Thlarau Lam Thil Duh La, Nung Rawh!
“Thlarau lam thil duh erawh chu nunna . . . a ni.”—ROM 8:6.
1, 2. Engtin nge Bible-in “tisa” leh “thlarau” chungchâng a khaikhin?
HE tisa lam nawmchen fakmawina khawvêlah hian Pathian hmaa nungchang thianghlim vawn chu thil awlsam a ni hauh lo. Mahse, Pathian Lehkha Thu chuan “tisa” leh “thlarau” lam thil chu khaikhinin, tisa sual inthununtîrna rah chhuah râpthlâk tak leh Pathian thlarau thianghlim thununa hnuaia intukluhna rahchhuah malsâwmnate inkâr hlatzia chu chiang takin a târ lang a ni.
2 Entîr nân, Isua chuan: “Tinungtu chu thlarau a ni, tisa chu engahmah a tlâktlai lo; in hnêna thu ka sawite hi thlarau a ni, nunna pawh a ni,” tiin a sawi a. (Johana 6:63) Galatia khuaa Kristiante hnênah pawh tirhkoh Paula’n: “Tisa hian Thlarau dona lam a châk ṭhîn, Thlarau pawhin tisa dona lam a châk bawk si ṭhîn,” tiin a sawi a ni. (Galatia 5:17) Tin, “mahni tisa lama thehtu chuan tisaa mi chhiatna a seng ang a; Thlarau lama thehtu erawh chuan Thlarauva mi chatuana nunna a seng dâwn a ni,” tiin a sawi bawk.—Galatia 6:8.
3. Châkna ṭha lote leh thil ṭha lo lama rilru âwnnate lak ata zalên tûrin eng nge ṭûl?
3 Jehova thlarau thianghlim—a thiltihtheihna thahrui—chuan ‘tisa châkna’ bawlhhlawhte leh kan tisa sual mi tichhe thei thununna awmte chu a nuaibo vek thei a. (1 Petera 2:11) Thil ṭha lo lama rilru âwnna lak ata zalên tûr chuan Pathian thlarau ṭanpuina neih a pawimawh hle a, Paula pawhin: “Tisa lam thilte duh chu thihna a ni si a, Thlarau lam thil duh erawh chu nunna leh thlamuanna a ni,” tiin a ziak a ni. (Rom 8:6) A nih leh, thlarau lam thilte duh chu eng tihna nge ni?
‘Thlarau Lam Thilte Duhna’
4. “Thlarau lam thilte duh” tih hi engtihna nge?
4 Tirhkoh Paula’n “thlarau lam thilte duh” tih chungchâng a ziah hian, “ngaihtuah dân, rilru nghah dân, . . . thil tum, duhna thûk tak, leh tihtak zeta beihna” tih awmze nei, Greek thumal a hmang a ni. A awmze dangah chuan “engemaw kawng taka ngaihtuah leh duh” tihna a kâwk bawk a ni. Chuvângin, thlarau lam thilte duh tih chu Jehova thiltihtheihna thahrui hmanga thunun, awpbeh leh tura awm tihna a ni a. Chu chuan kan ngaihtuahna te, ngaihdân te, leh duhna thûk takte chu lâwm takin Pathian thlarau thianghlim thununna hnuaiah kan kaihhruaitîr tih a târ lang a ni.
5. Eng anga nasain nge thlarau thianghlim thununnna hnuaiah kan intukluh ang?
5 Thlarau thianghlim thununna hnuaia kan intukluh nasat dân tûr chu Paula’n, ‘thlarau bawihte’ nihna chungchâng a sawi hian a uar hle a ni. (Rom 7:6, NW.) Kristiante chu Isua tlanna inthawina an rinna zârah sual lak ata chhuahin an awm a; tin, tûn hmaa sual bâwihte an nihna ata chu an “thi” ta bawk a ni. (Rom 6:2, 11) Chûng mitthi anga tehkhin, tisa lama nung reng thote chu “felna bâwite” ni a Krista zui tûrin an zalên ta a ni.—Rom 6:18-20.
