Nungchang Thianghlimna I Vawng Thei
“Pathian kan hmangaihna chu hei hi a ni, a thupêkte kan zawm hi.”—1 JOHANA 5:3.
1. Tûn lai mite zîngah nungchang lama inkalhna eng nge hmuh theih awm?
HMAN lai chuan, zâwlnei Malakia chu Pathian mite leh a rawngbâwl lote nungchang inkalh tlat dân tûr thu sawi lâwk tûra thlarauva thâwk khum a ni a. Zâwlnei chuan: “Mi fel leh mi suaksual, Pathian rawngbâwltu leh bâwl lotu chu in thliar thei tawh ang,” tiin a lo ziak a ni. (Malakia 3:18) Chu hrilh lâwkna chu tûn laiah a thleng famkim tawh a. Nungchang lama thianghlimna a phûtte pawh tiamin, Pathian thupêkte zawm chu nun kawng ṭha leh finthlâk tak a ni. Mahse, chu chu a awlsam reng lo. Chhan ṭha tak avângin, Kristiante chuan chhandam ni thei tûra an thawh rim hrâm hrâm a ngai dâwn tih Isuan a sawi a ni.—Luka 13:23, 24.
2. Pâwn lam nêksâwrna engte hian nge nungchang thianghlimna vawn reng tiharsa?
2 Nungchang thianghlimna vawn reng chu engvângin nge a harsat? A chhan pakhat chu pâwn lam aṭanga nêkchêpna kan tawn vâng a ni. Intihhlimna buatsaihtute chuan mipat hmeichhiat hmanna sawhkhâwk duhawm lo takte chu ngaihthahin, duhawm tak, hlimawm tak, leh puitling nihna angin an lantîr a. (Ephesi 4:17-19) Inlaichînna nghet tak nei âwma an lantîr zawng zawng deuh thaw chu nupa ni si lova inkawp sathliah mai maite an ni ṭhîn. Cinema leh television-ahte chuan mipat hmeichhiatna chu, a tlângpui thuin hmangaihna leh inzah tawnna tel lova hman, thil pângngai tak angin an chhuah ṭhîn bawk. Chutiang chanchin chu mi tam tak chuan an naupan lai aṭangin an hre tawh hlawm a. Chu bâkah, tûn lai khawvêl inphalrainaa inhnamhnawih tûrin thiante nêksâwrna nasa tak a awm a, chutianga inhnamhnawih lote chuan nuihsawh leh ânchhe dawn châng an nei hial ṭhîn a ni.—1 Petera 4:4.
3. Khawvêla mi tam takte nungchang bawlhhlawhnaa an inhnamhnawih chhan ṭhenkhat chu eng nge ni?
3 Chhûng lam aṭanga nêksâwrna pawhin nungchang thianghlimna vawn chu a tiharsa thei a. Jehova chuan mihringte chu mipat hmeichhiatna lama châkna nei thei tûrin a siam a, chûng châknate chu a chak hle thei a ni. Châkna leh kan ngaihtuahna chu a inzawm ṭha hle a, nungchang bawlhhlawhna chu Jehova ngaihtuahna nêna inrem lo thil ngaihtuahna nên a inzawm tlat a ni. (Jakoba 1:14, 15) Entîr nân, British Medical Journal hian tûn hnaia a enfiahnaah chuan, mipat hmeichhiatna hmang ṭantîrte zînga tam takte chu mipat hmeichhiatna nihphung hriat châk vâng mai maia hmang an ni tih a hmu chhuak a. Mi dangte chuan an rualpuite chu mipat hmeichhiatnaa inhmang hle angah ngaiin, anni pawhin thianghlimna lo hloh ve chu an duh a. An ngaihtuahnain a hneh tlat vâng emaw, an “ruih deuh” vâng emaw nia sawi pawh an la awm cheu. Pathian tihlâwm kan duh a nih chuan, kawng dangin kan ngaihtuah tûr a ni. Eng ang ngaihtuahna hian nge nungchang thianghlimna min vawntîr thei ang?
