Enoka Pathian Ngaihsak Lohna Khawvêlah Pathian Nên An Lêng Dûn

DIABOLA chuan mi zawng zawng chu Pathian lak ata la pêng theiah a inchhâl tlat a; a châng chuan a hlawhtling deuhthaw niin a lang hial ṭhîn. Abela a thih aṭanga kum zabi panga chhûng deuhthaw chu Jehova chhiahhlawh rinawm tumah hriat a ni lo. Chutih ahnêkin, sualna leh nungchang sual tak chu a lâr hle zâwk a ni.

Chutianga thlarau lama tlâk chhiat hun chhûngin Enoka chu a lo lang a. Bible ni chhût dân chuan B.E.C. 3404-ah a piang a ni. A hun laia mite ang ni lovin, Enoka chu Pathian pawm tlâk mi a ni. Tirhkoh Paula chuan ani chu Kristiante entawn tlâk, Jehova chhiahhlawhte zîngah a telh a ni. A nih leh Enoka chu tunge ni? Eng harsatnate nge a lo tawn? Chûng harsatnate chu engtin nge a hneh? A rinawmna hian kan tân ṭangkaina eng nge a neih?

Enoka awm hma kum zabi pali dâwn laia awm Enosa hun lai chuan mite chuan “LALPA hming chu an lo lam ṭan” a. (Genesis 4:​26) Mahse, mihringte chanchin inṭan aṭang rêngin, Pathian hming chu hman a ni tawh si a. Chuvângin, Enosa hun laia an lo lam ṭan chu rinna leh biakna thinghlima Jehova hming lamna a ni lo tih a lang a ni. Hebrai mi thiam ṭhenkhat chuan Genesis 4:26 thu hi “tibawrhbâng ṭan” emaw, “tihbawrbânna a inṭan,” emaw tih tûr a ni an ti. Chûng mite chuan Jehova hming chu anmahniah an inbêl emaw, Pathian an biakna hmanruaa an hman mi dangah emaw an bêl a ni thei ang. A nih loh vêk leh, an milem siamte chu Jehova hming an puttîr a ni ang.

“Enoka Chu Pathian Nên An Lêng Dûn”

Enoka chu Pathian ngaihsak lohnain hual vêl mah se, Jehova, “Pathian dik nên an lêng dûn ṭhîn” a. A thlahtute​—Setha te, Enosa te, Kenana te, Mahalalela te, leh Jareda te​—chu Pathian nên an lên dun thu sawi a ni lo. Anmahni laka nun dân danglam tak, Enoka ang êm chuan an nung ve lo a ni mai thei.​—Genesis 5:​3-27.

Jehova nêna lêng dun tih thu chuan Pathian nêna inhriatna leh inhnaihna chu Enoka chuan Pathian duhzâwng nêna inmila a nun avâng chauhvin a nei thei tih a kâwk a ni. Jehova chuan Enoka inpêkna chu a pawm a. Grik Septuagint chuan “Enoka chuan [Pathian] a tilâwm” a ti a, tirhkoh Paula pawhin chutiang deuh bawkin a sawi a ni.​—Genesis 5:​22; Hebrai 11:5.

Enoka’n Jehova nêna inlaichînna ṭha a neih chhan bul ber chu a rinna hi a ni. Pathianin “hmeichhia” hmanga ‘thlah’ lo awm tûr thu a tiamah chuan a rinna a lantîr a ni. Enoka chu Adama nên a inhmêlhriat chuan, Pathianin Eden huana nupa hmasa ber a dâwr dân ṭhenkhat chu a hriat phah ngei ang. Pathian hriatna a neihte chuan Enoka chu “tih tak zeta amah zawngtu” a nihtîr a ni.​—Genesis 3:15; Hebrai 11:​6, 13, NW.)

Enoka tân leh kan tân pawh, Jehova nêna inlaichînna ṭha neih nân chuan Pathian hriatna satliah mai a tâwk lo. Tuemaw nêna kan inṭhian ṭhat viau chuan, kan ngaihtuahna leh chêtzia te chu a ngaih dân hian a thunun a ni lâwm ni? Chu inṭhianna tichhe thei ṭawngkam leh chêtzia te chu kan pumpelh hrâm hrâm ṭhîn a. Kan dinhmun thlâkthleng kan rilrûk pawhin, chu chuan kan inlaichînna a nghawng dân tûr kan ngaihtuah ṭhîn a ni lâwm ni?

Chutiang bawk chuan, Pathian nêna kan inlaichînna vawn reng kan duhna chuan kan thiltih a thunun a ni. Chutiang ni tûr chuan a duhzâwng leh duh lohzâwng hriatna dik neih a ngai a. Tin, chu hriatna chu kan inkaihhruaitîr a, kan ngaihtuahna leh thiltihin amah tihlâwm kan tum tlat a ngai a ni.