Inthlâkdanglamna Chhinchhiah Tlâk Tak
6. “Felna bâwite” lo ni tate’n eng inthlâkdanglamna nge an tawn?
6 “Sual bâwihte” nihna aṭanga Pathian rawng bâwl tûra “felna bâwihte” han nih chu a chhinchhiah tlâk takzet mai. Chutianga thlâkthlenga awm ṭhenkhatte chungchâng chu heti hian Paula’n a ziak a: “Lalpa Isua Krista hmingah leh kan Pathian Thlarauvah tlenfai in ni tawh a, tihthianghlim in ni tawh a, thiam chang in ni tawh,” tiin.—Rom 6:17, 18; 1 Korinth 6:11.
7. Engvângin nge Jehova thil thlîr dânte neih chu a pawimawh?
7 Chutiang inthlâk danglamna chhinchhiah tlâk chu tawng tûr chuan Jehova thil thlîr dânte kan zir hmasak a ngai a ni. Kum zabi engemaw zât kal ta khân fakna hla phuahtu Davida chuan: “Aw LALPA, i kawngte chu min hriattîr la; . . . I thutakah chuan min hruai la, mi zirtîr ang che,” tiin Pathian chu tih takzetin a lo ngên a ni. (Sâm 25: 4, 5) Jehova’n Davida ngênna chu a ngaihthlâksak a; chutiang bawkin tûn laia a chhiahhlawhte ṭawngṭaina pawh A chhâng thei a ni. Pathian kawngte leh a thutakte chu a faia, a thianghlim avângin, tisa châkna bawlhhlawhte ûm tûra thlêm kan nih chuan chûng thilte chhût tel chu a ṭangkai hle ang.
Pathian Thu Thianghlim
Chanvo Pawimawh Tak
8. Engvângin nge Bible kan zir a pawimawh êm êm?
8 Pathian Thu Thianghlim, Bible hi a thlarau kut chhuak a ni a. Chuvângin, chu thlarau kan inthununtîr theihna kawng pawimawh tak pakhat chu nî tina Bible chhiar leh zir a ni. (1 Korinth 2:10, 11; Ephesi 5:18) Bible thutak leh dân bultea kan rilru leh thinlung kan tihkhah chuan kan thlarau lam beihna laka ding nghet tûrin min ṭanpui ang. Ni e, nungchang bawlhhlawhna lama thlêmna kan tawn hunin, Pathian thlarau chuan a duhzâwng nên inmila nun kan tumna tichak thei, Pathian Lehkha Thu hriatnawntîrna leh kaihhruaina dân bulte chu min hriatchhuahtîr leh thei a ni. (Sâm 119:1, 2, 99; Johana 14:26) Chuti chuan, nun kawng dik lo lama bumin kan awm lo vang.—2 Korinth 11:3.
9. Engtin nge Bible zirna chuan Jehova nêna inlaichînna vawn ngheh tlat kan tumna a tihngheh?
9 Bible ṭanchhan thu leh hla chhuahte ṭanpuinaa Pathian Lehkha Thu taima tak leh tihtak zeta kan zir zêl avângin, Pathian thlarau chuan kan rilru leh thinlung a thunun ṭhîn a; chu chuan Jehova tehnate kan zahna a tithûk deuh deuh ṭhîn a ni. Pathian nêna kan inlaichînna chu kan nuna thil pawimawh ber a lo ni a. Thlêmna kan tawh hunah, thil sual tihnaa tel a nawm dân tûrzia ngaihtuahnate chu neih tûr a ni lo va, Jehova laka kan rinawm nghehna vawn reng chu kan tum tlat zâwk tûr a ni. Amah nêna kan inlaichînna ngaihhlutna nasa tak mai chuan chu mi tichhe thei emaw, tikhaw lo thei emaw ngaihtuahna eng pawh, do tûrin min chêttîr ṭhîn a ni.
