Isua Anga Chêttîrin I Awm Em?
“Mipui tam tak a hmu a, vêngtu nei lo berâmte ang an nih avângin a khawngaih ta êm êm a, thu tam tak a zirtîr ta a.”—MARKA 6:34
1. Engvângin nge mite’n mize chhuanawm tak tak an lantîr chu hriat thiam theih a nih?
MIHRING chanchin tluan chhuakah hian mi tam takte chuan mize chhuanawm tak tak an lantîr a. A chhan chu i hre thiam thei ang. Pathian Jehova chuan hmangaihna, ngilneihna, thilphalna, leh mize dang kan ngaihsân tak takte a nei a; tin, a lan chhuahtîr bawk a ni. Mihringte chu Pathian anpuia siam an ni a. Chuvângin, mi tam takin hmangaihna, ngilneihna, lainatna leh Pathian mize dangte an lantîr chhan chu kan hre thiam thei a ni. (Genesis 1:26; Rom 2:14, 15) Mahsela, mi ṭhenkhat chuan mi dangte aiin hêng miziate hi an lantîr tam zâwk tih i hria ang.
2. Mite’n Krista entawn nia inngai chunga an thil ṭha tih ṭhenkhat chu engte nge ni?
2 Damlote kana ṭanpui fo ṭhîn, ram-tui-lei lote chunga khawngaihna lantîr ṭhîn, a nih loh leh mi retheite hnêna phal taka thil pe thînte pawh i hmêlhriat mai thei a. Phâr enkawlna emaw, fahrah enkawlna emawa thawk tûra khawngaihna ngah te, damdawi in emaw damlo zualte enkawlna in emawa mahni inpea thawk te, a nih loh leh râl tlânte emaw, in leh lo nei lote emaw ṭanpui nâna beitute pawh ngaihtuah bawk teh. An zînga ṭhenkhat chuan Kristiante tâna entawn tûr siamtu, Isua an entawn niin an inngai ngei ang. Chanchin Ṭha ziakah chuan Krista’n damlote a tidam a, rilṭâmte a hrai puar tih kan chhiar a. (Marka 1:34; 8:1-9; Luka 4:40) Hmangaihna, lainatna, leh khawngaihna Isua lantîrte chu a van lam Pa entawntu “Krista rilru” lanchhuahtîrna a ni.—1 Korinth 2:16.
3. Isua hnathawh ṭha thlîr dân inbûktâwk neih nân eng nge kan ngaihtuah ngai?
3 Nimahsela, Isua hmangaihna leh khawngaihna-in a chêttîr mi tam takte chuan Krista rilru hmêlhmang pawimawh ber chu an hmaih a ni tih i hmu tawh em? Marka bung 6-na thu ngun taka ngaihtuahna aṭangin he thu hriatthiamna hi kan nei thei ana. Chutah chuan mipuite chuan damlote chu a tihdam atân Isua hnênah an rawn hruai tih kan chhiar a. A châng dang aṭang chuan, mi sâng tam tak a hnêna lo kalte rilṭâmzia a hriatin mak tak maiin anni chu a hrai puar a ni tih kan hre bawk. (Marka 6:35-44, 54-56) Damlo tihdam leh rilṭâmte hrai chu hmangaih lainatna lantîrna langsâr tak a ni a; mahse, chûng chu Isua’n mipuite a ṭanpuina kawng pawimawh ber a ni em? Tin, ani pawhin Jehova a entawn angin, hmangaihna, ngilneihna, leh khawngaihna kawnga entawn tûr ṭha famkim a siam chu, engtin nge theihtâwpin kan entawn theih ang?