Ni e, Pathian nêna lêng dûn tûr chuan amah kan tilâwm tûr a ni. Kum za tam tak chhûng chu Enoka chuan chutiang chuan a ti a. Enoka chu Pathian nên an “lêng dûn” tihna Hebrai thu mal hian thiltih tihnawn ṭhin leh tihchhunzawm reng a kâwk a ni. Mi rinawm dang, ‘Pathian nêna lêng dûn’ chu Nova a ni.​—Genesis 6:9.

Enoka chu chhûngkaw pa a ni a, nupui leh “fanu leh fapate” a nei a ni. A fapate zînga pakhat chu Methusela a ni. (Genesis 5:​21, 22) Enoka chuan a theih tâwpa ṭhain a chhûngkua a enkawl ang tih chu rinhlelh rual a ni lo. Nimahsela, Pathian ngaihsak lohnain a hual vêl avângin Pathian rawng bâwl chu a tân thil awlsam a ni lo. Nova pa Lameka chu a hun laia Jehova chunga rinna lantîrtu awm chhun a nih hmêl hle. (Genesis 5:​28, 29) Chuti chung chuan, Enoka chuan huaisen takin biakna dik chu a vuan tlat a ni.

Engin nge Enoka chu Pathian laka rinawm tûra ṭanpui? Jehova hming tibawrhbângtute emaw, Pathian chibai bûktute tâna ṭhian ṭha lote a kâwm ngai lo tih rinhlelhna tûr a awm lo. Ṭawngṭaia Jehova ṭanpuina a zawn ṭhinna chuan amah Siamtu tilâwm lo thei engpawh pumpelh a tumna chu a tiruh sauh bawk ngei ang.

Pathian Ngaihsak Lote Chungchâng Hrilh Lâwkna

Pathian ngaihsak lo mite hual vêla kan awm chuan nungchang tehna sângte vawn chu thil har tak a ni a. Mahse, Enoka chuan mi suaksualte chunga rorêlna lo thleng tûr chungchâng pawh huaisen takin a puang chhuak pah bawk a ni. Pathian thlarau kaihhruainain, Enoka chuan heti hian a hrilh lâwk a: “Ngai teh u, mi zawng zawng chunga rorêl tûr leh Pathian ngaihsak lote zawng zawng Pathian ngaihsak lohna hna Pathian ngaihsak lo chunga an thawh zawng zawng kawngah leh Pathian ngaihsak lo mi sualten a chungah thu khauh tak an sawi zawng zawng kawnga thiam loh chantîr tûrin Lalpa chu a mi thianghlim sîngkhatte nên a lo kal a ni,” tiin.​—Juda 14, 15.

Chu thuchah chuan ring lotu mi sual takte chungah eng nghawng nge a neih? Chutiang thu lungngaih thlâk takte chuan Enoka chu mi huat a hlawhtîr ang a, an nuihsawhin, an sawichhia ang a, an vau hial duh ang tih rin chu thil âwm tak a ni. Ṭhenkhat phei chuan tihhlum hial pawh an duh ngei ang. Amaherawhchu, Enoka chu a zâm chuang lo. Mi fel, Abela chunga thil thleng chu a hria a, eng thil pawh lo thleng se, Enoka chuan Abela anga rinawm taka Pathian rawng bâwl chu a tum tlat a ni.

“Pathianin A La Bo”

‘Pathianin Enoka a lâk bo’ lai chuan ani chu dinhmun hlauhawm takah a ding a ni ngei ang. (Genesis 5:24) Jehova chuan a zâwlnei rinawm tak chu a hmêlmate kut tawrhtîr a phal lo va. Tirhkoh Paula sawi dânin, Enoka chu “thihna hre lo tûra lâk bovin a awm,” a ni. (Hebrai 11:5) Mi tam tak chuan Enoka chu a thi lo va​—Pathianin vânah a hruai a, chutah chuan a nung reng an ti a. Nimahsela, Isua chuan chiang takin: “Vânah tumah an lâwn ngai lo, vân aṭanga lo chhuka chauh lo hi chu, Mihring Fapa vâna awm hi,” tiin a sawi. Isua chu vâna lâwnte ‘hmahruaitu’ a ni.​—Johana 3:13; Hebrai 6:​19, 20.

Chuti a nih chuan Enoka chungah eng nge thleng? “Thihna hre lo tûra lâk bovin a awm” tih thu chuan Pathianin Enoka chu inlârnaa a rilru zawng zawng a pêktîr laiin, a nunna a tihtâwpsak tihna a ni thei ang. Chutiang a nih chuan, Enoka chu nâ engmah tuar lovin a thi tihna a ni. Tichuan, “hmuh theih a ni ta lo va,” Jehova’n Mosia ruang a phum ang bawkin, a ruang chu a phûm ve a ni ngei ang.​—Deuteronomy 34:​5, 6.

Enoka chu kum 365 a dam a​—a hun laia mi tam zâwkte dam chen pawh a dam lo a ni. Mahse, Jehova hmangaihtute tâna thil pawimawh êm êm chu, an thih nî thlenga rinawm taka a rawng bâwl chu a ni. Enoka chuan chutiangin a ti tih kan hria; “lâk bova a awm hmain Pathian lâwm zâwng mi a ni tih a hriattîr tawh rêng” avângin. Jehova’n Enoka hnêna a hriattîr dân chiah chu Bible-in a sawi lo. Amaherawhchu, a thih hmain Pathian pawm mi a nihzia hriattîr a ni a, chuvângin, thawhlehnaah chuan Jehova’n a hre reng dâwn tih kan chiang thei a ni.

