Kum 50 Chhûngin Ramsa 100 Zêla 73-in A Kiam—Bible-in Eng Nge A Sawi?

Kum 2024, October 9 khân, World Wildlife Fund chuan mihringte thiltihin ramsate chunga nghawng ṭha lo a neih dân chungchâng report lungchhiatthlâk tak a chhuah a. “Kum 50 liam ta chhûngin (1970-2020), ramsate chu 100 zêla 73 vêlin a kiam,” tia a târ lan hnuah, heti hian a vaukhân a: “Kum nga lo awm leh tûr chhûnga thilthlengte chuan he Leia nakin nun awm dân tûr chu a hril ang,” tiin.

Chutiang chanchinte avânga mi tam tak mak tia an awm chu hriatthiamawm tak a ni. Kan leilung mawi tak hi kan duh tak zetin, a chhûnga chêng ramsate’n hrehawm an tuar kan duh lo hle. Chutianga kan awm chhan chu Pathianin ramsate enkawl tûra min duh vâng a ni.—Genesis 1:27, 28; Thufingte 12:10.

Heti hian kan ngaihtuah mai thei, ‘Ramsate hi kan hum thei ang em? Bible-in eng nge a sawi?’ tiin.

Nakin hun atâna beiseina

Theih tâwp kan chhuah chung pawhin, ramsate hmakhua chu keimahniah ni lovin, Pathian chungah a innghat a ni. Bible-a Thu Puan 11:18 chuan Pathianin ‘lei tichhetute a tihchhiat ve thung hun’ chu a lo thleng ang tih a sawi a. Chu Bible châng chuan thil pahnih min zirtîr a ni:

1. 1. Pathianin he lei tichhetute chu a tiboral vek ang.

2. 2. Pathianin hma a la thuai ang. Engtin nge kan hriat theih? Tûn hma zawng aiin, tûn laiah mite’n leia ramsate an ti mang ang tih dinhmun hlauhthâwnawm tak kan hmachhawn a ni.

Pathianin chu buaina chingfel tûrin eng nge a tih ang? A vân lam sawrkâr, a nih loh leh Lalram hmangin lei pum pui hi a awp ang. (Matthaia 6:10) Chu sawrkâr chuan thuawih mihringte chu leia ramsate ngaihsak tûr leh humhim tûra an mamawh finna leh zirtîrna a pe ang.—Isaia 11:9.