Thlarau Lam Mamawhte Phuhrûk Tûra Chêttîr
4. Marka 6:30-34-a thuziak dinhmun chu eng nge ni?
4 Isua chuan a vêla mite a khawngaih chhan bul ber chu an thlarau lam mamawhte vâng a ni. Chûng mamawhte chu thil pawimawh ber a ni a, tisa lam mamawhte ai pawhin a pawimawh zâwk a. Marka 6:30-34-a thu hi ngaihtuah teh. Chuta chhinchhiah thil thleng chu C.E. 32 Kalhlen Kût dâwn vêla, Galili Tuipui kama thil thleng a ni. Tirhkohte chu chhan ṭha tak avângin an phûr êm êm a. Thu hrila an zinna ata lo haw hlim hlawt an ni a, Isua hnênah lo kal a, an thiltawnte hrilh hlân an nghâkhlel ngei ang. Mahse, mipui an lo pungkhâwm a. An tam luat avângin Isua leh a tirhkohte chuan chaw takngial pawh an ei thei lo va, an chawl hahdam thei hek lo. Isua chuan tirhkohte hnênah: “Nangmahniho ngawtin thlalêr hmunah ahrangin lo kal ula, châwl rih rawh u,” a ti a. (Marka 6:31) Lawngah chuangin, Galili Luipui kaltlangin hmun reh takah chuan an kal ta a. Lawnga an chuan ṭanna chu Kapernaum khaw kiang ni âwm tak a ni. Mahse, mipuite chu tuipui kama tlânin, lawng chu an va lehkhalh a. Engtin nge Isua’n a chhân lêt? A hun âwl neih tihbuai chu a lungni lo vem? Teuh lo mai!
5. Isua’n amah rawn pantu mipuite chu engtin nge a ngaih a, chhân lêt nân eng nge a tih?
5 Mipui sâng tam tak leh damlo nghâkhlel taka amah nghâktute chuan a thinlung an khawih êm êm a. (Matthaia 14:14; Marka 6:44) Isua khawngaihna leh A chhân lêt dân chu târ langin Marka chuan: “Mipui tam tak a hmu a, vêngtu nei lo berâmte ang an nih avângin a khawngaih ta êm êm a, thu tam tak a zirtîr ta a,” tiin a ziak a ni. (Marka 6:34) Isua chuan mipui tam tak angin a hmu mai lo va, thlarau lam mamawh nei mite a hmu a ni. Berâm ṭanpuitu nei lo darh nuai, hnim hring hmuna hruaitu leh venghimtu nei lo ang an ni. Berâmte vênghimtu tûr, mi khawngaihna nei lo sakhaw hruaitute chuan mi narânte thlarau lam mamawh an ngaihthah a, an hmusit a ni tih Isua chuan a hre chiang hle a. (Ezekiela 34:2-4; Johana 7:47-49) Chuvângin, an tâna thil ṭha ber tihsak a, danglam taka cheibâwl a tum a. Tichuan, Pathian Lalram chanchin chu a zirtîr ṭan ta a ni.
6, 7. (a) Isua’n mipuite mamawh a chhân lêtnaah Chanchin Ṭha ziakte chuan eng nge a târ lan pawimawh zâwk? (b) Eng chêttîrna avângin nge Isua’n thu a hrilh a, a zirtîr?
6 Luka chuan chu mi chanchin bawk chu a ziak a. Doctor a nih angin mi dangte taksa hrisêlna chu a ngai pawimawh hle a ni. Mahse, ani pawhin a sawi pawimawh zâwk chu chhinchhiah teh. “Mipuiho chuan . . . [Isua] an zui zêl a; tin, ani chuan anni chu a lo lâwm a, Pathian ram thu a hrilh a, tihdam ngai apiang a tidam a.” (Luka 9:11; Kolossa 4:14) Thil mak tih chungchâng ziakna zawng zawngah thu hrilhna ziak hmasak ni vek lo mah se, Luka hian eng nge a chhinchhiah hmasak? Isua’n mipuiho a zirtîr tih thu dik chu a ziak hmasa a ni.
