Lâwmna Lantîrin Hlim Rawh

“LAWM nachâng hriatna hi mihringte thinlungah a awm,” tiin Canada ram chanchinbu, Calgary Herald chuan a sawi a. Herald chanchinbu chuan, an zirtîrtute’n lâwmthu sawina tûr chhan an neih zawng zawngte ziak tûra an tirh primary school naupang kum kaw mite chanchin a sawi chhâwng a ni. Naupang pakhat chuan ‘amah an enkawl avângin’ a chhûngte chunga a lâwmzia a ziak a. Hmeichhe naupang pakhat pawhin a chhûngte chunga a lâwmzia hetiang hian a ziak a ni: “Ka chhûngte chuan min vênghim a, min enkawl a, min ngaihtuah a, min hmangaih a, min châwm a; ka nu leh pate chu awm lo se, he khawvêlah hian nungdamin ka awm tawh lo vang,” tiin.

Lâwm nachâng hriat lohna chuan kum khaw lungawi lohna a thlen ṭhîn. Philosopher-theologian J. I. Packer-a chuan: “Pathiana innghat tûr leh, inrinchhan tawn tûra duan kan ni,” tiin a sawi. Hei hian kum zabi engemaw zât kaltaa Bible fuihna thufing: “Lâwm nachâng hre . . . rawh u,” tih min hriatchhuahtîr a ni. (Kolossa 3:15) Mi dangte hnêna lâwmthu kan sawi a, kan lâwm tak zetzia lantîrna chuan, inngaihtuah tawnna nei inlaichînna ṭha tak siam tûrin min ṭanpui a ni.

Chu bâkah, lâwmna inlantîr tawnna leh inngaihhlut tawnna hmangin, Jehova hnênah lâwmna châng kan hriatzia kan lantîr a, ani chuan chu chu a lo hria a ni. Bible chuan: “[Jehova] lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn a ni,” a ti. (2 Chronicles 16:9) Mihringte’n a hming an hmangaihzia an lantîrte chu a hre rêng a, a hlut êm êm a ni tih Pathian chuan min tiam a ni. (Hebrai 6:10) Ni e, lâwmna lantîrna tûr chhan ṭha tak kan nei a ni; he Pathian ngaihsakna mizia nî tina lantîrna chuan Jehova a tilâwm a; kan hlimna pawh a tihzual avângin. Chu chu Thufingte 15:13 hian: “Thinlung hlimin hmêl hlim a siam,” a tih ang hi a ni. (w01 9/1)