Kum 2020 “Lâwm Fo Rawh U”! Regional Inkhâwmpui Thusawite Lehlinna

Kum 2020 July leh August thlaah a vawi khatna atân khawvêl puma unaute chuan regional inkhâwmpui thusawi thuhmun chu hun inangah an en a. Hetianga en thei tûr hian thusawite chu ṭawng 500 chuanga lehlin a ni a. A tlângpui thuin, hetiang ni thei tûr hian kum khat emaw, a aia tam emaw ruahman a ngai ṭhîn. Mahse, coronavirus hripui avângin ṭawnglettute chuan kum 2020 “Lâwm Fo Rawh U”! Regional Inkhâwmpui thusawite lehlin nân thla li chauh hun an nei a ni.

He hna lian tak hi thawk zo thei tûrin Jehova Thuhretute World Headquarters-a Translation Services leh Global Purchasing Department-te chu an ṭangrual a. Ṭawnglettute chuan he hna zo fel tûr hian microphone ṭha tak ang chi hmanruate an mawmawh tih Translation Services chuan a hria a. Global Purchasing Department chuan microphone 1,000 leiin, hmun 200 vêlah a thawn chhuak a ni.

Sênso a tlêm zâwk nân, microphone-te chu a hlâwma leiin, hmunpui pakhatah thawn hmasak a ni a, chuta ṭang chuan khawvêl hmun hrang hrangah thawn chhuah leh a ni. Chutianga a hlâwma lei a nih avângin a thawn man pawh tiamin, microphone pakhat-ah $170 U.S. vêl chauh a ni a, chu chu a mala lei aiin 100-a 20-in a tlâwm zâwk a ni.

Global Purchasing Department chuan hripui avânga sumdâwnna tam tak a inkhâr lai, kum 2020 April leh May thla chhûngin hêng hmanruate hi leiin a thawn chhuak a. May thla tâwp lamah chuan remote translation office te, branch office te, leh hmun danga ṭawngletlingtu a tam zâwkte chuan an mamawh hmanruate an dawng hman a ni.

Global Purchasing overseer Jay Swinney-a chuan: “He hna kan thawh chhûng hian Bethel department-te leh pâwn lama sumdâwng hrang hrangte inkârah thawhhona ṭha a awm a. Jehova thlarau vâng chauhvin kan unaute mamawh phuhru tûrin he hna hi rang tak leh sênso tlêm zâwkin kan thawk thei a ni,” tiin a sawi.

Translation Services-a thawk Nicholas Ahladis-a chuan, heti hian sawi: “Inkharkhipna hnuaia awm ṭawnglettute chu hêng hmanruate an dawn avângin nasa takin an chak phah a. Chutianga an team member-te nêna hmun khata an thawkho thei lo chung pawhin, thusawi te, lemchan te, leh hla te chu ṭawng 500 chuangin an letlingho thei a ni,” tiin.

He hna hi khawvêl puma unaute tâna kum 2020 “Lâwm Fo Rawh U”! Regional Inkhâwmpui tihchhuah nâna thawh hna tam tak zînga pakhat a ni a. Kan website-a donate.jw.org leh kawng danga phal taka in thawhlâwm thawhte avângin hêng thil ṭûlte hi kan nei thei a ni.