7 Hei hi Marka 6:34-a a thu sawi pawimawh nên a inrem thlap a ni. Chu mi châng chuan a khawngaihna lantîr tûra Isua chêtîrtu bulpui ber chu chiang takin a lantîr a. Mipuite chu a zirtîr a, an thlarau lam mamawhte a pe a ni. A rawng bâwl tirh lamah chuan, Isua chuan: “Khaw dangahte pawh Pathian ram chanchin ṭha ka hril tûr a ni, chu mi avâng chuan tirh ka ni si a,” tiin a sawi tawh a. (Luka 4:43) Amaherawhchu, Isua chuan a tih tûr thuhrilhna chu a rûn dâl chauhva thawk a, a hna a nih vâng maia Lalram thuchah puang anga kan ngaih chuan kan tisual der ang. Mite a khawngaihna chu anmahni hnêna chanchin ṭha hril tûra chêttîrtu pawimawh ber a ni si a. Isua’n damlo te, ramhuai man te, mi rethei te, a nih loh leh rilṭâmte tân pawha a tihsak theih ṭha ber chu Pathian Lalram chanchin thutak hre tûr te, pawm tûr te, leh hmangaih tûr tea anmahni ṭanpui chu a ni. Jehova lal chungnunna thiamchantîrna leh mihringte tâna malsâwmna kumhlun pêkna kawnga Lalram chanvo avângin, chu thutak chu thil pawimawh ber a ni.
8. Isua’n a thu hrilhna leh zirtîrna chu engtin nge a ngaih?
8 Lalram chanchin phûr taka puan chu he leia Isua lo kal chhan bul ber a ni. A lei lam rawngbâwlna a tâwp dâwnah Isua’n Pilata hnênah: “Thutak hriattir hi ka pian chhan leh khawvêla ka rawn kal chhan a ni. Tupawh thutaka mi apiangin ka thu an pawm ṭhîn,” a ti a. (Johana 18:37) Thuziak hmasa pahnihah khân Isua chu mi lainat thei—mi ngaihsak tak, nêlawm tak, mi ngaihtuah tak, mi rinchhan thei, leh chûng zawng bâkah chuan mi hmangaih thei tak a ni tih kan hriat tawh kha. Krista rilru hriat thiam kan duh tak zet a nih chuan a mize hrang hrangte kan man a ngai a ni. Chutiang bawka pawimawh chu Krista rilru-ah chuan thu hril leh zirtîrna dah pawimawh hmasak a tel tih hriat chu a ni.
Thu Hril Tûrin Mi Dangte A Fuih
9. Tute tân nge thu hril leh zirtîrna chu dah pawimawh hmasak tûr?
9 Thu hrilhna leh zirtîrna—hmangaihna leh khawngaihna lantîrna anga—dah pawimawh ber chu Isua tân chauh a ni lo. A hnungzuitute chu a rilru put hmang te, a dah pawimawh hmasak te, leh a thiltihte entawn tûrin a fuih a. Entîr nân, Isua’n a tirhkoh 12-te a thlan hnuah, eng nge an tih tûr? Marka 3: 14, 15 chuan: “A hnêna an awm theih nân leh thu hril tûr leh ramhuaite hnawh chhuahna thu nei tûra a tirh chhuah theih nân sâwm leh pahnih a ruat a,” tiin min hrilh a ni. Tirhkohte tâna dah pawimawh hmasak tûr engemaw i hmu em?
10, 11. (a) Isua’n tirhkohte a tirh chhuah khân, eng ti tûrin nge a hrilh? (b) Tirhkohte tirh chhuahna chungchângah eng nge ngaih pawimawh a nih?
10 A hunah chuan, Isua chuan tirhkoh 12-te chu ramhuaite hnawhchhuah theihna leh tihdam theihna a pe a. (Matthaia 10:1; Luka 9:1) Tichuan, “Israel hnam berâm bote hnênah chuan” a tîr chhuak ta a ni. Eng ti tûrin maw? Isua chuan: “In kalin, ‘Vân ram chu a lo hnai ta,’ tiin, hril zêl ang che u. Dam lote tidam ula, mitthite kaitho ula, phârte tithianghlim ula, ramhuaite hnawt chhuak ang che u,” tiin, kaihhruaina thu a pe a. (Matthaia 10:5-8; Luka 9:2) Tichuan, eng nge an tih? “Tichuan an kal chhuak a, [1] simna tûr thu an hrilh a; [2] ramhuai tam tak pawh an hnawt chhuak a, dam lo tam tak pawh hriak an hnawih a, an tidam bawk.”—Marka 6:12, 13.
