Jehova Thuhretute’n An Fate Chu Thuhretu Ni Ve Tûrin An Nawrlui Em?

Pathian biakna hi mi mal thu tlûkna siam tûr a nih avângin an nawrlui lo. (Rom 14:12) Jehova Thuhretute chuan an fate chu Bible thu bulte an zirtîr a; mahse, naupangte chuan an rawn ṭhan len hunah Jehova Thuhretu an nih dâwn leh dâwn lohvah mahniin thu tlûkna an siam tûr a ni.—Rom 12:2; Galatia 6:5.

Nu leh pa tam zâwkte ang bawkin, Jehova Thuhretute chuan an fate tâna ṭha ber tûr an duh a. An fate’n an hlawkpui tûra an ngaih, nungchang lama thu bulte leh sakhaw thurinte bâkah, thiamna ṭangkai takte chu an zirtîr a ni. Jehova Thuhretute chuan Bible hi nun kawng ṭha ber kawhhmuhtu a ni tih an ring a, chuvângin, chumi hlutna chu an fateah tuh an tum a. Chu chu Bible zirpuina leh Kristian inkhâwma telpuina hmangin an ti a ni. (Deuteronomy 6:6, 7) Chutiang chuan, naupangte’n an rawn ṭhan len hunah an nu leh pate rinna chhawm ve mai tûr an nih leh nih loh chungchângah thu tlûkna ṭha tak an siam thei ang.

Jehova Thuhretute’n nausên baptisma an chantîr em?

Chantîr lo. Bible-in nausên baptisma chantîr a pawmpui lo. Entîr nan, kum zabi khatnaa Kristiante khân baptisma an chan hmain thu an hriaa, ‘lâwm taka zâwmin’ an sim a ni tih a târ lang a. (Tirhkohte 2:14, 22, 38, 41) Chuvângin, baptisma chang tûrin mi chu Bible zirtîrnate hre thiam tûr te, ring tûr te, leh chûng zirtîrnate mila nung tûra thu tlûkna siam tûr tein a upa tâwk tûr a ni. Hêngte hi nausênin a ti thei lo.

Naupangte chuan an rawn ṭhan len hunah baptisma chan an thlang thei a. Mahse, chutianga ti tûr chuan an thutiam chu an hre thiam ngei tûr a ni.

Jehova Thuhretute’n an fa baptisma chang duh lote chu an hawisan em?

Hawisan lo. An fain an rinna a ṭâwmpui loh hian Thuhretu nu leh pate chuan pawi ti hle mah se, an fa chu an la hmangaih reng a, Thuhretu nih a duh loh vâng maiin amah nêna an inlaichînna an tichat lo.

Mipa naupangin tuia inhnimphûmin baptisma a chang. — Eng rual pawh ni se, mi tinin baptisma chan leh chan lohvah mahniin thu tlûkna an siam tûr a ni

Engvângin nge Jehova Thuhretute’n an thu hrilhnaah an fate an hruai ṭhin?

Kan thu hrilh rawngbâwlnaa kan fate kan hruai ṭhin chhan tam tak a awm.a

Bible-in nu leh pate chu an fate thlarau lam thilte zirtîr tûr leh Pathian be tûra zirtîr tûrin kaihhruaina a pe a. (Ephesi 6:4) Pathian biaknaah vântlâng hmaa rinna puanchhuah a tel avângin, thu hrilhna hi thlarau lama naupang zirtîrna pêng pawimawh tak a ni.—Rom 10:9, 10; Hebrai 13:15.
A bîk takin, Bible-in naupangte chu “LALPA hming chu fak” tûrin a fuih a. (Sâm 148:12, 13, Mizo King James Bible) Pathian fak theih dân kawng pawimawh tak chu mi dangte hnêna a chungchâng sawi hi a ni.b
Naupangte chuan an nu le pate ruala thu hrilh chu kawng ṭangkai takin an hlâwkpui a. Entîr nân, mi chi hrang hrangte biak dân an zir bâkah, mize hlu tak tak khawngaihna, ngilneihna, zahna, leh mi dangte ngaihsakna an neih phah bawk. Chu bâkah, an rinna innghahna Bible chângte an hre chiang lehzual a ni.

