni hmasialnain a khat tlat a. An remchânna emaw, an dikna neih emaw a derthâwn chuan mi dangte ngaihsak an awm mang lo. (2 Timothea 3:​1-5) Engvângin nge mi tam takte hi mi huamhauh, mi nunrâwng, khawngaihna nei lo, leh mahni hmasial tak an lo nih tâk? Dân Rangkachak chu hriat lâr tak a ni chung pawha hmantlâk loh leh nungchang hlui anga ngaia hnâwl vâng a ni lâwm ni? Lungchhiatthlâk takin, Pathian ringa inchhâl mi tam tak zîngah pawh chutiang ngaih dân chu a awm a ni. Thil nihphung han chhût chuan, mite chuan mahni hma an la sial deuh deuh dâwn a ni.

Chuvângin, zawhna pawimawh tak ngaihtuah tûr awm ta chu: Dân Rangkachak zawmnaah hian eng dang nge tel? Tuemaw talin chu dân chu a la zâwm em? Mihring zawng zawng chu Dân Rangkachak mila an nun hun a awm thei ang em? tihte hi a ni. Hêng zawhnate chhânna dik tak hmu tûrin thuziak dawt leh chu chhiar ang che. (w01 12/01)

[Phêk 3-naa milem]

Confucius leh mi dangte chuan Dân Rangkachak chu a chi dangin an zirtîr