“I Dân Hi Ka Va Ngaina Êm?”
10. Engvângin nge thlarau lam thilte duh theih nân Jehova dân zawm a ṭûl?
10 Thlarau lam thil duh tûr chuan, Pathian Thu hriatna mai a tâwk lo. Lal Solomona chuan Jehova tehnate chu hre chiang hle mah se, a hun tâwp lamah chuan chûng Pathian tehnate mil chuan a nung zui lo a ni. (1 Lalte 4:29, 30; 11:1-6) Thlarau lam thil ngaihven mi kan nih chuan, Bible thu sawite hriat mai bâkah tihtak zeta Pathian dânte zawm a ṭûlzia kan hre dâwn a ni. Chu mi awmzia chu urhsûn taka Jehova tehnate enfiah leh chûngte nên inmila taima taka nun tum hrâm hrâm tihna a ni. Fakna hla phuahtu chuan chutiang rilru puthmang chu a neih avângin, heti hian a zai a ni: “Aw, i dân hi ka va ngaina êm! Nilênga ka ngaihtuah ṭhîn a ni,” tiin. (Sâm 119:97) Pathian dânte zawm kan tum tak tak chuan, Pathian miziate lan chhuahtir tûra chêttîr kan ni ang. (Ephesi 5:1, 2) Sual hîp hneha awm ai chuan, thlarau rah kan lantîr zâwk a; tin, Jehova tihlâwm kan duhna chuan “tisa thiltihte” min hawisantîr a ni.—Galatia 5:16, 19-23; Sâm 15:1, 2.
11. Inngaih khap tlatna chungchânga Jehova dân chu kan tân invênhimna a nihzia engtin nge i hrilhfiah ang?
11 Engtin nge Jehova dân hmangaihna leh zahna thûk tak kan neih theih? Kan neih theihna kawng khat chu a hlutna ngun taka zir a ni. Nupate tâna mipat hmeichhiatna chintâwk neih tûr dânte leh inngaih leh uire khapna Pathian dânte hi ngaihtuah teh. (Hebrai 13:4) He dân zawmna hian thil ṭha min thlen em? Hmangaihnaa khat kan vân lam Pa chuan kan chunga thil ṭha thlen lohna tûr dân a siam dâwn em ni? Teuh lo mai! Jehova nungchang tehnate mila nung lo mi tam takte nuna thil thleng mêk hi han ngaihtuah teh. Duh lo chunga sâwn painate chuan nau tihtlâk te, puitlin hmaa inneih te leh inneihna hlimawm lo tak te a thlen fo ṭhîn. Mi tam tak chuan nupui emaw, pasal emaw kawppuite tel lo va fa enkawl tûr an neih phah a. Chu bâkah, chutianga inngaih chîngte chuan mipat hmeichhiat hmanna aṭanga kai chhawn theih natnate an kai phah bawk a ni. (1 Korinth 6:18) Jehova chhiahhlawh inngaihnaa a tlûk chuan, a rilru lam a nghawng dân chu râpthlâk tak a ni ṭhîn. Mahni inthiam lohna bengdaih an tumna chuan zân muttheih lohna leh rilru natna a thlen thei a ni. (Sâm 32:3, 4; 51:3) Chuvângin, inngaih khap tlatna chungchânga Jehova dân chu kan himna tûra ruahman a ni tih a chiang viau lâwm ni? Ni e, nungchang thianghlim vawnnaah chuan hlâwkna ropui tak a awm teh meuh asin!
Jehova Ṭanpuina Dîl Rawh
12, 13. Châkna sualte’n min tuam laia ṭawngṭai chu engvângin nge a inâwm?