Kût nîte, a nih loh leh thil dang lawmnaah Jehova Thuhretute an tel ngai em?

Jehova Thuhretute chu sakhaw kût nî, a nih loh leh Pathian tilâwm lo kût ni dang lawmnaah an tel lo.c (2 Korinth 6:14-17; Ephesi 5:10) Entîr nân, Kristianna aṭanga chhuak ni lo, piancham leh Krismas lawmnaah kan tel lo a ni.

Amaherawh chu, chhûngkuaa hun hmanho leh kan fate hnêna phal taka thil pêk chu nuam kan ti hle. Chhûngkaw inhmuhkhâwm leh thilpêk inpêkna atân calendar-a ni chhinchhiah bîkah chauh ni lovin, kum tluanin inhmuh khâwm hun leh thil inpêkna hun kan siam zâwk a ni.

Nu leh pain an fanu leh fapa hnênah an beisei loh takin thilpêk an pe. — Kristian nu leh pate chuan an fate hnêna thilpêk nuam an ti

Jehova Thuhretu nia seiliante’n eng nge an sawi?

“Mite thurin leh min cheibâwl dân chu eng pawh ni se, thu hrilhna chuan mi dangte zah tûrin min zirtîr a. Chu bâkah, thu kan hrilh hian mite chuan an lungkhamna leh harsatnate min hrilh ṭhîn a. Chuta ṭang chuan, mahni chauh inngaihtuah aiin mi dangte rilru vei zâwng ngaihsak dân leh an mamawhte hmuh thiam dân ka zir a ni.”—Tara-i.d
“Ka nu leh pate’n Thuhretu ni tûrin min nawrlui lo. Duhthlan theihna ka neih thu min hrilh fo ṭhîn a. Thuhretute thurin chungchânga hriat duh ka neihte ka Nu ka zawh apiangin, ‘Hemi chungchâng hi zir bingna i nei tawh em?’ tiin min chhâng ṭhîn. Chuvângin, zir bingna ka nei nasa hle a, a tâwpah hei hi ka nu leh pate sakhua mai ni lovin, ka sakhua ngei a ni tih ka chiang ta a ni.”—Ellie-i.
“Kût nîte ka lawm loh avângin chân nei niin ka inhre ngai lo. Chawlhkâr tâwpahte hian Thuhretu dangte nên hun kan hmangho ziah a. Kan ei a, kan lâm a, games-te kan khêl ṭhîn. School-a ka ṭhiante chuan anni aia ṭhian ka kawm tam zâwk thu min hrilh fo.”—Melissa-i.
“Krismas kan lawm loh chhan hre thiam tho mah ila, a châng chuan chân nei niin ka inhria a. Chutiang ngaih dân do tûra min ṭanpuitu chu ka nu leh pate’n ka ṭhiante leh chhûngkhat lainate kan ina lêng tûra an sâwm ziah ṭhîn hi a ni. Thilpêk min pêk ṭhinte chu ka la hre reng.”—Miguel-a.

a A tlângpuii, Thuhretu naupangte chu an nu leh pate, a nih loh leh puitling anmahni kaihruaitu tel lovin thu hrilhnaah an tel ngai lo.

b An thurin mi dangte hnêna an sawi chhuah avânga Pathian tilâwmtu naupang tam tak Bible-in a târ lang.—2 Lalte 5:1-3; Matthaia 21:15, 16; Luka 2:42, 46, 47.

c “Engvângin Nge Jehova Thuhretute’n Kût Nî Ṭhenkhat An Lawm Loh?” tih thuziak chu en rawh

d Hming ṭhenkhat chu thlâk a ni.