Hmangaihna Kawng Chu Engtikah Mah A Reh Lo Vang
“Thilpêk ropui berte chu châk hle zâwk rawh u. Tin, kawng ṭha lehzual ka entîr dâwn che u.”—1 KORINTH 12:31.
1-3. (a) Hmangaihna lantîr tûra zirna chu ṭawng thar zirna nên engtin nge a inan êm êm? (b) Hmangaihna lantîr tûra zirna chu eng thilte’n nge chonaa siam thei?
TAWNG thar zir i tum chhin tawh ngai em? A nêp thei ang bera sawi pawhin chona a tling a ni! Dik takin, naupang chuan inbiakpawhna mai aṭangin ṭawng a zir thei a. A thluak chuan ṭawng ri leh thu awmzia a vaiin a hîp khâwm a, chuvângin reilotê chhûngin naupang chuan thiam thawkhat leh inzawm zat hialin thu a sawi thei a ni. Mahse puitling chu chutiang an ni ve lo. Ṭawng danga thu hlâwm tlêmtê hre nâl tûr pawhin dictionary kan keu fo a ni. Nimahsela, ṭawng thar hmannaah a âwmtâwk thiltawn kan neih hunah chuan ṭawng tharin thil kan ngaihtuah ṭan a, ṭawng chhuah pawh a lo awlsam zâwk ta a ni.
2 Hmangaihna lantîr dân zir hi ṭawng thar zir nên a inang hle a. Dik takin, he chung lam hlutna engemaw chen chu mihringte’n an rochun ve a ni. (Genesis 1:27. 1 Johana 4:8 khaikhin rawh.) Chutichung pawhin, Hmangaihna lantîr dân zir tûrin nasa taka beihna a ṭûl a ni—a bîk takin tûn lai pianpui hmangaihna a tlêm viau laiin. (2 Timothea 3:1-5) A chângin hei hi chhûngkuaah pawh a awm thei a ni. Ni e, tam takte chu hmangaihna thu lantîr ngai mang lohna hmun hrehawm takah an sei lian a ni. (Ephesi 4:29-31; 6:4) Chuti a nih chuan, chutiang dinhmun kan tawng khât viau a nih pawhin, engtin nge hmangaihna kan lantîr theih ang?
3 Bible-in a ṭanpui thei a ni. 1 Korinth 13:4-8-ah Paula chuan hmangaihna chungchâng chu hrilhfiahna narân mai ni lovin, he hmangaihna sâng ber thiltih dân sawifiahna chiang tak a pe a ni. Hêng Bible chângte ngaihtuahna hian chung lam hlutna nihna tak hrethiam tûrin min ṭanpui ang a, chu chu lantîr tûrin min thuam ṭha bawk ang. Hmangaihna kawng hrang hrang tirhkoh Paula hrilhfiah ṭhenkhatte hi ngaihtuah ila. A zau zawngin: kan nungchang tlângpui; tichuan, chipchiar zâwkin mi dangte nêna kan inlaichînna; tin, a tâwpah chuan kan chhelna, tiin, chi thumah kan ṭhen thei ang.
Hmangaihna Chuan Chapona Hneh Tûrin Min Ṭanpui
4. (a) Eng dinhmunah nge thîkthuchhiatna hi a âwm? (b) Eng ang thîkthuchhiatna hi nge mi tichhe thei tak a nih a, eng kawngtein nge?
4 Hmangaihna chungchâng bul ṭanna a sawi zawhah, Paula chuan Korinth mite hnênah: “Hmangaihnain a îtsîk lo va,” tiin, a ziak a ni. (1 Korinth 13:4) Dik takin, thîkthuchhiatna âwm dinhmun a awm a ni. Entîr nân, Paula chuan Korinth mite hnênah Pathian hnêna inpêk bîkna vawng ṭha tûra ṭanpui a châk nasatzia sawi nân ‘Pathian thîkna’ tih thu hlâwm khat a hmang a ni. (2 Korinth 11:2) Nimahsela, thîkna chu mi dangten chan ṭha emaw, hlawhtlinna emaw an neihin a lang thei bawk. Hetiang chi thîkna hi mi tichhe thei tak a ni—taksa lam, thinlung lam, leh thlarau lam thlengin.—Thufingte 14:30; Rom 13:13; Jakoba 3:14-16.