Thutlûkna Nghet Siam Rawh
4. Nungchang thianghlimna vawng tûr chuan eng nge kan tih ang?
4 Nungchang thianghlimna vawng tûr chuan, chutiang nunphung zawh chu a manhla a ni tih kan hre tûr a ni. Chu chu tirhkoh Paula’n Rom khuaa Kristiante lehkha a thawnna thu nên pawh a inrem hle a ni: “Pathian duhzâwng, a ṭha leh lawm tlâk leh, ṭhat famkim chu in lo hriatfiah theih nân, in rilru athara awmin lo danglam zâwk tawh rawh u,” tih nên chuan. (Rom 12:2) Nungchang thianghlimna vawn ṭhat chu a manhla a ni tih hriatna chuan Bible-in nungchang bawlhhlawhna a dem tih hriatna mai aia tam a keng tel a. Chutah chuan nungchang bawlhhlawhna dem a nih chhan leh kan hawisan avânga kan hmuh theih hlâwknate hriatthiamna a tel a ni. A chhan ṭhenkhat chu thuziak hmasaah ngaihtuah tawh a ni.
5. A bîk takin, engvângin nge Kristiante chuan nungchang thianghlimna chu an vawn duh ang?
5 Mahse, Kristiante tâna mipat hmeichhiatna lama nungchang bawlhhlawhna pumpelh chhan tûr bul ber chu Pathian nêna kan inlaichînna aṭangin a lo chhuak a. Ani chuan kan tâna thil ṭha ber a hria a ni tih kan zir tawh a. Amah kan hmangaihna chuan sual haw tûrin min ṭanpui ang. (Sâm 97:10) Pathian chu “thilpêk ṭha leh thilpêk famkim zawng zawng,” min Petu a ni. (Jakoba 1:17) Ani chuan min hmangaih a. A thu âwihna hmangin amah kan hmangaihna leh kan tâna a thiltih zawng zawng kan hlutzia kan târ lang a ni. (1 Johana 5:3) A thupêk fel takte bawhchhiain, Jehova chu kan tivuiin, kan tilungngai duh hauh lo vang. (Sâm 78:41) Amah chibai kan bûkna thianghlim leh fel sawichhiat hlawhtîr thei tûr zâwnga khawsak chu kan duh lo bawk a ni. (Tita 2:3-5; 2 Petera 2:2) Nungchang thianghlimna kan vawn rengna chuan Chungnungbera chu a tilâwm a ni.—Thufingte 27:11.
6. Kan nungchang tehnate mi dangte hriattîrna chuan engtin nge min ṭanpui theih?
6 Nungchang thianghlimna vawn kan tum tawh chuan, kan thutlûkna mi dangte hriattîr chu inhumhimna a ni. Pathian Jehova chhiahhlawh i ni a, a tehkhâwng sâng takte zawm i tum tlat thu mi dang te hriattîr rawh. I nunna leh i taksa chu i ta a ni a, nangmah ngeiin duhthlanna i siam tûr a ni. Eng dinhmun hlauhawm nge awm? I Pa, vâna mi nêna i inlaichînna a ni. Chuvângin, nungchang lama i rinawmna hi sawi rem theih a ni lo tih tichiang ang che. A thupêkte kenkawhna hmanga Pathian aiawh nih theihna chu chhuang hle rawh. (Sâm 64:10) Nungchang lama i thutlûkna mi dangte hnêna hrilh chu zahpui rêng rêng suh. Huaisen taka i ngaihdân sawina chuan a humhim ang chia, mi dangte pawh i entîrna siam zui tûrin a fuih ang.—1 Timothea 4:12.
7. Nungchang thianghlimna vawng tûra kan thutlûkna chu engtin nge kan enkawl ang?
7 Nungchang thianghlimna vawn kan tum a, chu chu mi dangte kan hriattîr hnuah, kan tum chu hlen chhuah kan tum tlat tûr a ni. Chu mi tihtheih dân kawng khat chu ṭhian kawm tûr thlanna kawnga fîmkhur hi a ni. Bible chuan, “Mi fing pâwl la, i lo fing ang a,” a ti a. I nungchang ang pute kâwm rawh; an tichak ang che. Pathian lehkha thu chuan: “Mi â pâwl erawh chu hrehawm tuar phahna a ni,” a ti bawk. (Thufingte 13:20) A theih phawt chuan, i thutlûkna tichhe thei tûr mite chu pumpelh ang che.—1 Korinth 15:33.
