“Hnam Zawng Zawng Hriattîrna” Atâna Thu Leh Hla Pho Chhuahna Nawrlirhte

Kum tam tak chhûng chu thu leh hla pho chhuahna nawrlirh hi kan rawngbâwlna pêng pakhat a ni tawh a. He nawrlirh hi khawvêl puma mite hriat hlawh tak a ni. Nawrlirh chu hmuh a awlsam mai bâkah, hman pawh a awlsam hle a. Poland rama unaunu Asenata-i chuan: “Nawrlirh chu mâwlmang tak leh tûn lai taka duan a ni a; mahse, a felfaiin hmuh a nuam hle a. Hman leh nawr sawn pawh a awlsam hle,” tia a sawi chu i pawm ve ngei ang.

Chu nawrlirh duan leh siam a nih dân chu i ngaihtuah ngai em?

Ṭha Taka Duan A Ni

Kum 2001 khân, Governing Body chuan France rama kan unaute’n vântlâng hmuna thu hrilhna chu tih dân chi hrang hranga an tihchhin a rem ti a. Tih dân chi hrang hrangin an han ti chhin a. Entîr nân, khual zin bag nawr sawn theih leh thil leina nawrlirhte chu thu leh hla pho chhuah nân an hmang a. A hnuah, France branch chuan design pakhat chu a thlang a, chu chu thuchhuahtute’n kum tam tak chhûng an hmang ta a ni.

France rama unaute chuan vântlâng hmaa an thu hrilh hmasak ber ṭuma a rah chhuah chu an hlimpui hle a. Chuvângin, kum 2011-ah Governing Body chuan U.S.A. New York khawpuia mi veivâk tamna ber hmun pakhatah vântlâng hmaa thu leh hla pho chhuahna dawhkân leh nawrlirhte hman chu a remti ta a ni. Chu ruahmanna siama tel pioneer-te chuan nawrlirh chu awlsam taka nawrsawn theih a nih mai bâkah, a hlâwkna tam tak an hmu chhuak ta thuai a. Anni chuan nawrlirh design siam dân tûr chungchângah thurâwn ṭangkai tak tak an pe bawk a ni. An siam hmasak bera thinga siam nawrlirh chu a rih lutuk avângin, kailâwn sâng taka ken chu a harsa a. Chuvângin, chumi aia zâng zâwk chu an siam leh a; chu chu zâng hle mah se, thli a tleh pawhin a tlu lo a ni. Chu design siam thar chu a lian a, a kete pawh a nghet ṭha a, khawi hmunah pawh nawr a awlsam a ni. Chu bâkah, thu leh hla chhuahte dahna tûr bâwm pawh an dah tel bawk a ni.

Chu ruahmanna chu a hlawhtling hle! Chuvângin, kum 2012-ah Governing Body chuan khawvêl pumpuiah thu leh hla pho chhuahna nawrlirh chu hmang tûrin a remti ta a. Tichuan, zâng tak leh tlo taka hman theih nawrlirh tam tak siam tûrin company-te nên ruahmanna an siam ta a ni.

Kumte a liam zêl chuan, nawrlirhte chu tlêm azâwnga siam danglam a ni a. Entîr nân, ruah a sûr huna a hul theih nân kum 2015-ah a hma lam plastic fîm a khuhna awm siam a ni a. Georgia rama Unaunu Dina-i chuan, nawrlirh hmêlhmang thar a duhzia heti hian a sawi a ni. “Nawrhlirh hian thu leh hla chhuahte hliahkhuh nân ‘raincoat’ plastic fîm a nei a,” tiin. Kum 2017-ah thîr hîp thei (magnetic) poster-te chu ṭawng ṭhenkhata tihchhuah a ni a. Poland rama Unau Tomasz-a chuan: “Tûn hma chuan thil chârna nêna châr poster-te chu thlâk a harsa thei lutuk a. Chu thîr hîp thei poster siam chhuah a ni chu thil ṭha tak a ni,” tiin a sawi. Kum 2019-ah chûng nawrlirha hmanruate leh a siam dânte chu ṭha lehzual leh tlo lehzual ni tûra tihdanglam leh a ni.

Thu leh Hlate Pho Chhuahna Nawrlirhte Siam Chhuahna

Thu leh hla pho chhuahna nawrlirhte chu siam chhuaktu pakhat chauh hmanga siam a ni a, chûngte chu khawvêl pumpuia kohhran zawng zawngah an thawn chhuak a ni. Dik tak chuan, thawn man leh thil dang mante tel lovin, nawrlirh pakhat man hi U.S. $ 43 a ni a. Tûn thlengin nawrlirh man atân U.S. $ maktaduai 16 aia tam hman a ni tawh a, khawvêl puma kohhranahte 4,20,000 aia tam thawn chhuah tawh a ni.

Thawhlâwmte a ṭha thei ang bera hman a nih theih nân thu leh hla pho chhuahna nawrlirhte chu tam lehzuala siam belh zêl a ni a. Chu bâkah, tûnah chuan nawrlirhte siam ṭhat a ngai a nih chuan a thara thlâk aiin kohhran chuan thlâk ngaihna laia hman tûr bungruate chu an chah thei tawh a ni.

Thu Hrilhnaa Nawrlirh Hmanna

Khawvêl puma thuchhuahtute chuan thu leh hla pho chhuahna nawrlirh hman chu nuam an ti a. Ghana rama Unaunu Martin-i chuan: “A tlângpui thuin, rawngbâwlnaah chuan mite kan va pan ṭhîn a. Mahse, ṭha ka tih pakhat chu nawrlirh hmanga thu hrilhnaah chuan mite’n min rawn pan zâwk hi a ni a. Kawnga kalte hnênah pawh thu hrilhna kan nei thei a ni,” tiin a sawi.

Africa khawmuala ram dangah chuan pa pakhat hian nawrlirh chu rawn panin, an ṭawnga tichhuah thu leh hla chhuahte a la a. Chawlhkâr khat hnua a rawn kal leh chuan: “Lehkhabu zawng zawngte kha ka chhiar chhuak vek tawh. Thu pawimawh tak a ni. Kan khuaa ka chhûngte hnêna hrilh tûrin ka va haw ang,” tiin a sawi a, an khua chu kilometer 500 (mêl 311) hlaa awm a ni. Thla hnih hnua lo kal lehin, heti hian a sawi a ni: “Kan khuaa mite pawhin lehkhabu zawng zawng chu an chhiar vek a, a thu kha ṭha an ti khawp mai. Jehova Thuhretute nih an duh a. Mahse, zawhnate an nei a. Entîr nân, anni chuan baptisma chang tûr chuan tuia hnim pil ngai niin an hria a. Mahse, kan khaw bul hnaiah lui a awm loh avângin, baptisma chang tûra an rawn kal a ngai em?” tiin. Thuchhuahtute chuan a ṭawng hmanpui pioneer pakhat an hmêlhriattîr a. Chumi hnu aṭang chuan, an pahnihin Bible sawihona an nei ṭhîn a ni.

‘Hnam zawng zawng hriattîrna tûra khawvêl zawng zawnga’ thu hrilhnaa thu leh hla pho chhuahna nawrlirh hman a ni tih hriat chu a phûrawm hle! (Matthaia 24:14) A nih leh, engtin nge nawrlirh siam nâna sênsote chu phuhrûk a nih? Khawvêl pum huap thawhlâwmte chu hman a ni a, a tam zâwk chu donate.jw.org aṭanga kan dawn a ni. Phal taka in pêk thawhlâwmte avângin kan lâwm e.