11 Zirtîrna chu hmun tinah sawi hmasak a nih loh vâng maiin a pawimawh lovah kan ngai tûr em ni? (Luka 10:1-8) Awle, hmun tam takah tihdamna aiin zirtîr rawngbâwlna a sawi hmasa tih chu kan theihngilh tûr a ni lo. He mi chungchângah hian a chhehvêla thu awmte hi han ngaihtuah teh. Tirhkoh 12-te a tîrh chhuah hma lawk khân, mipuite dinhmun chuan Isua thinlung a khawih êm êm a. “Isuan an inkhâwmna inahte zirtîrin, Ram Chanchin Ṭha chu hrilin, dam lohna tinrêng leh natna tinrêngte tidamin, khaw lian leh khaw tête zawng zawng a fang zêl a. Chutichuan, mipuite chu a hmuhin, vêngtu nei lo berâmte anga hrehawm leh darha an awm avângin a khawngaih ta êm êm a. Tichuan, a zirtîrte hnênah chuan, ‘Buh seng tûr a tam hle si a, nimahsela a thawktute an tlêm; chutichuan, a buh seng tûra thawktu tûrte tîr tûrin buh Neitupa hnênah chuan ngên rawh u,’ a ti a,” tih kan chhiar a ni.—Matthaia 9:35-38.
12. Isua leh tirhkohte thil mak tihte kha eng dang atân nge a ṭangkai?
12 A hnêna an awm avângin, tirhkohte chuan Krista rilru aṭhen azâr chu an la lût thei a. Mite an hmangaih leh khawngaih tak zetnaah chuan Lalram chungchâng hrilh leh zirtîrna a tel tih an hre thei a—chu chu an hna thawh ṭha hmêlhmang bul pui tûr chu a ni. Chumi milin, taksa lam thiltih ṭha tak, damlo tihdamna ang chuan rethei ṭanpui mai aia tam a thawk a ni. Mi ṭhenkhat chu tihdamna leh mak tak maia ei tûr pêknate hîpin an awm ang tih i ngaihtuah thei ngei ang. (Matthaia 4:24, 25; 8:16; 9:32, 23; 14:35, 36; Johana 6:26) Mahsela, tisa lam ṭanpuina mai piah lamah, chûng thil tihte chuan a thlîrtute chu Isua chu Pathian Fapa leh Mosia lo hrilh lâwk “zâwlnei” chu a ni tih pawm tûrin a chêttîr a ni.—Johana 6:14; Deuteronomy 18:15.
13. Deuteronomy 18:18-a hrilh lâwkna chuan “zâwlnei” lo awm tûr tân eng chanvo nge a sawi pawimawh?
13 Isua “zâwlnei” a nihna chu engvângin nge awmze nei tak a nih? Chu zâwlnei chanvo pawimawh ber tûr hrilh lâwk chu eng nge ni? “Zâwlnei” chu mak taka tihdamna emaw, khawngaihna nei taka rilṭâmte tâna ei tûr pêk vâng emawa lâr tûr a ni em? Deuteronomy 18:18 chuan: ‘An unaute zînga nangmah [Mosia] ang zâwlnei ka siam sak a; a kâah ka thute ka dah ang a, a hnêna thu ka pêk apiang chu an hnênah a sawi ang,’ tiin a lo sawi lâwk diam tawh a ni. Tirhkohte pawhin, lainatna nei tûr leh lantîr tûra an zir rualin, Krista rilru chu an thuhrilna leh zirtîr rawngbâwlnaah pawh a lang tûr a ni tih an pawm tlâng thei a ni. Chu chu mite tâna an tih theih ṭha ber chu a ni ngei ang. Chu mi hmang chuan, retheite leh damlote chuan hring nun tawi tê chhûng emaw, chaw vawi hnih khat ei mai emaw ni lovin hlâwkna kumhlun an nei thei a ni.—Johana 6:26-30.