8. (a) Kan rilru chu thil ṭhain engvângin nge kan châwm ang? (b) Eng nge kan pumpelh ang?
8 Chu bâkah, kan thinlung chu a dik te, a zahawm te, a fel te, a thianghlim te, a duhawm te, a thangmawi te, a ṭha te, a faktlâk tein kan châwm tûr a ni. (Philippi 4:8) Chutiang chu, kan thil en leh kan chhiar tûr te, leh rimawi kan ngaihthlâk tûr te fîmkhur taka thlangin kan ti a ni. Nungchang bawlhhlawnna lam hawi thu leh hlate chuan mi tichhe lo kan tih chuan, nungchang ṭha zirtîrna thu leh hlate pawhin mi a tiṭha thei chuang lo tihna a ni. Mihringte hi ṭha famkim lo kan ni a, nungchang bawlhhlawhnaah awlsam têin kan tlu lût thei tih hre reng ang che. Chuvângin, mipat hmeichhiatna lam hawi lehkhabute, magazine-te, cinema-te, rimawite chuan châkna bawlhhlawhah min hruai ang a, a tâwpah sualah min tlûktîr ang. Nungchang thianghlimna vawng reng tûr chuan, kan rilru chu Pathian finnain kan châwm tûr a ni.—Jakoba 3:17.
Nungchang Bawlhhlawhnaa Hruaitu Rahbite
9-11. Solomona chanchin sawia tlangvâl pakhat chu nungchang bawlhhlawhnaah eng rahbite hian nge zâwi zâwia hruai?
9 Nungchang bawlhhlawhnaa hruaitu rahbite chu hriat chian theih a ni fo va. Rahbi tin mai chuan, hawikîr a tiharsa zual sauh zêl a ni. Chu mi chungchânga Thufingte 7:6-23 sawi dân chu chhinchhiah teh. Solomona chuan “tlangvâl hriatna nei lo,” a nih loh leh thil tum ṭha lo nei chu a thlîr a. Tlangvâl chu “a [nawhchizuar] awmna lam hnaih kawtthlêrah chuan a kal ṭan a, a in lam a pan ta a, tlai lam thimhmulah.” Chu chu a tihsual hmasak ber a ni. Tlai lam thimhmulah, a “thinlung” chuan, kawng naran ni lo, nawhchizuar awm ṭhinna kawnga kal tûrin a hruai a ni.
10 Chu mi hnu chuan: “Ngai teh, nawhchizuar inthuam leh fin vervêk rilru pu hmeichhiain a tâwk a,” tih kan chhiar a ni. Tûnah chuan hmeichhia chu a tâwk ta! Hawisanin, hawsan daih thei a ni a; mahse, a bîk takin chhia leh ṭha hriatna a tlâkchham avângin chu chu a hma aiin a harsa zâwk tawh a. Hmeichhia chuan a man a, a fâwp a. A fawh hnu chuan: “Remna thilhlana inthawinate chu ka hlân tûr a ni a, vawiinah ka thutiam ka hlen ta” tia ngaihno bei tak ṭawngkama a thlêmna chu a ngaithla ta a. Remna inthâwinaah chuan sa te, chhangphut te, hriak te, leh uain te a tel a. (Leviticus 19:5, 6; 22:21; Number 15:8-10) Chu inthâwina chanchin sawiin, ani chuan thlarau mi a nihzia a sawi thawi mai bâkah, a inah thil ṭha ei tûr leh in tûr tam tak a awm a ni tih a hrilh a ni. “Hawh teh, zankhuain hmangaihna duhtâwkin i chên ang khai, hmangaihnain inhnêm ang,” tiin a ngên a.
