Jehova Thuhretute Chuan An Thurinte Nêna Inmil Tûrin Bible An Thlâk Em?
Thlâk lo. Chumi nêna inkalh takin, Bible nên a inmil lo tih kan hmuh chhuah chuan kan thurinte chu kan thlâk zâwk a ni.
Kum 1950-a New World Translation of the Holy Scriptures kan tihchhuah ṭan hma aṭang daih tawhin Bible hi kan bih chiang tawh a. Bible lehlin kan hmun theih apiang chu kan hmang a, chûngte mil chuan kan thurin chu kan siam a ni. Jehova Thuhretute’n hun rei tak chhûng an rin tawh an thurin ṭhenkhat hi ngaihtuah ta ila, Bible zirtîrna dik tak nên a inmil leh mil loh nangmah ngeiin rêl thlu ang che.
Kan thurin: Pathian chu Trinity a ni lo. Kum 1882 July thla chhuak Zion’s Watch Tower chuan: “Kan thu chhiartute chuan Jehova, Isua, leh Thlarau thianghlim te kan ring tih an hriat rualin, hêngte hi mi pakhata Pathian pathum awm, a nih loh leh Pathian pakhata mi nung pathum awm anga Bible thu nêna inmil lo zirtîrna chu kan hnâwl ṭhak tih an hre bawk,” tiin a sawi.
Bible sawi dân: “Jehova kan Pathian chu Jehova pakhat chauh a ni.” (Deuteronomy 6:4, The Holy Bible, by Robert Young) “Pathian pakhat chauh (Pa chu) a awm a, ama hnên aṭangin engkim a chhuak a, keini pawh ama tâna awm kan ni; Lalpa pakhat chauh (Isua Krista chu) a awm bawk a, amah avângin engkim a awm a, keini pawh amah avâng bawka awm kan ni.” (1 Korinth 8:6) Isua ngei pawhin: “Pa chu keimah aiin a ropui zâwk,” tiin a sawi a ni.—Johana 14:28.
Kan thurin: Hremhmun meidîla chatuana inhremna a awm lo. King James Version Bible-a Rom 6:23 thu la chhuakin, Zion’s Watch Tower chuan kum 1882 June thla chhuakah “Sual Man Chu Thihna,” tih thuziak a tichhuak a, chutah chuan heti hian a târ lang a ni: “Hei hi thu tluangtlam leh fiah tak a ni a. Mahse, Bible hi Pathian Thu a ni tih pawmtu mi tam takte’n he thu tluangtlam tak an hnâwl leh hemi kalh chiah sual man chu hremhmun meidîla chatuana hremna a ni tih hi Bible zirtîrna anga an ring nghet tlat hi a va mak tak êm!” tiin.
Bible Sawi Dân: “Thil sual titu chu a thi tûr a ni.” (Ezekiela 18:4, 20, Mizo King James) Pathian dodâltute hremna hnuhnûng ber chu hremhmuna chatuana nghaisakna ni lovin, “chatuana boralna” a ni zâwk.—2 Thessalonika 1:9.
Kan thurin: Pathian Ram chu thinlunga awm ni lovin, sawrkâr tak tak a ni. Pathian Ram chungchângah kum 1881 December thla chhuak Zion’s Watch Tower chuan: “He lalram dinnaah hian leia lalram zawng zawngte tihboral a tel ang,” tiin a sawi.
Bible sawi dân: “Tin, chûng lalte nîah chuan vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang.”—Daniela 2:44.
Jehova Thuhretute thurin chu New World Translation-ah chauh a innghat em?
Nghat lo, kan thu hrilh rawngbâwlnaah hian Bible lehlin hrang hrang kan hmang zawm zêl a. A nihna takah chuan, a thlâwna kan Bible zirtîrna program-ah hian New World Translation hi a thlâwnin pe mah ila, ṭawng lehlin dang hmang duhtute pawh hlim takin kan zirpui a ni.