Tûn Laia Krista Rilru Neih
14. Krista rilru neihna chu engtin nge kan thu hrilnaah a inrawlh?
14 Kan zînga tumahin Krista rilru chu kum zabi pakhatnaa mi—an chungchâng tirhkoh Paula’n “Krista rilru kan pu a ni,” tia a ziah Isua leh a zirtîr hmasate ngaihsân ang tlukin kan ngaisâng thei lo. (1 Korinth 2:16) Tin, chanchin ṭha hril tûr leh zirtîr siam tûra phût kan ni tih chu kan pawm nghâl a. (Matthaia 24:14; 28:19, 20) Mahse, chu hna thawk tûra min chêttîrtu ngaihtuah chu a hlâwk a ni. Thawh tûr a ni tih hriat vâng maia thawh a ni tûr a ni lo. Rawngbâwlnaa kan tel chhan bul ber chu Pathian kan hmangaih vâng a ni a; tin, Krista an tak zetnaah chuan thu hrilh tûr leh zirtîr tûra khawngaihnaa chêttîra awm hi a tel a ni.—Matthaia 22:37-39.
15. Engvângin nge khawngaihna hi kan vântlâng rawngbâwlna nêna inâwm tak a nih?
15 Kan rinna min pawmpui duh lote chunga khawngaihna neih chu a awl-ai lo hle a; a bîk takin, inngaihsak lohna te, hnâwlna te, a nih loh leh dodâlna te kan tawn hian a awlsam lo hle a ni. Mahse, mite kan hmangaihna leh khawngaihna kan hlauh chuan, Kristian rawngbâwlnaa tel tûra min chêttîrtu pawimawh tak kan hlauh thei a ni. A nih leh, engtin nge khawngaihna chu kan chhawm nun ang? Mite chu Isua hmuh ang, “vêngtu nei lo berâmte anga hrehawm leh darha” awm anga hmuh ve kan tum thei a ni. (Matthaia 9:36) Chu chuan tûn laia mi tam takte dinhmun a hrilhfiah a ni lâwm ni? Anni chu sakhaw dik lo berâmpute ngaihthah leh thlarau lam mit tihdelsakin an awm a ni. Chuvângin, Bible-a hmuh theih kaihhruaina dik chu an hre lo va, kan leia Pathian Lalramin a rawn thlen thuai tûr Paradis dinhmun pawh chu an hre hek lo. Retheihna te, chhûngkaw inrem lohna te, dam lohna te, leh thihna te tiamin ni tin nuna buainate chu Lalram beiseina nei hauh lovin an hmachhawn a ni. Keini erawh chuan an mamawh chu kan nei a ni: nun chhanhimna Pathian Lalram vâna din tawh chanchin ṭha chu!
16. Engvângin nge mi dangte chanchin ṭha hrilh chu kan duh ang?
16 I chhehvêla awmte thlarau lam mamawh i ngaihtuah chuan, Pathian hmangaih thiltum chungchâng i theih tâwka hrilh tûrin i thinlungin a chêttîr che a ni lâwm ni? Ni e, kan hna chu khawngaihna hna a ni. Isua anga mi dangte dinhmun hriatthiamna kan neih chuan, kan ṭawngkam chhuakah te, kan hmêl lan dânah te, leh kan zirtîr dânah te a lang ang. Chûng zawng zawngte chuan “chatuana nun duhna rilru dik tak nei apiang,” tân kan thuchah chu a tiduhawm zual ang.—Tirhkohte 13:48, NW.