11 A hlawhtlin leh tlin loh chu ngaihruat a har lo. “A ṭawngkam thiamin a thlêm thlu a, . . . Bâwng, a talhna hmuna a kal ang leh, . . . Savain a thihna tûr a ni tih hre lova . . . thang lam a pan angin,” hmeichhia chu a zui ta a. “Inngaite leh uirête chu Pathianin a ngaihtuah dâwn” avângin, a nun hi a derthâwng a ni. (Hebrai 13:4) Mi tinte tân zir tûr ropui tak a va ni êm! Pathian huat zâwng min nihtîr thei kawngah chuan pên khat lek pawh kan pên chhuak tûr a ni lo.
12. (a) “Hriatna nei lo” tih hi eng tihna nge ni? (b) Engtin nge nungchang nghet kan neih theih ang?
12 Chu tlangvâl chu “hriatna nei lo” a ni tih chhinchhiah ang che. Chu chuan a ngaihtuahna te, a duhzâwng te, a ngainat zâwng te, a rilru vei zâwng te, leh a thil tumte chu Pathian duhzâwng nên a inmil lo tih min hrilh a. A nungchang ngheh lohna chuan sawhkhâwk râpthlâk tak a thlen a ni. He ni hnuhnûng ‘hun khirh tak’ kâra nungchang nghet nei tûr chuan tum ruh a ngai a. (2 Timothea 3:1) Pathian chuan min ṭanpuitu tûrin ruahmanna a siam a. Kawng dika min fuihtu leh kan tum ang neite nêna inkawm theih nân Kristian kohhran inkhâwmnate a ruahman a ni. (Hebrai 10:24, 25) Felna kawnga min vêngtu leh min zirtîrtu kohhran upate an awm bawk. (Ephesi 4:11-13) Pathian Thu, Bible chu min kaihruaitu atân kan nei bawk a ni. (2 Timothea 2:16) Tin, eng hunah pawh Pathian thlarau dîla ṭawngṭai theihna kan nei bawk a ni.—Matthaia 26:41.
Davida Thil Tihsualte Aṭanga Zir
13, 14. Engtin nge Lal Davida chu sual nasa takah a tlûk?
13 Nimahsela lungchhiatthlâk takin, Pathian chhiahhlawh mi lâr takte pawh mipat hmeichhiatnaah an tlu ṭhîn. Chûng zînga pakhat chu kum sâwmbi tam tak rinawm taka Jehova rawngbâwl tawh Lal Davida a ni. Ani chuan Pathian a hmangaih em em chung pawhin, sualah a tlu lût a ni. Solomona sawi tlangvâl angin Davida sualnaa hruaitu rahbite a awm a ni.
14 Chutih hun lai chuan Davida chu vâl upa, kum 50 chuang hret a ni a. A lal in chung aṭang chuan, hmeichhe hmêlṭha tak Bath-sebi inbual lai a hmu a. A chungchâng mi a zawhtîr a, tunge a nih a hre ta a. A pasal Uria chu Ammon-ho khua Raba va donaah a tel a ni tih a hre ta bawk a. Davida chuan mi a hruaitîr a, a lal ina an rawn hruai chuan a lo mutpui a. Chutichuan, thil a buai ṭan ta—Davida’n sâwn a thlâk tih a inhre ta a ni. Uria’n a nupui a mutpui theih nân Davida’n Uria chu a râl dona aṭangin a ko haw a. Chutiang chuan, Beth-sebi fa chu a pasal, Uria fa angin a lang mai dâwn a ni. Mahse, Uria chu a inah a haw duh tlat lo va. A thil sual tih thup nân, Davida chuan Uria chu Raba khuaah a tîr leh a, indonaa a thih ngei theih nâna râl zualna lai bera hmatâwntîr tûra sipai hotu hriattîrna lehkha a kentîr a ni. Uria chu a thi ta ngei a; tichuan, Beth-sebi a rai a ni tih tlâng hriat a nih hmain Davida chuan nupuiah a nei ta a ni.—2 Samuela 11:1-27.