Enoka Rinna Entawn Rawh

Pathian ngaihsak mite rinna hi kan entawn thei a ni. (Hebrai 13:7) Rinnain Enoka chu Pathian zâwlnei rinawm hmasa ber a lo ni a. Enoka hun lai khawvêl chu kan hun lai ang bawkin​—tharum thawhna te, bawlhhlawhna te, leh Pathian ngaihsak lohna tea khat tlat a ni. Mahse, Enoka chu a danglam bîk a. Rinna dik tak a nei a, Pathian ngaihsakna kawngah mi entawn tlâk a ni. Ni e, Jehova chuan rorêlna thuchah pawimawh tak puanchhuah tûr a pêk bâkah, puang chhuak thei tûrin a tichak a ni. Enoka chuan huaisen takin a hna chu a hlen chhuak a; tin, Pathianin hmêlmate dodâlna kârah ani chu a humhim a ni.

Enoka anga rinna kan lantîr chuan, Jehova chuan he ni hnuhnûnga a thuchah puang tûrin min tichak ang. Ani chuan dodâlna huaisen taka hmachhawn tûrin min ṭanpui ang a; tin, kan Pathian ngaihsakna chuan Pathian ngaihsak lote lakah chuan nasa takin min tidanglam dâwn a ni. Rinna chuan Pathian nên min lên duntîr thei ang a, a thinlung tilâwm tûrin min nuntîr thei ang. (Thufingte 27:11) Rinnain mi fel Enoka chu Pathian ngaihsak lohna khawvêlah chuan Jehova nên an lêng dûn thei a, chuvângin keini pawh kan lêng dûn thei a ni. (w01 9/15)

[Phêk 30-naa bâwm]

Bible Hian Enoka Lehkhabu Aṭangin A La Chhâwng Em Ni?

Enoka lehkhabu hi Bible-a chhiar tel, ziaktu hriat loh leh rinhlelh kai, leh hming lema ziak lehkhabu a ni a. Dik lo takin Enoka ziak anga sawi a ni. B.C.E. kum zabi pakhatna leh pahnihna vêl chhûnga siam chhuah a nih hmêl hle; thilthleng dik tak ni lo, Judate thawnthu âwm ang lo tak tak lâkkhâwm a ni a, Genesis-a Enoka chanchin tâwi tê kan hmuh chu chipchiar taka hrilhfiah tumna mai a ni. He mi mai pawh hi, Pathian thâwk khum Thu hmangaihtute tân chuan hnâwlna khawp a tling a ni.

Bible-ah hian Juda lehkha thawn chuan Enoka hrilh lâwk thu: “Ngai teh u, mi zawng zawng chunga rorêl tûr leh Pathian ngaihsak lote zawng zawng Pathian ngaihsak lohna hna Pathian ngaihsak lo chunga an thawh zawng zawng kawngah leh Pathian ngaihsak lo mi sualte’n a chungah thu khauh tak an sawi zawng zawng kawnga thiam loh chantîr tûrin Lalpa chu a mi thianghlim sîngkhatte nên a lo kal a ni,” tih hi a sawi a ni. (Juda 14, 15) Mi thiam tam takte chuan Enoka hun laia Pathian ngaihsak lo mite chunga thil lo thleng tûr a hrilh lâwk chu, Enoka Lehkhabu aṭanga lâk chhuah a ni an ti tlat a ni. A nih leh Juda hian ziaktu hriat loh leh rinhlelh kai lehkhabu chu ṭanchhanah a hmang a ni thei ang em?

Juda hian Enoka hrilh lâwk thu a hriat dân hi Bible-ah târ lan a ni lo. Hmân lai mi tam zâwkte hriat dân rin tlâk tak inhlân chhâwn zêlte ṭanchhanin a ziak a ni thei ang. Paula pawhin chutiang bawk chuan a ti a ni: Mosia dodâltu Pharaoa dâwi thiam hmun danga an hming târ lan loh, Jannia leh Jambria te hming a târ lan khân. Enoka Lehkhabu ziaktu pawhin hmân lai thu ṭanchhan tûr a hmuh theih chuan, engah nge Juda pawhin chutiang a hmu thei tih kan pawm loh bîk ang?a​—Exodus 7:​11, 22; 2 Timothea 3:8.

Juda’n Pathian ngaihsak lo mite hnêna Enoka thuchah ken a hriat dân chu buaina tham a ni lo. Juda chuan Pathian thlarau thâwk khumin a ziak a, chu chu a rin tlâkzia tifiahtu a ni. (2 Timothea 3:16) Pathian thlarau thianghlim chuan thil dik lo ziak lo tûrin a vêng tlat a ni.

[Footnote]

[Phêk 31-naa milem]

Enoka chuan Jehova thuchah huaisen takin a puang chhuak