ZAWHNA 5

School-ah Hnehchhiah Ka Nih Chuan Eng Nge Ka Tih Ang?

A PAWIMAWH CHHAN

I chhân lêt dân chuan boruak a tiṭha theiin, a tizual thei.

ENG NGE I TIH ANG?

He thilthleng hi han mitthla teh: Thomas-a chu vawiin aṭangin school a kal duh tawh tlat lo va. Buaina chu thla thum kaltaa a school kalpuite’n a chungchâng thu dik lo an theh darh aṭangin a inṭan a ni. Tichuan, hminglemte phuahsakin an ko nawmnah a. A châng chuan Thomas-a lehkhabu ken laite chu an rawn phihthlâksak a, chu chu tihpalh angin an lantîr a; a nih loh leh a hnung aṭangin an ṭhianza zînga mi pakhatin a rawn namsawk a, a hawi lêt chuan tu tih nge ni tih a hre thei lo a ni. Nimina social network aṭanga vauna a hmuh aṭangin, inhnehchhiahna chuan zual lam a pan ta . . .

Thomas-a ni ta la, engtin nge i chhân lêt ang?

INNGAIHTUAH CHIANG RAWH!

Tih theih nei lo i ni lo! A nihna takah chuan, hnehchhiah hmangte chu kuttum tel lovin i ngam thei a ni. Engtin nge?

CHHANG LET SUH. Bible chuan: “Mi â chuan a thinur thu zawng zawng a sawi chhuak a, mi fing erawh chuan an thup a, an ngawihpui ṭhîn.” tiin a sawi a ni. (Thufingte 29:11) A lo berah pawh chiai lo ang taka i lan theih chuan, hnehchhiah hmangte chuan an ngaihsak tawh lo vang che.
THUNGRUL SUH. Bible chuan: “Tu sual pawh sualin thungrûl suh u,” tiin a sawi a. (Rom 12:17) Phuba lâkna chuan dinhmun a tichhe zâwk mah ang.
BUAINAAH INTATLUT SUH. Bible chuan: “Mi hmanghria chuan thil ṭha lo chu a hmuhin a biru ṭhîn,” tiin a sawi a ni. (Thufingte 22:3) A theih phawt chuan buaina siam theite leh hnehchhiahna thlen theihna dinhmunte chu pumpelh ang che.
AN BEISEI LOH ANGA CHHAN TUM RAWH. Bible chuan: “Chhânna nêmin thinur a tikiang ṭhîn,” tiin a sawi. (Thufingte 15:1) Fiamthu thawh i tum thei a ni. Entîr nân, hnehchhiah hmang chuan i va thau ve lo ti ta se, i dâr tihchhîn deuh âk pahin, “Chhe tê chuan ka intihchêr theih ka ring!” i ti thei ang.
KALSAN RAWH. Kum 19 mi Nora-i chuan: “Ngawihna chuan min zar buaitute aiin i puitling zâwkin, i chak zâwk tih a târ lang. Hnehchhiah hmangte neih loh mizia, insum theihna i neihzia lantîrna a ni si a,” tiin a sawi.—2 Timothea 2:24.
MAHNI INRIN TAWKNA NEIH TUM RAWH. Hnehchhiah hmangte hian mahni inngaih hniamna avânga bei lêt duh lo tûrte chu an hre tlângpui ṭhîn a. Chu mi nêna inkalh takin, an thununin i awm lo tih an hriat chuan, hnehchhiah hmang tam tak chuan an kalsan mai ang che.
TUEMAW HNENAH HRILH RAWH. School zirtîrtu ni tawh ṭhîn pakhat chuan heti hian a sawi a: “Hnehchhiahna tâwkte chu sawi chhuak tûrin ka fuih ṭhîn. Hei hi tih tûr dik tak a ni a, hnehchhiahna tâwk lo tûrin mi dangte a vêng thei a ni.”

Mipa tleirâwl pakhat chuan mahni inrin tâwkna hmangin hnehchhiah hmangte a bei lêt — Mahni inrin tâwkna chuan hnehchhiah hmangte neih loh chakna a pe ang che

HEI HI I HRIA EM?

A ngial a ngana kut inthlâk bâkah, inhnehchhiahnaah chuan hêngte hi a tel thei:

Ṭawngkama inbeihna. “Min koh nawmnah dân leh an thusawite chu engtikah mah ka theihnghilh lo vang. Tlaktlai lo tak, mi duh loh, leh ṭhatna rêng nei lo nia inhriatna min neihtîr a. Mit duk khawpa sawisak nih ka thlang zâwk fê.”—Celine-i, 20.
Inkawm duh lohna. “Ka school kalpuite chuan min kâwm duh lo ṭan a. Chhûn chaw eina dawhkânah hmun âwl awm lo angin an siam a, an kiangah ka ṭhu ve thei lo. Kum khat chhûng chu keimah chauhvin mittui tla chungin ka ei ṭhîn.”—Haley-i, 18.
Social network aṭanga intihhming chhiatna. “Computer-a hawrawp tlêm tê hmangin mi hming i tichhe thei a—a nun pawh i tichhe hial thei a ni. Sawi uarna angin a lang mai thei; mahse, a thleng tak tak a ni!” —Daniel-a, 14.

**HNEHCHHIAHNA CHUNGCHANGA ZAWHNATE**
A DIK NGE DIK LO	CHHANNA
1 Hnehchhiahna hi kum sâng tam tak a lo awm tawh.	1 A Dik. Entîr nân, Bible chuan Hebrai ṭawnga Nephilim tia koh Milianho chungchâng a sawi a, chu mi awmzia chu “Mi Dangte Titlutu” tihna a ni.—Genesis 6:4.
2 Hnehchhiahna hi pawi sawi lo inchhaihna mai a ni. Thil pawi lutuk a ni lo.	2 Dik Lo. Hnehchhiahna chu ṭhalai tam takte mahni intihhlumna thlentu a ni.
3 Hnehchhiahna tihtâwp theih dân chu beih lêt ve hi a ni.	3 Dik Lo. Hnehchhiah hmangte chu a tlângpui thuin an chak zâwk thîn a, chuvâng chuan beih lêt tum chu a sâwt lo.
4 Inhnehchhiah lai i hmu a nih chuan, ngaihthah mai chu a ṭha ber a ni.	4 Dik Lo. He mi chungchângah hian, ngaihthah mai chu thiam chantîr theih a ni lo. Inhnehchhiah lai i hmuha engmah i sawi si loh chuan, buaina chingfeltu aiin buaina siamsaktu i ni zâwk thei a ni.
5 Mi hnehchhiah hmangte chu ṭawng chapo viau ṭhîn mah se, inrintâwkna nei lo an ni zâwk fo.	5 A Dik. Mi hnehchhiah hmang ṭhenkhat chuan mahni inrintâwkna nasa tak nei mah se, a tam zâwk chuan an nei lo va, nei anga an lan theih nân an ngam zâwngte an hnehchhiah ṭhîn a ni.
6 Mi hnehchhiah hmangte chu an inthlâk danglam thei.	6 A Dik. Ṭanpuina an dawn chuan, mi hnehchhiah hmangte chuan an ngaihtuahna leh an awm dân chu an thlâk thei a ni.