5. Theocratic chanvo pêkna ṭhenkhatah hmaih anga kan lanin engtin nge hmangaihna chuan thîkna hneh tûrin min ṭanpui ang?
5 Hemi chungchângah, nangmah leh nangmah heti hian inzâwt ang che: ‘Theocratic chanvo pêkna ṭhenkhatah hmaih anga ka lanin îtsîkna ka nei em?’ tiin. Chutiang i nih pawhin beidawng suh ang che. Bible ziaktu Jakoba chuan mihring ṭha famkim lo zawng zawng chhûngah “thîkna,” [“thîk duhna rilru,” NW] a awm tih min hriatnawntîr avângin. (Jakoba 4:5) I unaute hmangaihna chuan i rilru puthmang inbûktâwka siam ṭha tûrin a ṭanpui thei che a ni. Chu chuan lâwmte lâwmpui tûrin leh mi tu emawin malsâwmna emaw, lawmpuina emaw a dawnin, nangmah mimal taka hmuhsit vâng angin a ngaihtîr lo thei che a ni.—1 Samuela 18:7-9 khaikhin rawh.
6. Kum zabi pakhatnaa Korinth kohhranah eng dinhmun khirh tak nge lo insiam?
6 Paula chuan hmangaihna chu “a infak lo va, a uang lo va,” tiin, a sawi belh a. (1 Korinth 13:4) Thil thiam bîk engemaw, theihna emaw kan nei a nih pawhin chapo puina tûr chhan a awm lo. Chiang takin, hei hi hmân lai Korinth kohhrana lo lût, mi tum sâng ṭhenkhatte buaina a ni. Ngaih dân sawifiahnaah thiamna sâng zâwk an nei emaw, thiltihnaah hlawhtling zâwk emaw an ni mai thei. Anmahni lama ngaihsakna an lâkna chuan kohhran inṭhendarhna a thlentîr thei a ni. (1 Korinth 3:3, 4; 2 Korinth 12:20) Dinhmun chu a lo khirh hle a, Korinth khuaa mite chuan Paula’n dêu sawh taka “tirhkoh lian berte” tia a sawi, ‘mi âte chu lungawi takin an dawh’ avângin nasa taka a zilh a ngai hial a ni.—2 Korinth 11:5, 19, 20.
7, 8. Kan rochun thiamna eng pawh chu inpumkhatna awmtîr nâna kan hman dân tûr Bible aṭangin entîr rawh?
7 Chutiang dinhmun chu tûn laiah pawh a awm thei a ni. Entîr nân, mi ṭhenkhatte chuan rawngbâwlnaa an hlawhtlinna emaw, Pathian inawpna pâwla an chanvote emaw avângin infak duhna rillru an nei mai thei a ni. Kohhrana mi dangte tlâkchham thil engemawah thiamna bîk emaw, theihna bîk emaw kan nei a nih pawhin chu chuan min uantîr tûr em ni? Engpawh nise, thiamna kan rochun eng pawh chu inpumkhatna awmtîr nân kan hmang tûr a ni—mahni tân chauh ni lovin.—Matthaia 23:12; 1 Petera 5:6.
8 Paula chuan kohhranin mi tam tak nei mah se, ‘Pathianin taksa hi a remkhâwm a ni,’ tiin, a ziak. (1 Korinth 12:19-26) “Remkhâwm” tia lehlin Greek ṭawng chuan rawng chawhpawlh anga inmil taka inchawhpawlh tih a kâwk a ni. Chuvângin, kohhrana mi tumahin an theihnate chungchângah uan duhna rilru an nei tûr a ni lo va, mi dangte chunga thuneih an tum tûr a ni lo bawk. Chapona leh tumsânna chuan Pathian inawpna pâwlah hmun rêng a nei lo.—Thufingte 16:19; 1 Korinth 14:12; 1 Petera 5:2, 3.