15. (a) Davida sual tih chu engtin nge a lo lan? (b) Thiam taka Nathana zilhna chu Davida chuan engtin nge a lo dawnsawn?
15 A sualna khuhbo tûra Davida ruahmanna chu a hlawhtling niin a lang. Thla tam tak a liam a. Mipa naupang chu a lo piang a. Davida’n Sâm 32-na a phuah lai khân chu thil thleng chu a rilru-ah a awm a nih chuan, a chhia leh ṭha hriatna chuan amah chu nasa takin a hrem a ni ngei ang. (Sâm 32:3-5) Amaherawhchu, a sualna chu Jehova hmaah thup a ni lo. Bible chuan: “Davida thiltih chuan LALPA a tilungni lo va,” a ti a ni. (2 Samuela 11:27) Jehova chuan zâwlnei Nathana a tîr a, ani chuan thiam takin Davida thiltih chu a phawrh chhuak a. Davida chuan a sualtih chu puang nghâlin, Jehova ngaihdamna a dîl nghâl a ni. A inlamlêt tak zetna chuan Pathian nêna inremna a thlen a ni. (2 Samuela 12:1-13) Davida chuan chu zilhna chu a haw lo. Sâm 141:5-a thu sawi: “Mi fel chuan mi vaw rawh se, khawngaihna a ni ang; mi zilhhau rawh se, lûa hriak thih ang a ni ang; ka lûin duh lo suh se,” tih ang rilru put hmang a lantîr zâwk mah a ni.
16. Thil tihsual chungchângah eng vaukhânna leh zilhna nge Solomona’n a pêk?
16 Davida leh Beth-sebi fapa a pahnihna, Solomona chuan a pa nun kawng lungngaihna chu a ngaihtuah a ni thei ang. A hnuah heti hian a ziak a ni: “Bawhchhiatna zêptute chu an hmuingîl lo vang a, zêp lova inpuanga hawisantute chuan zahngaihna an hmu ang,” tiin. (Thufingte 28:13) Sual lian taka kan tlûkchhiat chuan he thâwk khum fuihna kan zâwm tûr a ni, chu chu vaukhânna leh zilhna thu a ni si a. Jehova hnênah kan inpuang ang a, min ṭanpui tûrin kohhran upate kan pan ang. Upate mawhphurhna pawimawh tak chu thil sual titute insiam ṭha tûra ṭanpui hi a ni.—Jakoba 5:14, 15.
Sual Sawhkhâwk Chu Tuarin
17. Jehova chuan sual chu ngaidam mah se, eng ata nge mi a hum loh?
17 Jehova chuan Davida chu a ngaidam a. Engvâng nge? Davida chu mi rinawm tak a ni a, mi dangte chungah zah a ngai a, a thinlung tak taka a inlamlêt vâng a ni. Amaherawhchu, sual sawhkhâwk râpthlâk takte lak ata Davida chu humhim a ni lo. (2 Samuela 12:9-14) Tûn laiah pawh chutiang bawk a ni. Jehova chuan inlamlêtte chungah thil ṭha lo thlentîr lo mah se, an thil sualtih sawhkhâwk ata a hum chuang lo. (Galatia 6:7) Mipat hmeichhiatna lama nungchang bawlhhlawhna sawhkhâwkte chu nupa inṭhenna te, sâwnpaina te, mipat hmeichhiatna lama inkaichhâwn theih natna te, leh mi dangte rinna leh zahna hlohna te a ni thei.
18. (a) Mipat hmeichhiatna lama sual nasa tak chinfel dân tûr chungchângah Paula’n Korinth kohhran chu engtin nge a hrilh? (b) Mi sualte chungah Jehova’n engtin nge hmangaihna leh khawngaihna a lantîr?
