Khawvêl Pumah Jehova Thuhretu Eng Zât Nge Awm?

Engtin nge Jehova Thuhretu awm zât chu in chhiar?

Thla tina Pathian Ram chanchin ṭha tha tho taka hriltute chauh Jehova Thuhretute zînga chhiar tel a ni a. (Matthaia 24:14) Hetah hian Thuhretu baptisma chang tawhte leh baptisma la chang lo thu hrilh rawngbâwlnaa tel tûra tlingte an tel a ni.

Miin Thuhretute zînga chhiar tel a nih theih nân thawhlâwm a thawh a ngai em?

Ngai lo. Thuhretu anga chhiar ni tûr emaw, kan inawpna pâwla chanvo, a nih loh leh nihna eng emaw chelh tûrin mi chuan thawhlâwm a thawh kher a ngai lo. (Tirhkohte 8:18-20) A nihna takah chuan, thawhlâwm tam zâwkte chu a thawhtu hriat a ni lo. Thuhretu tinte chuan an duh thu leh an dinhmun azirin an hun, tha leh zung leh, thil neihte chu khawvêl puma kan rawngbâwlna atân an hmang a ni.—2 Korinth 9:7.

Engtin nge tha tho taka thu hrilhnaa tel zâtte chu in hriat?

Thuhretute chuan thla tina thu hrilhnaa an tel zât chu tualchhûnga an kohhranah an report a. Chu report chu mahni duhthuin an pe a ni.

Kohhran report-te chu lâk khâwm a nih hnuah, a belhkhâwm chu tualchhûng branch office-ah thawn a ni a. Branch chuan ram, a nih loh leh bial tin report belhkhâwmte chu kan world headquarters-ah a thawn leh a ni.

Rawngbâwl kuma tâwp apiangin, chumi kum chhûnga ram tina Thuhretu awm zât tam lai ber chu chhinchhiah a ni ṭhîn a. Hêng number zâtte belhkhâwm hi khawvêl puma Thuhretute awm zât a ni. Ram tin atâna report kimchang zâwkte chu kan website-a “Around the World” tih section hnuaiah pho chhuah a ni a. Chutiang report-te chuan Kristian hmasate a tihchak ang bawkin hêng report-te hian min tichak hle a ni.—Tirhkohte 2:41; 4:4; 15:3.

In inawpna pâwl rawn bêl, thu hrilhnaa tel ve lote chu in kohhranah in chhiar tel em?

Chûng mite chu Thuhretute zîngah chhiar tel lo mah ila, kan kohhranahte kan lo lâwm a. An zînga a tam zâwkte chu kum tina neih Krista thih Hriatrengnaah an tel ṭhîn a; chuvângin, Hriatrengnaa tel zât leh Thuhretute zât khaikhinna aṭangin chutiang mite tam lam chu a hriat theih a ni. Kum 2024 Hriatrengna inkhâwma tel zât chu mi 21,119,442 an ni.

Kan inkhâwma lo tel lo tam tak chuan in lama a thlâwna Bible zirpuina kan neih chu an hlâwkpui a. Kum 2024 khân, thla tin chawh rualin Bible zirpui 7,480,146 kan nei a, chûng zînga ṭhenkhat chu ṭum khata mi pakhat aia tam nêna zirna a ni.

Engvângin nge sawrkâr chhiarpuia Thuhretute zât târ lan chu in chhinchhiah zât aia a tam?

Sawrkâr chuan chhiarpui a neihnaah mi chu eng sakhaw vuan nge an ni tih zâwtin an chhânna ang chu an sakhaw vawnah a pawm mai ṭhîn a. Entîr nân, U.S. Chhiarpui Office chuan ngaih dân an lâk khâwmna chungchângah “an zawhna chhângtute’n an sakhaw vawn an sawi ang chu an pawmsak mai a ni,” tiin a sawi a, chuta a zât rawn chhuak chu “thu dik ni lovin, mi mal ngaih dân ṭanchhan a ni,” tiin a sawi belh bawk. Chumi nêna inkalh takin, keini chuan Thuhretua inchhâlte ni lovin, mi dangte hnêna thu hrila an thu hrilhna report petute chauh Jehova Thuhretute angin kan chhiar thung a ni.