9. Mahni ṭhatna tûr chauh zâwngtute tân Bible-in eng vaukhânna entîrna nge a pêk?
9 Hmangaihnain “mahni hma a sial lo.” (1 Korinth 13:5) Hmangaihna nei mi chuan a duhzâwng tihpuitlin nân mi dangte vervêk takin a thunun ngai lo. He thil chungchângah hian Bible-in vaukhânna entîrna a keng tel a ni. Entîr nân: Delili te, Jezebeli te, Athali te chungchâng kan chhiar a ni—mahni hmasial vânga mi dangte vervêk taka thununtu hmeichhiate chungchâng chu. (Rorêltute 16:16; 1 Lalte 21:25; 2 Chronicles 22:10-12) Lal Davida fapa Absaloma pawh chutiang mi a ni bawk. Tupawh rorêltîr tûra Jerusalem-a lo kal apiangte chu a lo panin, lal in chuan an harsatnate a ngaihven tak tak loh thute a rûkin a lo sawi thawi ṭhîn a ni. Tichuan, lal in mamawh tak chu amah anga mi khawngaih thei a nih thu tlang takin a sawi chhuak ṭhîn a ni! (2 Samuela 15:2-4) Dik takin, Absaloma chuan mi hnuaichhiahte a ngaihsak vâng a ni lo va, amah a inngaihsak vâng zâwk a ni. Lala insiamchawpin, mi tam takte rilru a hmin a ni. Mahse, nakinah Absaloma chu nasa taka tihtlâwm a ni a. A thihin thlân pângngaia phum tlâka ngaih pawh a ni lo.—2 Samuela 18:6-17.
10. Midangte ṭhatna tûr pawh kan ngaihtuah a ni tih engin nge kan lantîr theih ang?
10 Hei hi tûn lai Kristiante hnêna vaukhânna a ni. Mipa kan ni emaw, hmeichhia kan ni emaw pianpui mi rilru hneh theihna kan nei a ni mai thei. Kan duhzâwng tihpuitlin nân inbiakpawhna thunun tlat emaw, ngaih dân hrang neite hmin tûm tlat emaw chutianga tih kan awlsam a ni mai thei bawk. Nimahsela, mi hmangaih thei tak kan nih chuan, mi dangte ṭhatna tûr pawh kan en ve ang. (Philippi 2:2-4) Kan ngaih dân chauh thupui fûn anga ngaiin, Pathian inawpna pâwla dinhmun kan chelhte avângin, mi dangte chungah remchâng kan la lo vang a, rinhlehawm ngaih dânte kan awmtîr hek lo vang. Bible thufing: “Chapona chu boralna hmâah a kal a, rilru intivei chu tlûkna hmâah,” tih hi kan hre reng zâwk ang.—Thufingte 16:18.
Hmangaihna Chuan Inlaichînna Muanawm a Siam
11. (a) Ngilnei leh mawihnai tak hmangaihna chu engtin nge kan lantîr theih ang? (b) Fel lohnaah kan lâwm lo a ni tih engtin nge kan lantîr theih ang?
11 Paula chuan hmangaihnain “ngil a nei” a; tin, “a che mawi lo lo va” tiin, a ziak bawk a ni. (1 Korinth 13:4, 5) Hmangaihna chuan hawihhâwm lo, mawihnai lo tak, a nih loh leh zahpah lo taka kan chêt a remti lo vang. Chutih ahnêkin, mi dangte ngaih dân tûr pawh kan ngaihtuah tel ang. Entîr nân, hmangaihna nei mi chuan mi dangte chhia leh ṭha hriatna tibuai thei tûr thilte chu an pumpelh ang. (1 Korinth 8:13, khaikhin rawh.) Hmangaihna chu “fel lohnaah a lâwm lo va, thutak erawh chu a lâwmpui ṭhîn.” (1 Korinth 13:6) Jehova dân kan hmangaih chuan, Pathian huatzâwnga intihhlim hlauhawmna emaw, nungchang bawlhhlawh hlauhawmna emaw chu kan haider lo vang. (Sâm 119:97) Hmangaihna chuan mi tihniam thei thil aiin mi tichak thei thilah lâwmna hmu tûrin min ṭanpui ang.—Rom 15:2; 1 Korinth 10:23, 24; 14:26.