12 Thlarau lam thil duhna chuan tih takzeta ṭawngṭai a mamawh ngei mai. Pathian thlarau ṭanpuina dîl chu a inâwm hle, Isua pawhin: “Nangni . . . mahin in fate thil ṭha pêk nachâng in hriat chuan, in Pa vâna mi chuan a dîltute chu Thlarau Thianghlim a va pe dâwn êm!” tiin, a sawi si a. (Luka 11:13) Ṭawngṭainaah chuan, kan chak lohnate chungah thlarau ṭanpuinaa kan innghahzia kan sawi chhuak thei a ni. (Rom 8:26, 27) Châkna sual emaw, rilru puthmang sual emawin min nghawng tih kan hriat chuan, a nih loh leh kan rinpuiin hmangaihna nei takin min hrilhhria a nih chuan, kan harsatna chu kan ṭawngṭainaah telhin, chûng rilru puthmangte hneh thei tûra Pathian ṭanpuina dîl chu a finthlâk hle ang.
13 Jehova chuan thil fel te, thil thianghlim te, thil ṭha te, leh fak tlâk thil te ngaihtuah tûrin min ṭanpui thei a. Chuvângin, “Pathian thlamuanna” chuan kan rilru leh thinlung a vên theih nâna a hnêna dîl chu a va inhmeh tehrêng êm! (Philippi 4:6-8) Chuvângin, “felna te, Pathian ngaihsakna te, rinna te, hmangaihna te, dawhtheihna te, thuhnuairawlhna te ûm zêl” tûrin Jehova ṭanpuina i dîl ṭheuh ang u. (1 Timothea 6:11-14) Kan Pa vâna mi ṭanpuinain, lungkhamna leh thlêmnate chu tawrh phâk bâk chuan a lo thleng dâwn lo va, chu ai chuan kan nun chu Pathian pêk remna-in a khat zâwk ang.
Thlarau Chu Tilungngai Suh
14. Engvângin nge Pathian thlarau chu faina atâna thawk a nih?
14 Jehova chhiahhlawh puitlingte chuan Puala fuihna thu: “Thlarau chu timit suh ula,” tih hi a takin an zâwm a ni. (1 Thessalonika 5:19) Pathian thlarau chu “thianghlimna thlarau” a nih avângin, a fai a, a bawlhhlawh lo va, a thianghlim a ni. (Rom 1:4) Chuvângin, keimahnia hna a thawh hian, thlarau chuan kan thianghlim nân, a nih loh leh kan fai nân a thawk tihna a ni a. Chu chuan Pathian thu âwihna-in a târlan nun kawng fai taka nung tûrin min ṭanpui a ni. (1 Petera 1:2) Chîn dân bawlhhlawh zawng zawng chuan chu thlarau zah lohna chu a awmtîr a, chu chuan rah chhuah râpthlâk tak a nei thei a ni. Engtin nge a neih theih?
15, 16. (a) Engtin nge Pathian thlarau kan tihlungngaih theih? (b) Jehova thlarau tihlungngaih chu engtin nge kan pumpelh theih?
15 Aw le, Paula chuan heti hian a ziak a: “Pathian thlarau thianghlim chu tilungngai suh u, tlanna ni atân chuan amahah chhinchhiaha in awm kha,” tiin. (Ephesi 4:30) Pathian Lehkha Thu chuan Jehova thlarau chu Kristian hriak thih rinawmte tâna chhinchhiahna, a nih loh leh “thil lo la awm tûr atâna zakhamna,” angin a târ lang a. Chu chu thi thei lo vân lam nunna a ni. (2 Korinth 1:22, NW; 1 Korinth 15:50-57; Thu Puan 2:10) Pathian thlarau chuan hriak thihte leh an thawhpui lei lam beiseina neite chu a kaihruai theiin, sual hnathawhte pumpelh tûrin a ṭanpui thei a ni.