18 Mahni ngeia sual nasa tak kan ti a nih chuan, a sawhkhâwk tuar chu a lungngaihthlâk duh hle a. Amaherawhchu, inlamlêta Pathian nêna inremleh chu engmahin a dâl tûr a ni lo. Kum zabi pakhatnaah khân, Paula chuan Korinth khuaa mite hnênah chuan inngaih hmang chu kohhran ata hnawtchhuak tûrin lehkha a thawn a. (1 Korinth 5:1, 13) Inngaih hmanga chu a inlamlêt tak zet hnu chuan, chu kohhrante chu ‘ngaidama, thlamuan bawk a, amah an hmangaihna tinghet’ tûrin a hrilh a ni. (2 Korinth 2:5-8) He thâwk khum zilhnaah hian, thil sual titute laka Jehova hmangaihna leh khawngaihna kan hmu a ni. Vâna vântirhkohte chu mi sual pakhat a inlamlêt hian an hlim hle a ni.—Luka 15:10.
19. Kawng dik lo zawhna avânga lungngaihna chuan eng hlâwkna nge a thlen?
19 Kawng dik lo kan zawh chuan mi tilungngai mah se, chu chuan ‘fîmkhur a, khawlohna lam hawi lo’ tûrin min ṭanpui ang. (Joba 36:21) Dik takin, a sawhkhâwk râpthlâk takte chuan chu sualna tinawn leh lo tûrin min dang ang. Chu bâkah, Davida chuan a thil tihsual avânga a thiltawn duhawm lo tak chu mi dangte zirtîr nân a hmang a ni. Ani chuan: “Chutichuan bawhchhetute chu i kawng chanchinte ka zirtîr ang a; tichuan, mi sualte chu i lamah an hawi leh ang,” a ti a.—Sâm 51:13.
Jehova Rawngbâwlna Aṭanga Lo Awm Hlimna
20. Pathian thil phût felte pawisakna aṭangin eng hlâwknate nge rah chhuak thei?
20 Isua chuan: “Pathian thu hriaa zâwmte hi mi hamṭha an ni zâwk e,” a ti a. (Luka 11:28) Pathian thil phût felte pawisakna chuan tûnah hlimna a thlen a, chu hlimna chu tâwpnei lo nakin hun thleng a daih ang. Nungchang lama thianghlimsa kan nih chuan Jehova’n min ṭanpui nâna ruahmanna a siamte hmang ṭangkaiin, chu thianghlimna chu i vawng zêl ang u. Nungchang bawlhhlawhnaah kan tlu chhia a nih pawhin, inlamlêt tak takte chu Jehova’n a ngaidam duh tih hriatnaa thlamuanin i awm ang u; tin, chu sual tihnawn loh chu i tum tlat bawk ang u.—Isaia 55:7.
21. Nungchang thianghlimna vawng tûra min ṭanpui thei tirhkoh Petera fuihna chu eng nge ni?
21 He khawvêl fel lo tak hi a nungchang bawlhhlawhna leh rilru put hmang bawlhhlawh takte nên a boral thuai ang. Nungchang thianghlimna vawng rengin, tûnah leh chatuan atân hlâwkna kan hmu thei ang. Tirhkoh Petera chuan heti hian a ziak a ni: “Duh takte u, chutiang thilte chu in beisei avângin bawlhhlawh kai lo leh sawisêlbovin, thlamuang taka in awm a hmuh theih nân che u, taihmâk chhuah rawh u. . . . Chûng thu chu in lo hriat lâwk avângin fîmkhur rawh u, chutilochuan mi sualte dik lohnaa hruai bova awmin in nghet ṭha lai in tlu dah ang e,” tiin.—2 Petera 3:14, 17.
I Hrilhfiah Thei Em?
• Engvângin nge nungchang thianghlimna vawn chu a harsat theih?
• Nungchang tehna sâng tak zui tûra kan thutlûkna ṭanpui thei kawng hnih chu engte nge ni?
• Solomona sawi tlangvâlpa thil sual tih aṭangin eng nge kan zir theih?
• Davida entîrna siam chuan inlamlêtna chungchâng eng nge min zirtîr?
[Phêk 13-naa milem]
Nungchang chungchânga i dinhmun mi dangte hriattîr chu inhumhimna a ni
[Phêk 16, 17-naa milemte]
Davida chu a inlamlêt tak zet avângin, Jehova’n a ngaidam