12, 13. (a) Mi tuemawin kan rilru a tihnatin engtin nge kan chhân lêt ang? (b) Ngaihhnathiam theih thinurna chuan âtthlâk takin min chêttîr thei a ni tih lantîr Bible entîrnate sawi chhawng rawh.
12 Paula chuan hmangaihna chu “a thinur duh lo va,” (“a tau lo” Phillips) tiin, a ziak a. (1 Korinth 13:5) Mi tuemawin kan rilru a tihnatin, chawhbuai emaw, thinrim mai emaw chu keini mihring ṭha famkim lote tân chuan thil tlânglâwn mai chauh anga pawm tûr a ni. Amaherawhchu, huatna thinlunga vawn reng mai emaw, thinrim reng mai emaw chu a dik lo vang. (Sâm 4:4; Ephesi 4:26) Thunun a nih loh chuan, ngaihhnathiam theih thinurnaah pawh âtthlâk takin min chêttîr thei a, Jehova chuan hemi atân mawh min phurhtîr thei a ni.—Genesis 34:1-31; 49:5-7; Numbers 12:3; 20:10-12; Sâm 106:32, 33.
13 Mi ṭhenkhatte chuan mi dangte ṭhat famkim lohna chu Kristian inkhâwma kal tûr emaw, thlawhhma rawngbâwlnaa tel tûr emawa an thu tlûkna chu an khawih pawitîr a ni. Tûn hmain hêng zînga tam takte chuan rinna atân beihna nasa tak an bei a, chhûngkaw dodâlna hnuaiah te, hnathawhpuite nuihzabûrna te, leh chutiang thil dangte an tuar a ni mai thei. Rinawmna fiahnaah an ngaih avângin chutiang harsatnate an tuar chhuak thei a ni, chu chu rinawmna fiahna a ni rêng a ni. Mahse Kristianpuiten hmangaihna nei lo takin an ṭawng emaw, thil engemaw an tihin eng nge lo thleng? Chu pawh chu rinawmna fiahna a ni lo vem ni? Dik takin, kan thinrim reng chuan ‘Diabola chu hmun kan kian’ a ni thei ang.—Ephesi 4:27.
14, 15. (a) “Sual lamah a ngaihtuah lo va” tih hi eng nge a awmzia? (b) Jehova ngaihdamna engtin nge kan entawn theih ang?
14 Chhan ṭha tak neiin Paula chuan, hmangaihna chuan “sual lamah a ngaihtuah lo va, [“chhiatna chhinchhiahna a nei lo,” NW]” tiin, a belh a. (1 Korinth 13:5) Hetah hian thil chhûtna thumal a hmang a, chiang takin, hei hian theihnghilh a nih lohna tûra chhinchhiahnabu-a bawhchhiatna ziak lûhna thiltih a kâwk a ni. Mi tina thei thiltih emaw, thu sawi emaw chu engemaw huna râwn leh atân rilrua chhinchhiahna nghet tak siam hi hmangaihna a ni em? Jehova chuan chutiangin nun rawng tak tihdân hmanga chipchiar taka min endik loh avângin kan va lâwm thei êm! (Sâm 130:30) Ni e, kan simin, kan bawhchhiatnate chu a thai bo a ni.—Tirhkohte 3:19.
15 Hemi chungchângah hian Jehova kan entawn thei a ni. Tuemawin min hmusit anga a lanin, kan la na hma lutuk tûr a ni lo. Kan thinrim hma lutuk chuan mi tinatu tihnat aia nasa zâwkin kan intina thei a ni. (Thuhriltu 7:9, 22) Chu ai chuan, hmangaihna chuan “engkim a ring” tih kan hriat reng a ṭûl a ni. (1 Korinth 13:7) Dik takin, tumahin bum awlsam tak nih chu kan duh lo va, kan unaute thinlunga veite chu ṭûl lo takin kan ringhlel tûr a ni lo. A theihna hmun apiangah, mi dangin ngaihtuahna ṭha lo a nei lo tûrah i ngai ang u.—Kolossa 3:13.