16 Tirhkoh chuan dâwt sawi te, rûk rûk te, nungchang zahpuiawm te, leh chutiang chi rêng rêng chu do tûrin min vaukhân a. Chûng thilte’n min hîp bo kan rem tih chuan, thlarauva thâwkkhum fuihna Pathian Thu chu kan kalh mai dâwn a ni. (Ephesi 4:17-29; 5:1-5) Tichuan, Pathian thlarau kan tilungngai hle ang, chu ngei mai chu kan pumpelh duh a ni si a. Chu mi atân chuan kan zînga mi tu pawhin Jehovah Thu fuihna kan hlamchhiah ṭan chuan, duhthu rênga thil sual ti a, Pathian duhsakna thlauh thlâktîr thei rilru puthmang emaw, mizia emaw chu kan insiam ṭan thei a ni. (Hebrai 6:4-6) Tûnah mai chuan sual ti lo mah ila, chu mi kawng chu kan lo pan reng thei a. Thlarau kaihhruaina kalha kan kal luih reng chuan thlarau chu kan tilungngai ang a; tin, thlarau thianghlim lo chhuahna, Jehova chu kan hnâwlin, kan tilungngai bawk dâwn a ni. Pathian hmangaihtute kan nih avângin chutiang chuan kan ti duh hauh lo vang. Chuai chuan thlarau tilungngai lo tûr leh thlarau lam thilte duh renga a hming thianghlim chawimawi theihna tûrin Jehova ṭanpuina kan dîl zâwk ngei ang.
Thlarau Lam Thil Ngaihtuah Zêl Rawh
17. Tharau lam thil tum kan insiam theih ṭhenkhatte chu engte nge ni a, chu chu engvângin nge a finthlâk?
17 Thlarau lam thil ngaihtuah reng dân kawng ṭha ber chu thlarau lam thil tumte siam a, chu mi thlen tuma thawh chu a ni. Kan mamawh dân leh dinhmunte azirin kan thil tum chuan, kan Pathian thu zirna tihhmasâwn te, thu hril rawngbâwlnaah nasa lehzuala tel te, a nih loh leh rawngbâwlna chanvo engemaw bîk tak: hun bikima rawng bâwl te, Bethel-a rawng bâwl leh missionary hna te a huam thei a ni. Chu chuan kan rilru chu thlarau lam thilin a tikhat ang a, kan mihring chak lohnate emaw, khawvêl thil lama tum neihnate leh he khawvêla lâr tak, Pathian thu nêna inmil lo châknate’n min hruai bo an tumna chu do thei tûrin min ṭanpui dâwn a ni. Hei hi finna kawng a ni takzet mai, Isua pawhin: “Leia sûlrûl leh tuiêkin a ei chhiatnaah, rûkruten an reh pawha an rûknaah hian, in tân rote khâwl khâwm suh u; vânah, sûlrûl leh tuiêkin a ei chhiat lohnaah, rûkruten an reh pawha an rûk hek lohnaah chuan, in tân rote khâwl khâwm zâwk rawh u; i ro awmna apiangah i rilru pawh a awm ang,” tiin min fuih a ni.—Matthaia 6:19-21.
18. Engvângin nge he ni hnuhnûngahte hian thlarau lam thilte duh zêl chu a pawimawh êm êm?
18 He “ni hnuhnûngahte” hian thlarau lam thilte duh leh khawvêl thil châknate do chu finna kawng a ni tak zet a. (2 Timothea 3:1-5) Chu bâkah, “khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang.” (1 Johana 2:15-17) Entîr nân, Kristian ṭha lai pakhatin hun bikima rawng bâwl a tum tlat a nih pawhin, chu chuan a puitlin hma tleirawl chhuah chhoh lai vêla harsatna a tawnah a kaihruai thei dâwn a ni. A thil tum thlahthlam tûra nêksâwrna a lo awm hunah pawh, chutiang mi chuan Jehova rawngbâwlnaa hlen chhuah a duh thilte chu chiang takin a hmu dâwn a ni. Tin, chutiang thlarau lam mi chuan khawvêl thil ûmna emaw, sualin nawmchenna a pêk theih engpawh avânga a thlarau lam thil tumte ṭhelh chu finthlâk loh, âtthlâk takah a ngai hial ang. Mosia chuan thlarau lam thil duhin, ‘rei lo tê atân sual nawmna hlimpui ai chuan Pathian mite nêna tihduhdah tuar a thlang zâwk’ tih hre reng ang che. (Hebrai 11:24, 25) Kan naupang emaw, kan upa emaw tisa lam thila tlûkluh aia, thlarau lam thilte kan duh zêl hian chutiang duhthlanna chu kan siam a ni.
