LUSUN TANA ṬANPUINA ṬHA BER

TUN HNAI MAI KHAN, THIHNAA HMANGAIH TAK CHAN AVANGA TAWRH HREHAWMZIA TAM TAK KAN HRE TAWH A. Mahse, a tîr lama kan târ lan tâk angin, mi thiamte thurâwn ṭha ber berte chu Bible-a kan hmuh hmân lai finna nên a inmil a ni. Bible kaihruainate chu tûn thlengin a la hman tlâk reng a. Chutah chuan thurâwn rin tlâk tak takte a chhuang a ni. Bible-ah chuan hmun dang khawiah mah kan hmuh loh, lusûnte tâna thlamuanna nasa tak thlen theitu chu kan hmu a ni.

• Kan hmangaih thi tate chuan hrehawm an tuar lo tih tiamkamna

  Bible-a Thuhriltu 9:5-na chuan, “Mitthi erawh chuan eng mah an hre lo va,” tiin a sawi a. “An ngaihtuahnate chu a bo nghâl a ni.” (Sâm 146:4) Chumi nêna inmil takin, Bible chuan thihna chu tui taka muhîl nên a khaikhin a ni.—Joh. 11:11.

• Hmangaihna Pathian chunga rinna nghet tak neihnain thlamuanna a thlen

  Bible chuan Sâm 34:15-naah: “LALPA [“Jehova,” NWT]a mit chuan mi felte lam a en ṭhîn a, a beng chuan an au hre tûrin a ngaithla reng ṭhîn,” tiin a sawi a. Pathian hnêna ṭawngṭaia kan rilru vei zâwngte sawi chhuah chu rilru hah tihdamna ṭha tak a ni a, a nih loh leh, kan ngaihtuahnate thunun theih dân kawng khat a ni. Chu chuan min thlamuan nâna a thiltihtheihna hmangtu min Siamtu nêna mi mal inlaichînna ṭha nei tûrin min ṭanpui thei a ni.

• Nakin hun ṭha zâwk beiseina

  Nakin huna he khawvêla nung tûrin thlâna awmte an rawn thawh leh hun tûr chu han mitthla teh! Bible chuan chu hun chu a sawi nawn fo va. Chutih huna khawvêl dinhmun awm dân tûr chungchângah Bible chuan Pathianin “an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang,” tiin a sawi a ni.—Thu Puan. 21:3, 4.

Bible-a târ lan Pathian Jehova ringtu tam tak chu an hmangaih thi ta te hmuh leh an beisei tlatna chuan an sûnna tawrh dân thiam tûrin nasa takin a ṭanpui a ni. Entîr nân, a pasal kum 65 mi chântu Ann-i chuan: “Bible chuan kan hmangaih thi tawhte chu hrehawm an tuar lo va, Pathian hriat rengnaa awm zawng zawngte chu an tho leh ang tih min tiam a. Ka chân tâkte ka ngaihtuah apiangin chumi chungchâng chu ka hre chhuak a, chuvângin ka thiltawn azawnga chhe ber pawh ka hneh thei ta!” tiin a sawi.

He thuziak inzawm hmasa lama kan sawi tâk Tiina-i chuan: “Timo-a thih nî khân, Pathian ṭanpuina dawngin ka inhria a. Ka mangan hun laiin Jehova’n min ṭanpui tih chiang takin ka hria a ni. Chu bâkah, thawhlehna chungchânga Bible thutiam chu ka ring nghet tlat a. Chu chuan Timo-a ka hmuh leh hun nî a thlen hma chu chak taka awm tûrin min ṭanpui a ni,” tiin a sawi.

Chûng thute chu Bible ring tlattu mi maktaduai tam takte thusawi dân nên a inang a. Bible sawi dânte chu tak tak a ni lo emaw, duhthusâm ram emawa i ngai a nih pawhin, Bible-in a pêk thurâwnte leh thutiamte chu a dik leh dik loh nangmah ngeiin finfiah la. Bible chu lusûn tâna ṭanpuitu ṭha ber a ni tih i hmu ngei ang.

MITTHITE TANA BEISEINA CHUNGCHANG ZIR BELH ZEL RAWH

Kan website jw.org-a video tihchhuahte chu en la

MITTHITE DINHMUN CHU ENG NGE NI?

Kan thih hian kan chungah eng thil nge thleng? Bible chhânna chiang tak chu a thlamuanthlâk hle

LIBRARY > VIDEO-TE tih hnuaiah lût ang che (Video Category: THE BIBLE)

CHANCHIN ṬHA HRIAT I DUH EM?

Nî tin hian chanchin ṭha lo tak tak kan hre ṭhîn a, khawiah nge chanchin ṭha kan hmuh theih?

BIBLE ZIRTIRNATE > THLAMUANNA LEH HLIMNA tih hnuaiah lût ang che