Hmangaihnain Tuar Chhuak Tûrin Min Ṭanpui
16. Eng ang dinhmunah nge hmangaihna chuan dawhthei tûrin min ṭanpui theih?
16 Tichuan, Paula chuan “hmangaihnain a dawhthei a,” tiin, min hrilh a ni. (1 Korinth 13:4) Chu chuan hun rei tak awh ni mai thei, dinhmun harsate pawh min tuartîr thei a ni. Entîr nân, Kristian tam takte chu kum engemaw zât sakhaw thila chhûngkaw inṭhen darhah an chêng a ni. An duhthlan ni lovin, “Lalpaa awm mi” kawppui tûr an hmuh loh avângin mi dangte chu nupui pasal nei lovin an awm a ni. (1 Korinth 7:39; 2 Korinth 6:14) Tin, hrisêlna lama harsatna nasa tak do an awm bawk. (Galatia 4:13, 14; Philippi 2:25-30) Dik takin, he kal hmang ṭha famkim lo takah hian, chhelna nihphung ṭhenkhat mamawh lo nun tuma’n an nei lo a ni.—Matthaia 10:22; Jakoba 1:12.
17. Engkim tuar chhuak tûrin engin nge min ṭanpui ang?
17 Paula’n hmangaihna chuan “engkim a tuar hrâm hrâm a, . . . engkim a beisei a, engkim a tuar chhuak ṭhîn,” tiin, min tiam a ni. (1 Korinth 13:7) Jehova hmangaihna chuan felna atân dinhmun engpawh min tuar theihtîr a ni. (Matthaia 16:24; 1 Korinth 10:13) Rinna avânga thihna kan zawng lo. A leh lamah chuan, kan tum ber chu thlamuang tak, rilru leh taksa hahdam taka nun hi a ni. (Rom 12:18; 1 Thessalonika 4:11, 12) Nimahsela, rinna fiahna a lo awmin, Kristian zirtîr nih man zînga mi a nih angin, hêngte hi lâwm takin kan tuar chhuak a ni. (Luka 14:28-33) Kan tuar chhuahin, dinhmun khirh tak kâra rahchhuah ṭha ber beiseiin, a ṭha lam beiseina vawng ṭhat kan tum a ni.
18. Hun hlimawmah pawh engtin nge chhelna a mamawh?
18 Hrehawm tawrhna hi chhelna mamawhna dinhmun awmchhun a ni lo. A châng chuan, tuar chhuak tih awmzia chu, dinhmun khirh a awm emaw, awm lo emaw kawng sial saa nghet taka kal chhunzawm zêl tihna a ni thei. Chhelna chuan thlarau lam hun duan ṭha vawn ṭhatna pawh a huam tel a ni. Entîr nân, i dinhmuna zirin, rawngbâwlnaah awmze nei taka telna i nei em? Pathian Thu chhiarna leh chhûtna neiin, leh ṭawngṭaina hmangin i Pa vâna mi nên inzawmna i nei em? Kristian inkhâwmnaahte i tel zat zatin, i rinpuite nêna intihchak tawnna aṭangin hlâwkna i nei em? Chutianga i ti a nih chuan, hun hlimawmah emaw hun khirhah emaw i awm a nih pawhin, i tuar chhuak tihna a ni. “Kan inthlahdah loh zawngin a hun takah chuan kan seng dâwn” avângin tlâwm suh ang che.—Galatia 6:9.
Hmangaihna—“Kawng Ṭha Lehzual”
