Judate Suat An Nih Laiin Jehova Thuhretute Chungah Eng Nge Thleng?
Germany leh Nazi ram awp chhûnga chêng Jehova Thuhretu 35,000 te zînga 1,500 vêl chu Judate suatna thlen lai khân an thi a. An thih chhan zawng zawng chu hriat vek a ni lo va. Zir chianna kalpui mêk a la nih avângin, thi zât leh chanchin chipchiar zâwkte chu tih danglam a la ni thei.
Engtin nge an thih?
Nazi-ho hman lu tanna
Tihhlumna: Germany leh Nazi ram awp chhûnga awm Thuhretu 400 deuhthaw chu tihhlum an ni a. A tam zâwkte chu court-a an thubuai ngaihtuah a nih hnuah thi tûra an chungthu rêlsakin, an lu tansak an ni. Mi dangte chu court-a mumal taka thubuai ngaihtuahsak lohva kahhlum emaw, khaihlum emaw thung.
Lung in dinhmun hrehawm takte: Thuhretu 1,000 chuangte chu Nazi concentration camp leh lung inahte an thi a. Rim taka chhawrluih an nih vâng te, nghaisakna vâng te, rilṭâm vâng te, pâwn khaw vawta dah an nih vâng te, dam lohna vâng te, leh damdawi lama inenkawlna ṭhat loh vângtein an thi a. Mi dangte chu tihduhdahna nasa tak an tawrh avângin Khawvêl Indopui II-na tâwpa an zalên hnu lawkah an thi a ni.
Chhan dangte: Thuhretu ṭhenkhat chu boruak rim chhiaa inurhlumna pindana tihhlum an ni a, an damdawi siam enchhinnaa hman, a nih loh leh chîu hlumte an ni bawk.
Engvângin nge tihduhdah an nih?
Bible zirtîrnate an zawm avângin Jehova Thuhretute chu tihduhdah an ni a. Bible-in a khap thilte ti tûra Nazi sawrkârin a phût khân, Thuhretute chuan an ti duh lo va. “Mihring thu aia Pathian thu zâwm” an thlang a ni. (Tirhkohte 5:29) Chutianga tih an thlan chhan thil pahnih lo ngaihtuah ta ila.
Politics-ah an tualdâwih reng. Tûn laia ram hrang hranga Thuhretute ang bawkin, Nazi rorêlna hnuaia awm Thuhretute chu politics-ah an tualdâwih a. (Johana 18:36) Chuvângin, anni chuan
Sipaia ṭan an duh lo, a nih loh leh indona nêna inkûngkaihna nei eng hna mah an thawk duh lo.—Isaia 2:4; Matthaia 26:52.
Vote an thlâk lo va, Nazi pâwl an zâwm lo bawk.—Johana 17:16.
Nazi chhinchhiahna (swastika) chibai bûk emaw, “Heil Hitler!” tih sawi emaw chu an duh lo bawk.—Matthaia 23:10; 1 Korinth 10:14.
An rinna thiltihte. An rinna thiltihte khap behsak an ni chung pawhin Jehova Thuhretute chuan hêng thilte hi an tizawm zêl
Ṭawngṭai leh inkhâwm tûrin an inhmu khâwm.—Hebrai 10:24, 25.
Bible thuchah hrilin, Bible ṭanchhan thu leh hlate an tichhuak.—Matthaia 28:19, 20.
Judate pawh tiamin, an vêngte chungah khawngaihna an lantîr.—Marka 12:31.
An thurin an phatsan a ni tih nemnghettu lehkha-ah hming sign duh lovin an rinna an vuan nghet tlat.—Marka 12:30.
Professor Robert Gerwarth-a chuan Jehova Thuhretute chu “Nazi rorêlna hnuaia sakhaw thurin avânga tihduhdahna tuar awmchhun an ni,” tiin thutâwp a siam a ni.a Concentration-camp-a an tânpuite chuan Jehova Thuhretute chu an ding nghehna avângin an ngaisâng hle a. Austria mi, tâng pakhat chuan: “Indonaah an tel lo va. Mi dangte tihlumtu nih aiin tihhlum tuartu an ni zâwk,” tiin a sawi a ni.
Khawi hmunah nge an thih?
Concentration camp: Jehova Thuhretu a tam zâwkte chu concentration camp-ahte an thi a. Anni chu Auschwitz te, Buchenwald te, Dachau te, Flossenbürg te, Mauthausen te, Neuengamme te, Niederhagen te, Ravensbrück te, leh Sachsenhausen ang chî camp-ahte tântîr an ni a. Sachsenhausen-ah chauh pawh Jehova Thuhretu mi 200 vêl an thi tih finfiah a ni.
Tân in: Thuhretu ṭhenkhat chu tân inah thi khawp hiala sawisak an ni a. Mi dangte chu dâwp an nih laia an hliam tuar lovin an thi bawk a ni.
Tihhlumna hmun: Jehova Thuhretute chu Berlin-Plötzensee te, Brandenburg te, leh Halle/Saale tân inah tihhlum an ni tlângpui a. Chu bâkah, Thuhretute an tihhlumna hmun dang 70 pawh ziaka vawn ṭhat a ni.
Tihhlum mi ṭhenkhatte
Name: Helene Gotthold-i
Tihhlumna hmun: Plötzensee (Berlin)
Pasal pawm lai leh fa pahnih nei Helene-i chu vawi tam tak man a ni a. Kum 1937 khân an dâwp laia nasa taka kut an thlâk avângin a nau pai lai chu a chhiat a. Kum 1944 December ni 8 khân, Berlin-a Plötzensee tân inah a lu tansak a ni.
Name: Gerhard Liebold-a
Tihhlumna hmun: Brandenburg
Kum sawm hnih mi Gerhard-a chu a pâ lu an tansak aṭanga kum hnih hnu, kum 1943 May ni 6-ah a pa tânna Brandenburg tân inah tho a lu tansak ve a ni a. A chhûngte leh a nupui hual a thlahna lehkhaah chuan: “Lalpa thiltihtheihna tel lo chuan, he kawng hi ka zawh thei lo vang,” tiin a ziak a ni.
Name: Rudolf Auschner-a
Tihhlumna hmun: Halle/Saale
Rudolf-a chu kum 1944 September ni 22-a a lu tansak a nih chuan kum 17 mi chauh a la ni a. A nu a thlahna lehkhaah chuan: “Unau tam takte’n he kawng hi an zawh tawh a, keipawhin ka zawh ang,” tiin a ziak a ni.
a Hitler’s Hangman: The Life of Heydrich, phêk 105.