17. (a) Mi dangte hmangaihna leh khawngaihna kan lantîr theih dân kawng ṭhenkhat chu engte nge ni? (b) Thil ṭha tih nge vântlâng rawngbâwlnaa tel tia a engemaw zâwk thlan theih engvângin nge a nih loh?
17 Kan hmangaihna leh khawngaihna chu kan nun kawng engkimah a langchhuak tûr a ni ngei mai. Hei hian mi chanchhia te, damlo te, leh rethei te chunga ngilneih a huam a—an tawrhna chhâwk thei tûra kan tihtheih apiang tihsakna a huam bawk. Tin, an hmangaih tak thihnaa chân tate hnêm tûra ṭawngkam leh thiltiha kan beihna pawh a huam bawk a ni. (Luka 7:11-15; Johana 11:33-35) Chutichung pawhin, tlâwmngai pâwl nêna awm anga an inngaih loh nân chutiang hmangaihna, ngilneihna, leh khawngaihna lantîrna chu kan hnathawh ṭhate zînga kan ngaih pawimawh ber a ni tûr a ni lo. A sawhkhâwk daih rei zâwk chu kan sawi tâk Pathian miziate chêttîrnaa Kristian thu hrilh leh zirtîr rawngbâwlnaa tel chu a ni. Juda sakhaw hruaitute chungchâng Isua thusawi kha hre chhuak leh la: “Pudina te, mohuri te, zira te chu sâwmah pakhat in pe ṭhîn a, dân thu pawimawh zâwk—felna te, khwngaihna te, rinawmna te chu—in ngaihthah si ṭhîn; nimahsela, chûng chu asin in tih tûr ni, a dangte chu tih ṭhulh chuang lovin,” tih chu. (Matthaia 23:23) Isua tân chuan mite tisa lam mamawh ṭanpui nge nun pe thei thlarau lam thilte zirtîr zâwk tia a engemaw zâwk thlan theih a ni lo. A pahnihin a thawk ve ve a ni. Mahse, zirtîr rawngbâwlna chu a pawimawh ber a ni tih a lang a ni: chu mi hmanga thil ṭha a hlenchhuah chu chatuan ṭanpuina a nih theih avângin.—Johana 20:16.
18. Krista rilru kan ngaihtuahna chuan eng ti tûrin nge min chêttîr ang?
18 Jehova’n Krista rilru min hriattîr avângin a va lâwmawm êm! Chanchin Ṭha ziakte hmangin, nungdam tawh zînga mi ropui ber ngaihtuahna, rilru, mizia, thiltih leh a ngaih pawimawh hmasakte kan hre bel lehzual thei a ni. Bible-in Isua chungchâng a târ lante chhiar a, ngun taka chhût a, a taka hman chu keimahnia innghat a ni. Krista ang chiaha thil kan ti tak tak dâwn a nih chuan, mihring ṭha famkim lo kan nih angin kan theih tâwka a ngaihtuah dân te, a rilru te, leh a thil chhût dân te chu kan zir hmasa tûr a ni. Tichuan, Krista rilru chhawmnun leh lantîr chu i tum tlat ang u. A aia nun kawng ṭha zâwk leh mi cheibâwl dân ṭha zâwk a awm lo; tin, sawisêl bova a lo entawn, kan lainatna Pathian Jehova hnaih theihna kawng ṭha zâwk a awm lo bawk.—2 Korinth 1:3; Hebrai 1:3. (w00 2/15)
Engtin nge I Chhân Ang?
• Isua’n ṭanpui ngaite a ṭanpui fo dânah eng hriatthiamna nge Bible-in a pêk?
• A hnung zuitute a kaihhruiainaah Isua’n eng nge a sawi pawimawh?
• Kan thiltihah engtin nge “Krista rilru” kan lantîr theih ang?
[Phêk 33-naa phêk khat awh milem]
[Phêk 34-naa milem]
Mi dangte tâna Kristiante thil tihtheih ṭha ber chu eng nge ni?