Anna Chu A Ṭha Lo Tak Tak Em?

Zawhna

• Mi dangte âng i hriat hian engtin nge i awm?

  • An âng tih pawh ka hre lo, ka tân chuan thil pângngai tak a ni.

  • Engtin emaw takin min tibuai; mahse, ka pawm thiam mai.

  • Ka thin a rim, ka ngai thei thlâwt lo.

• Eng anga zingin nge i ân ṭhin?

  • Vawi khat mah

  • A khât tâwkin

  • Vawi tam tak

• I ngaih dânin ṭawngkam bawlhhlawh hman hi eng ang takin nge a pawi?

  • Thil ho lam

  • Thil pawi tak

A pawimawh chhan

Anna hi thil pawi tak angin i thlîr em? ‘Thlîr lêm lo,’ tiin i sawi mai thei. ‘A nihna takah chuan, khawvêlah hian hei aia pawi zâwk a tam lutuk. Bâkah, mi tin an âng ṭhîn alâwm!’ Chu chu a dik tak tak em?

I ring emaw, ring lo emaw ṭawngkam ṭha lo hmang duh lo tam tak an awm. Anni chuan mi dangte hriat loh thil ṭhenkhat an hria a ni. Entîr nân:

• Anna hian i nihna a târ lang. I thusawi chuan i chhûngrila awm a târ lang a. Chu bâkah, ṭawngkam bawlhhlawh hmanna chuan mi dangte rilru i ngaihtuah lohzia a târ lang thei a ni. Chutiang mi chu i ni tak zet em?

  Bible sawi dân: “Kâa chhuakte erawh chu thinlung aṭanga lo chhuak a ni.”—Matthaia 15:18.

  

• An i chîng a nih chuan mi dangte’n ṭha lo takin an thlîr thei che. Cuss Control lehkhabu chuan: “Kan thusawi dân chuan kan ṭhian tûr te, kan chhûngte leh hnathawhpuite hnên aṭanga zahna kan dawn zât tûr te, kan inlaichînna ṭhat zâwng te, mi dangte chunga nghawng kan neih dân tûr te, hna hmuh, a nih loh leh kaisântîr kan nih dâwn leh dâwn lohte bâkah, hmêl hriat lohte min ngaih dân tûrte pawh a hril thei a ni,” tiin a sawi. Heti hian a sawi bawk: “An i chîn loh hian , mi dangte nêna in inlaichînna a ṭhat phah em, tiin inzâwt rawh,” tiin.

  Bible sawi dân: “Sawichhiatna . . . bânsanin awm rawh se.”—Ephesi 4:31.

• An i chînna chuan i inngaih ang a nihtîr lo vang che. How Rude! tih a lehkhabu-ah Dr. Alex Packer-a chuan: “An chîngte bula awm hi thil hrehawm tak a ni,” tiin a sawi a. Ṭawngkam mawi lovah chuan “suangtuah thiamna, hriatna, finna, leh khawngaihna ṭawngkamte’n hmun a chang lo va. Thatchhe tak, chiang lo leh suangtuahna nei lova thusawi ṭhîn i nih chuan i ngaihtuahnain chu chu a rawn zui ngei ngei ang,” tiin a sawi belh a ni.

  Bible sawi dân: “Thu ṭha lo rêng in kâan chhuak suh se.”—Ephesi 4:29.

I tih theih chu

• Thiltum insiam rawh. Engvângin nge ṭawngkam ṭha lo chu thla khat, a nih loh leh a aia tlêm hmang lova awm chhin i tum loh vang? I hmasâwnna chu chart-ah emaw, calendar-ah emaw i chhinchhiah thei a. Mahse, i thiltum hlen thei tûr chuan rahbi dangte pawh i rah a ngai thei bawk. Entîr nân:

• Ṭawngkam ṭha lova i ngaihtuahna tikhattu intihhlimna pumpelh rawh. Bible chuan: “Ṭhian sualte chuan nungchang ṭha an tikhawlo ṭhîn,” tiin a sawi a. (1 Korinth 15:33) “Ṭhian” tihah hian kan mihringpuite mai ni lovin—kan film en te, kan video games khelh te, leh kan rimawi ngaihthlâkte ang chî—intihhlimnate a tel a ni. Kum 17 mi Kenneth-a chuan: “Kan hla duh zâwngte lo sakpui ve hi a nuam a, a beat mawi kan tih avângin ânna ṭawngkam telte ngaihthah chu awlsam tak a ni,” tiin a sawi.

• Mi puitling tak i ni tih târ lang rawh. Mi ṭhenkhat chuan mi puitling anga lantîrtu nia an hriat avângin ṭawngkam bawlhhlawh an hmang a. A nihna takah chuan, chumi kalh chiah zâwk chu a ni. Mi puitlingte chuan “chhia leh ṭha fiah tûrin an hriat theihnate chu an sawizawi tawh,” tiin Bible-in a sawi a. (Hebrai 5:14) Anni chuan mi dangte “ngaihven hlawh” an duh vâng maiin an tehnate an tihniam lo.

A nihna takah chuan, ṭawngkam ṭha lo hian keimahni leh mi dangte rilru chu thil ṭha lovin a khahtîr a. Chutiang mite chu khawvêlah hian tam tak an awm tawh a! “Pun belhtîr suh,” tiin Cuss Control tih lehkhabu chuan a sawi. “Ṭawngkam thianghlim hmang tûrin theih tâwp chhuah rawh. Chu chuan mi ṭha zâwk nia inngaihna a neihtîr che ang a, mi dangte pawhin chutiang chuan an ngai ve ang che.”