Kan Thu leh Hlate Hi Eng Anga Ziak leh Lehlin Nge A Nih?

“Hnam tinrêng te, chi tinrêng te, ṭawng tinrêng te, mi tinrêng te” hnêna “chanchin ṭha” theih tâwp chhuaha kan hrilh theih nân, ṭawng 750 vêlin thu leh hla kan tichhuak a. (Thu Puan 14:6) Engtin nge he hna hautak hi kan thawh theih? Khawvêl puma thu ziaktute leh ṭawng lettu inpe takte ṭanpuinain kan ti thei a—an zain Jehova Thuhretu vek an ni.

Thu leh hlate chu atîrah chuan Sapṭawnga buatsaih a ni. Governing Body chuan kan hmunpuia thu leh hla ziaktu Writing Department chu a enkawl a. He department hian kan hmunpui leh branch office danga awm thu ziaktute hna thawh tûr chu a enkawl a ni. Thu ziaktu mi chi hrang hrang kan neih avângin, hnam tin chi tinte nêna inkûngkaih thute kan ziah theih phah a, chu chuan kan thu leh hlate chu khawvêla mi zawng zawngte ngaihven a hlawhtîr a ni.

Sapṭawnga thu ziah chu ṭawng lettute hnêna thawn chhuah a ni. Thuziak chu endik leh pawm a nih hnuah, letling a, check a, proofread-tu tûr khawvêl puma ṭawng lettu pâwlte hnênah computer hmanga thawn chhuah a ni a. Anni chuan an ṭawng lehnaah Sâpṭawng awmzia phawk ṭha ber tûr ṭawngkam dikte chu hman an tum a ni.—Thuhriltu 12:10.

Computer chuan hna a tisâwt. Computer chuan thu ziaktu leh letlingtu mihringte chu a thlâk thei lo. Mahse, an hna chu computer chuan a tisâwt thei a ni. Jehova Thuhretute chuan computer program chi khat, Multilanguage Electronic Publishing System (MEPS) chu an siam chhuak a. Chu mi hmang chuan ṭawng chi hrang za tam takin thu a ziah theih a, thuziaka chuang tûr milemte nên a rem khâwm theih bâkah, lehkhabu anga chhut chhuah theih tûrin a siam theih a ni.

Engvângin nge mi sâng engemaw zât chauhvin an hman ṭawngte pawh tiamin, ṭawng lehlin lamah chuti taka ṭan kan lâk? A chhan chu Jehova’n “mi zawng zawng chhandama awmah leh thutak hriaah a duh” vâng a ni.—1 Timothea 2:3, 4.

• Engtin nge kan thu leh hla chhuahte hi ziah a nih?

• Engvângin nge kan thu leh hlate hi ṭawng chi hrang tam taka kan lehlin?