19. Engtin nge hmangaihna hi “kawng ṭha lehzual” a nih?
19 Paula chuan chu chung lam hlutna chu “kawng ṭha lehzual” tia kovin hmangaihna lantîrna pawimawhzia a sawi uar a ni. (1 Korinth 12:31) Eng kawngin nge “ṭha lehzual” a nih? Awle, Paula chuan kum zabi pakhatnaa Kristiante zînga lâr tak thlarau thianghlim thil thlâwn pêkte chu a ziak lût zo chiah a ni. Ṭhenkhat chu thu a hrilh lâwktîr thei a, ṭhenkhat chu damlo a tihdamtîr thei a, mi tam takte chu ṭawng hrangin thu a sawitîr thei a ni. Thilthlâwnpêk mak tak chu a ni ngei mai! Chutichung pawhin, Paula chuan Korinth mite hnênah: “Mihring ṭawngte leh vântirhkoh ṭawngtein thu sawi mah ila, hmangaihna ka neih si loh chuan dâr, ri mai mai emaw, dâr benthek, ri mai mai emaw ka lo ni ang. Tin, thu hrilh theihna neiin, thurûk zawng zawng leh hriatna zawng zawng hre vek mah ila, tlâng sawn theihna khawp hial rinna famkim nei mah ila, hmangaihna ka neih si loh chuan engmah ka ni lo vang,” tiin, a hrilh a ni. (1 Korinth 13:1, 2) A ni, thiltih hlu tak ni tûrte pawh hi Pathian hmangaihna leh ṭhenawmte hmangaihna avânga tih a nih loh chuan “thiltih thi” a lo ni ṭhîn.—Hebrai 6:1, 2.
20. Engvângin nge hmangaihna chhawmnun nân beih chhunzawm zêl a ṭûl?
20 Isua’n chung lam hmangaihna hlutna kan chhawmnun chhan tûr dang min pe bawk a. “In inhmangaih chuan mi zawng zawngin ka zirtîrte in ni tih chu miah chuan an hria ang,” tiin, a sawi a ni. (Johana 13:35) He thumal “chuan” tih hian hmangaihna a lantîr dâwn nge dâwn lo tih mipa a ni emaw, hmeichhia a ni emaw Kristian tinte chungah a nghat a ni. Eng pawh ni se, ram danga chênna mai chuan an ṭawng zir tûrin min tilui chuang lo va. Kingdom Hall-a inkhâwmna leh unaute nêna inkawmna mai chuan hmangaihna lantîr dân min zirtîr nghâl mai lo bawk. He “ṭawng” zirna hi beih chhunzawm zêl a ṭûl a ni.
21, 22. (a) Paula sawiho hmangaihna kan tlin lo a nih chuan engtin nge kan chhân lêt ang? (b) Engti kawngin nge “hmangaihna hi engtikah mah a reh lo vang” a tih theih?
21 Paula sawiho hmangaihna ṭhenkhatah tlin loh châng i nei thei a. Mahse, lunghnual mai suh. Dawhthei takin inhmang zêl rawh. Mi dangte nêna in indâwrnaah Bible râwn chhunzawm zêlin, a thu bulte chu hmang zêl ang che. Jehova ngeiin kan tâna entîrna a siam chu theihnghilh ngai suh ang che. Paula chuan Ephesi khuaa mite chu: “Inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u,” tiin, a fuih a ni.—Ephesi 4:32.
22 A tâwp a tâwpah ṭawng thara thu sawi pawh a awlsam telh telh angin, a hun takah chuan hmangaihna lantîr pawh a awlsam telh telh a ni tih i hmu chhuak ang. Paula chuan “hmangaihna hi engtikah mah a reh lo vang,” tiin, min tiam a ni. (1 Korinth 13:8) Thlarau thianghlim thilthlawn pêk mak takte ang lovin, hmangaihna chu tihbo a ni ngai lo vang. Chuvângin, he chung lam hlutna lantîr tûrin zir chhunzawm zêl rawh. Chu chu, Paula sawi angin, “kawng ṭha lehzual” chu a ni.
I Hrilhfiah Thei Em?
◻ Hmangaihnain chapona hneh tûrin engtin nge min ṭanpui theih?
◻ Kohhrana remna awmtîr tûrin hmangaihnain eng kawngtein nge min ṭanpui theih?
◻ Engtin nge hmangaihna chuan tuar chhuak tûrin min ṭanpui theih?
◻ Engtin nge hmangaihna chu “kawng ṭha lehzual” a nih?
[Phêk 19-naa milem]
Hmangaihna chuan kan rinpuite tlin lohnate ngaithiam tûrin min ṭanpui ang
[Phêk 23-naa milem]
Chhelna awmzia chu theocratic hun duan vawn ṭhat hi a ni