Engvângin Nge Jehova Thuhretute’n Puhna An Tawh Zawng Zawng An Chhân Lêt Vek Loh?
Jehova Thuhretute chuan puhna leh sawichhiatna zawng zawng chhâng lêt lo tûra Bible thurâwn pêk chu an zâwm a. Entîr nân, Bible thufing pakhat chuan: “Hmuhsit chîng zilhtu chuan tihtauh khumna a tâwk ṭhîn,” tiin a sawi a ni. (Thufingte 9:7, 8; 26:4) Puhna dik lote avânga ṭûl lo taka inhnialnaa inhnuh luh aiin Pathian tihlâwm kan tum tlat zâwk a ni.—Sâm 119:69.
“Ngawih hun a awm a, ṭawng hun a awm,” tih chu a dik ngei mai. (Thuhriltu 3:7) Rilru put hmang dik tak nei thutak zawnga ngaihventute chu kan chhâng lêt a, mahse ṭûl lo taka inhnial kan pumpelh a ni. Isua leh Kristian hmasate zirtîrnate leh entawn tûr siam chu kan zui a ni.
Isua chuan Pilata hmaa dik lo taka puh a nih khân a chhân lêt lo va. (Matthaia 27:11-14; 1 Petera 2:21-23) Chutiang zêlin, Isua chuan zu heh mi leh sa heh mi tia puhnate pawh a chhâng lêt lo bawk. Chu aiin, he thu bul: “Finna chu a thiltih aṭangin a dikzia a lang a ni,” tih nêna inmilin a thiltihin a chhâng lêt zâwk a ni. (Matthaia 11:19) Mahse, dinhmun azirin a ṭûl a nih chuan amah sawichhetute chu huaisen takin a chhâng let thung.—Matthaia 15:1-3; Marka 3:22-30.
Isua’n a hnungzuitute chu puhna dik lo avânga lunghnual lo tûrin a zirtîr a. Heti hian a sawi a ni: “Miin keimah avânga an hau che ua, an tihduhdah che ua, dâwta sual tinrênga an hêk hunah che u, in eng a la thâwl ang,” tiin. (Matthaia 5:11, 12) Mahse, Isua chuan chûng puhnate chuan a hnungzuitute tân thu hrilhna kawng a hawn hunah, ani chuan a thutiam: “In hmêlma zawng zawngin an dodâla an hnial theih lohna tûr kâ leh finna ka pe dâwn si che u a,” tih hi a hlen ang tih a sawi bawk.—Luka 21:12-15.
Tirhkoh Paula chuan Kristiante chu dodâltute nêna ṭûl lo taka inhnialna pumpelh tûrin a vaukhân a, chutianga inhnialna chu “thil sâwt lo leh eng mah lo” angin a târ lang a ni.—Tita 3:9; Rom 16:17, 18.
Tirhkoh Petera chuan Kristiante chu a theih hun apiangah an rinna humhim tûrin a fuih a. (1 Petera 3:15) Mahse, chu chu ṭawngkama sawi aiin thiltiha lantîr a ṭha ber ṭhîn tih a hria a ni. Ani chuan: “In thil ṭha tih avânga ṭawng ngaihna hre lova mi â-ho in ti ding reng mai hi,” tiin a ziak a ni.—1 Petera 2:12-15, Mizo King James Bible.