Videoconference Hmanga Kohhran Inkhâwmte

Khawvêla sawrkâr tam tak chuan inkalpawh lo tûrin leh mipui inhmuh khâwmnate nei lo tûrin thuchhuah a siam a. Jehova Thuhretute chuan hêng an thupêkte zawm leh him takin Pathian biakna neih zawm zêl chu an tul tlat a. Chutianga ti thei tûr chuan, kohhrante chuan Zoom ang chi videoconferencing app-te chu a hmang a ni.

Governing Body chuan kan inkhâwmte him taka kan neih zêl theih nân, kohhrante tâna Zoom account lei nâna thawhlâwmte hman chu a remti a. Hei hian $15-$20, a nih loh leh a aia man to zâwk videoconference liscense lei thei lo kohhran ṭhenkhat chu nasa takin a ṭanpui a ni. Hêng kohhrante hian free app-te an hmang ṭhîn a, chûng app-te chu mi tlêmte chauhvin an zawm theih mai bâkah, a him tâwk lo bawk a ni. Inawpna pâwl pêk chhuah Zoom accounts hmang kohhran zawng zawngte chuan him tak leh awlsam takin an hmang thei a, inkhâwm tinah mi tam takin an zawm thei a ni. Vâwiin thleng hian ram 170-a kohhran 65,000 chuangte chuan hêng account-te hi an hmang a ni.

Indonesia ram, North Sulawesi, Manado khawpuia awm Kairagi kohhran chuan free videoconferencing app chu hmang tawh lovin, inawpna pâwl pêk chhuah Zoom account an hmang ṭan a. Unau Hadi Santoso-a’n tihian a sawi: “Electronic hmanruate khawih thiam vak lo unaute pawhin inkhâwm nuam an ti tawh hle a, a chhan pui ber chu inkhâwm vawi khat neih chhûnga luh nawn leh ṭhin a ngaih tawh loh vâng a ni,” tiin.

Ecuador ram, Guayaquil khawpuia awm, Guayacanes Oeste kohhrana, kohhran upa Lester Jijón, Jr.-a chuan: “Kohhran ṭhenkhatah chuan sum leh pai dinhmun harsatna avângin unau tam takte tân kohhran puma tel theihna Zoom license lei chu thil theih a ni lo. Tûnah chuan, inawpna pâwl azârah, mi tam tak tel theihna Zoom account kan hmang thei tawh a, a tel thei zât bituk a pêl ang tih hlauhna nei lovin mi dangte chu inkhâwma tel tûrin zalên takin kan sâwm thei tawh a ni,” tiin a sawi.

Zambia ram Lusaka-a awm, Ngwerere North kohhrana upa Johnson Mwanza-a chuan heti hian a ziak a ni: “Unau tam takte chuan tihian an sawi nawn fo va, ‘Inawpna pâwl pêk chhuah Zoom ruahmanna chuan unaute min inhnaihtîr mai bâkah, Jehova hmangaihna leh ngaihsakna dawng nia inhriatna min neihtîr a ni,’tiin.”

Hêng inawpna pâwl pêk chhuah account-te hi leilung chhiatna tâwkte chhawmdâwlna atâna ruahman sum aṭanga lei a ni a. Chûng sum chu khawvêl puma rawngbâwlna chhawmdâwlna atâna phal taka pêk thawhlâwmte aṭanga lo kal a ni. Hêng thawhlâwm a tam zâwkte hi donate.jw.org hmanga thawh theih a ni a. Khawvêl puma chhawmdâwl hna dangte ṭanpui teltu, phal taka in pêk thawhlâwmte avângin kan lâwm e.—2 Korinth 8:14.