19. Thlarau lam thilte kan duh reng chuan eng hlâwknate nge kan neih ang?
19 “Tisa duhzâwng chu Pathian dona” a ni a, “thlarau lam thil duh erawh chu nunna leh thlamuanna a ni.” (Rom 8:6, 7) Thlarau lam thil kan duh zêl chuan, thlamuanna hlu tak kan tawng dâwn a ni. Tin, kan thinlung leh rilru pawh keimahni sual thununna lak ata a him zâwk bawk ang a. Thil ṭha lo tihnaa tel tûra thlêmnate chu kan do theih phah bawk ang. Tin, tisa leh thlarau inkâra inbeihna awm reng chu tudai thei tûrin Pathian ṭanpuina kan nei bawk ang.
20. Tisa leh thlarau indona chu kan hneh thei a ni tih engtin nge kan chian theih?
20 Thlarau lam thilte kan ngaihtuah zêl chuan nunna leh thlarau thianghlim Hnâr, Jehova nêna kan inzawmna pawimawh tak chu kan vawng reng tihna a ni. (Sâm 36:9; 51:11) Diabol-Setana leh a hote chuan Pathian Jehova nêna kan inlaichînna tihchhiat nân an theih ang angin thil an ti a. An thiltiha kan rilru kan pêk phawt chuan Pathian hmêlma nihna leh thihna kan hmachhawn dâwn tih an hriat reng avângin, kan rilru thunun chu an tum tlat a ni. Mahse, he tisa leh thlarau indonaah hian hnehtu kan ni thei. Chu chu Paula’n a lo hmachhawn tawh a, ama indona ngei chungchâng a ziaknaah heti hian zawhna a siam hmasa a ni: “He thihna taksa lakah hian tuin nge mi chhan chhuak ang?” tiin. Chu mi hnu-ah chhanchhuahna chu a awm theihzia hetiang hian a sawi leh a: “Isua Krista kan Lalpa avângin Pathian hnênah lâwmthu ka sawi a ni,” tiin. (Rom 7:21-25) Keini pawhin mihring chak lohnate hmachhawn theihna leh chatuan nun beiseina ropui tak nei chunga thlarau lam thilte min duhtîr zêl avângin, Krista kaltlangin Pathian hnênah lâwmthu kan sawi ve thei a ni.—Rom 6:23. (w01 3/15)
I Hre Chhuak Thei Em?
• Thlarau lam thilte duh tih chu engtihna nge?
• Engtin nge Jehova thlarau chu kan inthununtîr theih ang?
• Sual kan donaah Bible zir te, Jehova dân zawm te, leh a hnêna ṭawngṭai te a pawimawh chhan sawifiah rawh.
• Thlarau lam thil tumte ruahmanna chuan engtin nge nunna kawnga min thlen theih?
[Phêk 28-naa milem]
Bible zirna chuan kan thlarau lam beihna laka ding nghet thei tûrin min ṭanpui
[Phêk 29-naa milem]
Châkna sualte hneh tûra
Jehova ṭanpuina dîl chu a âwm hle
[Phêk 30-naa milemte]
Thlarau lam thil tumte chuan thlarau lam thil duh zêl tûrin min ṭanpui thei